viernes, 28 de diciembre de 2012

Arcayana (Valdés) - La Paradiella

8 d'Avientu de 2012

Track: Arcayana (Valdés) - La Paradiella



Queríemos facer una rutina pa que la nuesa perrina, Kíla, que presento equí nel blogue oficialmente, jeje, tuviese nel so llibretu un montucu astur prestosu. Así que pa ello, al día siguiente teníemos que dir pa una fastera asturiana dafechu desconocía pa nós, como ye'l valle del ríu Esqueiru en Valdés.

El tema, yera que teníemos que tar pa la xinta en Xixón de nuevu y la perra paez que tenía poques ganes d'echase a durmir y ya yeren más de la una la mañana. Finalmente, algamamos a que se sobase y llueu pela mañana nun había quien la pusiese en danza, jeje.

Hai que dir pa la cama y Kíla dando guerra

Con too y con ello, pasaes les 9 y media de la mañana tamos plantaos nel pueblu valdesanu d'Arcayana. Atrás quedaron les babes de Kíla pol mieu de montar en coche, faciendo dende Xixón: el tramu d'autovía del Cantábricu hasta la salida de Somao, onde siguiremos pela N-632 hasta Samartín de Lluiña, pa tomar la As-222 hasta entrar nel conceyu de Valdés, pasando pelos pueblos de La Mafalla y Las Cruces enantes de llegar al nuesu puntu de salida.

La verdá ye que la carretera ye un dolor pa los que son de mariarse y una gociada pa los conductores afamaos, jeje. Aún así, a ritmín tranquilu, fuímos a esfrutar muncho del valle del ríu Esqueiru, que caltenía nesta dómina del añu, los collores de la seronda bien curiosos.

Puntu de salida n'Arcayana (274 ms)

El día nun ta pa munches floritures, asína qu'entainamos a dexar el coche, nuna antigua curva de la carretera y ponémos-y, pel momentu, l'arnés a Kíla llevándola atada, nun vaya ser qu'haya dalgún perru gafu. Nun ye asína, y lo únicu qu'algamamos nel nuesu paséu per Arcayana, ye qu'otru perru del pueblu amestásese a la ruta.

Pasiamos pel pueblu al traviés del Valle los Horros

Namái que salimos penriba'l guapu pueblu d'Arcayana, siguiendo'l valle los Horros, dámos-y la llibertá a Kíla, que correrá al llau del otru perrín peles pistes, ensín mayor esmolecimientu que pasalu bien. Pau y yo, tamién vamos a lo nuesu charrando, así que con echar un güeyu a la perrina dacuando, siguiremos avanzando pente mediu d'un monte madereru.

Siempre per pista ascenderemos hasta ver l'oxetivu al fondu

En dalgún puntín sedremos a ver, el nuesu oxetivu a lo lloñe, anque sabemos que tamos práuticamente nel tramu más duru, ya que llegáu a los altos de la xerra de Cougruzas, aparte de guapes vistes tendremos un caleyar más entreteníu.

Aportaremos a los altos de las Cougruzas con vistes a la mar

Asína sedrá y a los 575 ms, pondrémonos n'arba pente los conceyos de Cuideiru al norte y Valdés al sur, pa tener les vistes hacia la mar que tábemos naguando. Tamién hacia'l vistosu viaductu del Pintor Fierros sol ríu Cabu.

Namái quédanos siguir la llende pente Cuideiru y Valdés per pista con dellos recuestos

Como les vistes al sur, tan tapecíes per una ñubona, anque tienen que ser bien guapes con cotes más altes de Balmonte y Somiedu, siguimos pista alantre ensín mayores dificultaes, que travesar un colláu del qu'un grupu de caballos ye "amu y señor" y xubir al Bolao (634 ms), antecume de la Paradiella.

El caleyar faíse entreteníu coles vistes hacia'l cabu Bustu

La verdá ye que pasamos un ratín pelín malo, colos caballos ya que yeren gafos y el perrín qu'acompañábenos yera mui atrevíu y por ello, llevóse una coz que siempre quedarános na memoria a Pau y a mi.Menos mal, que'l perru, aparte del sustu, nun tenía nada, anque por si acasu, tuviemos mirándolo bien y dímos-y una chuchería de les de Kíla, pa que se tranquilizase un pocu.


