Cantu La Sierra (Morcín)

 Hestoria d'esta escuelina morciniega (2023)

Dempués d'un iviernu de munchos entrenos correnderos pel Monsacru, nel que pude conocer tolos requexos y opciones posibles, acabó por prestame muncho facer la circular dende la Collá hasta'l Cuitu Rumiru, ya que podía xubir corriendo tol tiempu y descender per Covarriella a Otura pa siguir al Cantu la Sierra, onde garraba esi guapu senderu que cierra la circular hasta la Collá.
 
Hubo díes de dir apretando enforma y nun parar res y otros nos qu'averéme a echar una güeyada a posibles muros pa equipar, cosa na que venía teniendo interés nos últimos tiempos, poro fuí guardándome unos cuantos na tiesta, yendo a dar un paséu col collaciu Santos a entamos de la primavera pa ver si nos decidíamos.

Esi primer día, visitamos un murín nel valle de Robles y decidimos tirar hasta la Collá, pa pasar ver otros dos, unu primeru más curtiu en direición el Cantu la Sierra y llueu, aportamos coles últimes lluces al Cantu La Sierra y ya nun hubo vuelta atrás, ya que vimos claro, que diba salir un seutor bien guapu y sobretou una cara norte ensin roca blanca, que diba facer les delicies nos díes más calurosos del branu.

Primer día de vistazu al seutor del Cantu La Sierra

Pali pali, fueron sucediéndose les visites y entamamos a equipar la primer línea, que nesti casu sería Lamento Polea, dedicada a los fanáticos de partir polees por apretar de más jeje. Al so llau, entraríen dos víes más, como sedríen Petación Directa y la Loba Placa, faciendo quiciás el tríu de víes más mítiques y plaqueres del seutor, con una roca abrasiva y preses de toles formes y collores. 

Cabe destacar el cambeu de roca de la parte baxa del muru a la alta, camudando de roca pinchuda y abrasiva a a tacos y preses más romes qu'alcuerden quiciás al tipu de roca de Frechura. La verdá ye que tábemos encantaos coles tres primeres víes y díbemos probándoles y llimpiando, demientres Diego, fanáticu equipador, metiera les 4 plaques de la esquierda del seutor, más otra más na bóveda de la mandrecha ,que tuviera bien de tiempu con cuerda afitada.

Entamamos a trabayar cola calma na primer línea: Lamento Polea

La mayor evolución, ya que tanto Santos como yo, tábemos n'otros proyeutos d'otres escueles esguilando y nun too diba ser taladrar y trabayar, fue la xuntanza al grupu d'equipadores de Berto Moss, que metióse nos desplomes sacando la Pali Pali y Te Rompo la Cara, víes más a bloque nes entraes y con una placa guapísima na parte superior y a posteriori equiparía les dos víes más dures del seutor, como fueron No I Cantu Be Free y Muyerada Nui.

Mesa a la preba de la Petación Directa

Ente pegues de rises ente los equipadores y dalgún collaciu averáu al grupu, fueron llegando les primeres ascensiones y tamién fueron equipándose les últimes víes del seutor, como "Non e duro, e placa" y so variante más cenciella Ética Mutante (d'esto hai un montón nel mundu escalador) y sobretou la Porriwoman del Tallao, pela que nun dábemos un duru y quedó una vía fanática preciosa.

Díes de xaréu pel seutor cuando les rutes diben aumentando

La última vía n'equipase fue Refalfiu Postureru, qu'aproveché a metela al llimpiar y quitar la cuerda afitada que tenía Diego en la qu'a posteriori nomóse La Puerca. En total, salieron un total de 16 víes, nes que la mayoría tan ya con munches ascensiones y repeticiones, pudiendo entrar dalguna más residual, pero la roca ya podría ser dudosa y nun teníemos ganes de trabayar más por esti añu.

 

Santos tastiando otra creación: La Porriwoman del Tallao

No deportivo, durante esti añu, pude encadenar Lamento Polea, que valiónos de referencia pal restu de víes, ya que teníemos un grau consensáu nella y fueron cayendo dempués Petación Directa, la Porriwoman del Tallao y La Loba Placa, que fízome especialmente ilusión, por ser la primera vía completa qu'equipara y pa enriba quedó una placa finisima dafechu fanática pa los especialistes plaqueros.

