Caín (Valdión) - Cares - Puente Vieya - Pandu - Inabio - Raíz - Ría - Cuesta Duja - Tranvia

10 de Setiembre de 2026 

Track: Caín (Valdión) - Cares - Vieya - Quintana - Inabio - Raíz - Ría - Cuesta Duja - Tranvia

Otru día más na contorna de Caín navegando pelos requexos colgaos del Cares y si'l día anterior anduviéremos pela fastera del Cornión, poles canales de la Raya y Culiembru, esta vegada teníemos l'envís de tornar a visitar pasos de los Urrieles, poro nun mos quedaba otra que patear una vegada más la sienda'l Cares, lo que ya entamaba a dar una pereza estrema.

Güei perdíemos a Carlos, que llevantárase malín del estómagu y prefirió quedar por Caín de tranqui, asina que saldremos a patear Sara, Mario y yo, caleyando una vegada más Cares alantre, alcontrándonos un día más, con muncha xente foriata y ye qu'alloriamos cola cantidá de senderistes que fae'l Cares y sobretou d'europeos durante díes pente selmana. 

Salimos de Caín (460 m) otru día más

Nós vamos a lo nueso, cruciándonos colos primeros qu'intenten aportar a Caín, parando dacuando a echar dalguna güeyada a canales que queremos descubrir o antiguos tramos del camín d'antaño del Cares que pasaba pela parte del Cornión, menos conocíu que'l de la fastera los Urrieles, que ficimos completu delles vegaes y que pude enllazar el tramu que me faltaba nos primeros díes per Caín d'esti añu, col pasu a Cámara pel Puntedo dende Casielles.

Caín (Valdión) - Santibaña - Caín de Riba - Yerbas Altas - Bersolina - Trea

8 de Setiembre de 2026 

Track: Caín (Valdión) - Santibaña - Caín de Riba - Yerbas Altas - Bersolina - Trea

Continuamos per Caín dando pateínos y conociendo nuevos llugares, pero tamos siempre cola meteo repunando y faciéndonos tomar decisiones pa cambeu de planes, poro viendo que tenemos tormentes de tarde decidimos salir al plan anicial y dir viendo sobre la marcha hasta onde podríemos llegar, ampliando una posible escapatoria con un paseín hasta la Cueva Santibaña. 

Una vegada más en Caín (460 m) entamamos ruta

D'esti xeitu y con dalgo de borrín, salimos de Caín, faciendo casu a los paisanos del pueblu, pa conocer la cueva del Quesu o de Santibaña, que tanto nos recomendaren estos díes ya que según ellos dexáranla mui guapa, anque a posteriori enterámonos que nun fueren nin vela entá, jaja. El casu ye qu'entamamos a caleyar per Caín atopando perbien marcáu tol percorriu hasta Santibaña y ye que'l parque de Picos ta poniendose les piles, pa marcar dellos percorríos y que nun ande tol mundiu pelos mesmos llugares.

Caín (Valdión) - Cantu Mabro - Casielles - Puntedo - Cámara - Trescámara - La Tránvia - Cares

4 de Setiembre de 2026 

Track: Caín (Valdión) - Cantu Mabro - Casielles - Puntedo -Cámara - Trescámara - La Tránvia - Cares

Tornamos a Picos d'Europa dempués de la Travesera 2025 - 2026 col envís de conocer dalgunos llugares y pasos que me queden na contorna de Caín. Siendo sinceros, cada día cuéstame más alcontrar rutes motivantes y ye que ya son munchos años de pateos y personalmente Picos, ye dalgo que trabayé muncho, coles traveseres y dalgunos díes d'especiales.

Sicasí, dempués de dar munches vueltes y preparar munchos tracks, con milenta posibilidaes, tiramos el vienres a Caín cola idega de tar una selmana patiando, nun día de munchu calor, asina que dexamos pa prau cualesquier monte del cordal y decidimos dar un paséin aéreu pel Cares, pa que los collacios vayan metiéndose en farina.

Partimos dende Caín (460 m)

La idega ye estirar les pates dempués del viaxe y cansar un pocu, ya qu'enriba tenemos les fiestes de Caín y suponemos que la música nun mos va dexar descansar pa la ruta del sábadu, que presentábase potente. Nel intre, preparámonos y salimos caleyando per Caín, pasaes les 4 y media la tarde, pegando entá la solana con fuercia, averándonos hasta la Jarda, onde garraremos el senderu del sedu Mabro.

