domingo, 25 de diciembre de 2016

La Peñona (Xixón)

18 d'Agostu, 4, 6 d'Ochobre de 2016

Cuando crees que la Peñona ya nun da va más, siempre sorpréndte esta pequeña escuela y el so mayor finxu, la propia Peñona, da pa sacar un par de víes más nun pañu roca, qu'agora sí, ya nun da pa más, ta completu.

Al mayor esponente de la escalada na Peñona, Abel, incansable equipador y aperturista de bloques, sumámos-y esta última temporada a Miguel Poch que descubrió esti llugarín y punxose a finiquitar los últimos requexos de roca que-y quedaben a la Peñona.

Que significó esto? Pues que dempués de dar por terminada esta escuela, encadenando toles víes, tuve que volver a probar les víes nueves, alcontrándome con dos nueves: Grillu Camochu y El Retacu que rondarán el 7a y una variante de salida direuta del Reto que pudiera sumá-y un plus a la vía aportando tamién al 7a.

Volviendo a apretar na Peñona


Ya sabéis que l'estilu equí ye mui bloquero, entos vos alcontraréis con preses minimes y unos apretones de cuidáu, colo que cualquier pasu en cualquier vía d'Asturies que pasare per preses d'este estilu andaría nestos graos, pero equí son 4 chapes namás.

En tres díes d'Ochobre, cuando les tardes van amatagando y la lluz escápase cola entrada la Seronda, tuve per ellí, probando les víes y sacándoles pali pali. Grichu Camochu ye una vía, con un pasu increyíblemente duru a una presa ínfima, solo apta p'auténticos fanáticos del ñapéu y nesos m'alcuentro, jaja.

Abel, colos sos dedarros nun yera nin a sentila jajaja. Coses de la escalada, pa unes coses bien y pa otres, andar más finu de deos da más xuego pa estes preses tan pequeñes. Polo demás, cayó nun par o tres de pegues, ya que si-y metes munchos más desmontes la pelleya.
Solucionando Grillu Camochu

Llueu la otra nueva el Retacu, ye menos guapa pa mín, más aleatoria y con más posibilidaes según estilos.  Pue llanzase de frente y a distintes preses, pero nun quita que seya guapina, pero non tanto como Grillu que tien los pasos totalmente obligaos y eso préstame muncho nes víes.

Tamién salió, en tres pegues, namás que saqué-y el métodu más curiosu pa min. Anque lo dicho tien varies alternatives a distintes preses con un llance de fe y agarrase a lo que se pueda y tirar p'arriba como un burrín.

Lo demás ya ye rizar el rizu, con que si nun pilles esa o la otra sal más duru. La peña ya nun da pa más y ta cosida a bolts pa sacar víes y movimientos, asina qu'a disfrutala pero pa mi idega qu'hai que dexar les coses como tan con estes víes y que la xente xuegue y aprete enforma.

Apretando nel Retacu

La sorpresa fué la salida direuta del Reto, que de ser 6c+ saliendo de frente pudiera metese nel 7a y que costóme más de lo camentáu, cayendo nel últimu movimiento lo menos en 3 pegues distintos, sale durina, mala de pies y hai qu'apretar como un chifláu.

Polo demás, la única nota negativa quiciás al enfotu por sacar movimientos y llinees nesti pedazu de roca, ye la estrallimpieza de preses p'algamar el Retón (7a+) que queda desvirtuáu de los sos movimientos iniciales y que tanto costó sacar, afinando los llances, pegándose a la paré d'unes ñapes insufribles y garrando la calidá suficiente pa llanzar y quedase d'una pinza malísima.

Fueron munchos pegues, sacando los movimientos y afinándolos pa cotala de 7a+ pero bien pudiera ser 7b, pa dir vela agora y comprobar qu'hai preses cepillaes hasta la fartura, que nunca lo fueron y ye que la roca na Peñona ye mui blandina y suel tar mui puerca jeje.

Hasta más ver... escuelina xixonesa

La Peñona (Sectores visitaos)
 
Croquis modificaos por mi de la escuela d'escalada de La Peñona, por mor del blogue Pura Escalada Asturias y Piratas Free. Gracies y col so permisu.


