Vibuli (Ponga) - Seu Vibulines - Tuba - Peña Salón - Nochendi - Toyu - Baxeñu

1 d'Avientu de 2024

Track: Víboli (Ponga) - Seu Vibolines - Tuba - Peña Salón - Nochendi - Toyu - Baxeñu

Última ruta del añu col GM Xuan de la Borrina, enantes d'una inesperada por lo rápida intervención pa operame de la cadera, que llevábame machacando dende la selmana santa del 2023, pudiendo facer nestos tiempos muncha escalada y dalgo de monte pero con dolor abondo. 

Al llunes siguiente d'esta ruta per Ponga, tenía'l preoperatoriu colo que camentaba un mes mínimu de tranquilidá hasta la operación, pero esi mesmu día ufreciérenme operame al día siguiente, asina qu'ensin pensalo demasiáu fuimos p'alantre y nel mes d'Avientu quitáramos d'enriba la operación, tando nel intre, nel procesu de rehabilitación, col envis d'intentar tornar a l'actividá pa la primavera dafechu.

 

Salimos de la redolada de Vibuli nel aparcaderu de les Mesties (715 m)

Nesti primer día d'Avientu, aportábemos cola calma a Vibuli nel conceyu de Ponga, onde ya tuviéremos va dellos años ascendiendo a Sen de los Mulos y la Pica Subes y pasáremos bien cerquina na nuesa primer ascensión a la Peña Salón, dende les cercaníes de la puente Bidosa. Esta vegada la idega yera conocer los seos de Vibulines, que daquella nun yeren tan conocíos y escapáronse a la nuesa circular.

Pa ellos, almorezareos na Huera en Cangues d'Onís, pa siguir l'escobiu los Beyos alantre, que tantes rutes diónos durante estos años que llevamos faciendo monte per Asturies y más en concreto nos conceyos d'Amieva y Ponga. Xubirmeos pela foz de los Andamios en coche, lo que ya ye toa una aventura, ablucando col llugar y les parés que cayen a dambos llaos de la foz del rigu Vibuli.

Covarriella (Morcín)

Seronda del 2024

Continuamos trabayando pela Covarriella, una vegada que tuvimos en setiembre l'apertura de los seutores orientales del Monsacru, zarraos pel añeramientu de zapiquera, que fácil que vuelva a repetise pal 2025 pente'l 1 de Marzu y el 31 d'Agostu.

D'esti xeitu, aprovechamos y namái que pude, subí un día en solitariu con Kíla y demientres Dani ocúpase de trabayar n'Aguya Madalena, yo metíme nel Aviru Campón, col envís de recuperar el pie de vía (pie de Kíla), col sofitu increyible de la perrina, que va faciendo cames y dexando repises embaxo de cada vía.

 

El nuesu llar particular... La fastera oriental de la Covarriella

Aparte del acondicionamientu del pie de vía, que rematamos xunto a Dani y Becky otru día que fuimos con material de desbroce, dexé una cuerda afitada na parte alta, alcontrándome dos paraboles esistentes, poro punxe una reunión que llevaba y rapelé mirando les posibilidaes a la mandrecha de les víes ya esistentes.

Xustu, onde entama la continuidá de roca, ya que na parte alta hai muncho "prau" como p'allargar les víes, alcontréme otres dos chapes a mou de reunión, qu'aproveché pa meter la reunión de lo qu'a lo postreru diba ser el final de dos víes nueves: Escampla la Borrina y Pie de Kíla.

 

Díes al solete na Aguya Madalena onde hai un bon garrapiellu de víes nueves y dures

En xunu, xustu'l día que diba intentar encadenar la última vía que tuviera prebando, apareciera'l guarda a echanos, más menos, amáblemente del seutor. Asina que tocaba volver a tastiala ya intentar l'encadene, sicasí, enantes d'eso un día con Santos, fuéramos a da-y un pegue a la vía a la manzorga'l seutor, faciéndola al segundu pegue, cotándola de 6c, desplomadín y pelín físicu pero mui guapa, anque con un tramu de roca feble.

