Las Xanas (Santu Adrianu) - Pedroveya (Quirós) - Peñarréi - Valdolayés

26 de Setiembre de 2021

Track: Las Xanas (Santu Adrianu) - Pedroveya (Quirós) - Peñarréi - Valdolayés

Entamamos temporada de monte 2021-2022 y había que facelo con ruta-fartura, asina que púnxeme a mirar que facer pela fastera central asturiana, dándome cuenta que dempués de la revisión de los Techos d'Asturies, quedárame pendiente l'ascensión a la Peñarréi en Santu Adrianu.

Partimos del aparcader de Las Xanas (182 m)

Ensín más, facemos quedada nel aparcaderu de Las Xanas, sobre les 9 la mañana, poro, vamos tener que reconocer l'escobiu Las Xanas p'acometer el nuesu oxetivu. Nun ta de más, ya que ya lloviera de la última vegada que lu ficiera, p'ascender a la Mostayal.

Esfrutando del paséu pel escobiu Las Xanas

La verdá ye que paezme normal l'afluencia y l'ésitu d'esta ruta senderista, porque tamos falando d'un pequeñu Cares nel centru d'Asturies y tanto les vistes como'l camín colgáu ye guapu. Ya nel so día, falara de la necesidá o non, de los pasamanos, pero bono, pasando tanta xente día tres día, nun ta de más, que delles persones agárrense si tienen dalgo de vértigu.

Salimos del escobiu p'averanos hasta'l pueblu quirosanu de Pedroveya

Ensin más saldremos del escobiu, pa pasar pel molín de Secundino, enantes d'aportar a la cabaña de la Décima onde cruciamos el rigu de nuevu pa salir per camín ampliu hacia'l texu y ermita de Pedroveya, enantes de continuar al pueblu, onde paramos a tomar un cafetín/caña.

Continuamos camín hacia Dosangu

Llueu del descansu, siguimos marcha cruciando Pedroveya, pa salinos del conceyu Quirós y volver a Santu Adrianu, de camín hacia Dosangu, onde al altor de la escuela, tomaremos camín hacia la Peñarréi, por cómoda pista hasta un altu.

Abandonamos la pista pa bregar un pelín pel monte hasta la Peñarréi

 

Nel altu, con vistes del cumal, restolaremos cual ye'l meyor senderu y diremos llibrando les cotoyes, hasta dar col puntu más altu de la Peñarréi de 762 m. La verdá ye que nun ye que sea'l monte más llamativu del mundiu, pero tien guapes vistes de la fastera norte de L'Aramo.

 

Cumal de la Penarréi (762 m)

Nun taremos munchu tiempu y tornaremos al mesmu puntu onde abandonamos la pista, siguiendo ésta hasta la llaguna de Penarréi, perfeuta pal refresquín de Kíla y pa continuar camín trasversal hacia la senda Valdolayés, que ye'l camín "normal" que fai la vuelta circular de las Xanas.

Perguapa y tranquila baxada per Valdolayés

 

Asina qu'empatamos camín cola senda Valdolayés y baxaremos sele conociendo esti guapu camín, hasta qu'alcuéntrome con un espolón con delles chapes de deportiva y dame por mirar un pocu más arriba, pa unes muries que caen dende la Peña Los Navaliegos, topándome con una cordada.

Como nun podía ser d'otra manera, Anna, Kíla y yo, averámonos hasta esti paré en Valdolayés, a charrar colos escaladores y saber un pocu más del tema, viendo que yera una nueva escuelina qu'alcuéntrase en plenu procesu d'equipación.

Ensin más, tornamos a la senda y descendemos apriesa per camín hasta baxar a la carretera, zarrando esta prestosa y curtia circular de 11,25 km y +/-835 m de desnivel acumuláu en pocu más de 4 hores y media de patéu tranquilu.

Camudando'l Camín colos altos de Santu Adrianu