miércoles, 30 de diciembre de 2020

Priañes (Uviéu)

22, 28 de Payares de 2020

Munches fueron les tardes apretando per Priañes a primeres del branu. Tábemos recién salíos de la pandemia y obligábame a dir un día a la selmana a entrenar a Priañes, nel seutor menos agraciáu visualmente, anque bon sitiu pa ponese fuerte enforma.

Tuviera delles selmanes yendo a da-y pegues a Bramae, un 7c como un templu, anque en dalgunos croquis apaeza de 7b+. Ye una vía cabrona, mui aleatoria, a nun ser que vayas mui sobráu nel grau, asína que fuimos ganándo-y tarrén hasta tenela mui cerca, pero en dalgún puntu del camín, decidí escaecela y entamé a trepar per Morcín de continuu.

Bramae en prebes... taba pa ello

El resultáu, fue positivu, ya que pude meté-y una fulminada curiosa a seutores como Figares u Otura nel seutor de Nuberu, llevándome munchos sétimos más baxos que tenía pendiente. Nun fue hasta'l mes de Payares, nel qu'averéme un par de findes tranquilos a trepar a Priañes, al seutor cimeru, muncho más guapu visualmente col solín y el rigu Nora al llau.

Esta vegada, centrámonos un pelín en facer víes menos hostiles y llevámonos un par de 6cs guapos como Calma Total, Huecos Nora y tamién apretamos más de lo camentáu pa sacar Conocimiento de Causa un 7a, bien guapu, pero nel que metí un par de chancletazos de llibru, costándome hasta 4 pegues pa encadenala.

Pasando díes al solín per Priañes alantre

Habrá que volver, a siguir sacando cosines, ya qu'anque Priañes atrás nun me motiva res, alantre, el llugar ye más afayaizu visualmente y alcuéntrome un pelín más cómodu que nes víes tan desplomaes de la parte d'atrás.
 
Aparte, qu'a la compañera de cordada, quedó-y pendiente Conocimiento de Causa, nun día totalmente fanáticu, en que-y metío pegues ensin xacíu, munchos dellos perbonos, pero nun hubo suerte a la fin... asína que toca volver antes del cierre.

Priañes (Seutores visitaos)   

Croquis modificaos por mi de la escuela d'escalada de Priañes, por mor de Piratas Free. Gracies y col so permisu.

------------------------------------------------------------------

lunes, 28 de diciembre de 2020

Poncebos (Cabrales) - Bulnes - Cuetos d'Albu - Llagu Rasu - Valcosín

23 de Payares de 2020

Track: Poncebos (Cabrales) - Bulnes - Cuetos d'Albu - Llagu Rasu - Valcosín


Lo de siempre, llamada d'Ana con picor de monte xabaz y Berto qu'acude a la llamada. Conocémonos demasiáu bien, como pa saber que ye lo que-y presta a la compañera de grandes batalles, asina que preparo una circular cañera pero con toque teúnicu na parte alta.

Problemes? Tolos que quieras, tamos casi n'Avientu con mui poques hores de lluz y ocúrreseme la xabazada d'ascender a los Cuetos d'Albu dende Poncebos. Camiento que somos a ello, pero tamién tengo claro que nun tamos na forma d'otros años y ye que'l 2020 pasó factura en tolos sentíos.

Partimos de Poncebos (260 m) de nueche aportando a Bulnes (715 m) pela canal del Texu

jueves, 24 de diciembre de 2020

Frechura (Mieres)

15 de Payares de 2020

Otru día de vacaciones nel que salimos a esguilar cola amenaza de lluvia a partir de les 3 más menos. Poro, nun tenemos munchu tiempu pa xubir a sectores de llargu averamientu y alcuérdome de Frechura, al cual llevo más de dos años ensin dir.

Daquella, lo reciu de la escalada punxéranos nel nuesu sitiu, al menos a mi, que nun fuera nin a encadenar nin un 6c, magar de da-y varios pegues. Esta vegada, vamos pasar la mañana con Anna y si'l día anterior tocóme a mí montar les víes, esta vegada decídise ella a entamar y eso qu'esti paré, nun ye mui amigable y cuesta decidise a entrá-y con bon xeitu.