Col pasu de los compañeros, tiramos bloques y llimpiamos tolo que pudimos, asentando'l grau nel 6c, sicasí, munchu procuru pente la segunda y tercer chapa, onde tenemos pendiente poner un cordín afitáu, pa facer el tramu de roca malo aseguráu, namás que salimos del desplome anicial pa llueu ya poder esguilar cómodamente ya que la roca meyora increyíblemente.

 

Equipando Escampla la Borrina pente'l ñublu y les vaques

Con 4 de les 5 víes encadenaes esistentes, centréme na de más a la mandrecha, cayéndome nel últimu movimientu duru hasta tres vegaes enantes de facelu y encadenala, paeciéndome 7b sele quiciás, pero 7b. Dempués, vendríen varies persones detrás, con métodu ya afitáu per mí y coles preses llimpines que dixeren que pudiera baxar a 7a+, asína que vamos dexala cola barrina y que'l restu d'esguilaores asiente'l grau.

Sacante d'esto la vía, ye 5 estrelles, con 4 chapes apretones enforma y regleteres y llueu munchos metros d'escalada perguapa que rondará'l 6b hasta la cadena. Con esti encadene, ya quedábame ensin trabayu nel Aviru Campón así que tocaba metese a equipar y prebar dempués dalguna nueva vía.

Dani probando la finísima y apretona entrada del 7b del L'Aviru Campón

Un domingu de meteo inestable, con bien de borrina, averámonos Ana y yo hasta l'Aviru y pente'l borrín tuviemos trabayando un pocu metiendo tola línea esi día, pente los dos y dándonos tiempu a da-y un peguín pa probar los pasos, paeciéndonos dura enforma, camentando que sería 7c de xuru y qu'Escampla la Borrina, sería un bon nome.

El siguiente día de prebes, xubiera'l collaciu Santos a macear los pinchinos qu'abrasaben nes preses principales de la vía y púnxose a llimpiar una regleta al llau d'un hombru, rompiendo la regleta, ensin danos cuenta que yera una puente roca, lo qu'a lo postreru, quedó un picu, clave pa poder movese a la entrada del bloque más duru de la vía.

Santos esfrutando d'unos a la segunda vía'l seutor (7a/+)

 

Dempués de pegues y más pegues, alcontrando hasta tres métodos distintos pa facer el bloque Santos, Dani y yo, quedéme a les puertes de facer la primera ascensión, cayéndome dempués del bloque, algamando l'encadene Santos, nun pegue épicu, nel que pudo cayer a cualesquier movimientu.

Magar de la primera, tocaron varios díes con posibilidaes de facela, anque manquéme nel antebrazu, por mor del métodu usáu, tirando d'un monodeu n'estensión, que tengo caltener ya qu'asina tenía pensada la vía y asina saldrá, ya qu'a testerón nun me gana naide, anque ya nun sé si me dará tiempu a facela antes del cierre.

Rubén nes apretaes d'aniciu del 7b del Aviru

Demientres cayeron pegues de preba de varies persones, Dani cuando algamó'l so métodu, tamién fue a facela, demientres yo centréme n'equipar y prebar otra vía a la manzorga d'Escampla la Borrina, que n'honor al trabayu de Kíla nel seutor, nomóse como Pie de Kíla y que pel momentu nun tien tovía primera ascensu.

Cola supervisión milimétrica de mio, Santos volvió a xubir cola so maza a quitar pinchinos abrasantes de les milenta regletes esistentes de la vía, paeciéndo-y que salía guapísima, teniendo la mesma sensación que yo cuando la probara, una ruta 4 chapes escalables, con un reposu mediu malu y ya, a fueu nuna secuencia, de presa mala, llarga hasta cadena.