La calufa ye terrible y sudamos enforma, pero tenemos la esperanza de garrar solombra un pelín más alantre cuando empocemos na garganta, asína que tiramos alantre pel senderu, garrando nos Lleraos el desvíu hacia'l Cantu Mabro, que ya percorriera la primer vegada que conocí Dobresengos nun error que fízonos superar más desnivel del deseyáu, por nun tomar bien el Sedu Mabro. 

H.ermosu (Valdión) - Hoyu Oscuru - San Luis - Cueturredondu - Igüedri - H.uentedé (Llébana)

15 de Xunetu de 2026 

Track: H.ermosu (Valdión) - Hoyu Oscuru - San Luis - Cueturredondu - Igüedri - H.uentedé (Llébana)

Últimu día de la Travesera 2025 - 2026, alboreciendo nel colláu H.ermosu al que llegáramos faciendo una travesía increyible pela Collada Blanca y la Torre La Palanca, volviendo a tener dellos problemes estomacales por mor de la superespeciada cena, pero a cambiu, tuviéramos a gustu viendo una proyeición del leopardu de les ñeves, abrigadinos nel esterior.

Preparámonos con calma, revisando un pocu tol refuxu, porque'l día anterior dalgún espabiláu, robóme los bastones y asina tamos, cola mochila puesta y ensin bastones pa facer casi'l mayor descensu de tola Travesera, teniéndonos que devolve a H.uentedé onde tenemos los coches.

Partimos de los 2065 m del Colláu H.ermosu

Salimos los supervivientes d'esti añu cola vista puesta nas Colladinas, clásica salida de H.ermosu, anque tol tiempu los güeyos se nos van al guapu más de ñubes que tenemos nel valle de Valdión, destacando como non, el macizu del Cornión cola so másima espresión la Torresanta llionesa y la Torre'l Frieru enfrente nueso, que tamién pide protagonismu.

Brez (Llébana) - Lechugales - Montestigu - Mermeja - Prau Contés - Cámara - Somajía

13 de Xunetu de 2026 

Track: Brez (Llébana) - Lechugales - Montestigu - Mermeja - Prau Contés - Cámara - Somajía

Siguimos de Travesera Picos 2025-2026 pela Llébana, llueu d'un día percalurosu onde ficiéramos la Peña Ventosa y pasáremos la tarde entre piscina y picoteos de pipes, mierdes varies y birres hasta dir pa la cama a descansar, pasando ya una nueche reguleres na furgo pol calor, que nun me dexó durmir tolo necesario.

Llevantéme con revoltura estomacal y almorcé lo que'l cuerpu fue a soportar yendo delles vegaes al bañu, pintando la cosa regular pa lo que teníemos per delantre y ye que tocaba una ruta propuesta por mí pal calendariu y nun yera otra que conocer esti "Terrenu Pucavi" nes canales menos conocíes del macizu Oriental.

Partimos de Brez (745 m) con un día maraviyosu

La ruta a la Morra Lechugales peles canales de Lechugales y Arredondas, ficiera estragos nos pies de dellos compañeros, quedándonos ensin la compaña de Carlos y Mario, que prefirieron regulase pa continuar los siguientes dos díes de Travesera, asina que quedamos namás que Rubén, Montse y lo que queda de mi cuerpu p'atacar la ruta más potente, aventurera y espuesta d'estos díes per Picos.

Gracies a una xarazada descomunal del día anterior, la previsión yera d'un día muncho más fresquín, asina que nun madrugamos tanto y a les 8 tábemos preparaos pa entamar a caleyar, teniendo que facer el mesmu camín hasta la canal de Lechugales del sábadu, asina que pocu tenemos más que cuntar del nuesu pasu per Rojes y Sandoblo, teniendo nesti día, la total visión de tol macizu, poro diremos intentando aldovinar per onde van llevanos los nuesos pasos pente'l murallón calizu.

Brez (Llébana) - Canal de Lechugales - Morra - Silla Caballu - Canal Las Arredondas

11 de Xunetu de 2026 

Track: Brez (Llébana) - Canal de Lechuglales - Morra - Silla Caballu - Canal d'Arredondas

Dempués del primer día de ruta pela tarde al Picu Jano, venía ún de los platos fuertes d'esta Travesera Picos 2025 - 2026 como yera l'ascensión a la cota más alta del macizu Oriental, pero claro, nel GM Xuan de la Borrina, nun díbemos facelo cenciellu dende'l H.itu d'Escarandi, sinon que queríemos conocer la Canal de Lechugales y baxar pela d'Arrendondas, canal a la que-y tenía munches ganes.

