Xomezana Riba (L.lena) - Carba Valsecu

17 de Febreru de 2018

Track: Xomezana Riba (L.lena) - Carba Valsecu

Siguimos con esti iviernu tan "especial" porque ta siendo iviernu de verdá, con ñeve, non con un escesu de fríu, pero si con muncha precipitación y poro n'altor grandes ñevaes pero casi toa Asturies, lo que llévanos a calzar la bota ñeve y polaina y a bregar pel monte.

Nesti casu, acompáñanos a Kíla y a mí, Ana, una increyible montañera y collacia y Noah la so perrina, colo qu'axuntámonos dos xabalís del monte y dos perrines, anque Ana ta muncho más fuerte que yo y muncho más motivada.

Partimos de Xomezana Riba (630 m)

Quedaremos en Campumanes p'almorzar bien ceo y pa ello garraremos l'autovía minera dende Xixón hasta Mieres del Camín, onde siguimos autovía A-66 alantre, saliéndonos en Campumanes. Magar d'alcontrar al fin un sitín decente pa tomar un café, empobinámonos pela LE-8 como si fuéramos pa Tuíza Riba, pero al pocu de pasar Sotiel.lo, salímonos a la mandrecha n'Espinareo, pillando'l desvíu hacia'l pueblu l.lenizu de Xomezana.

Perpasamos el barriu Baxo y siguimos hasta Xomezana Riba, aparcando al pié d'una plaza y preparámonos pa la griesca. Ye día de cargar con trastos varios, ropa d'iviernu, crampones, piolé, marañones... ye dicir pesu enforma.

Facemos l'amplia pista con ñeve enforma pente'l Fayéu Serpeña

Saldremos d'esti pueblu l.lenizu siempre en ascensu y Noah que la lía metiéndose nel llavaderu, ensin poder salir y nun ye que ficiese muncho calor. Esto ya promete dende l'entamu y lo dicho, garramos una amplia pista nel Col.léu que llevaranos nun ascensu tendíu pasando per llugares como'l Carrizal o el L.lobu hasta aportar sobre los 1000 m onde tendremos ya ñeve de continuu.

El día nun promete agasayanos con munches vistes, asína que nos ponemos en mou xabalí, fozamos lo que podemos y al altor de la braña Conforcos decidimos poner los marañones porque sinon, casi de xuru que tendríemos de desistir del intentu al nuesu oxetivu: la Carba Valsecu.

Siguimos camín pembaxo'l picu Busbigre hacia l'ascensión de la Cuesta Mostayar

Avanzaremos turnándonos p'abrir buelga siguiendo camín pel Ventanusu, perdiéndose cada vegada más la pista y tresformándose en rastru de senderu sobretou a partir de las Cabanas, onde pente la borrina vamos intuyendo los parés del picu Busbigre y del hombru Este de la Carba Valsecu.

Nel intre, llevamos casi tres hores de camín, abriendo buelga a turnos poniéndonos enfrente de la Cuesta Mostayar, la cual, nesti estáu ye un pequeñu corredor nun estáu llamentable. Toca tomar decisiones y son quitar los marañones y ponese a trabayar abriendo buelga hasta'l cadril en munchos tramos.

Lluchamos p'aportar a la Veiga'l Forquéu siguiendo cola xubida a la Carba Valsecu

Sabía qu'Ana yera dura, pero tienme ablucáu. Vamos trabayando la buelga, per onde vemos menos posibilidaes de montase un ábanu ya qu'agüeyamos planches cortaes y empozamos varies vegaes, hasta aportar a la  parte alta de la Cuesta Mostayar onde recíbenos una aire gayasperu en forma de ventisca de ñeve.

Aparte, nun vemos res, sabemos que tamos entrando na Veiga'l Forquéu, pero pocu más que guiyanos col gps podemos facer. Les perrines a lo suyu, Kíla va y vien y Noah, nun se separa, hasta que paez que salimos d'esi ventisqueru y entamamos l'ascensu más calmáu ganando-y metros a la pala sur de la Carba Valsecu.