Santos dando primeros pegues a Escampla La Borrina (7b+)

L'últimu día, que tuviera pel Aviru, diéra-y un pegue a Escampla la Borrina, ensin veme motiváu pal encadene, metiéndome entós en Pie de Kíla, aportando a la secuencia dura, cayendo a la so entrada. Cola calma, probé tolos movimientos y chapaxes, saliendo tolos pasos, apretando, pero saliendo hasta cadena, con sensaciones de rondar la vía, el 7b/+.

 

Quiciábes ye una vía mui de mi estilu, más qu'Escampla la Borrina, qu'aparte del bloque tien una secuencia de pasos llargos, que pa mi estatura faen que seya más duro y que cayera tres vegaes dempués del bloque, asina que nun tengo mui clara la cotación pa esta vía, ya que los collacios tornaron per ellí nos últimos tiempos, conmigo ya fuera de xuegu y viéronla infame por parte de Dani, que nun la probara y durísima, por parte de Santos que ya la tenía tocada.

 

Croquis actualizaos de L'Aviru Campón

Cuando comento que toi fuera xuegu, ye porque enantes de la Puente d'Avientu, tocóme pasar por boxes pa operame de la cadera, asina que tamos en plenu procesu de recuperación, poro nun sé cuando podré tornar al trabayu y dexar al menos equipada, la última vía que quería meter esta temporada.

Ensin más, agradecer a los que pasaron per esti seutor a trabayar antaño, el Pingüi (del que nun sé cuantes víes son suyes, quiciábes tres), ya que paezme qu'escaladores de la Cuenca, metieren camiento, los dos víes de la manzorga. Sicasí, lo importante, ye que recuperemos estos seutores escaecíos nel tiempu, porque sacante la primer vía nesi tramín, el restu, la roca ye ablucante y les víes son toes 5 estrelles.

-------------------------------------------------------------

Caranga Baxu (Proaza) - La Riquiebra - Canal del Cirio - Llampaseca - La Forcá - La Corraína - Senda La Cruz

23 Payares de 2024

Track: Caranga Baxu (Proaza) -La Riquiebra - Cirio - Llampaseca - La Forcá - Corraína - La Cruz

Ruta que tenía prevista dende l'añu pasáu, pero qu'ente la lesión del cadril y que nun mos xuntábemos los interesaos, quedó nel tinteru, hasta que la revisamos en condiciones, viendo los reportaxes de Victor (Pindio), Javi Cienfuegos y Yonatan (Los de las Claras), camentando que pudiera danos tiempu nesta dómina l'añu.

D'esti xeitu y avisaos toos de dir col equipu de bregar, xuntámonos nel pueblu proacín de Caranga Baxum, a les 9 la mañana, preparándonos pa salir a y cuartu, travesando les cais de Caranga, hasta la parte alta, onde atopamos camín, hacia los praos d'enriba'l pueblu, pasando pel depósitu d'agues que ye bon referente de que vamos bien.

 

Partimos de Caranga Baxu (250 m) con rises nervioses

Dende'l depósitu siguiremos camín alantre, hasta onde entama una vallina que paez nun tener salida de frente, teniendo que salir a la manzorga per una viesca, alcontrando senderu penriba d'una muria d'un prau, pa siguir siempre viesca alantre cola vista puesta nos parés del Risquiebru, enriba nuesa, a los qu'aportaremos travesando una llerona pelín inestable, na que topamos rastru de tar pisada y que vamos negociando como meyor podemos. 

Vamos ganando altor, sacando vistes al valle del rigu Teberga tres de nueso, mirando tamién con atención a la muria La Riquiebra onde topamos delles utreres y una cuevona na manzorga ensin accesu dalu. Al final de la llerona, toparemos que'l canalizu superior nun tien posible trepada, poro debemos salir a la mandrecha per una resbariosa viesca, upándonos a la parte alta del canalizu onde atoparemos rastros de senderu.

