La Peñona Bloque (Xixón)

21 y 28 de Payares de 2014

Finales de Payares, poca lluz quédanos pa esguilar de tarde, pero saliendo a les 3 de currar en la Felguera entá podemos aprovechar una migayina. Poro, de la que voi pela Minera hacia Xixón, hubo un par de díes que paré a apretar un ratín na Peñona.

Nun quedé con nengún collaciu pa da-y con cuerda, asína que tuve un par d'hores apretando nos milenta bloques. Como únicu llogru, dientro d'un claru descensu de nivel tanto nel bloque como na escalada en xeneral que toi sofriendo, algamé'l bloque d'El Camín.

Aún así, esti bloque abúltame duru como pa poder facelu cenciellu a mou de calentamientu nel intre, poro tocará siguir entrenando ya que nestos díes tampoco fuí a repetir nengunu de los bloques duros algamaos como Camudando'l Camín o Kíla.

Poro, lo meyor d'estos díes fué intentar recuperar sensaciones y tornar a facer bloque con Abel y Fredo que nun veía dende mediaos del branu lo menos.

La Peñona bloque (Bloques visitaos)
 
Croquis modificaos por mi de la escuela d'escalada de La Peñona, por mor del grupu Facebook esistente. Gracies y col so permisu.

-----------------------------------------------------------------------

Amieva (Amieva) - Xerre d'Amieva

8 de Payares de 2014

Track: Amieva (Amieva) - Xerre d'Amieva

Sí, un día más en mui pocos meses tamos de nuevu n'Amieva. Les anteriores vegaes visitáremos la Porra Valdepinu y el Camperón, teniendo nesta ocasión unos oxetivos menores n'altor, pero bien guapos en cuanto a vistes hacia'l ríu Dobra y el Cornión.

Como siempre aportaremos a Cangues d'Onís pela autovía'l Cantábricu y la N-625, desayunando nel chigre de la Huera, pa siguir pela N-625, pasando pelos pueblos de Cañu y Tornín, cruciando la ponte Dobra entrando nel conceyu d'Amieva. Nesti conceyu, travesaremos los pueblos de Miyares, Corigos, Pervís, La Vega Pervís onde topámonos col ríu Ponga nesti casu, y siguimos camín pasando per Santiyán, Precendi, Les Vegues, Campurriondi y Ceneya d'au saldrá a la manzorga la carreterina que xube hasta Amieva.

Partimos del pueblu d'Amieva (584 m)

Yanos (Ayer) - Cuetu Cuchu

25 d'Ochobre de 2014

Track: Yanos (Ayer) - Cuetu Cuchu

La última vegada que tuviéramos el placer de dir de monte con Simón, dexáramoslu en plena Travesera del 2012-2013, camín de Poncebos con Rebe y Pau y ésta fazaña, costára-y xunto a entamar el so propiu viaxe empresarial ensín tiempu pa dir al monte.

Más d'un añu dempués, sacara una migayina de tiempu pa facer al menos, la so ruta, la qu'escoyera xustamente pa l'anterior temporada. Con esi enfotu, averarémonos hasta'l pueblu ayeranu de Yanos, del que tenemos l'envís d'ascender al Cuetu Cuchu, Cuchu o Cuetu ensín más, que ya lu sentí con dellos nomatos.

Salida del grupu en Yanos (Ayer) a 564 m

Següencu (Cangues d'Onís)

18 d'Ochobre de 2014

Intentando sacanos la espina de la visita a Vil.lanueva la Tercia, escapámonos Pau y yo nun día soleyeru hasta la escuelina canguesa de Següencu. Nun la conocemos y atopámonos con que tien un seutorín d'Iniciación con cuatru IV+ que puen tenenos bien entreteníos tola mañanina.

Asína qu'aportamos a Cangues d'Onís pa siguir hacia Cuadonga, desviándonos namái salir de Cangues hacia'l desvíu de Nedia y Següencu. Xubiremos pela guapa carretera con bones vistes hacia los Picos hasta travesar ambos pueblos.

