Peña Manteca (Morcín)

26 de Mayu de 2022

Siendo sinceros, llueu del mes de Marzu y Abril, col bon tiempu y bones temperatures que fizo, nun contaba casi con apaecer de nuevu pela Carba. Nel mes de Febreru si que xubiera con Santos y Dani varios vienres, probando tranquilamente Distopia Primaveral (7c+/8a), ensin mayor envís que dar pegues sueltos y ver si yera a moveme nestos graos.

Llueu de munchos díes pela Cualladrona, llevándome Aker y Soul (7b+), Roca Norte (7b+/c) y dexando a puntín Esclavos del Grado (7c/+), averéme dellos díes frescos hasta la Carba, p'acompañar a Santos que taba probando Pétalos (8a), asina que volví a dar unos pegues a Distopia Primaveral, xunto a Rubén, viendo que me movía diferente, algamando munchu color nun últimu pegue del primer día. 

 

Primer tramín al bloquín d'entamu de la vía

D'esti xeitu, unos cuantos díes más, fuimos afinando la forma y los movimientos y cola motivada del encadene de Rubén, tocó dir a por ella, cola cuenta atrás del calor picando a la puerta. Un par de díes más, dexándola con una caída cola compaña d'Orlando que la probaba per primera vegada y esta selmana sentía que yera'l momentu de llevámela.

Pifiando'l bloque nel primer pegue del día

El martes, xubía con Orlando, montándola y viendo que taben munches preses húmedes poro, diba tar la cosa complicada. Baxo cepillando y dando magnesiu a les preses, dando un segundu pegue bastante buenu, cayéndome nel pasu duru pa min, aportando a cadena y dexándola una vegada más y diben 3 con una cayía.

 

Nel bloque más duro de Distopia Primaveral

El miércoles con un día frescu y sequino, nun tuve la suerte de tener compañía pa xubir, asi que tuve qu'esperar al xueves, onde al igual que cuando probé la vía per primer vegada, arrodiáu de collacios, fuimos hasta la Carba a echar la tarde, viendo que pegaba una solana de puta madre, así que pintaba fea la cosa.

 

Aguantando'l pasu final na sección más dura de la vía

Tocamos la roca, vien una ñube y entro a la vía, con sensaciones bastante buenes, nel clásicu pegue pantera, aportando al bloque y casi quedándome de la presa, pero yéndome p'abaxo. Sigo hasta cadena, pola cosa de dexala de nuevu con una cayía ya intento centrame nun segundu pegue hasta onde caiga y dexar un terceru pa marchar.

 

Placa final hacia la cadena nel pegue d'encadene

Me como un pegue colega de Silvia en Crucifixión y métese la ñube y sopla un vientu friu, asina que métome a la vía a ver que pasa, entrando al bloque con fuercia, sintiendo mi presa clave mui bien, quedándome nel dinámicu, asina que salgo p'arriba de la barriga, intentando baxar vueltes con calma nel siguiente chapaxe.

 

Encadenando'l proyectu de la Carba la Robla

Doime un airín incómodu y salgo col mió métodu, colocando pies y zarranda pinza de dreches aportando a la d'esquierdes lo más paráu posible, yendo al dinámicu final, más paráu de lo normal y yéndoseme un pie, que nun sé mui bien tovía, como aguanté la puerta.

Tuve la suerte de recomponéme y ya centrar tolos pasinos finos de pies y zarrar les preses llaterales como si nun hubiera un mañana, hasta aportar al reposu final. El restu la hestoria, la de siempre, ponese cardiacu por culpa del pasín llargu de cadena pa los baxos, pero llego bien paráu, chapando la cadena ensin problemes y llevándome Distopía Primaveral (7c+/8a), teniendo claro que depende muncho de la estatura, pero nun tengo tantes referencies pa decantame.