Magar d'una llucha brutal, nel últimu bloque la compañera nun ye a sacar un pasu y tócame a mín, meteme n'El Reencuentro, un 6c téunicu y finu como toles víes de Frechura. De sorpresa, soi a encadenalu al flash y nun sigo al segundu llargu de 6c+ porque nun llevo cintes y el día ta tornándose prietu, como pa facer el fatu y dexar cintes en segundos llargos.

Terminamos el día, con un par d'amagos de lluvia, teniendo Anna que desmontar la vía, enantes de que se punxera serio, con pasos en moyao y dalgún vuelín con caña incluyíu. Nel intre, quitéme'l sombreru pola brenga de la neña a la hora de xugase vuelos, innecesarios por mor d'acerar abaxo con too moyao, con tal de da-y solución a un bloque que nun yera a descifrar nel pasu clave.

Habrá que tornar...

Frechura
 
Croquis modificaos por mi de la escuela d'escalada de Frechura, por mor de la Asociación de Escaladores Astur Vertical. Gracies y col so permisu.  

----------------------------------------------------------------------------------------------------------------------------

lunes, 21 de diciembre de 2020

Figares (Morcín)

7 d'Ochobre y 6 de Payares de 2020

Mes d'Ochobre apurando al másimu les tardes per Figares de vienres, ya que la pérdida de lluz diba faciéndonos perder oportunidaes d'esguilar nesti seutor, a nun ser que fuéramos de día completu. Poro, caún tiraba a los sos proyeutos y los pegues teníen de ser serios y mui comprimíos nel tiempu.

Vane y Lolo de nuevu pelos pies de vía de Figares

Nesos díes, llevaba persiguiendo facer Piedramuelle, un 7a+ de dalgo más de 35 metros, que comparte'l bloque plaqueru finu del primer llargu de Mimos y Roca, poro tocaba comese un 7a finu y llueu media vía más de continuidá p'algamar esta increyible vía.

Nati enchufando el Diedro de Jose

Calculo que llevaríamos 3 o 4 díes algamala y de regalu nestos díes tamién tuviera probando'l segundu llargu de Mimos y Roca (7b+) pero nun me ví con fuercies pa motivame a tope y la llargura de la vía, penriba de los 45 m fai que seya pocu amigable pa un asediu jeje.
Faciéndome cola llarguísima Piedramuelle (7a+)

El restu'l grupu anduvu a los sos proyeutos, encadenando Anna dalguna vía pendiente como Fuego en las Entrañas y Medalles, vía que ta siendo un bon proyeutu mental, más mental que físicu pa Andrea, pero que de xuru ye algamala un día d'esguilada relax.

Andrea apretando fuerte na esixente Medalles

D'otra miente, un par de díes baxamos hasta l'últimu seutor de Figares, abaxo del too a la mandrecha, onde tenemos dalguan referencia, anque nun esistan croquis y ficimos nesos díes, les víes de más a la mandrecha, paeciéndonos un 6c/+, Ganga Parbat y la siguiente a la so manzorga, La Agarrancha, con un grau más, rondando'l 7a suave, al nuesu entender, el d'Anna y míu, que la ficimos el mesmu día. 
 
P.D: Semeyes d'Anna na so mayoría... qu'ente encadene y encadene tamién-y dá por ello
 
Figares
 
Croquis modificaos por mi de la escuela d'escalada de Figares, por mor de la Asociación de Escaladores Astur Vertical. Gracies y col so permisu. 

------------------------------------------------------------------------

martes, 15 de diciembre de 2020

Inguanzu (Cabrales) - Seu L'Home Muertu - La Canal - El Cuetón - Ostandi - Busnuevu

31 d'Ochobre de 2020

Track: Inguanzu (Cabrales) - Seu L'Home Muertu - La Canal - El Cuetón - Ostandi - Busnuevu


Segunda fola de la pandemia del horrendu 2020, no sanitariu y no económicu a estes altures pa muncha xente, quedándonos colo únicu positivu, que ye la posibilidá de salir al monte siendo federáu ya que tamos confinaos perimetrálmente nes grandes ciudaes.

