viernes, 26 de diciembre de 2014

Áliva (Llébana) - Covarrobres - San Luis - Las Nieves - Asotín - La Rienda - Cordiñanes (Valdión)

6 de Xunetu de 2014

Track: Áliva (Llébana) - Cordiñanes (Valdión)


Una vegada más, una travesera más... tamos nel refuxu d'Áliva a casi 1700 m d'altor y tamos recién almorzaos mirando pal cielu. Un cielu que nun para d'echar agua, un cielu que nun tien pinta de dexar d'orbayar y de moyar la mole de la Peña Vieh.a dándo-y un toque amenazante dafechu.

Somos cuatru los que continuamos na Travesera 2013-2014 pero sólo dos vamos a echá-y ganes al día de güei y vamos moyanos p'aportar al siguiente finxu nel nuesu camín particular d'esta travesera: Cordiñanes.

Día malísimu en Picos... orbayu y borrina n'Áliva (1668 m)

lunes, 15 de diciembre de 2014

Sotres (Cabrales) - Vegas de Sotres - Canal de las Grah.as - Pozán - H.isu - Áliva (Llébana)

5 de Xunetu de 2014

Track: Sotres (Cabrales) - Áliva (Llébana)


Tamos na V Travesera Picos del GM Xuan de la Borrina y esti añu, diónos por entamar el nuesu camín dende'l pueblu cabraliegu de Sotres. Como siempre, p'aportar a Sotres saldríemos de Xixón garrando l'autovía del Cantábricu hasta Posada de Llanes onde tomaríemos direición a Cabrales al traviés del Altu d'Ortigueru, y ya baxar a los pueblos de Canales, Carreña, Poo y a la fin Arenas de Cabrales.

Nel nuesu casu, Pau y yo, durmimos en Colombres na casa de Fernan, así que fueron los demás collacios los que ficieron esti viaxe con madrugón incluyíu p'alcontranos en Sotres almorzando nel hostal onde durmieron Zori y Richar, que decidieron dir de vienres a pasar el día pel pueblu.

Saldremos de la curvona de Sotres (950 m)

miércoles, 10 de diciembre de 2014

Travesera Picos 2013 - 2014

Del 5 al 8 de Xunetu de 2014

Track: Travesera Picos 2013 - 2014



Quinta Travesera Integral de Picos del GM Xuan de la Borrina y esti añu, nin el percorríu, nin les ascensiones, nin el calor fue'l mayor de los nuesos enemigos... el mal tiempu que sofrimos llevóse la palma.

Magar de cinco años faciendo traveseres, descubriendo nuevos caminos, albidrando posibles futures traveseres,... tenía que venir el mal tiempu pa fadiar un pelín les nueses andances montunes y aún así, como cada añu, fuimos a sacar alantre estaya tres estaya hasta completar de la meyor manera posible la nuesa Travesera 2013 - 2014.

La totalidá del grupu na Quinta Travesera

viernes, 28 de noviembre de 2014

Tuíza Riba (L.lena) - Picu'l Siete

15 de Xunu de 2014

Track: Tuíza Riba (L.lena) - Picu'l Siete


Finamos la temporada montañera 2013-2014 con una ruta curtia, pero con ambiente alpinu y como non, pa estes caxigalines siempre ta presente'l macizu de Penubina, Asina que tenemos qu'averanos hasta'l pueblu de Tuíza Riba y fadrémoslo como ye davezu saliendo de Xixón y garrando l'autovía minera hasta Mieres del Camín, onde siguiremos hasta'l pueblu de Campumanes en L.lena, onde la verdá, nun m'alcuerdo si d'esta vegada almorzamos daqué o non.


Darréu tiramos pela carretera 8 de L.lena, pasando pelos pueblos de Sotiel.lo, Espineo, Los Pontones, Teyeo, Rospaso, Tuíza Baxo y a la fin entramos en Tuíza Riba, onde aparcamos el coche con vistes a la Penubina (1), el Cuetu les Cabres (2), Puerta d'Arcu (3), los tres Castil.linos (4, 5 y 6) y el Portil.lín Fonderu (7)...