Una semeya enantes d'encumar la Paradiella

Polo demás, siguiremos alantre cola pista, viendo a cada pasu, más cerquina, les casetes, antenes y demás hestories que tien nel so cumal, el Picu La Paradiella, pel que xube tamién el camín de Santiagu, hasta los sos 720 ms d'altor, sol nivel del mar, el cual ta bien cerquino a pocu más de 3km en llinea reuta.

Semeyes de cume nel Picu La Paradiella (720 ms)

Magar de la llucha incansable con Kíla, p'apaecer los 3 na semeya, de picar dalgo tamién los 3 pa recuperar fuercies y de mirar la cantidá de trastos qu'hai nel monte (hasta 5 fierros a mou de buzón o dalgo pol estilu), colamos d'ellí, que ya llevábemos casi dos hores de ruta.

Baxamos al llau de la Pena'l Gallu empobinándonos al valle d'Argumosín

Baxaremos per pista hacia la Pena'l Gallu en direición sur y pasamos pocu dempúes de siguir les envueltes de la pista, pa baxar per un cortafueos hasta'l colláu de Brañabona, anque lo suelto de la tierra del cortafueos pudiera compensase con rápidu pela pista.

Siguimos n'envueltes per delles pistes cola guapa vista d'Argumosu

Nel intre, tendremos varies opciones, como xubir per un senderu que va penriba la Pena Sombreiru, pero por nun dar más males baxaes a la perrina, preferimos garrar una pista que faldiará pel norte esta pena y quedarános unes guapes vistes del valle d'Argumosín y de la casona y praos d'Argumosu.

El tramu final fadrámoslo travesando dellos pueblos valdesanos

Ensín más, siguiremos esta guapa pista alantre hacia'l oriente, baxo un sele orbayu, que fai que prefiera recoyer a Kíla na mochila, aparte de por vela dalgo cansada. Llueu, camudaremos el sen hacia'l sur empobinándonos hacia'l Pueblu.

Esti sedrá'l primer de los pueblos d'un tramu, nel que pasaremos per Vil.larín y Oucinera, pa dir baxando altor hasta cruciar el ríu Argumosín y tener que xubir un pelin de desnivel pela carretera hasta'l apartaderu onde teníemos allugáu'l coche n'Arcayana.

Finaremos la ruta travesando'l ríu Argumosín y aportando per carretera a Arcayana

En resume, primer ruta completa d'esti Setter Inglés, que ye Kíla, na qu'anduvo 9,2 kms en 3 hores y cuartu y superó un desnivel acumuláu de 575 ms pa conocer esta parte del conceyu de Valdés y xubir La Paradiella.

Dicir, que ye una mañanera perguapa y que como puntu final a ella, sedría perfeuta una bona fartura en dalgún pueblu del camín de vuelta, pero nós teníemos xinta familiar y nun pudo ser, jeje. Si dalguien sabe un bon sitiu que lu diga.

Ta la próxima...

Camudando'l Camín descansando nel sofá

 Primer ruta per tierres valdesanes faciendo'l:Picu La Paradiella (720 ms) monte prestosu astur y vértice xeodésicu de Valdés

Ver progresos en: Retos montañeros

viernes, 21 de diciembre de 2012

Llamorgal (Llanera) - Santufirme

8 de Payares de 2012

Track: Llamorgal (Llanera) - Santufirme


Bono... quiciábes debería entamar un nuevu apartáu del blogue... d'ascensiones express o carreres de montaña o metela na parte de MTB, pero como ya nun tengo en que facer la estaya bicicletera, ya que robáronme va unos años mi bici, vamos dexala nel apartáu de monte.

El casu ye, que tenía que tachar el Santufirme en Llanera y teniendo como compañeru de trabayu a Jose, qu'anda en bici un güevu y parte l'otru y agora dío-y por correr pela montaña, decidimos facer l'ascensión al Santufirme dende al llau del trabayu, en Llamorgal.