Sicasí, somos conscientes de la gravedá del asuntu, poro xuntámonos namái que seis del grupu monte y vamos en coches separaos. Nel ambiente, toos tenemos un ruxerux de que quiciás ye la última ruta que vamos poder facer nesti añu, ya seya por cierre gubernamental o por pura responsabilidá de grupu.

Partimos del guapu pueblu d'Inguanzo (315 m)

viernes, 11 de diciembre de 2020

La Rumiada (Cabrales)

24 d'Ochobre de 2020

Fines de selmana onde alcontrámonos en plena segunda fola pandémica, ensin saber cuando, cómo o si nos van a cerrar. Dicen que Xixón, cierre perimetral, federaos pueden salir, federaos nun puen salir... liámonos la manta na tiesta y tiramos a pasar el finde a Cabrales.

L'Envís? Pues ensin más, pasar el finde, tomar una botellina nos chigres y tar tranquilos durmiendo na furgo ensin la llocura de la ciudá confinada. Como siempre, que nun se quier liala, pues líase la cosa y llevantámonos de la manera.

Vista del muru de la Rumiada
 
Que facemos ye la frase más utilizada, ya que mis intenciones yeren dir de monte col grupu, pero lo dicho, unos confinaos, otros federaos, otros non federaos, al final suspendo la ruta y decidimos intentar trepar un pocu, iluminándoseme la bombiella y yendo a conocer un seutor nuevu na redolada de Poncebos.
 
Pa cuando, averámonos per ellí, tenía los croquis un pelín d'estraperlu, pero va más d'un mes qu'espublizose tolos croquis de tres nuevos seutores de Cabrales na revista INUA, los cuales tamién espero visitar ceo.

Accesu pelín gafu dende riba de Poncebos

L'averamientu al seutor, el más afayaizu, lleéndolo na revista ye dende Poncebos pol camín de la canal de la Rumiada que xube hasta Tielvi, poro nun tien pérdida, pero como nun sabíemos de la situación y dixéranmos que taba enfrente d'unes cabañes penriba Poncebos pues aparcamos delantre les cabañes y buscamos como baxar al rigu Duh.e y cruciar per un quitamieos-ponte hasta l'otru llau... increyible pasu.

Mario y Carla tastiando la increyible caliza cabraliega

Nel otru, llau hai que tirar de cualesquier manera, porque nun hai muncho senderu hasta topar col camín de la Rumiada onde ya, sí que podemos dir meyor hasta'l seutor. Aportamos al seutor, más bien tarde, poro tiramos a lo cenciello, probar un quintín y un 6a qu'hai a la manzorga y ablucar cola calidá de les víes.
 
Dicir, qu'aparte de la resaca, toi zánganu enforma y dexo a los collacios trepar mientres saco semeyes a toles víes, miro los croquis d'estraperlo y allorio cola calidá de la caliza. Nun fai falta dicir, que'l llugar con vistes al Cares ye perguapu y que'l seutor paga la pena una y milenta visites.

Esguilando un puquiñín nesti ablucante llugar
 
Como veréis, nos croquis, más menos tenemos graos pa tol mundiu y tampoco pueu dicir si t'axustáu o non el grau, diría que yeren facilines inclusu pal grau que probamos. Como digo, yera tarde y dexé a los collacios esguilar probando dalgún 6b y saliendo fácil, poro, tamos ante una escuela que pue ser referencia pola calidá de la roca, güeyu, porque corta la caliza de lo nuevo que ta y porque tenemos más de venti víes pa esfrutar a tope y quiciás poner un pocu nel mapa de nuevu l'oriente pa esguilar n'Asturies, desmasificando las Cabadas n'Arenas.

