Sobrevil.la (Teberga)

10 d'Ochobre de 2020

Entamaba un puente d'Ochobre con una meteo pelín gafa, con fríu y dalgo de lluvia a tramos del día, poro díbemos pa Teberga a facer lo que buénamente se pudiera. El primer día, magar d'alborecer relaxádamente, terminamos por dir hasta Murotecho.

Esguilando un pocu per Murotecho

Sedría la mió tercer visita y nun acabo de pillá-y el puntu, quiciás porque siempre vamos con condiciones fríes y pocu agradables. Esta vegada, al menos llevaba los deberes apuntaos y nun yera otra que facer Juventud Creadora, una 7a finu de regletéu y ñapines que según la xente diba prestame.

Juventud Creadora.... una vía fina, téunica y mui, mui guapa

Y teníen razón, prestóme, una vía mui guapa, fina de ñapes nel pasu y llueu un tramu más físicu arriba, siendo mui completa en términos xenerales. El pegue poniendo cintes ya fué perbono, pringando al dir más dinámicu de lo que diba prestame a una regle ínfima pero al segundu pegue ya la enchufamos y nun dió tiempu a metese en namái.

 

Habrá que tornar per ellí...

Sobrevil.la (Seutores visitaos)
 
Croquis modificaos por mi de la escuela d'escalada de Sobrevil.la, por mor de La noche del Lloro. Gracies y col so permisu.

 
2 de Xunu de 2018

Nun suelo prodigame muncho por Murotecho, ya que dame muncha pereza esi llargu accesu embarráu y ye como a tol mundiu, cuando vamos a trepar en deportiva suel dar pereza, enllenase de barru y esos pateos llargos.

Averamientu hasta'l Murotecho

Aún así, a primeros de Xunu, diónos por dir hasta mediudía hasta esi ablucante paré, quiciás el más guapu de Teberga. Ellí, siendo cientu y la madre nel seutor, fice un par de 6bs mui guapos a mi entender, pero nun los alcuentro nos croquis pa saber cuales yeren y magar de pringar otru 6b más clásicu dimos el día por bono y colamos pa Entragu.

 Increyible paré d'esti seutor teberganu

A ver cuando vuelvo per ellí, ya que víes bones hai a mamplén y dalgún día tendré que dir pillándo-y el puntín a esti seutorazo. Nun sólo, pillándo-y el puntu, sinon que dir a esguilar, motiváu y con ganes de lluchar ya que regalar nun relaguen res en Teberga en xeneral.

 
18 de Febreru de 2017

Sábadu con un día murniu enforma, onde l'orbayu y el fríu son el calter principal nel ambiente, aún así, los atrevíos trepamuros deciden dir hasta Murotecho en Teberga. Como nun lo conozo, garro a Kíla ensin madrugar res y tiro tranquilamente hasta valle del Trubia.

Esti seutor ta penriba del pueblu de Sobrevil.la onde va unos añinos ficiera l'ascensión a la Pena Sobia y a la Siel.la. Esta vegada nun voi de monte y si a trepar un ratín, pero como nun conozo'l camín correutu p'aportar al seutor tiro hacia la canal de la Faya ya qu'a la so manzorga veo la muria de Murotecho.

Como voi con Kíla y tien ganes de corretiar pel monte, tómolo con calma y tiro d'intuición aportando a la parte alta del pueblu, xusto na baxera de la propia canal de la Faya. Dende equí, intento buscar dalguna sienda que lléveme hasta'l seutor nuna cómoda baxada... pero va ser que non.

Ante mí, tengo una vallina y perderéme casi durante hora y media, a la gueta de senderos factibles cruciando una guapa viesca que cuando crees alcontrar senderu con salida tórnase nun bardial infumable.

Otru intentu pela parte alta, llevóme a xubir casi penriba'l seutor y tener que dar la vuelta al non alcontrar baxada posible. Finalmente, vuelta p'abaxo y casi con ganes de colar, pillo una pista casi pegáu a la última casa del pueblu y como non, con tola tranquilidá llego hasta'l seutor.

Con un sudada increyible y casi sin ganes de poneme l'arnés, faigo un esfuerzu ya intento meneame per un 6a castronazo que tengo que facer al segundu pegue pa encadenalo. Cuéstame enforma, trepar en escueles nueves pa mi y necesito varies víes pa pilla-y el puntu a la roca.

Demientres la escalada, falar un ratín y picar dalgo pola hora que yera, Kíla anda a lo suyu por ahí como siempre pero nel intre avérase de más a los dominios d'una gran danés y con comida de pol mediu, píllala pocu sollerte y méte-y un mordiatu como na so vida.

Cola perrina sangrando y lloramicando, quitenseme toles ganes de trepar y el restu la tarde ocupámosla en curiar que nun enguarre la ferida y en curásela gracies a Ramón, que tuvo los ánimos pa dir hasta'l coche a pol botiquín cola caminata de turnu.

Mil gracies Ramón... yes un grande.

Ensin ganes de facer na y con mal cuerpu... colamos de Murotecho, esperando que la próxima visita seya un pelín más agradable y pueda centrame n'esguilar qu'al final ye de lo que trátase y non de meteme nuna enguedeyada pel monte y que me muerdan a la perra jeje.

La próxima más y meyor... porque pior ya nun puede ser...