Saliendo de Llamorgal (156 ms) col Santufirme al fondu

Poro, poco dempués de les dos de la tarde, mudámonos de ropa nes instalaciones de Llamorgal y salimos corriendo unos pocos metros pela As-241 pa meténos a la manzorga nel Pondal, xubiendo poquín a pocu hacia'l pueblu de Truébanu, onde dellos perros lladren ensín descansu.

Travesamos a bon ritmu'l pueblu de Truébanu

Magar del pasu pel pueblu, entama a ponese la cosa pindia y xústamente nel crucie que va hacia'l Mundín, camudamos el sen, hacia la manzorga, pasando al llau d'un depósitu d'augua y garrando los mayores desniveles hacia l'area recreativa de Santufirme.

Tramu perpindiu nel área recreativa de Santufirme

Bordiaremos esti guapu llugar d'esparcimientu pela mandrecha con una amplia envuelta y vamos dexar a la fín l'asfaltu, pa metenos en pista de tierra, onde tendremos dos envueltes pente los ocalitos enantes de garrar una recta final hacia'l cumal del Santufirme.


A la fín, veremos ún d'estos vértices xeodésicos a los que siempre presta xubise y comprobar l'altor que nesti casu yera de 437 metrinos, lo que nun ta mal del tou. Les vistes, pues realmente, nenguna ya que los gafientos ocalitos nun dexen ver gran cosa, aparte del esbarrumbe de les antigues mines.

Nel cumal del Santufirme (437 ms)

Nun tenemos munchu tiempu de descansu qu'a les 4 entramos a currar otra vegada, así que baxamos a fueu, pela pista de tierra y nesti casu travesaremos l'área recreativa penmediu, garrando de nuevu les pistes asfaltaes qu'han de llevanos per Truébanu hasta les instalaciones de Llamogal.


Como agasayu al esfuerzu de xubir corriendo, la baxada más llanzada y relaxada da pa echar una güeyada nun día claru a tola Asturies montañosa (dende L'Aramo, hasta Picos al fondu, con Peñamayor, Peña Mea, Retriñón...), prestando enforma.

Finalmente, nun vos fiéis de los tiempos que correr, nun ye lo mesmo que dir andando nin dir en bici, así que quedaros nun intermediu aproximáu como puntu de partida a un posible paséu. Eso sí, les cuestes en bici, tienen que mancar pero bien.

Nós, ficimos los 9,1 kms de percorríu en 48 minutinos, superando un desnivel positivu d'unos 300 ms aproximáu y sacando-y un bon partíu a eses dos hores que tenemos pa xintar nes horrendes xornaes partíes.

Camudando'l Camín yendo a duchase en Llamorgal

Carrera per Llanera pa tachar el vértice xeodésicu del: Santufirme (437 ms)

Ver progresos en: Retos montañeros

jueves, 13 de diciembre de 2012

Llaría (Casu) - Cantu L'Osu

21 d'Ochobre de 2012

Track: Llaría (Casu) - Cantu L'Osu


Paez mentira, pero esti monte teníemoslo ehí, siempre presente, siempre con ganes de visitalu... pero entre picores raros d'otros montes que veíemos nes distintes rutes, naide acababa por ponelu hasta esti añu, nel que Charly animose a pintalu na llista de la temporada.

Pa la ocasión, teníemos la suerte de contar colos collacios vascos, Fernan, Iñaki y Carlos, que ficieron con Pangua y conmigo, la cresta del Tapinón - Siegalabá el día anterior, y pa esti xuntarémonos en Rusecu (Sobrescobiu) p'almorzar un bon garrapiellu de xente.

Como siempre salimos de Xixón pola autovía minera, garrando'l Corredor del Nalón y travesamos los conceyos de Llangréu, Samartín del Rei Aurelio y Llaviana y magar del desayunu en Rusecu, siguimos alantre entrando en Casu y perpasando los pueblos de Tañes, Abantru, Les Yanes, El Campu (capital), Sotu, Sobrecastiellu, Bezanes y El Castañéu, pa xubir parte del puertu Tarna hasta unos kilómetros enantes del propiu pueblu de Tarna.