La Rumiada
 
Croquis modificaos por mi de la escuela d'escalada de la Rumiada, por mor de la Revista INUA. Gracies y col so permisu.

jueves, 10 de diciembre de 2020

Tarna (Casu) - Tabayón del Mongallu - Cuetu Negru - Vega Pociellu

 27 de Setiembre de 2020

Track: Tarna (Casu) - Tabayón del Mongallu - Cuetu Negru - Vega Pociellu


Día serondiegu enforma, con frescu mañaneru pero con unes previsiones perbones de sol tol día, poro espérase un "llenu" nel monte astur, ante la nueva moda que tamos sofriendo. Ye lo que traen les pandemies, camudos de vezos na xente y al non poder salir d'Asturies dalgunos meses, la xente descubrió lo que tenía en casa.
 
Nun tengo mui claro entá, si esto ye positivu o non, por un llau que la xente avérese al monte, pue dar de sí un mayor interés nos conceyos y nel país por caltener les siendes llimpies, al menos los PR y GR, pero paezme que sedrán la sociedá la que dicte sentencia y la masificación acabará por crear problemes mediuambientales y pente la xente llocal y los foriatos.

Partimos del pueblu casín de Tarna (985 m)

domingo, 6 de diciembre de 2020

Sobrevil.la (Teberga)

10 d'Ochobre de 2020

Entamaba un puente d'Ochobre con una meteo pelín gafa, con fríu y dalgo de lluvia a tramos del día, poro díbemos pa Teberga a facer lo que buénamente se pudiera. El primer día, magar d'alborecer relaxádamente, terminamos por dir hasta Murotecho.

Esguilando un pocu per Murotecho

Sedría la mió tercer visita y nun acabo de pillá-y el puntu, quiciás porque siempre vamos con condiciones fríes y pocu agradables. Esta vegada, al menos llevaba los deberes apuntaos y nun yera otra que facer Juventud Creadora, una 7a finu de regletéu y ñapines que según la xente diba prestame.

Juventud Creadora.... una vía fina, téunica y mui, mui guapa

Y teníen razón, prestóme, una vía mui guapa, fina de ñapes nel pasu y llueu un tramu más físicu arriba, siendo mui completa en términos xenerales. El pegue poniendo cintes ya fué perbono, pringando al dir más dinámicu de lo que diba prestame a una regle ínfima pero al segundu pegue ya la enchufamos y nun dió tiempu a metese en namái.
 
Habrá que tornar per ellí...

Sobrevil.la (Seutores visitaos)
 
Croquis modificaos por mi de la escuela d'escalada de Sobrevil.la, por mor de La noche del Lloro. Gracies y col so permisu.
 

miércoles, 2 de diciembre de 2020

Millaró (Los Argüeyos) - Cuetu Millaró

27 de Setiembre de 2020

Track: Millaró (Los Argüeyos) - Cuetu Millaró

2020, añu pandémicu. Branu enllenu de salides al monte, col grupu, sin grupu, xataes, ascensiones clásiques. Qu'esperar a partir d'agora? Entamamos temporada como si nun pasara na? Munches incóunites teníemos y aún así, decidimos entamar la temporada del GM Xuan de la Borrina con una salidina curtia pa intentar calecer pates y que la xente vaya animándose.

 
Partimos de Millaró (1380 m)

jueves, 26 de noviembre de 2020

Val.le (Somiedu) - Pena L.lana - Picos Blancos - Picos de la Mortera

24 de Setiembre de 2020

Track: Val.le (Somiedu) - Pena L.lana - Picos Blancos - Picos de la Mortera


Un día cualesquiera, como siempre, Ana dame un toque picando pa ver si pueu garrar un día pa salir al monte. Esti añu, pente la pandemia y demás, tengo díes sueltos a esgaya, asina que póngome a preparar dalgo pa pegar un patéu guapu, pero ensin xatada infame, ya que tenemos previsión de lluvia pa la tarde.

Va tiempu, que sé que los últimos dosmiles de Somiedu que me queden por facer, son les peñes de la Mortera, poro preparo una circular guapa y p'allá que vamos. Cuantayá que nun tuviera per Somiedu y más entá pel Val.le, asína que paezme una idega de lo más afayaiza.