Teyeo (L.lena) - El Rebel.léu - Monte Tixirúa - La Escrita - La Tesa - La Caviyera - Treslacruz

9 Payares de 2024

Track: Teyeo (L.lena) - Monte Tixirúa - La Escrita - La Tesa - La Caviyera - Treslacruz

Ruta que tenía preparada dende va tiempu, ya que quería que'l grupu conociese la guapa foz de la Caviyera, que yo conociera baxando a fueu na Güeyinos del Diablu y que paecíame que paga la pena facela con calma y esfrutando de cada pasu. Sicasí, prestábame preparar una circular montañera y potente, poro púnxeme a investigar como ascender a la Tesa, de dalguna manera diferente, ya que la normal ficiéramosla cuantayá dende l'Alto'l Palo.

Como non, la poca info qu'algamé vino del blogue del collaciu Victor "Pindio" qu'anduviera a la recoyeta de nomes, na faldera de les canales que quería conocer. Poro, fícieme cola parte del track que servíame de referencia y tiré de "mapa y llapiceru" pa trazar la llínea a siguir peles pindies vallines que queríemos ascender.

 

Partimos de Teyeo (650 m) al pie del rigu Güerna

Sábadu de madrugar, tomando'l cafetín en Mieres, onde dexamos coches pa dir na furgo hasta Teyeo, preparándonos nun día pelín frescu y húmedu nel entamu, saliendo a caleyar pocu más alantre les 9 la mañana, cruciando'l rigu Güerna pa salir hacia les cabañes de Rucao, entamando a calecer músculos y dándonos cuenta de la sudada qu'espéranos güei por mor de l'altísima humedá.

Siempre per pista, diramos ganando desnivel, algamando vistes hacia la fastera contraria del valle'l Güerna, distinguiéndo guapos montes como la Carba Valsecu o el Tapinón y Siegalabá, que ficiéramos en travesía va dellos años, casi nestes feches, daquella con ñeve na parte alta y esti añu escosu dafechu y sin pinta d'entamar l'iviernu nel intre.

Entragu - Pena Gradura (Teberga)

Tolosantos 2024

Puente de Tolosantos, con bon tiempu, asina qu'averámonos hasta Entragu en Teberga, col envís, d'intentar continuar trepando tolo posible siguiendo la inercia que trayiemos d'Olba. El xueves parábemos pel aparcaderu d'Entragu, dando un paseín con Kíla hasta la Esplanada, viendo que taba bastante moyáu, tol tema chorreril, asina que diba tocar plaquear enforma.

Al día siguiente, llueu d'una nueche con conciertín nel Narciso, qu'estendióse un pelín de más, col día nubláu tiraremos hasta la Esplanada, metiédonos a prebar la Nirvana orixinal, una placa infecta de 7a+, al que-y metí un par de peguinos, enantes d'abandonala por temor a desyemar nel primer día.

La Pipeline L1 fuera la ruta más prestosa del puente

A última hora, llueu d'unes hores infames de solana, pudiera probar la Pipeline L1, que montárala Rubén, cayéndome de la cabera cinta a cadena, onde tien el pasu en realidá, dexándola montada pa madrugar al día siguiente, cosa que nun fuimos a facer, pente varios desayunos y pa cuando xubimos probara Anna la vía, sacando tolos pasos y cuando tocó meterme a dar pegue d'encadena, ya entrara'l sol xubiendo dende la tercer cinta sudando como un pollu, cayéndome na placa por nun mirar bien los pies.

Rubén destruyendo tolo que pillaba na Esplanada

 D'esti xeitu, escapamos pa la Esplanada onde taben Ani y Rubén, pasando'l restu'l día, dando unos peguinos pela mió parte a la Lady Di y Anna encadenara Jayefante, que tenía pendiente y probara la Dodi (7a+), costándo-y sacar los pasos d'abaxo. De la que baxé de desmontar la Lady Di, ya que nun me lo daben les yemes, probara los pasos en polea y allorié, con como pude facela a vista poniendo cintes.