Partimos de la braña de Llaría a 918 ms

L'allugamientu del entamu de la ruta, ye pasáu l'Escobiu Les Torres, na braña de Llaría, onde na vera drecha de la carretera tendremos dellos aparcaderos pa los coches bien afayaizos, onde preparámonos con galbana los doce montañeros que fuímos a xuntanos pa la ocasión.

A les 9 y media la mañana, encomencipiamos a caleyar per una pista qu'en descensu va llevanos pegaos a la riega de la Nalona, la cual dará pasu, axuntándose a munchísimes riegues y ríos, al famosu Nalón. En tola baxada, nun habrá un segundu de silenciu y charraremos gayoleros, menos cuando vemos el nuesu destín nun claru de la viesca... el Cantu L'Osu.

Baxamos al llau de la riega la Nalona hacia'l Puente del Corral

Tenemos un día increyible de cielu azul y una temperatura mui agradable, anque no más fondero'l valle, al cruciar la Nalona nel puente del Corral, tea un pocu frescu, cosa qu'aína va desapaecer coles primeres rampes hacia la mayada de L'Ablanosa.

Ascendemos al empar del regueru L'Ablanosa con Cuetu Negru 

Tol tramu fadrémoslu, baxo les rames d'un guapu fayéu y siguiendo'l cursu de la riega L'Ablanosa, que siempre n'ascensu y cola imponente apaición del Cuetu Negru, a cada claru de la viesca, fadrános llegar a les cabañes del mayáu, magar d'una hora de percorríu.

Aportamos a guapa vega de L'Ablanosa (1086 ms)

L'Ablanosa ye ún d'esos llugares d'Asturies onde prestaría tener una cabañina d'eses tan bien cuidaes pa pasar los findes, con parrillaes colos collacios y esfrutando del paisaxe y la tranquilidá d'esti requexu casín. La verdá ye que'l sitiu bien lo merez.

A nós, sirviónos pa garrar augua na so fonte, descansar un pocu y pa que los qu'inda nun se quitaran les capes de ropa sobrantes lo ficieran, ya que per delantre descubrimos ún de les pandes más tendíes que nunca nun fuímos a xubir.

Tendida y dura ascensión pela Quemada hacia la mayada Cerréu

Alcontraremos la sienda d'ascensión, unos metros más alantre de L'Ablanosa en direición a la Vega Pociellu y sedrá como bien dixe, una especie de cortafueos qu'avanza tendíu hacia la mayada y colláu de Cerréu. Hai que dicir, que los gallos que fuéramos de monte'l día anterior, díbemos quedándonos atrás y les pates glayaben que nun podíen xubir más apriesa.

Les vistes del valle'l Nalón y de cumales de Redes abluquen dafechu

Son dalgo más de 250 ms de desnivel direutu, que xúbese dafechu a piñón, pero qu'al menos van dedicándote perguapes vistes al Cantu L'Osu a la manzorga y a valle del Nalón col Maciédome, o el Ten y Pileñes de fondu.

Aún así, les meyores vistes tarán al aportar a los 1357 ms del colláu Cerréu, onde aparte de recuperar l'aliendu vamos atopar la fastera sur del picu Tiatordos, asína como de munchos compañeros casinos como'l Cornielles, Becerrera,...

El Cantu L'Osu a la espera

Dempués d'un pequeñu reagrupamientu, tornamos a poner la vista nel oxetivu y gracies a lleer el blog de los de las claras, sabemos que nun tenemos que bordiar el xerru Fuentes penriba, sinon pembaxo y asína lo fadremos, unos per un senderu más abaxo y otros pegaos a les parés calices del Fuentes.
Arrodiando'l Xerru Fuentes pembaxo

El caleyar faíse cenciellu y pel momentu va saliendo too a la perfección, poro metémonos con xeitu na fastera de los Argayos, onde per dellos senderinos de vaques, fadrános xubir a la manzorga del Fuentes, hacia les sos Collaínes a 1600 ms d'altor.