Les previsiones yeren de munchu calor, asina que les alarmes na casa rural y nes furgos, sonó a les 6 de la mañana, ya que teníemos la intención d'entamar a caleyar a les 7. Asina que con un apixote perimportante, vamos preparándonos los almuerzos, la mochila y la xinta, intentando despertar a base de cafés infernales, que yeren de salir corriendo al bañu ún tres d'otru.

Partimos bien ceo del pueblu llebaniegu de Brez (760 m) 

Con too preparáu y una mañana fresquina pel momentu, tamos a les 7 la mañana preparaos pa caleyar y facémoslo saliendo, cola mochila enllena de xinta y agua (unos 4 litros por tiesta), asina que con esi pesu, entamamos a caleyar peles cais de Brez hacia la parte alta del pueblu onde vamos garrar la pista formigonada que llévanos hacia los ivernales de Rojes.

Continuamos pela pista, baxo la borrina mañanera hsta los praos de Sandoblo, onde salímonos de la pista y garramos el senderu baxo la canal del Ranchón, continuando con un cómodu ascensu hacia la entrada de la canal de Lechugales, perdiéndonos el senderu superior pelín tomáu, teniendo qu'aportar a la parte baxa de la riega de Piedras Negras, ya con tola canal enfrente de los nuesos güeyos, llueu d'hora y media dende Brez.

El Condao (Llaviana) - La Repunta - El Cotón - Mediodía - La Triguera - Fresnéu - La Robellá - Xerra - Boroñes

27 de Xunu de 2026 

Track: El Condao (Llaviana) - La Repunta - El Cotón - Mediudía - La Triguera - Fresnéu - La Robellá - Xerra - Boroñes

Continuamos un pocu cola preparación pa la Travesera de Picos del GM Xuan de la Borrina, viniéndonos a la tiesta, que tenía pendiente una crestería que bien pudiera valenos, pa superar un desnivel curiosu y sobretou pa movenos per tarrén calizu, asina que decidimos averanos hasta'l Condao en Llaviana, p'acometer la crestería sur del cordal de Peñamayor hasta'l Picu La Triguera. 

Les previsiones son de bastante calor y posibles tormentes de tarde, asina que saltámonos l'almuerzu de turnu y a les 9 la mañana tamos preparaos nel aparcaderu del cementeriu del Condao, pa entamar a caleyar, onde un potrín y la so ma, tienen a bien aparte de saludanos, acompaganos un ratín de pista nos primeros pasos del día. 

Partimos del pueblu d'El Condao (375 m)

La pista pela que salimos ye la que xube hasta'l colláu de Breza, xustu al empar del nuesu oxetivu final como ye'l Picu La Triguera, que tamién ficiéramos va munchos años na otra parte de la crestería de Peñamayor dende Fayacaba naquella ocasión. Esta vegada, saldremos a 375 m d'altor poro tenemos casi mil metros direutos d'ascensión per una crestería que nun pilotamos res, asina que vamos a l'aventura como siempre.

La Puente (Morcín) - El Rotellón - Figares - La Collá - La Madalena - Cuitu Rumiru - Otura - Llugar de Baxo

17 de Xunu de 2026 

Track: La Puente (Morcín) - El Rotellón - Figares - La Collá - La Madalena - Cuitu Rumiru - Otura - Llugar de Baxo

Miércoles cualesquiera col horariu de branu y somos a xuntanos, pa entrenar, tres del GM Xuan de la Borrina per Morcín. La idega yera facer la ruta al Picu Figares, que tantes vegaes fice entrenando pa les carreres y si'l tiempu permitíalo, continuar hasta'l Monsacru y facer el percorríu que más nos apeteciese, ya que teníemos avisu tormentes.

Son pocu más de les 4 la tarde, preparámonos y salimos caleyando pela sienda verde pela que discurría la vía'l tren pente'l pozu Monsacru y la Pereda en Mieres. Agora, tendremos un seliquín patéu, que tamién usamos pa dir a esguilar a los seutores de la Peña Garcilleru, teniendo que cruciar un par de túneles illuminaos, hasta'l Caliru'l Rotellón, onde aparte del caliar, tamién había llugar de crucie de trenes. 

