Tarna (Casu) - Tabayón del Mongallu - Cuetu Negru - Vega Pociellu

 27 de Setiembre de 2020

Track: Tarna (Casu) - Tabayón del Mongallu - Cuetu Negru - Vega Pociellu

Día serondiegu enforma, con frescu mañaneru pero con unes previsiones perbones de sol tol día, poro espérase un "llenu" nel monte astur, ante la nueva moda que tamos sofriendo. Ye lo que traen les pandemies, camudos de vezos na xente y al non poder salir d'Asturies dalgunos meses, la xente descubrió lo que tenía en casa.

 

Nun tengo mui claro entá, si esto ye positivu o non, por un llau que la xente avérese al monte, pue dar de sí un mayor interés nos conceyos y nel país por caltener les siendes llimpies, al menos los PR y GR, pero paezme que sedrán la sociedá la que dicte sentencia y la masificación acabará por crear problemes mediuambientales y pente la xente llocal y los foriatos.

Partimos del pueblu casín de Tarna (985 m)

Nós, como siempre, madrugamos y plantámonos en Tarna col envís, de facer una circular que tenía va tiempu na tiesta. De camín, ya viéramos movimientu de coches nel accesu a la ruta a la Vega Pociellu, dalgo increyible a les 9 la mañana.

 

En Tarna ta la cosa más tranquilina y tan sólo dalgunos seteros y senderistes, sedrán colos que compartiremos camín hacia'l Tabayón del Mongallu. Nun hai que comentar muncho sobre esta ruta, ya que la so belleza caleyando pel monte Saperu ye bien conocía y eso que tamos nuna seronda dalgo tardía.

Caleyamos sele pel guapu fayéu hacia'l Tabayón del Mongallu

La verdá ye que vamos a los nuesos camientos y respetuósamente vamos pasando xente hasta que damos vista al nuesu oxetivu: El Cuetu Negru. El sol del alborecer paez marcar les nueses intenciones y el cuetu amuésase impresionante con esi toque xabaz y escuru, que tienen los montes verticales de cuarcita, esos montes que paecen sacaos de Mordor.

Esfrutamos del espeutáculu del Tabayón del Mongallu

En hora y media, tamos embaxo'l Tabayón del Mongallu, compartiendo semeyes con una familia de senderistes, qu'entruguen pa onde vamos y queden un pocu ablucaos. Despedímonos con calma y siguimos el nuesu camín desfaciendo un pocu de camín y travesando la riega'l Mongallu pa restolar sienda que nos faiga ascender per una vallina hacia'l colláu Vallinatrás.

Travesamos la riega'l Mongallu y ascendemos hacia'l colláu Vallinatrás (1476 m)

Esti tramu ye onde más sollerte hemos de tar, ya que podemos metenos nuna maraña d'urcies mui abegosa, poro val más baxar un pelín nel sen de la riega y garrar la vallina dende baxo, ascendiendo per una viesca pindia pero preciosa hasta aportar a Vallinatrás (1476 m) onde tendremos a tiru l'ascensu hacia'l Cuetu Negru.

Ascendemos al cumal del Cuetu Negru pel canalizu de la manzorga

 

Cuando albidres nun alcontrar a naide nestos requexos de Casu, vas y atopes a un montañeru que venía de facer vivac colos collacios na redolada del Puertu Les Señales. Falamos con él un ratín y arrancamos al cuetu siempre llibrando los espolones rocosos pela manzorga. 

Fadremos casi tola ascensión per una amplia canal, onde cruciámonos col restu del grupu, que casualidaes de la vida son collacios míos del ámbitu políticu. Aldericamos un pocu, de les intenciones de caún, amosándo-yos per onde baxar al Tabayón y desaconseyándonos ellos, la idega de garrar una  canal direuta hacia L'Ablanosa ya que la riega Pociellu venía mui fuerte.

Perguapu monte esti Cuetu Negru (1581 m)

Llueu de la charra, despedímonos y continuamos ascensión pasándonos a un canalizu herbosu y finalmente dende un hombru encumamos cenciellu los 1581 m del Cuetu Negru. Tengo que dicir, qu'esti cumal, merez munches más ascensiones ya que tenemos una de les meyores vistes del parque de Reres.

