Vega d'Enol (Cangues d'Onís) - Pandecarme - Requexón - H.usantu - Canal Parda - Los Desvíos - Resecu

28, 29 d'Agostu de 2021

Track: Vega d'Enol (Cangues d'Onís) - Pandecarme - Requexón - H.usantu - Canal Parda - Los Desvíos - Resecu

Segundu finde consecutivu de salida a Picos, dempués de la circular per Trea y Culiembru, teniendo tamién un percorríu dafechu conocíu, sacante un par de zones y ye que col pasu los años, ye perdifícil alcontrar fasteres nueves, que nun supongan ponese mui seriu, en cuanto a pasos complicaos ente canales o ascensiones d'altu nivel.

Saldremos de la Vega d'Enol (1080 m)

 

De toes formes, siempre ye un placer acompañar a los collacios a facer los sos retos particulares, poro aprovechando que teníemos pendientes el picu Requexón y la Torre Los Traviesos, por parte de Charly, xuntámonos Carla, Charly y yo pa pasar un finde de vivac pel Cornión.

Facemos camín hacia Vegarredonda pela xubida normal per Pandecarme

 

Como tengo l'envís de facelos baxar per un valle que nun conocen, el de Resecu, decidimos salir dende la vega d'Enol, pelín antes de les 10 de la mañana, pa facer camín clásicu hacia Pandecarme y siguir hacia Vegarredonda como tantes otres vegaes pela Vega la Piedra, canal de Canrasu y la Redondiella.

 

Continuamos camín pela Llampa Cimera hacia'l colláu les Merines

Aportaremos a Vegarredonda, tomando casi'l vermú cola calma y charrando colos collacios del refuxu de la nueva clientela que gasten y les aventures braniegues y siguimos camín pela Llampa Cimera hacia'l Porru Bolu, pa siguir hacia'l colláu Les Merines ensin pasar pel Mosquil de Cebolleda.

Les increyibles vistes de les Peñes Santes y el Requexón ocupen nuesos pensamientos

Plantarémonos baxo'l cumal del Requexón, magar de 4 hores de ruta con calma, más una de vermú y Charly que nun se ve pa xubilo, asi que tiramos Carla y yo, en rápida trepada, caún per un llau distintu, pa sacar dalguna semeya dende'l cumal, nesti calurosu día de branu.

Cumal del Picu Requexón (2170 m)

Baxamos coles mesmes, esfrutando de cada pasu y continuamos con Charly camín hacia la H.uente Prieta, onde aparte de descansar a xintar un pelín, tenemos que recargar agua, pal restu del día, la nueche y el día siguiente, así que les nueses mochiles sedrán más pesaes qu'hasta'l momentu, si ye posible.

Averámonos hacia la H.uente Prieta pa siguir hacia la H.orcada Santa María

Nestos camientos voi hacia la H.uente Prieta, cargando con cordino y arnés, por si tenía qu'asegurar a Charly, pero cuando la cabeza nun va, pues nun va y hai que respetalo. Aportaremos a la H.uente Prieta, alcontrándonos con Jose, miembru del GM Xuan de la Borrina, que taba de vivac, mancáu d'un todiellu nuna apertura alpina y llueu de charrar un bon ratu con él, siguimos hacia la H.orcada Santa María, llugar nel que Charly nun tuviera nunca.

Descensu hacia'l nuesu vivac nel H.usantu

Siempre hai que ser positivos, si no tenemos la cabeza pa trepar a cumales, al menos conocemos llugares nuevos como la H.orcada Santa María, la cúal prestó-y munchísimu coles vistes de la Torresanta de Llión y de tou'l H.usantu, al que baxamos sele, col envís de restolar cual sedría'l nuesu vivac perfectu, alcontrándolu con vistes hacia'l Boquete y tol macizu central de los Urrieles.

 

Alborecemos con otru día ablucante de sol nel H.usantu

 

Los vivacs caún los vive a la so manera, supongo que'l primeru de Charly sedría d'esfrute pola estrellada, pola bona temperatura de nueche y pol alborecer, pero como siempre la comodidá, nun suel facer les coses cencielles, al menos, personalmente nun soi a durmir muncho, poro, prefiero pegame xataes y baxar a durmir nuna camina o na furgo nel mió colchonín maraviyosu.