-------------------------------------------------------------------  

miércoles, 21 de diciembre de 2016

Marabiu (Teberga)

11 de Setiembre de 2016


Llevántome un domingu nel aparcaderu llibre d'Entragu y saco la tiesta pela puerte de la furgo d'Haritz y veo la mesma imaxen en caún de los personaxes qu'arrevolotien d'un llau a otru, empobinándose la mayoría hacia los baños: RESACA!!!

Eses cares y esos cuerpos ameyoren dempués d'una mexada y llavase un pelín, pa dempués garrar perres y dir tomar un café al primer chigre qu'alcuéntrase. La nueche fué llarga, pasaes les 5 y media la mañana, poro les intenciones de trepar al día siguiente son les xustes.

Soi de los primeros en llevantame, metiéndome un café con Orlando y collacios, colos qu'echo delles rises hasta que voi ver que fai la xente. Pa cuando vuelvo al aparcaderu, la xente va esperezándose y me doi una reválida almorzando con Pepa y Jose nun chigre de la Plaza.


Wifre y Marie trepando en delles víes

De la que tornamos, la xente ta mediánamente organizada y alcuéntrome con que tenemos una nueva collacia d'escalada: Marie. Esta neña, que ta faciendo Erasmus d'Inxenería Civil en Mieres, ta con ganes de trepar y somos los únicos anormales que van dir a la paré que semeyante estáu resacosu y col calor que dan pal día.

Pues allá vamos, decidiendo dir hasta Marabiu, faciendo les milenta envueltes hasta los puertos, menos mal que ye guapísimu esti llugar, porque marease yera la cuenta. Aportamos enfrente la ermita Santana y tirámonos hacia los Bloques, que ye l'únicu sitiu que conozo de Marabiu.

Somos un montón de xente, asína que vamos turnándonos más menos por graos p'atacar les víes y como ye vezu, dedícome a facer namái lo que nun tengo encadenáu, sacando un 6c y un 6b, entre otres na mandrecha del seutor.

Metíu nun 6a de fisura más perru que la hostia y Richar apretando

Sicasí, nun entamaremos mal, dempués metímonos a les víes de más a la manzorga, con un 6b+ qu'atragantóseme nun pasín, sacándolo al segundu pegue, demientres que Marie lluchólu y sacólu alantre amosando una calidá esguilando suprema.

Llueu siguió cola masterclass nun 6a de fisura durín, durín que tamién bregó finamente pa salir p'arriba como ta mandáu. Otra vía, que se fué al segundu pegue confirmó que taba entrándome una baxona perimportante.

Demientres, tocó xintar dalgo, ver a los demás esguilar nes distintes víes y acabé encadenando les víes fallides y otru quintín de regalu, pero ya nun daba pa muncho más y los dolores nel pié diben acrecentándose según pasaben les víes esguilaes.

Marie dexándonos col culu torcíu de como esguila

Con un calor brutal y con toles cantimplores seques, tocaba colar de Marabiu, dexando'l restu del seutor pa otru día y yéndonos con bien de ganes a echar una cervecina. Nesti casu, decidimos parar en Villanueva, que ya facía tiempu que nun pasábemos per ellí a da-y a la Cotoya.

Dende entós, Marie pasó a ser una collacia más y acompañónos en dellos díes trepando per Asturies.

Marabiu
Croquis modificaos de Marabiu por mor de  Piratas Free. Gracies y col so permisu.


lunes, 12 de diciembre de 2016

Valdenebro - Boos (Soria)

8, 10 y 11 d'Agostu de 2016

Un añu más colo pa Soria a pasar dellos díes, amestando fiestes, tranquilidá y cuando ya me pica too, busco trepar como sea. Esta vegada cola familia ocupada colos miós sobrinos tuve de buscame la vida y aparte de facer bloque nun llugar onde dalgún día espublizaré daqué, probé suerte falando cola xente del café El Refugio d'El Burgo d'Osma.

Por suerte, namái falar con Darío, convidame a pasame a delles hores pela escuela de Valdenebro y ya tuvi la oportunidá de pasar varios díes per ellí y trepar con Oscar, Alex... y más xente de la redolada y bonos conocedores de la escuela.

Ye de recibu falar del bon facer de Darío y compañía, que meten a la xente por esti deporte con "bautismos d'escalada" y la verdá ye que la escuela de Valdenebro-Boos da pa bautismos y pa fondiar colos graos.