Tuíza Riba (L.lena) - Meicín - Picu'l Siete - Puerta L'Arcu - Senda Les Merines

8 de Mayu de 2023

Track: Tuiza Riba (L.lena) - Meicín - Picu'l Siete - Puerta L'Arcu - Senda Les Merines

Tornábemos al Macizu de Penubina dende va tiempu, cuando ficiéramos la crestería dende'l Fariñentu al Picu'l Canalón Oscuru, asina que cola idega d'echar un vistazu a la integral pente los Picos del Fontán a Penubina, averámonos hasta Tuíza Riba llueu del clásicu almuerzu en Campumanes.

Xuntámonos pa la ruta unos puquiñinos, llueu de la baxa de varios miembros durante la selmana, pero alborecemos con un día fresquino pero mui guapu, poro salimos con xeitu hacia'l Meicín, faciendo'l míticu percorrí hasta'l refuxu en pocu más de cuarenta minutinos.

 

Partimos dende Tuiza Riba (1210 m) nun día soleyeru

La idega yera facer una versión curtia d'esta integral pente'l Picu'l Siete y la Penubina, asina que pasamos penriba'l refuxu, onde veíase que diba desperezando la xente y averámonos hacia'l valle Covarrubia, pel que ya pasáremos delles vegaes, una delles siendo l'ascensión al Prau Capón, primer ruta col grupu d'Alberto y Natalia va casi diez años.

Cualladrona (Morcín)

5 de Mayu de 2023 

Continuamos esfrutando de la escuelina de la Cualladrona, onde pocu a pocu vamos cumpliendo oxetivos pa esta temporada. Digo temporada, pero como n'Asturies agora esguilamos tol añu, ya nun sé mui bien, cuando ye temporada de primavera-branu o seronda-iviernu, el casu ye que tenía na tiesta facer tres víes: Aker y Soul, Roca Norte y Esclavos del Grado.

Esti últimu mes, llueu d'encadenar Aker y Soul, centréme en Roca Norte (7b+/c), a la que malpenes l'añu anterior diera un pegue a mou de preba. Esta vegada, los pegues fueron pasando, garrando mis métodos, mis pies y sobretou dominando los llargos pasos que tien esta vía pa la mió altura.

 

Semeya trepando en Aker y Soul a falta de semeyes en Roca Norte

Sicasí, los que somos unos putos mataos nesta d'esguilar, pues toca ser testerón enforma, sinon acabes dexando les víes ensin encadenar. Pero si dalgo se me da bien, ye ser costante, garrar el puxu na propia vía y dir moviéndome cada día meyor, anque esta vía supuso un retu mental cayéndome nel últimu pasu duru hasta 12 vegaes.

A la fín, nun pegue de los míos, pegue pantera, ensin calecer, ya que taba montada por collacios como Poch y Fer, equipadores del seutor, algamé l'encadene, ensin fallu, ensin sufrir, un pegue d'esos que sal too bien y paez que vas hasta fácil pela vía... pero, esto ye, polos milenta pegues anteriores que-y tuve que dar... si yes malu, escala muncho.

Sobrefoz (Ponga) - Monte Fana - Puertu Sus - Picu Zorru - Mayáu d'Enol - Vallizón

1 de Mayu de 2023

Track: Sobrefoz (Ponga) - Fana - Sus - Picu Zorru - Enol - Vallizón

Garramos puxu cola actividá montañera, dempués de la guapa ruta per Riosa y les sos mines del Texéu y esta vegada, a petición de Mario, viaxamos hasta'l conceyu de Ponga, intentando escaecer les aberraciones d'asesinatos de llobos que salieron nos medios, dando una imaxe d'esti conceyu y los sos paisanos terrible.

Tornábemos hasta Sobrefoz, un pueblu, al que-y tenemos un ciñu especial, por munchísimes rutes que ficimos nestos años y pol tratu recibíu les vegaes que quedamos a durmir y xintar. Esta vegada, vamos decidir xubir pela pista Ventaniella hasta averanos a Fana, onde aparcamos la furgo y preparámonos pa salir a patiar.