 

Ensín café mañaneru, nin la cerveza de dempués de l'actividá del día anterior, llevántome así de la manera, vamos que nun tengo'l meyor humor y mis niveles de repunancia tan al altor de los montes de tola redolada, asína que voi desperezando pali pali, demientres damos los nuesos primeros pasos de camín al H.ou Los Asturianos dende'l H.usantu. 

Salimos del H.usantu (2113 m) con enerxíes renovaes

Ensin más salimos del H.usantu, pasándonos hacia'l H.ou los Asturianos y Charly coméntanos que nun ta pa munches hestories, asina que va esperanos demientres facemos dalgún cumal de la zona. Atacamos Carlina y yo, una vegada más, el Picu Los Asturianos, nuna trepada entretenida y aérea nel so tramu final.

Cume nel Picu Los Asturianos (2274 m)

Baxaremos de Los Asturianos y continuamos pela so crestería, también mui guapa y entretenida hacia la Torre de la Canal Parda, la cual tíen la meyor vista posible de la Torresanta llionesa, a la que va siendo hora de volver, dempues de tantos años, anque va picándome una actividá potente nesti guapu monte, así qu'habrá que pensalo en condiciones.

Facemos cume na torre La Canal Parda (2358 m)

Dende'l cumal, Carla y yo decidimos que nun paga la pena siguir hasta Los Traviesos, ya que nun vamos dexar esperando más tiempu a Charly, así que decidimos descender pela fastera contraria hacia'l H.ou La Canal Parda alcontrándonos nel hombru col H.ou La Capiya.

Entamamos un novedosu descensu hacia'l canalón de los Desvíos

Miramos les posibilidaes y ensín dubia, tírome a conocer una fastera nueva, poro dexaremos el Porru Los Garapozales, que ya ascendiera con Fernan de camín hacia Vegarredonda, a la mandrecha y continuaremos per un mar caóticu de caliza hacia'l Valle Resecu.

Negociando l'entreteníu Canalón de los Desvíos

Meterémonos no que nómase, como'l Canalón de los Desvíos, una d'eses canales del Cornión mui pocu transitada polo abegosu del tarrén, como pudimos dir descubriendo, anque tengo que dicir, que personalmente son llugares que me fascinen, con tramos de descensu per llambria brutales, baxaes a fondos h.oos y torques nes que nun ves el final y un continuu navegar nel que malpenes atopes un h.itu de xemes en cuando.

Enllazamos col final del Canalón del Conh.urtáu aportando a los h.oos del Resecu

Magar d'esfrutar durante muncho rato y col banduyu llenu, llueu d'una paradina a la solombra, decidimos que va siendo hora de salir a tarrén más favorable, así qu'escaecemos un pocu el final del canalón de los Desvíos, quiciás más xabaz, na so cayida hacia los H.oos del Resecu, saliéndonos hacia la parte media del Canalón del Conh.urtáu, munchu más amable y que nos dexará cómodamente nel Valle Resecu.

Descendemos tol valle Resecu que nesta dómina l'añu si ye consecuente col nome

 

Nun soi imparcial colos valles del Cornión, tanto los del rigu Ridimuña como'l del Resecu, son valles que me presten pola vida patiar y que nun me cansen. Son valles enllenos de vida y ganadería, qu'anque nesta dómina tuviera 'l rigu más seco de lo que me prestaría, danme más ganes de tornar na primavera pa velo en tola so plenitú.

Tramu final dende'l Resecu pasando pol Bricial y el monte'l Palomberu

 

A bon pasu, facemos el restu del valle Resecu, parando xustu al final, nes poces del esaniciáu mayáu de Les Texuques a refrescar los pies, pa salir del valle hacia'l llagu Bricial, siempre pela manzorga'l rigu ya qu'este termina nuna especie de tabayón que sume per una covacha.

Vemos el final hacia la Vega d'Enol al fondu

Con pocu más, decidimos facer el restu del camín, pel PR del fayéu de Palomberu, que va dexanos igualmente que'l PR que da la vuelta a los Llagos, na Vega d'Enol xusto onde dexáremos la furgoneta'l día anterior, con toles ganes del mundiu de patear pel Cornión.

En resume, otra guapa circular con vivac nel H.usantu de 26.5 km y 2000 metros de desnivel que lloñe d'aventures más estremes, ficiéronmos pasar un finde de monte con temperatures afayaices y nos que los tres, conocimos un pocu más de los Picos, que siguen y seguirán dando tarrén de xuegu a tolos niveles montañeros.

Camudando'l Camín na redolada de la Torresanta