Nel mió casu, esta vegada venía lo que se diz fundíu de les apretaes a finales de Xunetu, asína que tenía más interés por caltener un pelín de chispa que por facer daqué curiosu. Asína, qu'a parte de conocer bona xente, pude informame de graos de víes nueves y facer dalguna vía qu'otra, siempre ensín pasar del 6c más menos.

Espero tornar l'añu que vien con más xeitu y ganes pa poneme a apretar en seriu, anque faíseme raro'l tastiu de la roca y nunca soi a faceme a ella como pa meteme en graos altos. De toes formes, ehí queda una especie d'actualización de los croquis y dende equí un saludu tardíu a Oscar, Alex, Darío y demás xente que taba entamando nesto d'apretar na roca.

Valdenebro
Croquis modificaos por mi de la escuela d'escalada de Valdenebro, por mor del llibretu asoleyáu va pocu que podéis ver dalgo actualizáu en Soria Se Mueve. Gracies y col so permisu.

-----------------------------------------------------------------------------

sábado, 3 de diciembre de 2016

Valdegüesa (Porma)

31 de Xunetu de 2016

Mal tiempu per Asturies y a puntu de colar de vacaciones pa Soria andábemos neses feches y como non, dalguien tuvo la brillante idega d'averanos hasta Llión a la gueta del sol, de calecer y de poder pasar el día trepando tranquilamente.

D'esti xeitu llevantámonos y tiramos pa Llión... vaya cares

Zori decidió qu'a Valdegüesa qu'había munches víes cencielles y p'allá nos fuimos y a primera vista ya te das cuenta qu'hai de too. Víes dures desplomaes, víes dures de placa, víes más llargues y bordillos que ye pa onde tiramos y más en concretu al seutor Pensamientos Impuros.

El paré ye pa cagase... Kíla piensa lo mesmu

Nun conocía la escuela y prestóme muncho, con un pié de vía cómodu y hasta podíase colar pa la solombra cuando nun se podía aguantar más. Como siempre, primer visitina y toca facer metros y metros, esguilando cuartos ensín matase nin media.

La escuela ye ablucante... y hasta tenemos un pelín de solombra

Aportamos Haritz, Kíla y yo los primeros y metémonos a trepar cola calma, pa llueu dir llegando dempués Zori y Richar que pónense a la par turnándonos les víes y poquín a pocu, cosiendo'l nuesu cachu de paré de cintes.

En esto llegó Diego, Pilar y Nel que nun mos viéramos cuantayá

Más tarde entá, apaeció per ellí, Diego, Pilar y Nel que facía munchos meses que nun mos veíemos y pillába-yos de pasu enantes de dir xintar cola familia, poro pasaron a saludar y de pasu facer unes viuques y que Nel xugara un pelín con Kíla y trepara otru ratín tamién... mui bien por ciertu.

Y pelín más tarde la familia Asturwaterman al completu cola cámara como non

Y como yera'l día de les sorpreses más tarde apaeció tamién Dani Asturwaterman cola familia, muyer, fiu y perru, jajaja... al completu total. Como ye vezu, sacó la cámara y les semeyes guapes que paez que faenmos meyores escaladores salieron de Nico, Vero o Dani... porque Jake pel momentu nun sabe d'ello... sinon tamién.

Trepando de lo más relaxáu del mundiu

Asina, entre rises, déxame esa vía, llimpia tu la otra y demás hestories, fueron pasando les hores y el sol fué a más, nun pudiendo aguantar más nes hores más centrales y despidiéndonos de la primer visita a Valdegüesa con unes 11 víes... eso sí... ensin pasar de V+... les coses seliquines.

Esfrutando d'un domingu cualquiera nun llugar cualquiera

Y como somos asína y nun damos puntada ensin filu, pues de les cerveces nel pueblu con Dani y familia pasamos a colar hasta l'húmedu en Llión... con dos tolanos bien puestos y hasta la nueche tuviemos a cañes y pinchos Kíla, Haritz, Zori, Richar y yo... menudu branu.

Camudando'l Camín per Llión

Valdegüesa (Seutores visitaos)

Croquis modificaos por mi de la escuela d'escalada de Peña Careses sacaos de la Páxina de Montaña Leonesa de Cristino Torío. Gracies y col so permisu.