Una vegada más salimos de Tuíza Riba (1200 m)

viernes, 21 de noviembre de 2014

Colláu Angón (Amieva) - Porra Valdepinu

7 de Xunu de 2014

Track: Colláu Angón (Amieva) - Porra Valdepinu


Primer visita al pueblu d'Amieva, que va convertise en bon protagonista de les nueses andances montañeres nos caberos tiempos. Ye más, esta ruta fué una alternativa a l'ascensión al picu Camperón pelos sedos d'Ozania que tendríemos la suerte de completar unos meses más tarde.

Como siempre aportaremos a Cangues d'Onís pela autovía'l Cantábricu y la N-625 pa magar del desayunu nel chigre de la Huera, siguir pela N-625, pasando pelos pueblos de Cañu y Tornín, cruciando la ponte Dobra, pa entrar nel conceyu d'Amieva. Nesti conceyu travesaremos los pueblos de Miyares, Corigos, Pervís, La Vega Pervís onde topámonos col ríu Ponga nesti casu, y siguimos camín pasando per Santiyán, Precendi, Les Vegues, Campurriondi y Ceneya d'au saldrá a la manzorga la carreterina que xube hasta Amieva.

Salimos dende'l Colláu Angón (823 m)

martes, 11 de noviembre de 2014

El Puertu (Somiedu) - La Penouta

18 de Mayu de 2014

Track: El Puertu (Somiedu) - La Penouta


Tamos na Xuntanza Asturvasca 2013-2014 nel pueblu somedanu del Val.le. Llevantarémonos con calma y magar del almuerzu nel Hotel Rural Somiedu, col bon facer de Naciu, dexaremos esti pueblu pa empobinanos hasta'l Puertu Somiedu, onde alcontrarémonos con Pangua.

Si viniéremos de Xixón tendríemos de garrar l'autovía "Y" en direición Uviéu pa siguir dempués en direición Grau pola As-63, hasta la salida de Cangas del Narcea. Equí tomaremos la As-15, travesando parte del conceyu de Salas y entraremos nel conceyu de Miranda, siguiendo pola As-227 hasta l'entamu del conceyu de Somiedu, Aguamestas.

Entamamos n'El Puertu a 1481 m

lunes, 3 de noviembre de 2014

Val.le (Somiedu) - Pena L.lana

17 de Mayu de 2014

Track: Val.le (Somiedu) - Pena L.lana


Aportamos al Val.le, nuestru pueblu más visitáu de Somiedu y como siempre llegaremos dende Xixón pola autovía A-64 en direición l'occidente astur, hasta Pravia, onde tomaremos la As-16 hasta Cornellana y ehí, ya la As-15 y As-227 hasta Balmonte Miranda, onde almorzamos como ye vezu nel Hotel Cela.

Llueu siguiremos pela mesma carretera hasta Auguasmestas onde éntrase al fin nel conceyu de Somiedu, pa pasar polos pueblos de Xadriz, La Riera, Recueva, Castru y al fin a la capital, onde nuna carretera ascendente arríbase al Val.le.

Entamamos la ruta nel Val.le (1231 m)

martes, 28 de octubre de 2014

Xuntanza Asturvasca 2013 - 2014

17 y 18 de Mayu de 2014

Una xuntanza más y van 4 años siguíos, anque esta vegada retrasámosla de la dómina ivernal a la primavera, por mor de los munchos compromisos que'l club Alpino del Baskonia tenía nel so centenariu.

Acoyonante qu'un grupu montaña algame una cifra d'años tan espectacular y ye que 100 años, son munchos años, amosando la tradición vasca montañera y nesti casu la gran afición qu'hai al monte nel pueblu basauritarra.

Mui a gustu na casina rural que recomendónos Naciu'i Riguilón

lunes, 20 de octubre de 2014

Tarañes (Ponga) - Picu Tiatordos

10 de Mayu de 2014

Track: Taranes (Ponga) - Picu Tiatordos


Tornamos al Tiatordos magar de casi 5 años y vamos facelo dende la vertiente pongueta. Paez mentira que pasen los años tan apriesa y nun atalantamos que'l nuesu grupu ñaciera cuantayá, faísenos imposible dafechu, sobretou porque tenemos na tiesta les rutes como si fueren ayeri.

