jueves, 30 de septiembre de 2021

Las Cábadas (Cabrales)

18 de Setiembre de 2021

Hai víes qu'atragántense, ya que paez mentira qu'una vía curtia y bloquera, na que pues dar pegues más de continuu, escápese día tres día, pero bono, fueron díes de rises, de viaxar a Cabrales, aportar un vienres tarde col tiempu xustu de montar la vía, dar un pegue buenu y facese de nueche o ponese a orbayar y tener que colar del seutor.

Apretando de más en Banoria (7a+) última vía que quedaba pa finar tola escuelina

Pues esto pasóme con Banoria (7a+) que pa más picor, yera la última vía que quedábame del seutor y suel motivame la hostia llimpiar un seutor o una escuelina como ye'l casu. A la fin, cayó, pero costó díes de tener que marchar dempués de montala por lluvia o colar casi de nueche pa dar l'últimu pegue o pegar una solana de morrer y tener que pasar d'ella.

 
Anna llevándose l'otru sétimu (Cerica) de Las Cabadas con una motivación brutal

Por suerte, pude contar coles compis Anna y Andrea, que tamién teníen sos hestories por facer y pal restu los mortales "pros" estos seutores ya son casi odiaos, poro tener a les collacies pa dar los peguinos necesarios pa terminar col seutor fue un auténticu placer y mui d'agradecer.

 
Croquis modificaos de Las Cábadas por mor del blogue del guía de montaña Victor Sánchez. Gracies y col so permisu.


-----------------------------------------------------------------------------------

martes, 28 de septiembre de 2021

Caldes de Boí (Alta Ribagorça) - Cavallers - Pic de Comaloformo - Estanys de Gémena

 5 de Setiembre de 2021

Track: Caldes de Boí (Alta Ribagorça) - Cavallers - Pic de Comaloformo - Estanys de Gémena

Primer día d'actividá nesti viaxe pel Pirinéu 2020 - 2021 y como siempre, la ruta que teniemos pensada d'entamu, camudámosla por mor del conocimientu de Fernan, decidiendo salir dende Caldes de Boí, anque seyan más metros de desnivel que dende Cavallers, pa completar una circular a posteriori, dafechu maraviyosa.

Almorzaremos nel Camping Boneta de Barruera, a los que-yos daremos les gracies milenta vegaes pol bon tratu y enantes de les 9 la mañana, entamaremos a caleyar hacia'l banzáu de Cavallers. Fadrémoslu per un guapu senderu, nel que vamos dir atopando pontes que llibren la riega Noguera de Tor, dalgun campamentu de mocedá y milenta bloques de granitu que dan preste al fanatismu bloqueru d'esta fastera d'Aigüestortes.

Partimos del aparcaderu de Caldes de Boí (1482 m)

Nun soi nin munchu menos, bloqueru, pero hasta mí dábame ganes de garrar la colcho y esfrutar del paixase colos collacios, compartiendo pegues, rises y un mullíu prau onde tirase a descansar ente pegue y pegue. La verdá ye que tol camín pente Caldes de Boí y Cavallers ye seliquino de caleyar y los 300 metros de desnivel que vamos ganar, nun mos pesen demasiáu.
 
Al aportar a la base del enorme banzáu (embassament) de Cavallers, desviáremos hacia'l barranc de Comalesbienes y superaremos los últimos metros de desnivel per cómodes envueltes, hasta travesar el propiu banzáu penriba la muria, averándonos al entamu del senderu hacia'l nuesu oxetivu: El Pic de Comaloformo.

jueves, 23 de septiembre de 2021

Pirinéu 2020 - 2021

Del 4 al 11 de Setiembre de 2021

Dempués de casi 10 años, tornábemos al Pirinéu, con ganes de conocer llugares nuevos y tachar montes pendientes, centrándonos sobremanera nos 3miles cimeros del Pirinéu. Pa ello, un pocu taba preparáu tol viaxe entornu a l'ascensión a la Tuca d'Aneto, pero como siempre nel monte, les condiciones marquen el camín y nun diba ser distintu esta vegada.

El sábadu 4 arrancábemos dende Asturies, con tola calma del mundiu, parando a almorzar en primera instancia n'Unquera, onde diba conocer a Dani, compañeru de Mario que xuntábase a esti viaxe montañeru con munches ganes de monte, visitar pueblos y tastiar la gastronomía llocal.