----------------------------------------------------------

martes, 29 de noviembre de 2016

Vegarredonda (Cangues d'Onís) - Xerra Los Gurbiñales - Vega d'Enol (Cangues d'Onís)

25 de Setiembre de 2016

Track: Vegarredonda (Cangues d'Onís) - Xerra Los Gurbiñales - Vega d'Enol (Cangues d'Onís)


Ehí tamos, alboreciendo en Vegarredonda, nun cuartu día de patéu pel Cornión. Los planes? Pues, la nueche anterior fuéronse al traste con una bona xarazada que cayera demientres durmíemos, anque al llevantanos vemos que nun fuera pa tanto.

Falamos un ratu, pero fáltanos motivación pa metenos pa los altos. De nueche cenando, colos collacios franceses, demientres yéremos convidaos a un par de botelles de vinu pela compaña y la charra d'estos díes ya decidiéramos casi baxar.

Últimu día de monte dende Vegarredonda (1452 m)

domingo, 27 de noviembre de 2016

La Línea Blanca - Foz del Pincuejo (L.luna)

21 de Xunetu de 2016

Pues había ganes d'alpina, pa descansar un pelín d'apretar como un chifláu en deportiva y como non, toca falar con Abel pa estos temes, xuntándose Alberto tamién en mou cámara, pero sin cargar la batería del too, pocu pudo facer.

El casu ye, que salimos de currar a les 3 y tiramos pa Llion col envís de conocer la Foz del Pincuejo, onde hai delles víes d'alpina, pudiendo alcontrar información nos croquis del Maquis, que tantes y bones actividaes, amuesen na so páxina.

Les escalaes nel Pincuejo podéis alcontrales na siguiente páxina: Peña'l Pincuejo

Croquis del Maquis... mil gracies por tanta info

Ensín más, aportamos a Caldas de L.luna y el día nun ta como'l de la semeya del croquis precisamente y veníamos d'Asturies que taba zarráu enforma, así que pintaba feu. De primeres, llucía'l sol pero calecía más bien pocu y tiraba un aire pelín gafu.

Preparámonos y tócame tirar de primeru, teniendo que superar un primer llargu de 30m con un máximu de V+, que nun ye na en deportiva, pero n'alpina ensín un seguru casi, hai que meter tolo qu'entre, anque a dicir verdá, asegúrase perbien y el pasu de V+ alcuéntrase aseguráu con un parabolt.

Aportamos toos a la reunión y vuelvo a salir al segundu llargu, muncho más calteníu nel quintu grau, teniendo, si soi alcordame, tres bolts en tol llargu de 25 m. Más menos, vamos garrando ritmu, pero ya nesta segunda reunión, demientres xuben los collacios y pasamos les cuerdes qu'enmarañáronse entamo a notar fríu.

Vídíu de la Línea Blanca na Foz del Pincuejo

Camudamos l'orde y va salir a los caberos llargos Abel, saliendo per unos pasos de V, pa llueu facer travesía a la mandrecha per tarrén más cenciello pero con menos posibilidaes d'asegurar hasta aportar a la reunión, la cual ta en plena forcada con una aguya.

Equí, cuerre l'aire que ye una llocura y nun hai quien pare, faciéndose un infiernu tar en camiseta y pantalón curtiu asegurando a Abel nel últimu llargu. Namás qu'acábalo, teniendo'l pasu enantes de la reunión, protexíu por dos parabolts, salimos como tiros p'arriba onde sofriremos el cutu final.

Demientres montamos el primer rapel, tamos pegaos a la peña que caltiense con dalgo calor, pero nin con eses, ya qu'esperando mi turnu del rapel, éntrame una tiritona, que na mió vida. Así fue, que pedí-yos a Abel y Alberto facer los dos rápeles siguios namás que baxé a la segunda reunión porque taba pasándolo mal ya.

Cagonros, hai que llevar ropa adecuada p'andar nes reuniones n'alpina, un forrín polar como mínimu. D'esta, dígote yo que lu deprendí y nun fué lo único, porque pude prauticar a meter trastos nuna vía realmente guapa.

