19 de Mayu de 2021
Afayaivos al nuevu mundín de rutes a la carrera y ye que munchos montes, sobremanera nel occidente, pueden nun ser tolo atrautivos que deseyavos pa programar una ruta col GM Xuan de la Borrina. Poro, que meyor que poner los playeros y el pantalón curtiu y facelos corriendo a poder ser nuna circular un pocu curiosina.
D'esti xeitu, garraremos a la compi de carreres pel monte, Montse, pa tachar ún de los Techos de Conceyu y Monte Cimeru d'Asturies como ye'l Picu Grande na llende los conceyos de Candamu y Les Regueres.
Partimos de la Ilesisa de Sotu (173 m)
Pa ello, saldremos dende Sotu, nel conceyu Les Regueres, dexando los coches al llau de la ilesia, pa descender un pelín y xubir pente les cases d'El Pandiellu, onde hai que tener güeyu colos perros, porque hai dos mastinos mui gafos, anque por suerte tan ataos.
Escaecemos l'alcuentru perruno corriendo pista arriba hasta L'Altu'l Valle, onde desviámonos a la mandrecha col envís de percorrer tol Monte Pravia. Pasaremos pela fastera de Piedrafita, onde alcuéntrense unos túmulos, anque nun vimos restos de na y ascenderemos al Piquín pa descender pela Llaguna hasta L'Altu La Collada.
Aportamos al Altu La Trapa pa siguir hacia los Picos del Horru
Dende equí, tocarános xintar con patatinos un kilómetru y mediu de carretera, cortada por argayu, hasta L'Altu La Trapa onde ya garrarmos un senderín que déxanos na pista de los eólicos y al llau del miraor de los Picos del Horru, onde asístiense delles trincheres del frente del Nalón en Candamu.
Facemos dende Los Picos del Horru al Picu Grande pa descender al area de la Degollada
Atrás dexaremos les vistes hacia'l picu Taborneda y el Gorfolí, baxando a la pista de los eólicos pa pasar pel vértice del Picu Grande (624 m), anque nun mos dimos nin cuenta y sin querer entamamos a baxar a fueu hasta l'area de la Degollada a la gueta d'una fonte, la cual nun alcontramos, pero mierda y basoria a palaes.
Toca visitar el tabayón de la Maserona... perguapu requexu
Nun placenteru descender pel Montecin y la Mofosa, continuamos a la solombra del pinar hasta'l desvíu hacia la riega Les Bolgues, onde nun llamargosu senderu vamos visitar el tabayón de la Maserona. Dacuando presta pola vida, visitar estos requexos pocu conocíos y perguapos nuna Asturies que tenémosla muncho menos conocida pesie a lo averáu a les ciudades d'Uviéu y Avilés.
Cola Maserona... puntu más guapu de percorríu
Colos playeros embarraos pero contentos por conocer tan guapu requexu, damos vuelta al senderu hasta la pista, pa facer la cabera ascensión del día, de nuevu hasta L'Altu'l Valle, onde aparte de topanos el nuesu camín de venida, zarrando la circular col descensu hasta Sotu, visitando de nuevu tan amables perronos.
Ascendemos de nuevu al Altu'l Valle pa descender a Sotu
En resume, tarde más qu'aprovechada na que conocimos un pelín más el nuesu país, faciendo un total de 18 km y 675 m de desnivel acumuláu positivu en 2 hores y media, ganándonos unes birres en Santuyanu cola compañía de Jorge.
Camudando'l Camín nes Regueres
No hay comentarios:
Publicar un comentario