Cumal de la Carba Valsecu (1867 m)

Con munchu trabayu, pero a la mesma vegada esfrutando de l'actividá, aportaremos al cumal de 1867 m y l'esfuerzu dános una mini recompensa d'un cielu azul pero dura, más menos, un aliendu y un vientu fríu nos devuelve a la realidá del que'l día nun ta pa munches semeyes nin visiones prestoses del paisaxe.

Poro, con 4 hores y media de soba, contentos pol cumal, dedicimos descenser pela mesma buelga que tanto costónos abrir. Eso sí, la baxada ye menos más llixera y les perrines entretiénense corriendo pala abaxo hasta la Veiga'l Forquéu.

Descendemos apriesa pela carba hasta'l Forquéu y Cuesta Mostayar p'aparanos nel Pividal

Magar de la Veiga'l Forquéu, que tengo tornar a conocela nun día meyor, descendemos pela Cuesta Mostayar, que si pa xubir fuimos con tientu, pa baxar vamos andar más sollerte si cabe. Somos a baxar ensin mayores problemes y decidimos qu'habrá qu'intentar comer daqué si la intensa ñevada que nos cae penriba para un puquiñín.

Recoyemos los marañones y tornamos a ponelos, nun incomodísimu y fríu tarrén, dándonos ganes casi d'escaecer la idega de siguir cola circular que teníemos preparada. Pero por suerte salimos del final de la base de la Mostayar y nel Pividal, con suerte paró de ñevar abrió'l día un ratín y pudimos xintar daqué pa recuperar fuercies y ganes de siguir alantre.

Ascendemos hacia l'Altu la Portiel.la pa pasar pembaxo la Carba Fusnéu

Continuaremos agora ascendiendo hacia L'Altu la Portiel.la (1542 m), nun tramu de ñeve más durina y mui cenciella pela qu'avanzar, dándonos esti altu de los pocos momentos de vistes, esfrutando de la Mesa y de toles sos compañeres y camentando la pena de nun ver casi tolos grandes montes que nos arrodiaben durante la ruta (Tapinón, Siegalabá, Pena Ruea,...)

Son les 3 y media de la tarde y nun tenemos munches hores de lluz como perder el tiempu, asina que siguimos alantre, abriendo buelga pel puertu La Cruz, baxo la Carba Fusnéu, pasando per Veigafuentes primeru y la Veiga la Forcá dempués pa dexar la Pena Portiel.la a la nuesa manzorga, baxando bon desnivel y perdiendo esa continuidá de ñeve qu'anímanos a quitar marañones.

Descenderemos hacia la Primaliega pembaxo de la pena Portiel.la

Lloñe de lo camentáu, tenemos tramos nos que perdemos la traza del senderu y perderemos fácilmente media hora bregando en mediu d'una viesca y cola ñeve de nuevu pel cadril, jaja. Son coses que pasen, cuando ya pienses que lo ties tou fechu, toca trabayar un pelín más.

D'otra miente, a partir de la Primaliega, ya nun perderemos el senderu más y siguiendo delles marque de PR, baxaremos pel Cabril, el Yenulocha, el Cordal y nel Mayaón camudaremos hacia'l norte, empobinándonos definitivamente hacia Xomezana.

Vamos abandonando la ñeve pel agua según vamos pasando per brañes hasta Xomezana

Enantes, tocará pasar de los barrizales y llamargues del últimu tramu, a direutamente pasar per caminos que son riegues dafechu, sobretou a partir de travesar la riega'l Rucáu y la de Xomezana, aportando finalmente al pueblu a les 7 y cuartu, ye dicir... de nueche.

En resume, metímonos una paliza perguapa de 10 hores p'algamar un percorríu de 18,5 km, con casi 1500 m de desnivel positivos nunes condiciones cero favorables, pero con una compañera de batalles asina, puédese dir a cualesquier llugar.

Siguiremos ivernando... próximamente

Camudando'l Camín pente la ñeve de L.lena