Tornaré a facela... pero un día de calorín jeje.

jueves, 24 de noviembre de 2016

Peña Careses (Siero)

10 Xunu y 6 de Xunetu de 2016

Avanza'l branu con díes así repunantucos, nos qu'hai qu'andar filando fino pa poder trepar en dalguna escuela. Mal tiempu pal occidente, tamién pal oriente, pal sur... asína qu'hai qu'afinar per dalgo céntricu y lo más al norte posible... pa Careses.

Nes últimes visites, nes que tuviéramos probando la reequipación del sector Satisfaction, casi tocáremos toles víes pero quedaran munches ensin encadenar asína que llevaba esi envís pa estos díes así sueltos.

Encadenando la Seta (6c)

El primer día, tuviéramos Alberto y yo un ratín en la Faviola, repitiendo pela mió parte el Protón (7a) como si na y tamién Joder con el V+ (6b+) la cual acabó siendo un bon retu p'Alberto que fué a facese con ella dempués de 4 pegues y munchos ánimos.

Llueu colamos pa Satisfaction y col tiempu empiorando, fuí a encadenar la Peseta (6c) que ye un bloque prauticamente pero con un llance llargu pa mi estatura. D'equí ya tocó colar y tornaríemos otru día a poles víes de la mandrecha.

Un bon día d'escalada... contentu

La siguiente visita diba trayer los encadenes más prestosos d'esti seutor, La Seta (6b+) y el Acorazado Potemkin (6c) qu'agora comparten tol díedru d'entrada a vía y cauna sal per una parte del desplome con vuelu llateral y pasos raros pero mui guapos cuando-yos pilles el puntu.

Al final cayeron y probé'l Don del Águila, qu'abultóme rara, rara na so parte final, colo que tocó dexala pa otru día y ver veremos cuando tornamos per equí. De xuru que nel iviernu, con un día soleyeru ye una bona opción.

Careses (Seutores visitaos)

Croquis modificaos por mi de la escuela d'escalada de Peña Careses sacaos de les páxines de Puntu ColloráuGrupu Montaña El Maquis y del blogue El Regodón. Gracies y col so permisu.


----------------------------------------------------------

miércoles, 23 de noviembre de 2016

Vega d'Ariu (Onís) - Pica La H.orcada - Vegarredonda (Cangues d'Onís)

24 de Setiembre de 2016

Track: Vega d'Ariu (Onís) - Pica La H.orcada - Vegarredonda (Cangues d'Onís)


Llevantámonos, un día más, nel refuxu de la Vega d'Ariu, magar d'un día anterior increyible cola ascensión a les peñes Blanca y Robriza y una más qu'agradable cena aldericando con dos franceses de Pau, que veníen faciendo l'Aniellu de Picos.

Pesie a tener bona edá ya, pasaben con ganes de los 70, calteníen un espíritu aventureru que llevába-yos a facer una primer visita a los Picos y faciéndolo con bon xeitu, nin más nin menos, que metiéndose nuna travesía de varios díes... pa quitar el sombreru.

Un día más salimos de la Vega d'Ariu (1628 m)

martes, 22 de noviembre de 2016

Navalones (Uviéu)

26 de Mayu, 3, 14 de Xunu y 4 de Xunetu de 2016

Tamos col puntu fuerte de la temporada d'escalada, nos meses de Xunu y Xunetu y si amenaza lluvia pa una tarde n'Asturies, dir a Navalones ye sinónimu de colar con una reventada fina y de pasu entrenar los miós puntos débiles, que son munchos, pero'l más claru ye la resistencia en desplome.

Ellí tuviemos varios díes y fueron saliendo los encadenes, entamando por Tongo 30 (6b+) con un llance que nun se me daba na bien y acabó saliendo y Tallas Bien (6c) que supera un techu teniendo que facer un esfuerzu perimportante y saliendo con otru llance curiosino.


Algamaes estes dos, nun contaba con poder xubir más grau, pero dióme per probar el Mineru, 7a, que fai una primer parte ya conocía (Grisú, 6b +) y xube a otra reunión superando un par de techinos y allargando la mió penuria nesti tipu de víes.

A la fín, tamién cayó y quedó la escuela nel escaezu per esti añu, porque vieno perbon tiempu y nun tuvimos qu'abelluganos nel so paré, en tol restu de los díes d'escalada. Hai que dicir, que tan guarres munches de les sos víes y el siguiente pasu que sería 7a+, llevaría un procesu de llimpieza de víes pa poder llevalu alantre.