Pero bono, la vida ye asína...  y sigue alantre, poro p'aportar a Ponga, lo más rápidu pa nós, ye salir pela Autovía'l Cantábricu de Xixón, hasta Lloviu, onde siguimos nacional hasta Cangues d'Onís. Ellí toca l'almuerzu davezu y siguimos la N-625, onde en pasando los pueblos de Cañu y Tornín, cruciaremos el puente Dobra, pa entrar nel conceyu d'Amieva, pa travesando los pueblos de Buxil, Corigos, Pervís, La Vega Pervís y los Grazos topanos col ríu Ponga.


Partimos de Taranes (565 m) en Ponga 

miércoles, 1 de octubre de 2014

L'Angliru (Riosa) - Gamonal - Monrasiellu - Fontazán

30 d'Abril de 2014

Track: L'Angliru (Riosa) - Gamonal - Monrasiellu - Fontazán


Un día más nel paru, no que se refier al trabayu, ya que teniendo bonos díes de sol, que meyor que dir al monte enmediu la selmana. Otra vegada, faigo compaña al mió pa demientres anda a la gueta de cogordes, nesti día tan guapu nel cordal de L'Aramo.

Namái aportar a L'Angliru, alcuéntrome con una pintadina nun finxu, que pa cualesquier nacionaliegu, pon-y la piel de pita un pocu, sobretou si llueu echamos una güeyada enrededor, topándonos con un de los llugares más guapos pa facer monte ensín desniveles descomanaos.

Partimos de L'Angliru en Riosa (1554 m)

domingo, 14 de septiembre de 2014

Altu La Llama (Piloña) - La Múa - Miruenu

30 d'Abril de 2014

Track: Altu La Llama (Piloña) - La Múa - Miruenu


De les semeyes, d'entamu y final, col día estupendu, a les más murnies, pasaron ya más de 6 añinos. Dízse pronto, pero quiciás l'ascensión al Miruenu, fué de les primeres que ficimos nel añu 2008 y en xeneral na nuesa "carrera" nos montes asturianos.

Esta vegada, símplemente acompañé al mió pa, que diba a la gueta de cogordes y la fastera d'Espineres del Sueve, ye onde más-y presta andar. Poro, garramos el coche en direición Colunga pela Autovía'l Cantábricu, pa garrar nel pueblu la As-258 qu'empobínase hacia Lliberdón, pasando pelos pueblos de La Riera, La Ferrería, Agüera Baxu y Agüera Riba.

Nel Altu La Llama (418 m) con vistes al colláu Oviñes

jueves, 11 de septiembre de 2014

Pallabreru del Monte y la Escalada

Bono, como podéis ver los munchos o pocos que seguís esti blogue, llevo un atrasu pergrande na espublización d'entraes montunes o d'esguilada. El casu ye que va unos mesinos, surdióme la posibilidá de facer un pallabreru montañeru pa la oficina de la Llingua de Xixón.

Así que durante estos mesinos atrás, tuve dándo-y vueltes, restolando cosines y preparando'l trabayu pa que quedase dalgo curioso. Nunca nun ficiera daqué d'esti tipu, asína que tardé n'algamar el formatu correutu, pa que la montaña y la escalada tuvieren lo más xuntos posible, como una mesma cosa... como lo que ye... esfrutar de les actividaes al aire llibre, ya seya caleyando o engoláu nuna parede.

Rosa Fernández na presentación

Ésto, namái que ye un blogue personal, pero dende equí da-y les gracies a la Oficina de la Llingua de Xixón pola oportunidá, a Xosé Nel Riesgo, por contar conmigo pa esti trabayu tan guapu y a Xesús Manteca por falá-y de mí pa llevalu alantre.

Penriba too, mil gracies a Rosa Fernández, por facer el prólogu, tar presente nel actu y ser una persona tan bono, agradable y cercano. Fué un placer conocela, charrar un ratín con ella y saber de los sos prósimos oxetivos... qu'haya muncha suerte.

Colos responsables de cultura y deporte del Ayuntamientu de Xixón

Como veréis, cuando lo tengáis nes vueses manes, ta separtáu en Monte y Escalada, con toles actividaes alrodiu d'estes dos modalidaes que más menos fáense nel monte. Llueu, vien lo que ye'l pallabreru: Toponimia asturiana de monte, pallabreru xeneral y equipamientu.

Nun quier ser un diccionariu nin enciclopedia téunica, enxamás esa fué la intención. Lo propia pallabra lo diz... Pallabreru. Alcontraréis términos asturianos que nun sabéis, faltarán otros que si sabéis o que na vuesa fastera dizsen así... pero l'oxetivu yera dalgo pa tolos públicos: aficionaos, non aficionaos, espertos...