 

Nun soi a parar de mirar montes nos que tuve, pero acolumbrar tola estensión de la xerra Príes, col Cantu L'Osu perriba del monte Faucáu ye de lo meyor del día. Presta pola vida tar al sol, nuna cume tan solitaria y aparéntemente "inaccesible" y nun tener otra cosa que facer que nomar los montes que vemos: La Becerrera, Tiatordos, Maciédome, Ten y Pileñes, tol Cornión... tamos nel centru de Reres y ye una pasada.

Ablucante caminar coles vistes al Cantu L'Osu hacia la Vega Pociellu

Desfacemos camín y tornamos a Vallinatrás, onde paramos unos minutos, camentando esa posibilidá d'acortar la ruta pela canal que tenía na tiesta. Tengo claro qu'esti atayu diba tener munchu trabayu y pesie a ver un fayéu cómodu de baxar al entamu, güel a liada viendo les llinees d'altor del gps.

 

Consigo convencer a Benjamín, qu'a vegaes más kilómetros ye meyor y siguiremos crestiando hacia la Xerra'l Mongallu, con tramos de senderu per monte baxo y otros travesando viesques con unos collores d'ensueñu.

Descendemos hacia Pociellu dende'l colláu L'Arenal per una viesca increyible

Tamos na dómina más guapa del añu pa facer monte y tamos esfrutándolo enforma, ya que según miramos distintes posibilidaes pa baxar hacia la Vega Pociellu, nun paramos de sacar semeyes, anque al final, garramos xusto la vallina que tenía pensada dende'l colláu L'Arenal.

 

Munches vegaes, prepares coses penriba'l mapa y salen a la perfección ya que dende'l colláu anterior, el de la Rasa, tamién vimos baxada, pero nun día tan guapu que menos que baxar hasta Pociellu y muncho meyor si garres un fayéu de llibru pa descender hasta esta enorme vega.

Salimos a la Vega Pociellu onde alcontramos el llugar perfeutu pa tiranos nel prau un ratín

Con dalgo más de 5 hores de ruta, aportamos a la Vega Pociellu, onde alcontramos decenes de grupos, pasiando tranquilamente, neños xugando colos sos pas, merendando... una pasada. Camiento que nunca me tocara ver a tanta xente esfrutando d'un llugar aparéntenmente aislláu, ya qu'al menos un pateín hai que dalo.

 

Nós, decidimos tiranos media horina a xintar el bocata y echar media siestina al calecer del sol y darréu siguiremo camín pel PR que tien de llevanos de vuelta hacia Tarna. Dicir que nunca me tocara caleyar pel percorríu y ya dafechu recomendable, ya que'l monte Faucáu, anque seya la so parte baxa ye de gran belleza. 

Dexamos Pociellu pasando pela mayada L'Ablanosa

 

Caleyaremos sele, intentando ver pente la viesca esa canal de baxada direuta del Cuetu Negru y a cada vistazu que podemos dar pente los árboles, más feu la vemos, menos mal que nun mos metimos jeje. D'esti xeitu, aportaremos a la mayada L'Ablanosa, onde pente les guapes y conservaes cabañes despedímonos de la increyible faza norte del Cuetu Negru.

Descendemos hacia la puente'l Corral p'ascender de nuevu hacia Tarna

 

Dende L'Ablanosa baxaremos ya, per bona pista hacia la Puente'l Corral, onde empataríemos cola salida a la carretera en Llaría, llugar d'entamu del PR a la Vega Pociellu. Nós nesti puntu, magar d'echar una güeyadina al Escobiu Les Torres, onde podríemos enllazar camín dende la parte alta de Faucáu, siguimos pela sienda'l rigu hacia Tarna.

 

Comentar qu'hai un par d'argayos que dificulten el pasu y hai que tener un pelín de cuidáu, pero pásase ensin problemes, aportando al publín de Tarna magar de 8 hores de monte, casi 17 km y 1015 m de desnivel positivu acumuláu, faciendo una ruta circular completa onde les haya.

Camudando'l Camín en Tarna