Camudando'l Camín dende Navalones

Navalones
Croquis modificaos por mi de la escuela d'escalada de Navalones de la web Asturvertical

Gracies y col so permisu. 

---------------------------------------------------------------

miércoles, 16 de noviembre de 2016

Vega d'Ariu (Onís) - Peñeblanca - Robriza

23 de Setiembre de 2016

Track: Vega d'Ariu (Onís) - Peñeblanca - Robriza


Dempués d'una nueche fría p'andar per fuera'l refuxu, tiramos prontín pal sobre y descansamos un bon montón d'hores, ensín esmolecenos muncho por madrugar, ya que nun vamos mui lloñe en kilómetros de patiar pero sí n'intenciones a ascender.

Tamos na Vega d'Ariu y si miramos hacia'l sur hai dos siluetes qu'acaparen l'atención polo afilaes qu'amuésense dende la nuesa posición, son les peñes Blanca y Robriza, ye dicir de color caliar y coloráu (rubrum) así que na de Robliza que nun ví yo munchos robles neses lleres qu'arrodien los h.oos d'esa fastera.

Partimos con un día ablucante de la Vega d'Ariu (1612 m)

domingo, 13 de noviembre de 2016

La Pola Gordón (Gordón)

2 de Xunetu de 2016

Segundu fin de selmana qu'escapamos de camping en branu. Esta vegada escoyimos la Pola Gordón de campu base y pude lleváme a Kíla, lo cuál fué una doble satisfacción. El vienres dempués de currar salíemos d'Asturies con mal tiempu y hasta Vil.lamanín nun meyoraba un res.

Plaqueando na Pola Gordón demientres aguántase de calor

Una cañina n'Ezequiel y ya cola tarde repunantuca tiramos pal camping y entre pitos y flautes de montar tiendes y demás, ya nun mos dió tiempu nin a dir a trepar nin na pol estilu. Eso sí, dar un pirulín pel pueblu y tomar daqué durante la tarde-nuechu nun mos lo quitó naide.

Mui entreteníes toles plaquines

Al día siguiente de mañana, almuerzu y como taba por llegar della xente (Haritz, Noe y Wifre...) quedamos nuna pequeña escuelina qu'hai penriba d'un pinar na mesma Pola Gordón. Serán unes doce víes separtaes en dos paños de roca, pero pa pasar medíu día o así ye más que perfeuta.

Guapu'l sitiu, soleyeru y pa pasar otra mañanina

El estilu, pues de placa llionesa y graos cenciellos ensin pasar de 6a+. De mañanina, tuviemos Zori, Richar y yo, nel pañu de roca más a la manzorga faciendo les víes d'una n'una, Richar y yo y Zori, dándo bona cuenta de dalguna vía de primera que ye lo importante.

Acampada brutal nel camping de Pola Gordón

A les 3 y media aproximáu de la tarde... nun había quien parar de calor y colamos d'ellí pa la piscina del camping como ta mandáu. Nun too va ser tar engoláu nun paré, pudiendo dase un bañu na piscina de los de restallu... eso sí, de nueche fresquino, fresquino ta l'ambiente na Pola Gordón... tanto que los dueños del camping agasáyente con unes mantines pa por si acasu jeje.

Croquis modificaos de la Pola Gordón por mor de Pura Escalada Asturias. Gracies y col so permisu.

jueves, 10 de noviembre de 2016

Trail de Peñamayor (Nava)

6 de Payares de 2016

Track: Trail de Peñamayor (Nava)


Web del Trail: http://www.serondatrailseries.es/

Clasificaciones: Clasificaciones 2016

Fai un añu entamábemos l'aventura de les carreres pel monte y queramos o non, fué enganchándonos adulces y agora acabes una y ya tas camentando pa onde tirar la próxima. Deciamos que preparábemos nel so momentu el trail de la Pisada'l Diantre nel Sueve y ficimos 8 carreres la temporada pasada.

Pinta que van cayer munches más esti añu y pel momentu col nuesu segundu Trail de Peñamayor acabé les tres carreres de la Seronda Trail y pocu tien que ver los xeitos de carrera d'esti añu col anterior ya que anque seya aneudóticu baxe 40 minutos el mio tiempu.