Partimos del Val.le (1258 m) en Somiedu

jueves, 19 de noviembre de 2020

Rodellar (Semontano de Balbastro) - Cañon del Mascún - Otín

13 de Setiembre de 2020

Track: Rodellar (Semontano de Balbastro) - Cañon del Mascún - Otín

Despedímonos de les vacaciones per Rodellar con pocos encadenes, pero a gustu col mundiu de posibilidaes correnderes y montañeres qu'abrimos durante estos díes. Como non, pa terminar bien l'últimu día, que meyor que conocer tol barrancu del Mascún nun agradable patéu.

Poro, recoyeremos y pagaremos la nuesa estancia nel camping, del que nun falé muncho, pero a dicir verdá gastar perres pa tar a gustu como nesti camping paga la pena. Dicir, que ye nel primeru nel que toi, que veo bolses pa recoyer la mierda perru a cada pasu, lo cual ye d'agradecer el detalle, porque nun sabes cuando-y va dar al animalín por soltar lo suyo jeje.

Partimos de Rodellar con bona info del nuesu percorríu

lunes, 16 de noviembre de 2020

Rodellar (Semontano de Balbastro)

Del 4 al 14 de Setiembre 2020

Una vuelta más, tornamos per Rodellar y ya va siendo, casi una necesidá, un viaxe al añu per esta escuela oscense pernomada mundialmente. Lo bono d'esti añu, ye que tuve descubriendo un pelín tamién otres actividaes a facer y ya namoróme del tou, pudiendo esguilar, correr pel monte, bañame o dir dar un pateín, poro paezme'l sitiu perfeutu.

Yo, Suco y Orlando apretando nel Bulder del John

No que na escalada podemos falar, tornamos de nuevu a vieyos proyeutinos que dexáramos d'otros años atrás, viendo que pa dir a Rodellar con ciertes garantíes, hai que tar d'escalar duro o nel roco o en desplome, poro vimos que nun mos movíemos quedando pa prau, una vegada más.

Na roca o nel roco siempre esfrutando de la escalada

Sicasí, esti añu, nun mos centramos tanto en dellos seutores y fuimos conociendo otros tantos de grau cenciellu como de grau duro. Poro, envede marchar con menos deberes, cayeron dellos pegues a víes que nun encadené y que quedarán como non, pa otra vegada que temos más fuertes y motivaos.
 
Volviendo a antiguos y eternos proyeutos

Na realidá, daste cuenta onde te mueves bien y lo que lleves faciendo nos últimos tiempos, acaba por amosar cual ye'l to estilu d'escalada. Esto quier dicir, que nun yes a movete en grandes desplomes de cazos pero sí que cuando toca menos desplome y dalgo de regleta con pasos menos físicos pues sal fácil.

Tolo y Orlando apretando nel Meandro

Exemplu, pues los pocos encadenes que fice, fueron nel Camino, un 7a y un 7a+ pegaos que lleváronme lo mesmu defechu. A la escontra, víes como Juan y Fran en Ventanas, quedóme claro, que lo mesmu necesitaba otros 2 o 3 pegues en díes distintos y descansáu pa poder faceles, ya que nun son difíciles pero sí mui desplomaes y ehí hai qu'andar con resistencia y fuercia.

Viendo trepar a Nico y Rober nel Delfín... brutales les semeyes
 
Como siempre, xuntámonos un montón d'asturianos pela escuela y pel camping, ya que nesti añu de pandemia, l'aparcaderu de Rodellar taba dafechu prohibíu estacionar de nueche, así que tocó gastar perres nel camping, pero dexáronse bien a gustu.

Kíla esfrutando de los paisaxes o non... depende del momentu

En resume, bones vacaciones, corretiando, conociendo un pelín meyor tola redolada y esguilando lo que nos dexó'l cuerpu y el non entrenu que llevábemos pa esti tipu d'escalada. D'esta mena, nun queda otra que tornar más fuerte o intentar buscar les víes que meyor se te puedan dar pa non marchar desmotiváu, anque en Rodellar ya se sabe, desplome y garrote.

 Rodellar (Seutores visitaos)
 
Croquis modificaos por mi de la escuela d'escalada de Rodellar, por mor de En La Vertical. Gracies y col so permisu.

---------------------------------------------------------------------------------------------