Partimos del aparcaderu del cementeriu de La Puente (245 m)

Comentar que ta n'estudiu, recuperar la siguiente parte de la senda verde, al traviés de la cantera de Peñamiel, pa xunise a la esistente de La Pereda a Frechura, pudiendo casi unir Mieres cola Foz de Morcín, lo que daría munches posibilidaes deportives, sobretou ciclistes a estos conceyos mineros. Nós, tamién tenemos perpasáu dalgún túnel más, con "usu ganaderu" p'acceder a la fastera de Cueva Cabrera tamién na escuela de la Peña Garcilleru, pa esguilar pero dexa de ser transitable nel siguiente túnel.

Les Arriondes (Parres) - Collía - La Forcá - La Teyera - Güexes

12 d'Abril de 2026 

Track: Les Arriondes (Parres) - Collía - La Forcá - La Teyera - Güexes

Día repunante de meteo, nel que toca inventar daqué pa salir al monte pela mañana, asína que llueu d'una primer idega picante, tenemos qu'echala p'atrás porque la lluvia éntranos antes de lo debío, alcontrando dalgo más rápidu pa facer nel conceyu Parres y más en concretu dende la so capital, Les Arriondes, onde Pepa y Jose andaben de furgonetéu seliquino.

Partimos de Les Arriondes (30 m) capital de les Piragües

Almorzamos un cafetín y enantes de les 10 de la mañana tamos preparaos pa salir caleyando dende l'aparcaderu, cruciando'l rigu Chicu y saliendo per carretera per amplies envueltes hacia Pendás, onde pocu enantes alcontramos crucie hacia'l pueblu de Collía, atopando tamién marques de percorríu, que la verdá ye que podíen currase pela viesca que va travesando tola carretera.

El Beyu (Ponga) - Mura - Carriá - Poana - Trechu - Yarenes - L'Arenal

22 d'Avientu de 2025

Track: El Beyu (Ponga) - Mura - Carriá - Poana - Trecho - Llarenes - L'Arenal

Continuamos coles rutes del GM Xuan de la Borrina, averándonos esta vegada hasta Ponga, onde preparamos una ruta pa volver al Picu Carriá, monte que ficiera va años dende la Vega de Cién y que ye ún de los Montes Cimeros Asturianos, que tou montañeru tien que tener na so llibreta, pola guapura del monte y poles increyibles vistes enmediu del parque de Ponga.

Como siempre, quedamos nel chigre la Huera pa tomar un cafetín, pillar unos pinchinos y de pasu felicitar les fiestes al chigreru, collaciu ya dende va munchos años de monte. Xuntaremos coches y tiramos pal desfiladeru los Beyos, saliéndonos enantes de la Ponte Bidosa, hacia'l pueblu ponguetu d'El Beyu.

Partimos del pueblu ponguetu d'El Beyu (375 m)

Durante'l viaxe na furgo, ya soi acolumbrar cierta blancura nos montes de la que paso por Nava y cuando aporto a Cangues d'Onís, alcuéntrome con un día borrinosu, orpinando y cola llínea nival perbaxa, atopando los montes ñevaos a una cota mui baxa, muncho más de lo camentáu, asina que ya tengo na tiesta que va ser un día pelín complexu pa sacar la ruta alantre.

Ensin más, preparámonos y salimos d'El Beyu, col día amurniáu, pero al menos vamos pescanciando dalgún abanciu nel cielu, lo que dame un pelín d'esperanza. Saldremos peles caleyes d'El Beyu pasando pembaxo del cementeriu, garrando un antiggu camín que va dexanos nes cases de Canisquesu, que paez anguaño abandonáu dafechu.

La Pola (Somiedu) - Urria - Palombera - Ridibobia - Veigas - La Malva

9 de Payares de 2025

Track: La Pola (Somiedu) - Urria - Palombera - Redibobia - Veigas - La Malva

Munches ganes tenía de tornar per Somiedu, pero nos últimos tiempos nun alcontraba una ruta diérame pie a ello, sicasí, siempre tenía na tiesta dalgo tan cenciellu n'entamu, como yera, ensin más, da-y la vuelta a la xerra de Palombera, un cordal enmediu de los valles de Saliencia y el Val.le, poro asitiada nuna fastera increyible del parque natura.