Vistes dende la escuela de Següencu hacia los montes de Ponga

Vil.lanueva la Tercia (Los Argüeyos)

12 d'Ochobre de 2014 

Hai díes nos que val más quedase en casina y nun movese de la cama o al menos nun ser tolo optimistes que deberíeremos na qu'a la meteoroloxía se refier. Tamos, nun día típicu nel que según les previsiones p'Asturies va tar feu, d'orbayu y pa Llión bien pudiéramos tener un día guapu o al menos que nos dea pa pasar el día mediánamente bien.

Poro, tirámonos a lo xole pa la fastera Los Argüeyos en Llión, cerquino de la llende con Asturies, toos sabemos que lo mesmu ta orbayando en Campumanes ya inclusu nel Puertu Payares y tres kilómetros adientru tenemos un solín estupendu, tando bien a gustu pegaos a les paredes sur de les escueles llioneses.

Con esi ánimu, tiramos a conocer Vil.lanueva La Tercia parando como non a almorzar en casa Ezequiel, metiéndonos una fartura mañanera de pastes y bizcochos como ta mandáu, Pau, Haritz y yo. Más tarde llegaba'l grupu B o más bien R... de resaquísima: Gus, Alberto y Natalia, que más-yos valía siguir de folixa de sabadu nueche.

Increyible paré'l de Vil.lanueva La Tercia

Sotres (Cabrales) - L'Escamelláu

11 d'Ochobre de 2014

Track: Sotres (Cabrales) - L'Escamelláu

 

Lo bono d'incrementar el grupu del GM Xuan de la Borrina, ye que'l nuesu sistema de puntuación da la posibilidá d'escoyer les rutes qu'a ún-y apetez facer, pero qu'a lo meyor a otru nunca nun-y daría por poner.

Poro, montes que lo mesmu nun acaben de convencete o que vas dexando por otru que te picó más por cualesquier motivu, acaba por escoyelu otra persona y vas casi con más ilusión que si lo punxeres tu mesmu... ésto pasóme nel Escamelláu... cumal que tas fartucu de velu y nun acabes d'atopar la ocasión pa visitalu.

Richar decidió poner esti prestosu monte, que fai la cota más baxa del cordal de Juan de la Cuadra,  pero que tien na so mole caliza, una presencia ablucante dende'l camín de Sotres hasta Áliva. Como non, decidimos salir dende'l pueblu cabraliegu aportando dende Xixón pel camín davezu.

Salida dende la curvona d'antes de Sotres (940 m)

El Restañu (Amieva) - Picu'l Camperón

27 de Setiembre de 2014

Track: El Restañu (Amieva) - Picu'l Camperón

Tamos ante una de les rutes más esperaes por mí del añu, pero nin siquiera d'esti añu, ya que pertenecía a la temporada pasada quedándose nel tinteru por nun alcontrar les condiciones más afayaices pa llevala alantre.

Poro, Carlos, Richar y yo, aprovechamos la entrada de la seronda pa dir conocer con pelín de respetu esos afamaos seos d'Ozania nel conceyu d'Amieva. Pa ello, aportaremos a Cangues d'Onís pela autovía'l Cantábricu y la N-625, teniendo la guapa sorpresa de camín al almuerzu de la xuntanza con Fernan que llibró nun se cómo, pa venir a esta ruta.

Magar del desayunu nel chigre de la Huera, siguiremos pela N-625, pasando pelos pueblos de Cañu y Tornín, cruciando la ponte Dobra, pa entrar nel conceyu d'Amieva. Nesti conceyu travesaremos los pueblos de Miyares, Corigos, Pervís, La Vega Pervís onde topámonos col ríu Ponga nesti casu, y siguimos camín pasando per Santiyán, Precendi, Les Vegues, Campurriondi y Ceneya d'au saldrá a la manzorga la carreterina que xube hasta Amieva.

Preparaos na Ponte'l Restañu (736 m)