 

Kíla saludando afáblemente a un collaciu utreru

Les últimes víes que pude encadenar fueron la Pali Pali, que tuvimos la mala suerte de probala coles peores condiciones d'humedá tanto Dani como yo y que llevónos más pegues de los albidraos y tamién, encadené toles versiones de Ética Mutante, que varió de posición de reunión, cola variación de grau que conlleva, hasta quedar la salida hacia Te Rompo La Cara más cenciella y la versión más llarga a la mandrecha, con un pasu de placa más duro, xurdiendo Non e Duro, e Placa.

 

Más momentos nel Cantu la Sierra: Santos en Pali Pali y Poch en Lamento Polea

Los últimos pegues, un pocu ya cansáu de dir tantos díes al seutor fueron pa la última vía que metiera, Refalfiu Postureru, que nun fui a encadenar esta temporada y que ya dexé pa prau hasta la prósima, ya qu'esti seutor ye dafechu de branu y toca dar pasu a otros seutores castigaos polos cierres como ye Figares, al que tantes ganes había de volver. 

En resume, vais a alcontrar un pequeñu seutor, nel que cada vía ye un mundiu distintu al anterior y cauna tien la so personalidá, siempre con una escalada continua y apretona, ensin metros d'esguilada tranquila y col grau según dellos collacios del valle, "pelín apretáu", pero tampoco ye pa tanto, sólo hai que dir con ganes d'esfrutar del procesu d'encadenar cada vía y del mirador más guapu de tou Morcín del valle Riosa.

Increyibles vistes del Garcilleru y Peña Manteca

Como siempre, dar les gracies a los que ya pasaron pel seutor y prestó-yos enforma, faciendo primeres, repeticiones o cagándose na madre que nos parío, con dalguna vía y grau propuestu y a los que tan por pasar, pues que respeten y valoren el trabayu fechu polos equipadores, teniendo en cuenta qu'hai víes más repetíes qu'otres y siempre dalgo pue quedar por meyorar.

Mil gracies a AsturVertical pol sofitu con material pal equipamientu, siendo'l restante puesto polos propios equipadores, asina como la ferramienta y les hores de taladrar, llimpiar, cepillar, serruchar, fesoriar, desbrozar, repisar y demás hestories pa tener esti requexu nel qu'esfrutar de la escalada.

Los croquis sedrán espublizaos como corresponde al traviés del grupu d'escalada AsturVertical.

Camudando'l Camín nel valle Riosa

Premoñu (Les Regueres) - Ania - Picu La Cuesta - La Llonga

11 de Payares de 2023

Track: Premoñu (Les Regueres) - Picu La Cuesta

Continuamos intentando esfrutar del monte, contando colos problemes físicos na cadera y tocaba ruta del grupu pero nun hubo munchu ésitu de convocatoria, asina que decidíme a dar un pateín enantes de la comida familiar que tenía, poro avisé a Benjamín y animóse rápidamente a visitar Les Regueres col envís de facer l'últimu vértice xeodésicu que quedábame per conocer.

 

Partimos de Premoñu (90 m) a la vera'l ríu Nalón

Pa ello, quedamos a les 9 y media la mañana nel pueblu de Premoñu, onde va añinos díbemos a esguilar a la vera'l ríu Nalón y onde tengo que volver ya que tengo ganes de conocer otru seutor qu'equipóse va años. Preparámonos, aparcando cerquina de la ermita de Santana y saldremos caleyando carretera abaxo, durante mediu kilómetru hacia'l barriu de Picarín, onde visitaremos el molín de Picarín, que toma agües de la riega Andayón.

Visitamos el rigu Andayón y el molín de Picarín caleyando per carretera

Nel intre, ponse un pelín a orbayar y llueu de ver el guapu y remociáu molín, por dalgún motivu, envede salir per carretera hacia les cases de Picarín, decidimos cruciar el rigu Andayón atopando un camín empedráu bien guapu, que diba llevanos hacia'l pueblu d'Ania nuna xubida tranquila, anque a la postre, diba dexanos ensin conocer la Cueva Oscura, marcada en dellos cartelos de percorríos.