Pa ello, vamos animamos namái que tres presones del grupu, poro quedamos en Balmonte, pa echar un cafetín y tiramos hasta la capital del conceyu somedanu, na Pola, dende onde per primer vegada, vamos salir de monte, lloñe d'aquel Desafíu Somiedu que ficiera nel 2022, cuando ya diba tando'l cadril drechu nes últimes.

Partimos el grupu menudu dende la Pola en Somiedu (695 m)

Preparamos mochila y saldremos, nun día más bien fríu, pente les cais de la Pola pa garrar camín qu'ataya hasta la carretera qu'empobínase hacia'l Val.le, percorriendo dellos metros en cuesta, hasta salir a la manzorga onde garraremos l'antiguu y recién desbrozáu camín que tien de llevanos hacia'l pueblu d'Urria.

Esfrutando d'esti guapu camín y con vistes hacia val.le de Sousas y penriba al cordal de Peñalba, que conociéremos nuna increyible ruta dende'l Coutu va dellos años, pasando pel picu Gúa y L'Altu, vamos dir a bon ritmu hasta acolumbrar les primeres muries del cordal de Palombera so les cases d'Urria.

Pandébano (Cabrales) - La Vega Urriellu - Llebaniegu - Campanarios - Collada Bonita - H.ou Carnizosu - Las Moñas

13 de Setiembre de 2025

Track: Pandébano (Cabrales) - La Vega Urriellu - Llebaniegu - Campanarios - Collada Bonita - H.ou Carnizosu - Las Moñas

Tornamos dellos díes a Picos, dempués de la Travesera Picos del mes de Xunetu, yéndonos varios díes hasta Sotres, pueblu cabraliegu que tomaremos como campu base pa les nueses andances. El día anterior ya fuimos a dormir a Sotres, alcontrándonos con unos horarios pocu avezaos al estilu astur de vida, piesllándose les cenes bien ceo, por teníemos de tar sollertes pa nun quedar ensin cenar.

D'esti xeitu, a les 8 la mañana, viénenmos a buscar dellos taxis que súbenmos a fueu hasta Pandébano, puntu de partida de la ruta del primer día. Siempre fui mui d'autoxestión en tolos asuntos alrodiu'l monte, pero pillar el taxi a Pandébano y nun andar dando por culo colos coches propios, paezme una opción de lo más sensata y sostenible, pa evitar caleyar más d'una hora por pista dende Sotres.

Partimos de Pandébano (1120 m) bien ceo

Sicasí, caún ye caún, pero llenando los taxis, los seis euros, tan perbien gastaos, pa nun fadiar la furgo pela pista, poro aportaremos a Pandébano, col almuerzu na boca, llueu del viaxe, pero preparaos a les 8 y media la mañana pa entamar a caleyar, con un día pelín más tapecíu de lo que daba la meteo.

Entamaremos camín hacia Pandébano, dende'l aparcaderu, toos xubiendo pela parte llarga faciendo más envuelta, menos yo, que tenía que dexar un recáu y tiré pel atayu, pa xuntános toos na parte alta, siguiendo camín hacia la Trenosa, onde cargamos dalgo más d'agua, dalgunos de nós y siguiemos caleyando hacia la Vega Urriellu.

Valdorria (Los Argüeyos) - Monte Bucioso - Peña Valdorria

24 d'Agostu de 2025

Track: Valdorria (Los Argüeyos) - Monte Bucioso - Peña Valdorria

Dempués d'un mes sin dar un pateín curiosu, por mor de vacas, esguilaes varies y calor infame, salimos el GM Xuan de la Borrina, baxo mínimos, yéndonos hasta Los Argüeyos en Llión, onde tantes y bones rutes llevamos faciendo a lo llargo de los años. 

Como non, escapámonos hasta'l valle del rigu Curueñu, onde ficiéremos el branu anterior dos grandes rutes al Cuetu Ancino y Prau Llano y a la Peña Forqueta, quedándonos esta vegada na vera occidental del rigu, yéndonos hasta'l pueblu de Valdorria. 

Salimos de Valdorria (1355 m)

Magar del almuerzu y xuntanza n'Ezequiel, salímonos hacia'l valle del Curueñu, xubiendo pela pindia carretera hasta Valdorria, onde namás llegar ya vemos que pesie al madrugón, el día, nos va a apretar enforma'l calor. 