 

Mañanes d'Entecampos y Esplanada aprovechando hasta que pegaba la solana

Dempués de cenar nel Sobia y pasar un ratín nel llocal del club, planchamos la oreya bien ceo y vamos llevantanos prontín, tando nel pié de vía d'Entecampos a les 9 y media la mañana. Bien motivaos, esta vegada, tócame entrar primeru y voi caleciendo deos, na fría roca, poniendo les cintes hasta la placa, onde cayera al día anterior, sacando sin problemes los pasos de placa y reposando con calma, antes d'entrar al bloque final, qu'esta vegada nun me costó gran cosa, faciéndola la Pipeline L1 pa calentar.

Anna entrara con brenga dempués, cayendo na placa, pero matizando bien los pasos, ya que-y quedaba pelín llargu un pasu llateral y tira dempués hasta la parte alta, onde resuelve ensin mayores problemes el bloque final, quedándo-y pendiente pa otra vegada, ya que nun hai quien pare ya de calor nel paré d'Entecampos.

Nueche estrellada... xelada mañanera asegurada

Cola mesma, decidimos baxar a la Esplanada, onde tamos un ratín tumbaos esperando por Ani y Rubén, decidiendo dar un par de peguinos a la Lady Di (7a) de nuevu y a la Dodi. Por suerte, paez ser qu'al tercer día d'escalada va too rodáu y fáigola poniendo cintes tamién, pudiendo montar a Anna la Dodi, de la que baxo, metiendo un pegazu y llevándosela tamién, quedándonos ya con cara de y agora que.

Pa rematar la xugada, Rubén fizo al mesmu tiempu Entropía a vista y poniendo cintes y Ani taba reventada de los dos díes enantes, asina que la decisión yera unánime, colar pa Samartín a tomar el vermú y xintar un menú, pa pasar la tarde tiraos tranquilamente per Teberga.

---------------------------------------------------------------------

Olba (Teruel)

Del 19 al 26 Ochobre de 2024

Vacaciones más que merecíes, pa desconectar d'un branu enllenu d'hestories de toa triba, nel qu'esguilamos muncho, pero en permales condiciones. Poro, les ganes de fuxir de la mala meteo asturiana y zarrar así la temporada esguiladora braniega yeren totales, col envís de trepar lo másimu posible en graos un pelín amables, que pudieran salir al pegue o al segundu máximu.

El destín, pues pa min yera claru, ya que dempués de conocer Olba na selmana santa gustárame enforma, animándose Orlando y faciendo la tripla Ana, dempués de dar más vueltes qu'un perru p'acostase hasta que decidióse a venir. D'esti xeitu, garramos un apartamentín n'Olba y enllenamos la furgo, con tolos trastos pa díez díes fuera casa con mochiles d'escalada, instrumentos pa echar les tardes tocando per casa, caxes de comida como si fuéramos un mes al campu bas del Everest y dalgo de ropa si acaso, que nun vien mal dacuando.

 

Viaxando de vienres con parada a cenar en Aniñón

Primer día, vamos a lo conocío, asina que tiramos pa Sol de Invierno, pudiendo tastiar la roca turolense, con un par de sestos baxos, bien guapos, enantes de que la solana echásenos a conocer el seutor del Más Allá, que como bien indica'l so nome, ye siguiendo de Sol de Invierno n'adelantre teniendo solombra, a partir de mediudía. Ellí, tuviemos más qu'entrenteníos y felices, prebando Bohemian Rapsody un 7a/+ superdivertíu, que tuve la suerte de llevame al flash, demientres los collacios dieran un par pegues infructuosos, enantes de colar pa Olba de vuelta.

 

Primer día per Sol de Invierno y el Más Allá

Cola supuesta lección deprendía, en cuanto a escalar al sol, díbemos el segundu día a Meteoblue, pero nun yeramos a madrugar lo suficiente y pente ponte bien y tate quietu, aportamos al seutor, ya casi col sol pegando nos parés. Sicasí, enantes diéramos una vuelta per tola redolada, viendo otros munchos muros al final del valle del Palomarejas, enfrente de Sol de Invierno, que teníen pintona, así que la culpa fuera nuesa por nun entainar.