 

Travesamos Ania y entamamos ascensu hacia'l picu La Cuesta

Poro, ensin querer casi, aportamos al pueblu d'Ania, parando al fin d'orbayar pero quedándonos con un borrín que va acompañar los nuesos pasos travesando'l pueblu hasta la fastera de la Gobia, onde vamos metenos nunos praos, siempre pelos bordes, pa salir ya a monte baxo, per onde algamaremos sienda hasta restolar los últimos metros hasta'l nuesu oxetivu: el vértice de la Cuesta de 278 m.

 

Facemos cumal en La Cuesta (278 m) vértice del conceyu Les Regueres

A estos altores el día, paez espabilar un pocu y les nueses vistes ábrense a tola fastera central astur, destacando l'averáu Picu Grande na Degollada, tol cordalín del Naranco col picu Paisanu y ya pal sur tol cordal de L'Aramo, Monsacru y hasta monte de Proaza como'l cordal de Caranga. La verdá ye que dacuando, vien estupendo alloñase de los nuesos montes preferíos y velos dende monte más baxo con otra perspeutiva dafechu mui prestosa.

 

Baxaremos hacia La Cuesta y Areces pa siguir hacia la Llonga

Llueu d'un pequeñu descansu, descenderemos hacia les cases de La Cuesta, pasando pel depósitu d'agua de la capital de les Regueres, Santuyanu, el cuál tenemos xustu embaxo nuesa. Saludamos a la paisana de la primera casa que topamos y al so perru, que tenía pinta gafa y garraremos camín, hacia'l barriu d'Areces, onde vamos parando ca pocu a pañar castañes valdunes.

 

Descendemos pel valle la Llonga sorprendiéndonos esti guapu llugar

Aportaremos a la primer casa d'Areces y vamos garrar una pista a la manzorga, que va llevanos a conocer quiciás el requexu más guapu de tola ruta, como ye'l valle la Llonga, pel que descenderemos siempre pero guapu camín, con viesques de castaños a los llaos y praos perbon curiaos, siendo una auténtica maraviya esti caleyar hacia'l pueblu de Premoñu.

Con esti tramu final tan prestosu, onde esfrutamos de los collores de la seronda, aportaremos a Premoñu de vueltu, zarrando esta circular de malpenes de 7 km y +/-240 m positivos, que tuviéronmos entreteníos nesta mañana serondiega durante 2 hores y media de paséu. Comentar qu'a la nuesa ruta, puédese visites a la Cueva Oscura, los palacios de les Regueres o los Meandros del Nora, pero nun me responsabilizo de la cantidá de kilómetros de carretera a xintar.

Camudando'l Camín nel conceyu Les Regueres

Figares (Morcín)

5 de Payares de 2023

Vuelve la temporada de Figares, escasa temporada d'esguilada en Figares, que fai enllenase esti maraviyosu seutor demientres los 3 meses y mediu nel que por mor de regulaciones dafechu inxustes y desmedíes, queda zarráu esti seutor por utre y digo por utre, ya que la zapiquera, tien una regulación menor y ye munchu más controlable.

A la escontra, tamos antes una creciente comuna utrera en Figares y en xeneral en Morcín, lo que ye evidente a cualesquier llugar que vayamos a esguilar, pasiar o visitar del conceyu, por estes regulaciones nun tienen xacíu dengún, ante l'aumentu y el total pasotismu d'estos increyibles animales ante la presencia humana.

 

Baxando al muru Este del picu Figares

El casu ye qu'esti añu, sí que diónos un pocu más por volver hasta Figares, ya que nel añu 2022 diónos tanta pereza que malpenes dimos unos peguinos a dalgún posible proyeutu pero vímosla lloñe y nun fui a motivame lo suficiente pa enfrentame al Promontorio, coles ganes necesaries, asina que llimpiela una vegada más, pero nun-y dí siquiera unos pegues decentes y con motivación.

Dando unos peguinos pal encadene de Paseo Vertical con Suco y Rubén

Esti añu, teníemos dos grandes motivaos del seutor, como yera Anna que dexara Masterchimi l'añu pasáu vista pa sentencia dempués de facer Oficial del Metal y Dani, que probó Kiluxa y namoróse, dexando pa prau Paseo Vertical, na que la rotonda brutal qu'hai que facer pa facer los pasos, nun-y motivó lo suficente pa continuar proyeutándola.

