martes, 30 de noviembre de 2021

Tuíza Riba (L.lena) - Corrales - Prau L'Albu - Canalón Oscuru

24 d'Ochobre de 2021

Track: Tuíza Riba (L.lena) - Corrales - Prau L'Albo - Canalón Oscuru

Dempués de les vacaciones esguiladores per tierres catalanes, tornábemos a Asturies con ganes de dar dalgún pateín y continuar trepando lo más duro posible. Tamos al entamu de la temporada 2021-2022 y llueu de facer rutes más bien seliquines, vamos visitar una vegada más el macizu de Penubina, pa completar un cresteríu cenciellu pero coles meyores vistes de tol macizu.

La idega ye completar el cresteríu dende'l Fariñentu hasta'l Picu'l Canalón Oscuru, pero na realidá, como ya fice parte d'ello, nes rutes al Pie Ferreru y Prau L'Albu ya tengo na tiesta facer compañía a Benjamín y que'l restu'l grupu foguéese un pelín más y encume'l Fariñentu.

Tol grupu nel aparcaderu de Tuiza Riba (1225 m)

Saldremos a les diez de la mañana de Tuiza Riba, llueu de xuntanos casi toos en Campumanes pal cafetín de rigor. Esta vegada, tenemos nueva xente col grupu, Silvia que yera conocía de carreres pel monte y el so compañeru Pelayo, más dos perretes a sumar a Kíla, asina que travesaremos les cais de Tuiza un bon garrapiellu, hasta'l depósitu d'agua, onde garraremos senderu hacias Las Colgás.

miércoles, 24 de noviembre de 2021

Camarasa (Lleida)

Del 14 al 16 d'Ochobre de 2021

Llueu de pasar unos díes xeniales per Margalef, vimos que les fuercies ya nun daben pa más díes esguilando nesta escuela y decidimos finalizar les vacaciones, arrimándonos hasta Lleida y más en concretu a Camarasa, onde tenemos otra escuela enorme con milenta seutores.

Namái que tuviemos una tarde, na que pudimos dar unos peguinos nel seutor Túnel d'Aigubarreig, cola aventura de travesar túneles, portiar perros per una escalera de mano, etc... too ello, hasta que dixéronmos que podíemos bordiar un pelín y había camín sin problemes jaja... menuda liada la primer tarde.

El Pantá de Camarasa... un llugar con hestoria obrera ya industrial

La esguilada nesti seutor, pues física y de furacos al estilu Margalef, nes víes más dures pero con munchísimu sestu mediu onde los collacios pudieron esfrutar al másimu. Personalmente, nun par de tardes ficiera un 6c a vista (Epicontelitis), perbono pa calecer y llueu metiera un pegue fuerte a vista a Vaga de Fam, un 7a+ que casi faiga a vista cayéndome nun pasu pa dir a cadena... fue una pena, ya que paecía la última oportunidá de facer l'oxetivu del viaxe.

Al día siguiente de tarde, ficiérala poniendo cintes y probara un 7b a la manzorga, pero pringué nun pasu a metá de vía y nun tuvi tiempu a da-y un segundu pegue. La verdá ye qu'esti seutorín, dexó perbon tastu y a toos diba prestanos visitalu una prósima vegada.

Maia y Xavi esguilando caún a lo suyo

L'otru seutor que visitamos, fue Kuestelón la France, ún de les munches muries qu'hai al llau drechu del rigu Segre y onde pasamos un par de mañanes, nes que pude esfrutar d'un clásicu y duru 6c, la Fisura Garreta y al día siguiente por mor de la motivación que-y entró a Anna con un 7a+ atómicu (No Tatrinkis) volvimos pa da-y un peguín a vista.

A la fín, nun fue mal pegue, pero tovía tuve que da-y otros dos pegues pa encadenala al terceru, xustu igual qu'Anna que pudo llevásela al segundu, pringando arriba cuando ya paecía tar too fecho. Aún así, pagó la pena muncho tornar l'últimu día del viaxe d'escalada hasta Kuestelón pa encadenar esta vía, ya que fue un auténticu rutón plaqueru.

Un collaciu llocal en No Tatrinkis... vía que namorónos

Sacante del puru y duru mundiu esguilador, tuvimos el placer t'asitianos coles furgos na redolada de Sant Llorentç de Montgai, un pueblín más pequeñu que Camarasa, pero perguapu y onde atopamos un chigrín onde poder tomar dalgo ya inclusu cenar bien a gustu.
 
En resume, otra escuela, que bien paga la pena una visitina más intensa, conociendo más seutores y esfrutando de munchos estilos d'escalada, pudiendo plaquear de regletéu o tirar d'escalada física y furacos.