Preparamos trastos, contando con una ruta rápida, poro nun cargamos n'escesu d'agua y cruciamos les cases del pueblu, pa salir per pista hacia'l valle de Valdecesar, que si sólo quisiésemos facer la crestería del Valdorria, tendríemos de siguila hasta los Llamargones primeru y llueu al colláu Bucioso, ensin denguna dificultá.

Cualladrona (Morcín)

23, 29 Agostu, 1 Setiembre de 2025

Nesti branu 2025, como non, tuviemos dalgunos díes trepando pela Cualladrona, pero muncho menos qu'otros años, por mor d'esta meteo seca que pudimos esfrutar, dándonos posibilidá de tornar a otres escueles y seutores de Morcín.

Non sólo, tuviemos esguilando sinon que tamién trabayamos un pocu pa dexar más curioses les víes de la Fayona, añadiendo una reunión pa separar el Diedro la Fayona y el Escudo de Morcín con una reunión independiente.

Santos probando Zumo de Motivación (7b)

No que la esguilada refierse, unos pocos díes xubimos hasta la Placa d'Arriba de la que ya tenéis disponibles croquis, probando dalgún cuernu estrañu en forma de vía mui morfa (Hagende Garten), tachamos dalgún sestucu que tenía pendiente (Repetance y el Chanclas), apretones pero bonitos y metímonos a Laniakea (7a+) tolos collacios a sufrir nos sos pasos regleteros y de placa.

 

Dani plaqueando fino nel seutor Inferior de la Cualladrona

Dempués de llevanos Laniakea, non sin dar más pegues de los camentaos, tuvimos la suerte d'acompañar a los equipadores de la Cualladrona, pa prebar dalgunes víes que tan equipando nun nuevu seutor. A mou resume, pudimos tastiar y encadenar les siguientes víes:

 

Si tuviese que calificar les víes ye que la mayoría, salen derrapando dende'l suelu, con pasos a bloque o secuencies intenses na parte inferior y una parte alta más amable d'escalar. Sicasí, les víes son mui buenes, quedándome Desplumaviejas, Dios mío dame cazos y Zumo de Motivación, como les más guapes, siendo Zumo de Motivación un auténticu rompecabezas pa sacar los pasos más claves.

Mil gracies a los equipadores como siempre, por dexanos compartir pegues, comentar graos y testear y llimpiar les víes con ellos. En pocu tiempu, tarán como siempre disponibles los croquis de forma gratuita, nos llugares onde tamos espublizando la información, cuando los equipadores terminen el trabayu.

Croquis de La Cualladrona (Peña Manteca Norte) gracies al trabayu del Club Asturvertical y del GM Xuan de la Borrina. Tenéislos en papel, allugaos nel chigre MoNa en Llugar de Riba onde podéis collaborar colos equipadores de Morcín.

------------------------------------------------------------------------------- 

Caín (Valdión) - La H.errera - Oliseda - Peñeblanca - H.ou Miguel - Mesones

12 de Xunetu de 2025

Track: Caín (Valdión) - La H.errera - Oliseda - Peñeblanca - H.ou Miguel - Mesones

Segundu día de Travesera Picos 2024 - 2025 alboreciendo en Caín, llueu de la ruta a la Peña Vallines en Tierra la Reina, asina que coles pates ya calentines del día anterior, tenemos per delantre enfrentanos a un día potente de monte, queriendo ascender pela canal de la H.errera a la Peñeblanca, pa descender dempués pela canal de Mesones, completando unos dosmil metros de desnivel positivu y otros tantos de baxada.

Con esti plan, nun quedaba otra que madrugar asina que pa les 8 la mañana ya tábemos preparaos, cargando agua na fonte del Cainejo y sacando la semeya de rigor cola mesmísima Peñeblanca enriba nuesa, casi dosmil metros na nuesa vertical.

Grupu preparáu pa un día potente de monte en Caín (465 m)

Salimos camín alantre, siempre en continua xubida, aportando a Caín de Riba pela mandrecha, dempués de varies envueltes de camín empedráu y bien ceo ya tendremos la riega la H.errera delantre nuesa, metiéndonos pela so mandrecha, atopando'l senderu pelín tomáu, viendo a posteriori, que ye meyor garrala pela manzorga la riega, cruciándola xusto embaxo'l tabayón míticu d'esta guapa riega.

