El Campu (Casu) - El Pandu - El Piqueru

3 d'Ochobre de 2021

Track: El Campu (Casu) - El Pandu - El Piqueru

Magar d'un día perbono, con tolos collacios del GM Xuan de la Borrina, xubiendo al Cullargayos, xintando, pasando la tarde per Soto y cenando mui rico de vuelta nel Albergue Cantu L'Osu, despertamos na furgo dempués d'una nueche lluviosa.

Demientres almorzamos y aldericamos si arriesgar a facer daqué nesti domingu de ñubes y claros, veo que'l grupu nun ta pa munches hestories. Pente café y café, nun tengo mui claro si tirar pa Morcín a esguilar o salir a dar un patéu rápidu con Kila, decidiéndome polo último, aprovechando que toi en Reres.

Partimos d'El Campu (545 m), capital del conceyu casín

Nun sé mui bien, como ta d'animada Kíla y el día sigue amenazante, asina que déxola dar una vueltina pel aparcaderu de Soto y dempués d'un ratín, decidimos salir hacia El Campu, capital de Casu, onde tengo pendiente un monte cimeru d'Asturies dende cuantayá: el Monte Piqueru.

Aparcamos al llau de la casa conceyu, tomamos otru cafetín mientres echo una güeyada a dalguna ruta curiosina y al salir un sol y dalgún claru, anímame a poner el pantalón curtiu, garrar ropa de correr y salimos hacia'l centru d'interpretación, col envís de garrar el camín qu'avérase hasta'l pueblu de Veneros.

Averámonos hacia Veneros p'ascender pente cabañes hacia'l Pandu

Dellos metros enantes d'aportar a Veneros, garramos un pindiu camín, pel que trotamos ascendiendo pente delles cabañes, como les de Les Roces o Les Muñices, saludando dacuando a dalgún mastín, que más que lladrar, lloramiquéa al ver la llibertá que caltién na so vida, Kíla.

Pasamos pel área recreativa d'El Pandu pa baxar hasta'l colláu Moñu

Ensin más, saldremos a tarrén de llanéu, aportando al area recreativa d'El Pandu, onde aparte de facer un descansu pa beber agua, aprovechamos pa echar un vistazu dende esti colláu a les vistes hacia la Peña'l Casar, al sur, al nuesu destín, El Piqueru al Oeste y de la que baxamos hacia tol valle que xube hacia la collada Arniciu.

 

Ascensión per pista per tol monte Piqueru

Baxaremos per cómoda pista a fueu, hasta'l colláu Moñu, onde cruciamos la carretera qu'enllaza col conceyu Piloña y ascendemos per llarga pista, primeru per envueltes amplies con vistes hacia'l valle d'Orllé pa dempués de pasar pela Trapa, pasar hacia'l valle'l Nalón y en malpenes curtios ciszás, aportar al casetu con antenes que corona'l Monte Piqueru.

 

Nel cumal d'El Piqueru (1169 m)

Faigo una pequeña trepada hasta una peña caliza, puntu más altu de 1169 m d'El Piqueru y baxo con Kíla de nuevu, pa beber otru pocu d'agua y entamar la baxada ya que les ñubes amenacien con descargar agua enforma.

Desfacemos camín hasta la cabaña de la Trapa y ellí, garramos un senderín pente los árboles, que pocu a pocu agrándase per Xenra hasta la collada Villar, onde ya pasamos a garrar pista direuta que pasando pel Fueyu y La Viña va dexanos na parte alta d'El Campu.

En resume, paseín pa conocer ún d'esos montes de bones vistes que dominen el valle del Nalón, llevándonos facer los 11 km de percorríu y los 760 m de desnivel, malpenes 2 hores de carrerina ensin forzar muncho, lo xusto pa gananos tanto la compañerina Kíla como yo, un cachopín n'Aldea pa xintar na terracina de casa.

Camudando'l Camín col mió amorín Kíla