 

Partimos penriba del pueblu de Sobrefoz en Fana (815 m)

Esperaremos media horina a que lleguen el restu de compañeros, ya que nun s'atrevieron a xubir pela pista y vinieron caleyando dende Sobrefoz, anque a dicir verdá, la pista a Ventaniella hasta onde xubimos, ta meyor que la carretera que va de Abiegos a Sobrefoz, asina que toos xuntos entraremos a la mandrecha del rigu Vallizón, penriba d'una cabaña hasta otra cabaña perbien arreglada, onde tenemos crucie de caminos hacia la Foz de Vallizón de frente o hacia'l monte Fana a la mandrecha.

L.lamo (Riosa) - Mines de Texéu - Peña Los Bescones - Camín del Fierru - Espines - L'Argañosa

22 d'Abril de 2023

Track: L.lamo (Riosa) - Mines de Texéu - Peña Los Bescones - Camín del Fierru - L'Argañosa

Tornábemos a les rutes del GM Xuan de la Borrina, con una asignatura pendiente como yera conocer un pelín meyor la fastera riosana de cordal de L'Aramo. Pa ello, siguiendo los conseyos del compañeru de cordada riosanu, Santos y revisando delles entraes de blogues montañeros como'l de Cienfuegos y hestóricos como'l de Historia y Patrimonio de Riosa, díbemos averanos hasta'l pueblín de L.lamo.

Hai que destacar que conducir dende L'Ará hasta'l pueblu de L.lamo, ya amuesa lo que vamos alcontranos, una fastera bien guapa de L'Aramo, con viesques bien conservaes, rigos y dellos pueblinos qu'asítiense pel occidental del rigu L.lamo.

 

Entamamos la ruta dendel pueblu riosanu de L.lamo (530 m)

Aparcaremos a la entrada'l pueblu, garrando agua na guapa fonte y preparámos a salir caleyando pela pista en xubida siguiendo los cartelos del pueblu mineru de Rioseco. Venti minutinos dempués y coles pates calecíes, ya tábemos frente a los tres edificios principales, onde podemos ver un claru intentu de recuperación d'esti espaciu, a mou d'atracción turística.

Porrimán (Morcín)

18 d'Abril de 2023

Esti añu, colos proyeutos ya centraos pa la temporada de primavera-branu, sobretou nel Callexón d'Otura y na Cualladrona, tener un seutor nuevu como ye Porrimán, con una bayura de víes de sétimu grau enorme, ye una auténtica ayalga, tanto pa continuar xubiendo nivel, como pa confirmar y asentar el 7b/+ nun grau qu'entame a salir más cómodamente, durante esta temporada.

Kíla apostada na balconada del seutor Porrimán

Sicasí, tovía nun probé dengún 7b nesti seutor, ya que teniendo seutor nuevu, préstame dir pali pali, tachando d'abaxo p'arriba, asina que tenía probada d'otru día sueltu, Proa Norte, un 7a+ mui a bloque con un pasu mui marcáu nun techu, que l'anterior vegada nun fuera a encadenar y que nesta ocasión, cola compaña de Rubén a los mandos, ficiéramos los dos nuna tarde mui provechosa.

Dellos escaladores (Lito, Silvia) nes distintes víes de Porrimán

Tovía tuviera va unos díes col collaciu Santos, nuna tarde na que veníemos reventaos de dos día anteriores apretando y aportamos al seutor, ensin tener una idega clara de pa onde díbemos metenos. Decidímonos por un proyeutu que sabíemos que saldría 7a+, lo que nun contábemos yera colo sucio de la vía y con una equipación que nun mos prestó nin media, aportando a cadena y desmontando por mor, de nun xuganos un mal vuelu y mancanos intentando encadenala.