 

Perguapa vía la Bohemian Rapsody

Ponémonos al lío y llueu de facer un sestín pelín físicu pero cenciello, entrámos-y Orlando y yo, a Take it Easy (7a), tocándo-y montar a él, demientres Ana decidía facer más sestos pa siguir rodando ya que la vía del día anterior, paecío-y perfísica y prefería plaquear más. Sicasí, acabó metiéndose nun 6c+ cabrón, que tuvo que meté-y dos pegues pa encadenalu, demientres yo tuviera, otru día más, la suerte de llevame al flash la vía que montara Orlando.

Increíblemente pa min, taben yendo los pegues rodaos y animáronme a probar Curva Peligrosa, otru 7a más plaqueru que la desplomada Take it Easy, dando un pegue poniendo cintes d'esos épicos, lluchando tanto'l bloque más duru, col flash d'una escaladora, asina como na parte alta, onde tocó bregar faciendo dalgún goméu épicu al sol, hasta aportar a cadena, decidiendo que pola mió parte, taba'l día más que fech, esperando a que los collacios terminaren les sos xeres.

 

Apretando al sol en Meteoblue... de too apréndese... hai que madrugar más

Como ya sofriéramos dos díes siguíos col sol, el tercer día, fuimos ensin inventar na, a Obras Selectas, murazo increyible al que nun-y pega'l sol en tol día, asina que plumes y Orlando feliz, ya que nun soporta'l sol pa trepar. Nesti día tocábame a min, pringar montando, asina que buscamos dalgún 6c pa calecer deos pero como la guía ye un putu "desastre" o ta ya mui desactualizada, métome nel Poema ensin sabelo (7a), lluchándola, pero fallando nun pasu llateral nel qu'equivoquéme.

Nun tolos díes son folixa, asina que dempués de danos cuenta que tamos nel Poema, Orli entra con un pocu respetu colgando pa calecer y probar los pasos bien. Ana, sigue col so rodaxe y prueba un 6c con una pinta guapísima que se-y resiste hasta'l segundu peguín, pero decide que nun va metese en xardinos con nosotros ya que tien cuidar los hombros, asina que monta la de la so manzorga que tien hasta meyor pinta.

 

Primer visita a Obras Selectas... pasándolo podre nel murazu afuracáu

Al segundu pegue, tanto Orlando como yo, llevámonos el Poema, paciéndonos una vía cinco estrellas, esfrutándola munchísimo y andamos rabilando a ver onde tirar otru pegue, decidiéndonos pola GREIM, ya qu'esa roca naranxa enllena de furacos llevábame picando dende que llegáramos, Eso sí, miramos por interné y vemos que'l primer llargu ye 7a, decidiendo que col primer llargu tenemos abondo que llevamos tres díes siguíos esguilando y siguir al segundu llargu de 7a+ danos pereza.

Tócame entrar a vista a la GREIM poniendo cintes y alloriando colos pires, asina que voi esguilando lo más fino y seguro que pueu, ensin arriesgar, metiéndome na babaresa final, onde ya voi bramando hasta chapar la última cinta, nun lleendo bien el final ya intento salir per unos romos horrendos hacia cadena, que como non, tírenme, pero quedando mui contento cola actitú que toi teniendo en cada pegue lluchando al corte.

Dándolo too al segundu pegue de la GREIM... pena de nome jeje

Turnu pal Orli, que pídeme un flash yendo pol llibru en cada man y cada pié, aportando a la babaresa final onde-y toca ruxir un pocu, saliendo al planu final y yendo d'hombru a la presa que-y indico a la manzorga, montándose hacia la reunión y enchufando nun pegue maraviyosu. Dempués, Ana danos una lleición enchufando a vista, la vía que dexara mediu montada, mirándonos Orli y yo, nun tramu onde nun veíemos presa dende baxo, resolviendo esi tramu con mayestría total.