L'equipu al completu pel Pirinéu

Continuaríemos camín hasta Basauri, onde realmorzábemos con Fernan y col equipu completu fadríemos el llargu viaxe hacia'l Pirinéu, con paraes en Puente La Reina y Ainsa, enantes de continuar hacia'l primer destín que yera'l Parc Nacional d'Aigüestortes i Estany de Sant Maurici.

viernes, 17 de septiembre de 2021

Vega d'Enol (Cangues d'Onís) - Pandecarme - Requexón - H.usantu - Canal Parda - Los Desvíos - Resecu

28, 29 d'Agostu de 2021

Track: Vega d'Enol (Cangues d'Onís) - Pandecarme - Requexón - H.usantu - Canal Parda - Los Desvíos - Resecu

Segundu finde consecutivu de salida a Picos, dempués de la circular per Trea y Culiembru, teniendo tamién un percorríu dafechu conocíu, sacante un par de zones y ye que col pasu los años, ye perdifícil alcontrar fasteres nueves, que nun supongan ponese mui seriu, en cuanto a pasos complicaos ente canales o ascensiones d'altu nivel.

Saldremos de la Vega d'Enol (1080 m)
 

martes, 14 de septiembre de 2021

Llagu La Ercina (Cangues d'Onís) - Verdilluenga - Trea - Caín (Valdión) - Culiembru - Ostón - Vegamaor - Arnaedu- Belbín

21, 22 d'Agostu de 2021

Track: Llagu La Ercina (Cangues d'Onís) - Verdilluenga - Trea - Caín (Valdión) - Culiembru - Vegamaor - Belbín

Findes de bon tiempu n'Agostu, nos que toca aprovechar y tirar pa Picos. Esta vegada, llevaba Carlina, diciendo de preparar un finde y dempués d'aldericar qu'opciones sedríen les meyores, viendo que nun conocía denguna canal de Picos, decidime a repetir dalgunes estayes de Traveseres d'antaño.

Llagu La Ercina (1115 m) sedría'l puntu partida
 
Una de les más guapes estayes pel Cornión, llevónos dende'l Llagu La Ercina hasta Caín, magar de facer tola cumera dende la Verdilluenga hasta la Peña'l H.ultayu, pa baxar per Trea a Caín. Poro, nun hubo muncho más que pensar y más coles ganes que tenía de pasar un finde nel Albergue de Caín, onde ya lloviera de les últimes aventures con Ana.

viernes, 3 de septiembre de 2021

L.lano (Quirós)

15 d'Agostu de 2021

Tornamos magar d'un añu, pela escuela de Quirós, nel L.lano, col envís de pasar el finde relaxaos, facer un pocu de bautismu escalador pa una collacia gallega y de pasu, ver si podíes apretar un pocu en dalgún regalín que me quedaba pendiente en forma de vía plaquera.

Bautismos esguiladores pel L.lano

Dempués d'una mañanina, de víes cencielles nel Escambelláu Inferior, vamos tornar al refuxu a tomar una cervecina y xubiremos de tarde hasta la Candela, onde vamos metenos Ruben y yo a Utopia, que la tenía pendiente dende cuantayá.

Kíla n'estáu de relax máximu na Candela

Esta vegada, tuve la suerte de dá-y un pegue coles cintes puestes por Rubén, lo cual sicolóxicamente aída enforma y pude llevámela al primer pegue, tachando una d'eses cosines que tenía pendiente dende visites d'antaño con Vane a Quirós.

L.lano (Seutores visitaos)

Croquis de la escuela d'escalada en: L.lano (Quirós) por mor de Mariño que m'empobinó a visitar la páxina de Piratas Free. Gracies y col so permisu.

----------------------------------------------------

miércoles, 1 de septiembre de 2021

Vegacervera (Gordón)

1 d'Agostu de 2021

Finde llionés, faciendo la última visita a les foces de Vegacervera, onde aparte de víes d'alpina de gran calidá hai dellos seutores de deportiva. Paez mentira, que magar de tantos años esguilando per Asturies y Llión, nun m'averase enxamás hasta Vegacervera a trepar.

El casu ye qu'arrimámonos hasta ellí, ya ensin yemes del día anterior, xubiendo hasta'l seutor Belvedere, onde aparte d'alcontrar un montón de xente, metímonos a probar dalgo curtiu, ya qu'entá pegaba la solana como pa facer víes más llargues al sol.

Parés cimeros de Vegacervera onde asítiense los seutores

Cola motivación escosa a estes altures del finde, Anna metióse a montar Lolita Nights (6c), de bloque y dalgo sobada, que fice al flash non sin meter una bona apretada en dellos pasos. Más tarde, metíme nun 6b+ a la manzorga por probar daqué más y llevéme'l bofetón llionés, con un pasu de placa que nun lleí na bien y pringada.

Aún así, entá tenía otru pasu de techu más enriba, que pa 6b+, va ser que nun me paeció, pero bono, cada visita a Llión ye colar cola sensación de nun movese y de tener que retomar la esguilada de nuevu y facese a la peculiar caliza llionesa.

Camudando'l Camín dende Vegacervera

Vegacervera
Croquis de la escuela d'escalada de la escuela de Vegacervera, por mor de InfoEscalada Gracies y col so permisu.
 
 

-----------------------------------------------------------------------------