Rubén echando un güeyu a la vía demientres Silvia afronta'l pasu clave

Trail Cuevas de Soria (Almazán)

8 d'Abril de 2023

Track: Trail Cuevas de Soria

Web del Trail: Puro Oxigeno Soria   

Clasificaciones: Clasificaciones 2023

Como siempre, intento tar centráu en cuanto a les carreres pel monte, intento facer calendariu, intento separar les carreres en tiempu, mínimu quince díes ya intento nun engorilame de más. Pero, pesie a que llevaba un añu estupendu, terminando retos en Deva, con tres díes de carreres, la Maxi de Cangues d'Onís o les rápides y dures en Nava y Nembra, picáronme pa correr tamién nes vacaciones en Soria.

Tou diba bien, corriendo cada quinces díes, ensin entrenar, apretando dientru de les mis posibilidaes, ensin molesties y quedando dempués de cada carrera con un tastu especial, cola sensación de tar faciendo bien les coses, pero voi pal pueblu y poles mañanes como nun hai muncho que facer, pues salgo a correr un pocu ascendiendo dalgún montucu de la zona, como la Muela o el Castillo de Gormaz.

 

Tamién corremos en vacaciones en Cuevas de Soria

D'esti xeitu, anque malpenes fueran 5 y 7 km los que corrí el Xueves y el Vienres, al terminar el vienres ya noté qu'entá nun taba recuperáu de la Resistencia en Nembra, una carrera mui rápida y dura, con un nivel altísimu, na que llegara a meta tan cansáu casi como nel trail Villa de la Sidra Nava y eso que fuera 5 kilómetros menos.

Asina que tocáu del psoas, fuimos tola familia hasta Cuevas de Soria, onde facíase'l primer Trail Oxigeno Puro de Soria, con un percorríu de 16 km y 600 m de desnivel, amosando a les clares, lo rápida que diba ser la carrera, lo que quiciás nun me diba bien y muncho menos el calor que facía ya a les 11 la mañana cuando entamaba la carrera.

 

Imáxenes en plena carrera y Miguel comentándo-y la xugada a la entrevistadora

Al final, lo de siempre, 200 corredores, un nivel menor que n'Asturies y poca xente con ganes de salir alantre, asina que sin querer entames la carrera y veste nes 25 primeres posiciones, corriendo fuerte, nun tarrén cenciello y de grandes ritmos, hasta entamar el cortafueos hacia'l Alto de Inodejo, puntu más altu de la carrera, onde veo que les pates nun van y entamo a perder posiciones.

Algamamos el cumal, garramos agua y entamamos la baxada más o menos a metá de carrera, teniendo per delantre una llarguísima baxada, onde'l psoas y el piramidal ya nun me dexen correr fuerte, viendo como nun soi a caltener ritmu, faciéndoseme perpesada la rápida baxada y siguimos perdiendo posiciones, cuando debería baxar nestos tarrenes a fueu dafechu.

Una última xubidina hacia un castru y ermita penriba'l pueblu, dempués d'un tramu guapísimu de foz pel ríu Izana, dábame un pocu d'aliendu pa llevanos a la fín, hasta'l pueblu de Cuevas, entrando a la meta dempués d'un calvariu de carrera, onde nun pude esfrutar, nin correr tolo que me diba prestar, aportando na posición 42 y coxu dafechu, cola sensación de fastidiar tola temporada que tenía en mente.

Resistencia Reino Astur Nembra (Ayer)

2 d'Abril de 2023

Track: Resistencia Reino Astur Curtiu (Ayer)

Web del Trail: Resistencia Nembra   

Clasificaciones: Clasificaciones 2023

Continuamos con esta temporada tan correndera, na que tornamos a sentinos bien y anque dexáremos d'entrenar pela semana, con tan sólo andar pel monte pa dir a esguilar y correr cada quince díes, siguimos ganando estáu de forma y vamos completando carreres tan positives como la pasada en Nava, nel primer Trail Villa de la Sidra.

