viernes, 22 de junio de 2018

Espinaréu (Piloña) - Picu Sopiedra

11 de Marzu de 2018

Track: Espinaréu (Piloña) - Picu Sopiedra


Nos últimos tiempos, tengo un enfotu especial por conocer tolos valles perdíos del conceyu de Piloña y ye que considero qu'esti conceyu, ta quiciás dalgo tapecíu pelos conceyos d'alredore (Casu, Ponga,...), pertenecientes a dellos parques naturales.

Por embargu, tenemos milenta opciones pa facer montes, milenta riegues, foces, crestones, xerros que conocer, pasos por alcontrar, siendes por redescubrir usaes pelos pastores de Piloña. Tán sólo, hai que garrar el mapa ya intentar trazar una ruta afayaiza pal nuesu envís del día.

Salimos de ruta dende Espinaréu (241 m)

jueves, 14 de junio de 2018

Cangues Mountain (Cangues d'Onís)

3 de Marzu de 2018

Track: Cangues Montain (Cangues d'Onís)


Web del Trail: Cangues Montain (Cangues d'Onís)

Clasificaciones: Clasificaciones 2018 


Un añu más, volvíemos a querer correr en Cangues d'Onís y queríemos facelo bien, motiváu y entrenáu, pero otra vegada más, tocó venir a sufrir problemes físicos. La verdá ye que taba entrenando bien, ensin molesties nel piramidal, pero la temporada de carreres curties de primeros d'añu, tornaron a pasar factura y rematóme la ruta raquetera de la Carba Valsecu.

Magar de pasar tiempu ensin notar sobrecargues na pata drecha, durante la selmana anterior a la carrera, ya veía que díba cargándose'l ximielgu nos entrenos. Así qu'apaecimos per Cangues, con sensaciones non mui positives que digamos.

Saliemos de Cangues con cierta ilusión

Xuntámonos un bon garrapiellu de collacios na carrera y ye que la Cangues Montain ye una carrera especial, la primera llarga del añu y con tramos mui correnderos y otros más teúnicos, poro un disfrute total si llegamos nunes condiciones físiques bones.

Como siempre, salimos ensin cebanos na xubida al picu L'Arbolín y vamos ganando posiciones rápidamente demientres voi charrando con un conocíu ya de varies carreres. Aportamos al cumal y facemos un descensu tranquilu pa soltar patuques.

Nun díbemos mal del tou na xubida a Següencu

Magar de pasar per Cangues d'Onís pela ponte, entama'l tramu que quiciábes más duro se me fizo y onde'l piramidal entamó a dar problemes. Ye un tramu correnderu hasta'l colláu Andrín y equí nun pude caltener el ritmu, teniendo que tomámelo con más calma.

Dende Andrín, paez que recuperé na baxada téunica y otra vegada la pista hacia la Olla San Vicenti, fízoseme dura, nun podía correr fuerte y ye un coñazu dir cargáu de la cadera y nun poder dir sueltu corriendo.


La baxada convirtióse nun infiernu dempués del saltu

Aún así, siguimos con xeitu y garramos con bon humor tola xubida hacia Següencu, llevando bon ritmu y adelantando abondes posiciones, tando claro que diba más cómodu nos tramos téunicos que nos correnderos.

Llego al últimu avituallamientu y siéntome bastante bien, poro tiramos fuerte la cabera xubida hasta'l cumal y entamo la baxada cola sensación de qu'agora podía soltar pates y esfrutar d'una baxada rápida, pero fue tolo contrariu y les pates fueron cargando más y más y tuve que baxar los ritmos nun tramu que tendría que dir a fueu totalmente.

Tocaba acabar lo meyor posible

La gota que colmó'l vasu, fue'l destrepe-saltín de la carretera a Següencu, onde xubiéronseme los cuadriceps y tuve que parar. Dende equí, mal rollu, mala hostia y cero recuperación muscular en tol restu del percorríu, llegando a meta en ritmos llamentables y mui desencantáu otra vegada.

Al final, pesie a baxar 5 minutinos el tiempu del añu pasáu, quedo con unes sensaciones mui males y replantéome tola temporada, na qu'esperaba volver a facer grandes distancies pero viendo que nun acabo de desfaceme de la lesión, prefiero dir carrera a carrera.

Como siempre, dar gracies a organizadores, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Pedro Pablo Heres, MV Foto...) 

------------------------------------------------------------------------

martes, 12 de junio de 2018

Bo (Ayer) - Cordal de Ranero

18 de Febreru de 2018

Track: Bo (Ayer) - Cordal de Ranero



Dempués de la soba fozando pela ñeve del día anterior, n'ascensión a la Carba Valsecu, tocaba salir col GM Xuan de la Borrina y teniendo mui claro, qu'otra bregada nun me diba salir barata, decidí buscar dalgo más sele, teniendo en cuenta que'l día nun lo daben mui afayaizu.

Poro, eché un vistazu a dalgún cordal central y alcontréme col del Ranero, pente los valles del Caudal y del rigu Ayer. Pa ello, decidimos quedar en Morea d'Ayer p'almorzar, dempués del típicu viaxe en coche dende Xixón, pela minera hasta Mieres del Camín, siguiendo hasta'l corredor del Ayer onde metémonos hasta Morea.

Salimos del pueblu ayerán de Bo (420 m)

martes, 5 de junio de 2018

Xomezana Riba (L.lena) - Carba Valsecu

17 de Febreru de 2018

Track: Xomezana Riba (L.lena) - Carba Valsecu


Siguimos con esti iviernu tan "especial" porque ta siendo iviernu de verdá, con ñeve, non con un escesu de fríu, pero si con muncha precipitación y poro n'altor grandes ñevaes pero casi toa Asturies, lo que llévanos a calzar la bota ñeve y polaina y a bregar pel monte.

Nesti casu, acompáñanos a Kíla y a mí, Ana, una increyible montañera y collacia y Noah la so perrina, colo qu'axuntámonos dos xabalís del monte y dos perrines, anque Ana ta muncho más fuerte que yo y muncho más motivada.


Partimos de Xomezana Riba (630 m)