Personalmente, nun sé mui bien por qué, vila factible y púnxeme más en serio con ella, tanto pa controlar bien los pasos duros, como pa controlar meyor si cabe los pasos sicolóxicos ya que'l vuelu llateral ye pocu apetecible y cuando entamé a dar pegues d'encadene na parte más lloñe de la llínea de chapes había que dir por railes cláramente.

Anna en Masterchimi y Santos en Oficial del Metal

 

Al final, tanto Dani como yo, fuimos a encadenar dambos proyeutos (Kiluxa paecióme mui dura pa esti añu (7c+)), quedando nel mió casu, Paseo Vertical de 7b+, ya que nun me paez que llegue al 7c, a non ser que fuerces los pasos per unes regletes rascaes, cuando ties a mediu metru a la drecha cantos más agradables. 

Pa estes coses, suelo siempre apuntame les víes de lo que me paecen y nesti casu, faciéndola pero onde yo la fice, nun pueu apuntala de 7c, porque nun llega. Sicasí, la vía ye guapa, anque pa mi idega nun ta equipada per onde la llinea ye más evidente, pero bono, una menos, que dedicámonos a esguilar linees y non graos.

 

Apuraremos lo que queda de temporada pa tener más tocada dalgún otru proyeutu y si esti añu faise una regulación menos salvaxe estiraremos la temporada hasta onde se pueda, sobretou esperando qu'Anna pueda encadenar Masterchimi cola que lleva una llucha contra la vía y coles condiciones de moyaura de les sos chorreres.

Figares
 
Croquis de la escuela d'escalada de Figares, por mor de la Asociación de Escaladores Astur Vertical. Gracies y col so permisu.  

-----------------------------------------------------------------------------

L'Altu La Cobertoria (L.lena) - Bildeo - Brañavalera - Monte Mofusu

29 d'Ochobre de 2023

Track: L'Altu La Cobertoria (L.lena) - Bildeo - Brañavalera - Monte Mofusu 

Continuamos a la gueta de rutes pa tolos gustos, que vayan poniéndonos un pelín a tonu, que nun lo pase yo mui mal cola cadera y que de pasu, sírvame pa intentar conocer dalgo nuevo y tachar dalgún oxetivu de los miós llistaos, como ye nesti casu l'últimu vértice xeodésicu del conceyu de Quirós, como ye'l Picu Bildeo.

Pa ello, tamién voi repetir esta vegada, monte principal del día, col picu Brañavalera al que ya xubiera dende Tiós en solitariu va dellos años nuna ruta bien potente y guapa y tamién, averaríame hasta esti maraviyosu mirador, en plena carrera de Güeyinos del Diablu, aportando hasta'l cumal con una fundida física increyible.

 

Partimos del Altu La Cobertoria (1218 m)

Nel día de güei, un día preciosu con una lluz increyible, pero con un vientu fríu terrible, vamos salir hacia Brañavalera dende L'Altu La Cobertoria, poro, quedamos pa xuntar coches en Mieres del Camín y averámonos hasta la Cobertoria pel conceyu de L.lena, onde entamamos a caleyar cómodamente per pista con vistes al conceyu de Quirós.

Cualladrona (Morcín)

26 d'Ochobre de 2023

Casi nun sé dicir, cuando, nin cómo entamé a probar Esclavos del Grado (7c/+) na Cualladrona, eso sí, entamé a da-y pegues cuando nun tenía ganes d'afrontar na nuevu yo sólo. Asina que los pegues fueron, a sabiendes que quedábame pergrande.

Sicasí, fue fulminando al mió ritmu, ye dicir, ensin priesa, ruta tres ruta, hasta que n'Abril, llueu de facer Aker y Soul y Roca Norte, metíme con xeitu a por esta vía, dándo munchos pegues serios ya, algamando'l bloque en dalgunes ocasiones, abandonándola en Mayu, cuando vinieron unes selmanes de meteo fresca y tornamos a la Carba, al encadene de Distopia Primaveral.