Llegó la muerte a Camarasa y la necesidá d'una ducha

Camarasa (Seutores visitaos)
 
Croquis de la escuela d'escalada de Camarasa, alcontraos pela rede. Gracies y col so permisu.
 --------------------------------------------------------------

lunes, 22 de noviembre de 2021

Margalef del Montsant (Tarragona) - Ermita de Sant Salvador

12 d'Ochobre de 2021

Track: Margalef del Montsant (Tarragona) - Ermita de Sant Salvador

Dempués de 3 díes d'esguilada intensa per Margalef tocaba facer un descansín y pa ello, al igual que n'otros viaxes, siempre llevo preparáu dalgo pa los díes descansu, col envís d'entrenar un pelín corriendo o simplemente dando un pateín tranquilu.

Ya saliera varios díes a correr pela mañana, a la gueta de circulares prestoses, pero siempre acababa enmediu d'un olivar y nengún camín llevárame a la parte alta de la xerra del Montsant, así que a lo llargo los siguientes díes preferí salir a correr per pista hasta Bisbal de Falset y vuelta ensin esmoleceme muncho más.

Partimos del aparcaderu de la Fonda Margalef (370 m)

Esta vegada, aprovechando qu'Almu tenía que colar de Margalef al terminase'l puente, fuimos Mario, Anna, Almu y yo a conocer el valle de Sant Salvador, pensando a posteriori en xintar daqué en Ca Vernet, pa despedinos y xubir a trepar un puquiñín de tarde.

jueves, 18 de noviembre de 2021

Margalef de Montsant (Tarragona)

Del 9 al 13 d'Ochobre de 2021

Había munches ganes de viaxe d'esguilada y munches ganes de tornar a Margalef. Los últimos años, siempre centráramonos en Rodellar y tocaba tirar pa la meca de la dificultá mundial a garrar furacos y esfrutar de la so escalada, caún nel so nivel claro ta, dexaremos los novenos pa otru viaxe jeje.

Llevaba varies selmanes entrenando, ficiera la selmana de descansu de rigor y mis planes diben en facer toles víes posibles a vista a la gueta de mi primer 7a+ a vista. Poro, los graos nos que diba meteme yeren pente'l 6c y el 7a+, enxamás engorilándome con nada más duro.

Mítica entrada al pueblu... meca de la escalada en Catalunya y nel mundiu

martes, 16 de noviembre de 2021

El Campu (Casu) - El Pandu - El Piqueru

3 d'Ochobre de 2021

Track: El Campu (Casu) - El Pandu - El Piqueru

Magar d'un día perbono, con tolos collacios del GM Xuan de la Borrina, xubiendo al Cullargayos, xintando, pasando la tarde per Soto y cenando mui rico de vuelta nel Albergue Cantu L'Osu, despertamos na furgo dempués d'una nueche lluviosa.

Demientres almorzamos y aldericamos si arriesgar a facer daqué nesti domingu de ñubes y claros, veo que'l grupu nun ta pa munches hestories. Pente café y café, nun tengo mui claro si tirar pa Morcín a esguilar o salir a dar un patéu rápidu con Kila, decidiéndome polo último, aprovechando que toi en Reres.

Partimos d'El Campu (545 m), capital del conceyu casín

Nun sé mui bien, como ta d'animada Kíla y el día sigue amenazante, asina que déxola dar una vueltina pel aparcaderu de Soto y dempués d'un ratín, decidimos salir hacia El Campu, capital de Casu, onde tengo pendiente un monte cimeru d'Asturies dende cuantayá: el Monte Piqueru.

jueves, 11 de noviembre de 2021

Soto (Sobrescobiu) - Nozalín - Picu Cullargayos - Llaíñes (Sobrescobiu)

2 d'Ochobre de 2021

Track: Soto (Sobrescobiu) - Nozalín - Picu Cullargayos - Llaíñes (Sobrescobiu)

Continuamos cola vuelta al monte per Asturies, siendo esta un finde especial, ya que vamos facer una mini xuntanza por mor del XII Aniversariu del GM Xuan de la Borrina. De primeres, el númberu de participantes yera curiosu, pero pente la mala meteo y dellos problemes personales quedamos en poca xente, lo que nun quita que fuera un finde bien guapu.

El llugar escoyíu yera'l conceyu de Sobrescobiu y la Posada Cantu L'Osu fue'l nuesu campu base, durante tol finde. Dicir dende equí, que mil gracies pol tratu, poles cenes, los almuerzos, l'alderique montañeru y social y por tener comprensión coles baxes del grupu.

Partimos del aparcaderu de Soto (425 m)
 
Magar d'un almuerzu tan bono, como la cena del día anterior, presentámonos nel aparcaderu de Soto, con dellos planes nel bolsiellu, pero viendo'l día murniu y amenzante y que nun tenemos la meyor forma del mundiu pa lo que tenía pensáu, decidimos ascender al Picu Cullargayos, conociendo la foz de Nozalín.

miércoles, 10 de noviembre de 2021

Priañes (Uviéu)

4, 6 d'Ochobre de 2021

Casi un añu dempués, tornábemos per Priañes al seutor Principal, onde motívame dalgo más la esguilada. La verdá ye que la idega, yera aprovechar les tardes enantes del cambéu d'hora y dir llimpiando un pocu les víes más cencielles que díbemos probando.