Quedaba yo por intentar facer al segundu pegue la GREIM, asina que tiré p'allá a ver que pasaba, faciendo la parte baxa casi peor que nel pegue poniendo cintes, pero una vegada que llegué a la fisurona, centré y fice los pasos pol llibru, enchufando otru sétimu más pa la llibreta nesti viaxe, anque ya veía que les fuercies diben baxando col pasu los díes, pero bono, a eso veníemos a trepar a muerte y despexar la mente.

Visitina a Jérica... día perdíu comparáu con Olba... siguimos deprendiendo

Al día siguiente, el cuartu, díbemos camudar d'escuela y conocer la cercana Jérica, asina que tiramos cola calma hasta'l pueblu, onde decidimos almorzar, pegándonos una hostia épica los del chigre. Mal entamamos col cambeu de provincia entre Teruel y Castelló. Colo bien que tratábenmos nos chigres d'Olba, onde yeremos ya casi llocales y la primera na frente en Jérica.

Con esti mal comienzu, la llegada al seutor a la solombra, nun fue meyor. Ponémonos embaxo les plaques grises y con pinta sobaes, viendo tamién la equipación dalgo "old school" y Orlando nos mira, diciendo cabrones, que me toca a min y de resaca. Con esti plan, ficimos tres sestos baxos por conocer la escuela y colamos ensin tan siquiera echar una birra, decidiendo volver a Olba, pasando per Montanejos, conociendo otru guapu pueblu, al que dalgún día habrá que dir a trepar, siendo esta una escuela nomada los últimos tiempos con visites de gurús de la escalada.

 

Día horrible de lluvia que llibramos en Sol de Invierno

El quintu día, amanez orpinando, pero como escaláremos tan pocu en Jérica, envede descansar, decidimos xubir hasta Sol de Invierno, pudiendo facer Ana un sestu baxu tan guapu como espuestu, enantes de que l'orpín pasase a lluvia potente, dexándonos coles víes más desplomaes como única opción, escoyendo un 6b de primer llargu, que facemos los tres, quedando seco tan sólo un 7a+ con pinta físicona, al que tócame meteme a montar.

Tiro p'alantre, viendo que'l chapaxe de la tercer chapa va ser clave, ya que tien un pasín y tamos mui cerquina'l suelu, cuelgo, acero y lo miro bien, nun sacando na a les clares como chapar. Sigo montando viendo que tenemos unes chapes más amables de chorrera y teniendo un salida a reunión ablucante con un toque picante pa montase nuna repisa, quedándome un tastu a vía guapa, anque pelín bloquera pa mi estilu.

Apretando en la física Sintropía Total... esta quedóme pa otru viaxe

A lo tuntu, siguimos el restu del día, dándo-y pegues a la vía los tres, teniendo hasta suerte cola meteo qu'a la fin asela y va dexanos colar al final del día ensin moyanos pa marchar. Eso sí, colamos del seutor, coles yemes a la moda d'apretar, quedándonos col tercer pegue buenísimu d'Orlando que sí que ye capaz de llevásela, llueu d'alcontrar yo nel segundu como chapar con seguridá, siendo asignatura pendiente pa Ana y pa mí, ya que nun tuvimos pila nel tercer pegue del día.

El sestu día d'escalada, decidimos tornar per Obras Selectas, dando un repasín a tol muru hacia la mandrecha, visitando'l Paraiso y Sombra Perpetua, onde gracies a dalguna vía que recomendárenmos posamos los trastos y decidimos asitianos embaxo d'un 6c míticu nomáu Gran Hermano, que-y tocó montar a Orlando, faciéndolu Ana y yo al flash, teniendo que da-y un segundu Orli pa continuar la xera esguiladora.

 

Namoráu de Sombra Perpetua... que pintona teníes toles víes

Dempués de los pegues, quedamos un pocu mirando que facer los tres, pensando si movenos hacia'l Paraiso o a Obras Selectas, pero la verdá ye que quedéme mirando pa la línea d'al llau de Gran Hermano, nomada como Vanyou y tenía una pinta brutal teniendo un grau de 7a+. Cuando baxó del 6c comenté-y que punxera les cintes que pudiese al baxar, ya qu'apetecíame meté-y un pegue a ver si sonaba la flauta.