Xubimos pelos Argayos a les Collaínes de Fuentes

La parte final hai que lluchala un pelín colos enormos piornos, pero aína desdexamos esta llucha, cuando tenemos enfrente la toma de decisiones clásica na montaña. Sabemos d'un canalizu que parte de les Vallines de Losa hasta'l colláu L'Osu y sabemos de lo pindiu que ye y de lo malo que pue tar si l'estáu de la yerba ye húmedu.

Averámonos hasta'l canalizu de les Vallines de Losa

Decidimos prebar suerte y los más echaos p'alantre (Iñaki y Fernan a la cabeza) van echar una güeyada pa ver si xúbese bien y como non, la pallabra de Fernan a la entruga de que tal? ye un... "fácil". Camiento qu'a estes altures tanto Rebe como Paula, son a pescanciar el significáu de la pallabra "fácil" de Fernan y sinon dende esti día, sábenlo dafechu.

Primer tramu mui pindiu nel que yerba resbaría y mete mieu

Alcuérdome, que tenía un profesor qu'a la mesma entruga so la dificultá d'un esame, retrucábate con un símil puxilísticu... diciendo que nun yera lo mesmu que te diera una hostia él que Tyson... pues equí lo mesmu, lo que pa ún ye cenciello pa otru ye un marrón de coyones.

Les vistes al Tiatordos y Maciédome ábrense poquín a pocu

Intentaré calteneme nuna posición dafechu imparcial, anque camiento que metíme tanto na piel de la persona que tócame más fonda, Paulina, que llegué a pasalo tan mal como ella. D'otra miente, pueu dicir que'l canalizu tien una parte mui pindia d'entamu que llueu va aselando en delles envueltes pa finar nuna parte más amplia y menos pindia hasta'l colláu.

La cara de nun tar pasándolo bien, diz muncho del tarrén nel que nos movemos

Al empar, dicir que'l tarrén nel que movémonos, siendo yerba llargo y dalgo de barru, nun da pa confiase nin un plizcu y que resbaríar o perder l'equilibriu, podría ser l'entamu a baxar rodando dellos metros con consecuencies non mui bones de xuru.

El tiempu del tramu, pente les collaínes de Fuentes y el colláu L'Osu, un hora y cuartu, pa 500 ms de percorríu y 150 ms de desnivel, diz a les clares, como nel ascensu afitamos cada pasu y ficimos un trabayu sicolóxicu pergrande pa que Pau y Rebe pudieren llegar hasta riba.

Canaliza abegosa y peligrosa col tarrén húmedu

En resume, pueu dicir qu'a vegaes ye muncho meyor tar nuna paré vertical de sextu grau esguilando con tu cuerda, que nun d'esos "cuartos de yerba" nos que movémonos los montañeros, agarraos a la yerba con les manes ya intentando que nun resbarien les botes.

Al final, ye too un tema d'esperiencia, téunica y confianza, ya qu'anque paeza que non, hai que saber movese bien nestos pasos, pero lo más importante ye tener esa confianza en que'l pie que pones nun va a fallar anque lu pongas enriba de dalgo húmedo y qu'esi puñáu de yerba nel que t'agarres, nun va arrancase si'l pie falla.

Indescriptibles les vistes dende'l Cantu L'Osu (Visu, Peña'l Vientu, Tiatordos...)

Tengo que dicir, que poques vegaes paselu tan mal na montaña acompañando a dalguien y poques vegaes, sentíme tan mal por meter a dalguien nun llugar así, anque fuera animándola tol tiempu ya intentando dar esa confianza que-y faltaba.


Cumal del Cantu L'Osu (1796 ms)

El abrazu y les llárimes nel colláu l'Osu ente Rebe y Pau, cuando viéronse a salvu, dexaron pa prau el paseu calizu hasta'l cumal y el propiu cumal de 1796 ms, nel que ficimos la semeya de grupu y descansamos un ratín pa xintar el bocata y baxar l'estáu nerviosu que teníemos munchos de nós.