Daquella tuviera dando pegues buenos con Rubén y esti final de branu y seronda, tornáremos a Esclavos tanto Rubén primeru, como Dani y Tolo dempués, quedándome sólo pa encadenar, ya qu'ellos fueron más rápidos nel encadene. Pela mió parte, tenía mui bien tola parte alta, pero anque ficiese'l pasu duru d'abaxu, había dalgo na parte alta, que me podría tirar hasta que camudé a salir pela placa con un métodu de Dani.

Santos na entrada a Esclavos del Grado

Ehí, ya camudó'l chip y tan sólo tenía que ser capaz de facer el bloque, ya que tol restu la vía yera casi capaz de facelo casi ensin reposar dempués del bloque. Los díes fueron pasando y los pegues tamién y ya na última selmana, enantes del cambeu d'hora, quedándome ensin lluz pa salir de currar de tarde y tirar a dar pegues, hubo que facer les últimes apuestes.

Nesa última selmana, fuera de martes a dar unos pegues alcontrándome cola meyor condición y ye que pola mió estatura, pa quedame d'esa regleta, necesito'l meyor tactu ya que llego de milagru n'estensión y necesito ser capaz mover pies dempués, sacar la manzorga a un invertíu y ya poder zarrar la presa clave, pa llevantar pies y siguir esguilando'l restu de la secuencia dura.

 

Santos nun de los meyores pegues d'Esclavos del Grado

Nin con bon tactu fuí a facela y llueu de falar con Dani, qu'averose'l xueves hasta la Cualladrona por acompañame, volví con un día de calufa y sudor, que nada bono paecía que diba traer, pero por suerte o más bien insistencia estrema, fui a facer el pasu y llegando al reposu matándome, pa llueu centrar y nun fallar col encadene.

Enxamás, na mió vida, diera tantos pegues a una vía y nun tengo vergoña en dicilo (55 infames pegues) y ye que los que somos unos mataos, tenemos namái que la insistencia, el trabayu y ser testerón, pa facer víes qu'a lo meyor nin mos va bien, nin deberíemos perder el tiempu nelles, pero de momentu lo que prebo, lo encadeno, váyame bien o non... ya veremos si toca dalgún día abandonar proyeutu, alcontrando esa Rambla particular.

Con esto dicimos alón, a la Cualladrona esta la temporada siguiente, onde de xuru tendremos más víes a prebar, ya seya nel seutor de la Cualladrona, nel Texu u onde esos incansables equipadores, Fer y Poch, sigan creando tanto víes naturales, como retocaes en muries ensin cantu y enllenes de polvu blancu de cara norte.

Mil gracies pol trabayu collacios... ya nun soi Esclavu del Grau

-----------------------------------------------------------------------------------

Ruil.lazo (Los Argüeyos) - Picu Correciellas

21 d'Ochobre de 2023

Track: Ruil.lazo (Los Argüeyos) - Picu Correcillas

Dempués de los díes de patéu per Somiedu, descansábemos quince díes y volvíemos al monte, con una meteo dafechu distinta al calor que pasamos de daquella. Esta vegada, tenemos un día serondiegu, fresquín enforma y col golor esi de les primeres ñeves nel ambiente, tanto que según vamos conduciendo hacia Llión, acolumbramos esi mantu blancu na parte alta de los cumales del macizu de Penubina.

Atrás quedara l'almuerzu en Mieres del Camín, onde xuntamos coches, conduciendo pel Puertu Payares alantre, hasta Vil.lamanín, onde saldremos hacia Cármenes primeru y llueu hacia la fastera de Vegacervera, desviándonos hacia'l pequeñu pueblín de Ruil.lazo, onde tendremos el nuesu puntu de partida.

 

Partimos de Rodillazo (1315 m) nos Argüeyos

Tamos en mediu d'un mundiu de montes llioneses del Cordal Cantábricu y sincéramente, tovía perdémonos un pocu, ya que nestos años, patiamos Asturies con xeitu, pero darréu, vamos intentar conocer meyor esta Asturies Cismontana y nesta fastera, la cantidá de montes de gran valir son ablucantes: Bodón, Buicioso, Valdhorria...y el nuesu oxetivu el picu Correciellas o Polvoreo.