La verdá ye que como ye la escalada, ya que fui poniendo cintes na parta baxa, lleendo la vía estupéndamente, plantándome na parte más tiesa, con cierta seguridá, pero equivoquéme antes d'entrar al bloque y tiré pela mandrecha quedándome ensin posibilidaes. Dempués de colgar, mirar una migayina como diba'l pasu, salí p'arriba al primer intentu, camentando que la diba reventar al siguiente pegue.

 

Vanyou convirtióse nel atrangante del viaxe pudiendo facela'l penúltimu día los tres

Con ciertu cansanciu, tanto Ana como Orlando probáronla, gustándo-y munchísimu tamién, anque Orli diba ya col bidón de gasolina escosu a estos altores del viaxe. Entré al segundu pegue super seguru de facela pero como saliera'l bloque a la primera nun miré bien los pies a usar y pringué con tol equipu al segundu pegue y posteriormente tamién al tercer, colando pa casa, con una baxona importante y viendo tamién como'l mió tanque particular d'enerxía diba terminándose, llueu de 6 díes d'escalada seguíos.

Sicasí, había moral y la ruta gustáranos muncho a los 3, asina que decidimos dexar montada la parte alta y al día siguiente, sétimu de trepada continua, tornamos pela mañana, con dalgo d'amenaza de lluvia pa la tarde. Poro, madrugamos y plantámonos allí, metiéndome poniendo cintes y pringando una vegada más nun bloque que pensaba nun diba ser tan difícil. Llueu diría Ana que reventó la vía con un pegazo, pa siguir Orlando, con una bona arrastrada, pa continuar dempués yo, faciéndola a la fín, magar de matizar bien los pies a usar, siendo'l quintu pegue en total... menos mal que salía a vista.

 

Ana fanática l'últimu día... demientres los resacosos arrastrámonos

Pa rematar la xugada, Orlando animóse a dar un últimu pegue y enchufóla tamién, mirándonos los tres, diciendo que nun podíemos col alma ya, asina que llamada al pueblu d'al llau pa dir xintar y tiramos felices a tomar el vermú, comer y dir morrer al sofá, viendo una peli, ya que nun teníemos nin mediu gramu d'enerxía.

Dempués de la peli-siesta, tocó duchina y salir a tomar dalgo, cayendo una esbastiada brutal de tarde, corriendo rigos peles empedraes cais d'Olba, no que paecía una previa de lo que diben sofrir los vecinos malpenes 4 díes dempués. La intensa lluvia fue la disculpa perfeuta, pa quedar tranquilamente en casa Ana y que los paisanos, cola sensación de tol llabor fechu anduvíeramos de chigre hasta altes hores de la nueche... o meyor dicho madrugada... y ye que l'ambiente nesti pueblu ye otru de los sos grandes atrautivos.

Hubo tiempu pal chigréu, pa volver a tocar folk toos xuntos... y les ñubes amenazaben cola DANA

Al día siguiente, eso sí, llevantámonos como pudimos y zarramos viaxe trepando per Sol de Invierno a la gueta de dalguna vía seca, cosa qu'alcontramos y con creces, ya que pudimos esfrutar d'otru murín nel Más Allá, onde tuviera pela mió parte, faciendo cuatru sestinos a vista con un nivel de roca d'ensuañu, demientres Orli pasaba'l día como podía y Ana llevábase otru par de 6cs pal bolsiellu con munchu méritu pa un octavu día siguíu d'escalada.

 

Equí ya si que terminamos cola escalada, quedándonos pa finar el día, unes cervecines nel Chicuto, enantes de dir cenar al Mijares y retiranos pa casa pa poder descansar, recoyer dalgo tolos trastos y al día siguiente, almorzar prontín y entamar el viaxe de vuelta p'Asturies, dempués de 10 díes de vacaciones escaladores con un nivel de motivación y tar a gustu como poques vegaes.

 

-----------------------------------------------------------------------------------