Travesera Picos 2024 - 2025

Del 10 al 14 de Xunetu de 2025

Nueva travesera del GM Xuan de la Borrina, que preparamos con mimo durante varios meses, siempre a la espera por mi parte, que'l cadril nuevu, fuese a furrular como debiera pa tantos díes de monte potente. Les últimes rutes, ya me dexaren claro que la cosa diba bien, tanto pel Sil na ruta al Catoute como per Piloña a la Peñe Crespa.

Entamábemos la Travesera al frescu

D'esti xeitu preparamos 5 díes de monte, aportando a Riañu el xueves de tarde, dempués del viaxe de rigor per Tarna y atopamos un día imposible dafechu, ya qu'a les 3 de la tarde teníemos 35 graos a la solombra. Sicasí, fuimos hasta Vegacerneya, onde partía la ruta al Pandián, monte cimeru llionés del Cordal Cantábricu, pero albidramos lo mal que lo díbemos pasar y decidimos dir hasta'l banzáu de Riañu a prauticar el kayak y tar fresquinos hasta'l día siguiente.

 

Aprovechando la calufa infame pa esfrutar del kayak por Riañu

A lo tuntu, esi día pegamos una pechada, Sara, Montse y yo, de 10 km remando en dos hores per Riañu, quedándonos a gustu, pa pasar el restu la tarde tomando dalgo, primeru en Riañu y dempués en Llánaves, en Tierra la Reina, onde teníemos abellugu y cena, con más xente del grupu (Rubén, Mario, Pepa y Jose) qu'averábase hasta ellí a pasar la nueche de cara a la ruta del día siguiente.

 

Ruta disfrutona per Tierra la Reina con picnic final furgoneteru

Dempués d'una cena estupenda nel hotel San Glorio, averámonos al almuerzu con buffet llibre de mañana, saliendo como globos a caleyar, cosa qu'ente'l calor y la fartura acumulada, fízonos tener una ruta tranquila de ritmu, pero que dexónos con un tastu increyible pol monte que ficimos, Peña Vallines y sobretou pol so allugamientu, con unes vistes de Picos descomunal.

 

Paliza gorda de sábadu de Caín a Caín y cena recuperadora

Esi mesmu día, pasaremos hacia Valdión col envís de garrar campu base en Caí, pero primeru pa echar un pocu de tiempu, llueu del picnic en Llánaves, paramos en Santa María, pa tomar algo na Ardilla Real, xuntánodonos más tarde en Caín con tol restu del grupu, como yeren Marcos, Vane y Carlos. Esi día, ficiéremos cena de xuntanza, enantes de facer la estaya más xabaz de la Travesera, como fue l'ascensión a la Peñeblanca pela H.errera con descensu per Mesones.

 

Ascensión mítica a Cabrones por Dobresengros nun día mui cansáu

El día de la Peñeblanca, marcó un antes y un dempués al restu de la Travesera, ya qu'a parte de cobrase una "víctima" como fue Carlos, siento que nos mermó físicamente a la mayoría del grupu y al día siguiente xubimos hasta'l H.ou Los Cabrones, como pudimos, a un ritmu bastante llentu que nos dexó ensin poder ascender nenguna cota de la redolada.

 

Xornada de monte per Cabrones con descensu de vuelta hacia Caín

Aparte, alcontrámonos con una meteo poco amistosa durante tol día, con borrina esnalando nel ambiente y hasta moyándonos col orpín, cosa qu'atopamos dafechu nel refuxu, teniendo una tarde y nueche pelín húmeda. Llueu de la cena nel refu, prontín tiramos a la tienda a dormir y al día siguiente espertamos con un día soleyeru n'altura, pero tamién na parte baxa de la cuesta'l Trabe tocónos negociar col borrín.

Aportamos a Caín con una fundida importante

Una vegada más, los nuesos planes fuxeron y decidimos una retirada, per Piedrabellida, que fízosenos bien llarga p'axuntanos a los milenta senderistes, gran mayoría foriata, que diben de patéu pente Poncebos y Caín, siendo este últimu el nuesu destín final, onde esperábanos les furgonetes y una cabera xinta pa despedir estos cincu díes d'actividá pela contorna llionesa de los Picos.

Mil gracies a los participantes d'esti añu: Sara, Montse, Rubén, Mario, Sari, Pepa, Marcos, Vane y Carlos

Como siempre, vamos dexar unos datos a mou resumen y les correspondientes entraes del blog:

Primer Estaya: 

Llánaves (Tierra La Reina) - Peña Vallines

Duración: -- h   
Llonxitú: -- kms
Ascensu: -- ms
Descensu: -- ms


Segunda Estaya:

Caín (Valdión) - H.errera - Oliseda - Peñeblanca - H.ou Miguel - Mesones

Duración: -- h
Llonxitú: -- kms 
Ascensu: -- ms
Descensu: -- ms

Tercer Estaya:

Caín (Valdión) - Dobresengros - H.ou Grande - H.orcada Arenizas - H.ou de los Cabrones (Cabrales)

Duración: -- h
Llonxitú: -- kms
Ascensu: -- ms
Descensu: -- ms

Cuarta Estaya:

H.ou de los Cabrones (Cabrales) - Amuesa - Piedrabellida - Cares - Caín (Valdión)

Duración: -- h
Llonxitú: -- kms
Ascensu: -- ms
Descensu: -- ms

Totales:

Duración: -- h y -- min
Llonxitú: -- kms
Ascensu: -- ms
Descensu: -- ms

Más nada, pal añu que vien siguiremos inventando percorríos per Picos...