Ensín más punxímonos manos a la obra y en dellos díes, pudimos dir tachando'l segundu llargu de Patos Salvajes (6b+) bastante perra pa esi grau, Casacas Azules (6c) del mesmu palu y una mui pocu visitada Pies Planos (7a)

 Seutor Principal de Priañes

Como non, tamién probamos delles víes más, dalgunes de primer llargu bloqueres como La Ley del Deseo, otres de segundu llargu como'l Vuelo del Alimoche o víes que nun me dieron más, como la Columna de Hercules que quedarán pa visites a posteriori.

Priañes (Seutores visitaos)   

Croquis de la escuela d'escalada de Priañes, por mor de Piratas Free. Gracies y col so permisu.

------------------------------------------------------------------ 

martes, 9 de noviembre de 2021

Las Xanas (Santu Adrianu) - Pedroveya (Quirós) - Peñarréi - Valdolayés

26 de Setiembre de 2021

Track: Las Xanas (Santu Adrianu) - Pedroveya (Quirós) - Peñarréi - Valdolayés


Entamamos temporada de monte 2021-2022 y había que facelo con ruta-fartura, asina que púnxeme a mirar que facer pela fastera central asturiana, dándome cuenta que dempués de la revisión de los Techos d'Asturies, quedárame pendiente l'ascensión a la Peñarréi en Santu Adrianu.

Partimos del aparcader de Las Xanas (182 m)

Ensín más, facemos quedada nel aparcaderu de Las Xanas, sobre les 9 la mañana, poro, vamos tener que reconocer l'escobiu Las Xanas p'acometer el nuesu oxetivu. Nun ta de más, ya que ya lloviera de la última vegada que lu ficiera, p'ascender a la Mostayal.

jueves, 4 de noviembre de 2021

Larraineko Portutik (Erronkari-Zaraitzu) - Orhi

11 de Setiembre de 2021

Track: Larraineko Portutik (Erronkari-Zaraitzu) - Orhi

 

Como despedida a esti viaxe pel Pirinéu 2020-2021, averámonos hasta'l valle d'Erronkari pa conocer el primer dosmil del Pirinéu: el Orhi. Nun ye sólo ascender un monte, sinon facer el prestosu camín per carretera dende Asón hacia Erronkari, onde les viesques como la selva d'Irati, tomen presencia y cada kilómetru que vamos faciendo en furgoneta ye un regalu pa los güeyos.

La verdá ye que nun podíemos terminar meyor esti viaxe, que gracies a la meteo, fízonos conocer dos valles mas de lo planiáu de primeres. Nun ye nin meyor, nin pior que'l plan d'entamu, simplemente la capacidá d'amoldase a lo que'l monte o la meteo va imponiéndonos, ye la única manera d'esfrutar del día día nel monte ensin frustraciones.

Partimos del nomáu puertu ciclista de Larraine (1573 m)

Estes coses, depréndesles col pasu los años, ya que siempre pongo munchu procuru en preparar planes A, B, C.... y al final, tener tamién la capacidá d'adautase a les condiciones fae qu'un plan D, seya'l meyor de toos, sobretou compartiendo díes con xente positivo y dimpuesta a cambiar sobre la marcha.

Entamamos el pasín hacia'l cumal del Orhi pente los munchos montañeros

D'esti xeitu, con munchos díes de dormir en furgo y les pates cansaes, averámonos hasta'l puertu de Larraine, onde aparte, de ser un destín ciclista de primer categoría, munchos montañeros tienen como oxetivu ascender al Orhi Mendi, primer dosmil del Pirinéu.

Continuamos a bon ritmu namái que parando pa echar una güeyada hacia les vistes

Nun tien munchu que contar, simplemente garrar senderu dende'l puertu y siguir a la filera de montañeros, per tola crestería que fai llende pente Navarra y Francia, hasta que llomba tres llomba, encumemos los 2006 metros del Orhi.

Cumal del Orhi (2006 m) primer dosmil del Pirinéu

Ye un monte mui cenciellu con un desnivel de 430 m que vínomos de luxu, pa facer dalgo d'actividá enantes de continuar viaxe hacia Asturies. Les vistes, son una maraviya, con tol Pirinéu Occidental, onde tuviéramos el dia anterior, ascendiendo a la Meseta d'Os Tres Reis.

Descendemos pela arista sur pa nun cruciar de nuevu con tola xente

La baxada, fadrémosla descendiendo un pelín al sur, pa nun alcontranos con tola retafila xente qu'ascendía y tornando pela mesma arista enllazando un pocu más abaxo, aportando a la furgoneta magar d'una hora y media d'actividá y malpenes 4 kilómetros y mediu de percorríu.

Perbona despedida pa unos cuerpos ya cansaos, pero cola mente mui fresca pa preparar el prósimu viaxe pel Pirinéu, nel qu'intentaremos conocer más valles y ascender más montes siempre que la meteo y el nuesu físicu lo permita.

Camudando'l Camín nel primer dosmil del Pirinéu