Exemplu del pallabreru... que vos preste!

Nun pueu pasar ensín dar les gracies a Xosé Lluis del Río, que ye una enciclopedia de términos toponímicos n'Asturies. Alcuérdome tamién, de dalgunos crucies de correos con grandes recoyedores de toponimia na montaña como Ramón Sordo Sotres na fastera de Picos y Xulio Concepción en L.lena y el macizu de Penubina.

Prestaríame qu'anque seyáis espertos montañeros, muncho más que yo de xuru, o entaméis a dir de monte n'Asturies, deprendáis una migayina con esti trabayu, nel que como mínimu, eché-y bien d'ilusión y unes cuantes hores al salir de trabayar.

Un abrazu y que vos preste!... Vémonos pelos montes.

Más semeyes de la presentación equí.

Podéis descargar el pallabreru en pdf equí.

viernes, 5 de septiembre de 2014

La Vana (Cuideiru) - Monte Gamonéu - La Peñona

27 d'Abril de 2014

Track: La Vana (Cuideiru) - Monte Gamonéu - La Peñona


Díes raros, hailos a pataes y esti fué ún d'ellos. Deberíemos tar en Somiedu xubiendo la Penouta, pero a cambiu tamos en Cuideiru pa xubir un vértice d'ún d'esos montes d'ocalito qu'hai cerquino la costa.

Ye lo malo de xuntase dende abenayá tolos collacios, que la cosa líase y llueu nun hai quien seya a llevantase. Pa quitar el mal tastu de nun cumplir col grupu montaña, tiramos Pau, Kíla y yo, a dar un paseín ya que'l día taba guapu pa la costa y nun yera cosa de perdelu enteru.

Cartelu de la ruta L'Ocalitón

miércoles, 13 de agosto de 2014

Recuerda (Tierras del Burgo) - Otero de Mosarejos

13 d'Abril de 2014

Track: Recuerda (Soria) - Otero de Mosarejos


Paez mentira que tantos años corriendo y yendo en bici pel pueblu mió pa en Soria, y nun fuera a poner una rutina que partiera d'él, faciendo un percorríu bien curiosu. En selmana santa, Pau y yo, ficimos quiciás el camín que más me presta correr ampliándolu un pelín más con una ascensión.

Partimos de Recuerda pel camín de la Dehesa hacia'l hocino de Fuente Arenaza

martes, 5 de agosto de 2014

L.lindes (Quirós) - Penarpín

13 d'Abril de 2014

Track: L.lindes (Quirós) - Penarpín


Son les casi les 11 de la mañana y tamos nel pueblu quirosanu de L.lindes. P'aportar a él, salimos de Xixón, garramos la AS-I o minera, hasta topanos en Mieres del Camín cola A-66 que nos dexaría en la Pola de L.lena. Ellí desayunamos como pudimos, y garramos la As-230 que nos fadrá xubir a la Col.la la Cobertoria dempués de pasar pelos pueblos l.lenizos de Palaciós, Piedracea y Armá.

Equí entraremos nel conceyu de Quirós y siguimos per esta carretera hasta Santa Marina, pasando enantes per Chanuces y Murias. Nel crucie, garraremos la Qu-4 pasando por Fresneo de Cortes, Cortes y a la fín aparcaremos el coche al llau de la Ilesia de L.lindes.

Entamamos nel pueblín de L.lindes (917 m)

martes, 13 de mayo de 2014

Caranga Riba (Proaza) - Picu Barzanalgas

30 de Marzu de 2014

Track: Caranga Riba (Proaza) - Picu Barzanalgas


Segunda vegada que vamos intentar esti cumal nesti añu montañeru. Nel anterior intentu, la llargura de la ruta y sobretou, la llegada d'un frente fízonos quedar na Pena Xerragallos. Pa dar preste a la ruta propuesta por Pangua, decidimos camudar de valle, partiendo dende Proaza, envede del conceyu Quirós.

Como siempre que visitamos el valle del Trubia, salimos dende Xixón pela autovía hasta Uviéu, onde magar de percorrer el tramu de A-63, salímonos hacia'l valle, travesando Santu Adrianu y parando na capital de Proaza p'almorzar.

Entamamos en Caranga Riba (288 m)