Un descansu enantes de siguir pela Xerra de Pries alantre

El Cantu L'Osu, esi monte al que teníemos-y tantes ganes dexónos dalgo fríos a munchos de nós. Escoyer una bona vía d'ascensu pal disfrute d'un grupu grande ye más importante quiciás que'l propiu monte. Menos mal, qu'esi monte ufrecía unes vistes que foron relaxándonos a cada vistazu col bocata nes manes y a cada pasu que fuímos dando nel nuesu avance posterior pela Xerra Pries.

Les vistes nun se faen monótones nunca (Cascayón, Tiatordos, Brañagallones...)

Escaecemos lo malo de la ruta y metémonos no que tamos, viendo como l'avance pela xerra Pries, ye llentu, metiéndonos en fasteres de caliza afiláu, que dificulten muncho un avanzar rápidu, teniendo munches vegaes que trepar y destrepar pelos filos.

Viendo esto y la hora que ye, dos y media de la tarde, los collacios vascos, nel colláu de la Muezca (1678 ms), deciden abandonar al grupu, y van garrar la otra opción de xubida al Cantu L'Osu que teníemos, pal descensu, la de les travieses que percorren tola so paré occidental.

Despedímonos nel colláu de la Muezca (1678 ms)

Nós, nun entamu camentamos si siguir hasta la collada Cerrosa y conocer la Vega Pociellu, pero albidramos que lo que réstanos de xerra ye mui asemeyada a lo percorríu siendo demasiáu tiempu y tomamos la decisión de baxar tamién peles travieses, anque facémoslo con mayor tranquilidá que Fernan, Iñaki y Carlos.

Garramos unes espeutaculares travieses baxo'l paredón del Cantu L'Osu

La sienda baxará nun primer momentu unos metrinos, pa rápidamente tomar ya direición norte, na que dirá baxando al travíes d'un par contrafuertes onde tan los pasos más espectaculares. Hai que dicir que son espeutaculares vistos dende lloñe, pero que nel intre, nun hai sensación dalguna de patiu, ya que la traviesa ye más amplia de lo que paez.

Desdexaos estos dos pasinos, ya dexaremos de descender y caltendremos el desnivel hasta tar xusto embaxo del cumal del Cantu L'Osu, onde unos decidieron siguir la mesma sienda que lleva a les Collaínes de Fuentes y Cantarero, Pau y yo, pa nun facer un pasu llateral feu cerca del canalizu de xubida, baxamos per un pedreru a una sienda inferior a la última balconada del Cantu L'Osu.

Paez increyible avanzar per estes terraces del Cantu L'Osu

Esto obligónos a posteriori a xubir un pelín casi hasta les Collaínes, pero quitámonos de más malos momentos, faciendo ya relaxádamente, tola baxada pelos Argayos y de continuu hasta'l colláu Cerréu, onde xuntámonos toos y descansamos coles vistes del parque de Redes.


La Mayada L'Ablanosa col Cuetu Negru


Cincu minutinos bastaron de descansu y garramos esi tendíu senderu de baxada hasta l'Ablanosa, onde más d'ún prefirió baxalo corriendo pa nun retener tanto les pates. Dende esti guapu mayáu, tornamos a mirar pal Cuetu Negru y ya relaxaos del too, ficimos tol camín en baxada al llau de la riega de L'Ablanosa primeru y n'ascensu dempués cola Nalona de compañera.

Finalmente, aportamos a los coches, a les 4 y media de la tarde, dempués de 8 hores y 10 minutinos de ruta, na que percorrimos 13,1 kms y superamos un desnivel positivu de 1350 ms, pa da-y preste a esti Cantu L'Osu que pa lo bono y lo malo, va quedar n'alcordanza de xuru.


Camudando'l Camín nel Cantu L'Osu

Nueva ruta per Casu na que-y dimos preste al: Cantu L'Osu (1796 ms) que ye monte prestosu astur

Ver progresos en: Retos montañeros