Tamos cola mosca tres de la oreya, ya qu'a dalgunos compañeros que dormíen nel albergue, nun-yos encomendaron a facela, ya que decíen que taba mui tomada, pero bueno, nun sabe bien la xente, a lo que-yos tengo avezáu pel monte astur, asina que somos testerones y el plan diba siguir alantre si o si. 

Obar (Cabrales) - Las Palancas - Cabeza Polvorosa - Tordín - Camba - Cabeza Sonllanu - Sotres (Cabrales)

10 de Marzu de 2025

Track: Obar (Cabrales) - Palancas - Polvorosa - Tordín - Sonllanu - Sotres (Cabrales)

Colos díes más llargos y el cadril con más fuercia cada día, tocaba probase un pelín más y aprovechando que tenía a dellos collacios per Cabrales, decidí poner ruta pa esa fastera, anque finalmente, nun pudo venir muncha xente a facer esta guapa travesía pente Obar a la vera'l Cares y el pueblu de Sotres.

Los motivos cimeros d'esta ruta, yeren dos defechu, conocer el nomáu Aventón de las Palancas, un kilómetru vertical dende Obar hasta Portudera pa entamar la ruta y al final d'ésta, ascender a la Cabeza Sonllanu, ún de los últimos Montes Cimeros de Picos, que fáltenme por conocer de segunda categoría y que sorprendióme poles vistes tan guapes que tenía.

Entamamos nel aparcaderu d'Obar (210 m)

Alborecemos n'Arenas prontín, llueu de pasar la tarde del sábadu, tomando dalguna cervecina y cenando pal día siguiente a les 9 la mañana tar almorzaos, asina qu'averámonos hasta l'aparcaderu d'Obar, Pepa, Rubén y Naiara, guardesa del refuxu del H.ou de Cabrones, qu n'esta vegada va xunísenos pa conocer esta guapa travesía.

Preparámonos nel aparcaderu, coles meyores gales y miramos p'arriba del nomáu Aventón de las Palancas, kilómetru vertical que toma nome de la parte alta de la canal, tamién conocíu como Ardalomba pelos de Tielvi. Cualesquier person, daría-y pereza con tan sólo mirar, pero dempués d'añu y mediu de dolores y una operación de cadril, yo taba gayoleru por metéme con un bon desnivel.

Caranga Baxu (Proaza) - La Riquiebra - Canal del Cirio - Llampaseca - La Forcá - La Corraína - Senda La Cruz

23 Payares de 2024

Track: Caranga Baxu (Proaza) -La Riquiebra - Cirio - Llampaseca - La Forcá - Corraína - La Cruz

Ruta que tenía prevista dende l'añu pasáu, pero qu'ente la lesión del cadril y que nun mos xuntábemos los interesaos, quedó nel tinteru, hasta que la revisamos en condiciones, viendo los reportaxes de Victor (Pindio), Javi Cienfuegos y Yonatan (Los de las Claras), camentando que pudiera danos tiempu nesta dómina l'añu.

D'esti xeitu y avisaos toos de dir col equipu de bregar, xuntámonos nel pueblu proacín de Caranga Baxum, a les 9 la mañana, preparándonos pa salir a y cuartu, travesando les cais de Caranga, hasta la parte alta, onde atopamos camín, hacia los praos d'enriba'l pueblu, pasando pel depósitu d'agues que ye bon referente de que vamos bien.

 

Partimos de Caranga Baxu (250 m) con rises nervioses

Dende'l depósitu siguiremos camín alantre, hasta onde entama una vallina que paez nun tener salida de frente, teniendo que salir a la manzorga per una viesca, alcontrando senderu penriba d'una muria d'un prau, pa siguir siempre viesca alantre cola vista puesta nos parés del Risquiebru, enriba nuesa, a los qu'aportaremos travesando una llerona pelín inestable, na que topamos rastru de tar pisada y que vamos negociando como meyor podemos. 

Vamos ganando altor, sacando vistes al valle del rigu Teberga tres de nueso, mirando tamién con atención a la muria La Riquiebra onde topamos delles utreres y una cuevona na manzorga ensin accesu dalu. Al final de la llerona, toparemos que'l canalizu superior nun tien posible trepada, poro debemos salir a la mandrecha per una resbariosa viesca, upándonos a la parte alta del canalizu onde atoparemos rastros de senderu.