Nun tien mayor importancia, pero llevo tres carreres apretando fuerte y eso ta prestándome, anque tamién nesta carrera sentíme cola sensación de tener que cumplir bien pa quedáme a gustu y pasóme factura ya que los primeros kilómetros fueron una llocura d'adelantar xente, corriendo tol camín hasta'l primer avituallamientu a unos tiempos nos que nun toi avezáu a tar.

Dellos momentos de la carrera pel cordal de Peñamayor

Llueu, cuando entamó la xubida del Peranchu hacia Fayacaba, una ascensión tendida y perbona pa les mios condiciones, ya que camiento que dáseme perbien apretar xubiendo, pues nun podía, nun lo daba ya que taba fundíu de los primeros kilómetros y eso fízome tener un baxón mentar perimportante.

Aún así, tocó tirar de psicoloxía propia y dir animándome polo baxo, pa ver si yera a recuperar, porque aparte de nun ganar posiciones nesta xubida taba perdiéndoles y sentía que nun taba esfrutando de la carrera res.

Acabé la xubida como pude, aportando al avituallamientu de Fayacaba, onde garré dalgo de chocolate, isotónicu y a siguir corriendo... dábame igual ya sufrir tola carrera como un perru... al menos diba dalo too.


El Team Asgaya faldiando Peñamayor

Per suerte, hidratéme abando nel tramu llanu de Fayacaba y el faldéu a Peñamayor y xunto col chocolate paez que fuí recuperando y fice una xubida más que decente al picu Peñamayor, al cual aportamos pente una trapiada curiosa.

Encumé'l picu, magar de pasar a unos cuantos collacios y garré'l crestéu con xeitu, viendo que la xente tenía muncha prudencia nel crestéu y la baxada que taba enforma embarrada, pero yera factible si tas d'andar pel monte como ye'l mió casu.

Nel intre, víneme un pelín arriba y sin mayores problemes siguí ganando posiciones na baxada téunica de Peñamayor a les Praeres, onde garré frutos secos y tiré p'arriba hacia la Varallonga como un tiru ganando dalguna posición qu'otra.

Semeyes prestoses y alcuentros prestosos

Llueu tocaba, facer la baxada hacia les Foces del Pendón, menos téunica que la de Peñamayor, pero con más prau y con menos curiáu, dalguna resbariada cayó. Dende equí, hasta les foces esfrutando na baxada hasta les propies foces que taben increyible d'agua nes Meceures.

El tramu de les foces, con un llanéu estráu d'agua, fízoseme pelín duru, sin garrar un ritmu curiosu y sintiéndome pelín cansáu hasta Los Fornos, onde ye entamaba la baxada hacia H.uentesanta, que fícela a un ritmu curiosín.

Dende equí a la meta, dalgúna repechu hacia Piloñeta, nel que caltuve pates nun vaya ser que vinieran los calambres y aguantar ritmu fuerte pa baxar a Nava per carretera, garrándome Jorge, fisio que tuvo tratándome estes selmanes atrás, entrando xuntos a meta na 71 y 72 posición.

Aportando a meta nun día durísimu meteorolóxicu

Otra carrera con sensaciones agridulces y ye que tovía nun se regulame bien y tócame pasar dellos malos momentos, pero supongo qu'esto de les carreres pel monte ye así y sobretou cuando toes pasen d'una media maratón.

De los collacios, Gus y Alberto, ficieron la so carrera, pasándolo mal col fríu y ye que según fueron pasando'l día, el tiempu fue a pior y según pude enterame la ñevada nel cumal de Peñamayor fué espectacular dellos minutos más tarde de pasar yo.

Dende equí, tamién felicitar al Team Asgaya (Illán, Leticia y Rubén) que tamién acabaron como campeones les tres carreres de la Seronda Trail, llevándose la chaquetina Brooks que ye una auténtica golosina, jaja.

Una espeutadora de luxu nes Praeres

Como siempre, dar gracies a organizadores, voluntarios sobretou (menudu día) y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Jose Luis Lastra, Xixón Runners, Gilber, CapitánPola y Luis Ardura)

--------------------------------------------------------------------------------