Semeya perguapa per tramos de correr a fueu

Esta vegada díbemos pa Nembra, con menos kilómetros qu'en Nava, pero más desnivel y una carrera más típicamente asturiana, ye dicir, a pinchu p'arriba y a fueu p'abaxo, ensin medies tintes. Ya la corriera va cinco años, cuando facíase en Xunetu y gustárame muncho, teniendo la idega de facer la meyor carrera posible.

Primera parte de la carrera a pinchu hacia'l picu la L.lomba

D'esti xeitu, salimos bastante alantre, viendo como'l nivel diba ser peralto, saliendo como tiros tolos participantes, hasta topanos con un tapón, al cruciar los primeros regatos. Llueu, fuese estirando pali pali la carrera, hasta aportar a la gran xubida hasta'l picu la L.lomba, un entepechu brutal que tuve que tragar con un personaxe llevando musiquina discotequera, hasta qu'a la fín pude adelantalo.

 

Tramu correnderu nel crestéu hacia'l picu Pedru García

Son cosines que me fadien munchísimu y los organizadores deberíen tomar cartes nel asuntu, nin auriculares nin música qu'ofenda al restu participantes. Si corres pel monte, deberíes ser capaz d'esfrutar del monte, de los soníos, del alendar de los compañeros que corren al to llau, de la charra en comuna y del bon ambiente de les carreres, sinon, vete a dar vueltes a un parque con tu musiquina y dexar vivir el monte al restu los participantes.

 

Increyible lo dura y correndera que ye la Resistencia Nembra

Sacante d'esta falta d'empatía, llueu de la L.lomba, pude esfrutar de correr y aldericar con varios deportistes demientres avanzábemos hacia'l picu Pedru García, onde nos tocó ver l'horror de los incendios d'esta selmana, corriendo per tierra quemada, casi caliente y tragando un pelín de fumu, qu'entá salía d'esta tierra astur, que dalgunos empéñense n'estrozala.

 

Tramu final de carrera hacia la meta

Como siempre dempués d'encumar el puntu más alto, toca una llarguísima baxada, con tramos téunicos al entamu, otros más correnderos na parte media pa tornar a baxar per trialeres bien guapes, hasta'l ríu Negru, onde ya tendremos un llanéu hasta arribar a la meta en Nembra, onde Rubén, el nuesu animador preferíu y paisanu de Nembra, tenía a bien saludar participante, tres participante, nesta folixa del trail.

Aportamos a meta dempués d'una carrera bien lluchada

El nivel ye tal, que dempués de facer una bona carrera, aportamos a meta el 121 de 313 participantes y el 38 de la mió categoría de 105, siempre rondando tar nel primer terciu de los compañeros, pero como digo, ye una pasada ver el nivel notándose que los corredores entrenen y muncho... poro, los montañeros agora, quedamos cola sensación de facer lo que podemos ya intentar esfrutar d'esti deporte como un complementu estupendo al restu de les nueses actividaes.

 

En cuanto, a la organización del pueblu de Nembra, namái que dar les gracies pol ambiente, pola carrera, pol avituallamientu final, con pasta recién cocío, empanaes, cerveza gratis, mercáu astur y tol pueblu volcáu con esta folixa del trail, a la qu'espero volver mientres tenga fuercies y ganes d'intentar competir dientro del nivel al que pueu y pienso dar.

Frechura (Mieres)

31 de Marzu de 2023

Tornábemos una vegada más hasta Frechura, esta pequeña escuela de pies finos, preses romes y escalada téunica, mui afayaiza pal branu, ya que tien solombra peles tardes, anque'l calter rudo y desagradecíu de la so escalada fai que nun seya mui visitada pela mayoría de los escaladores asturianos.

Hai que dicir, que los graos más baxos son 6b altos y rancietes, así que ye normal la poca afluencia d'escaladores de grau mediu-baxu, ya que tamos falando de víes nes que toca afrontar, pisar, moverse, entender los pasos y apretar al empar y por qué non, pasar un pocu de mieu.

 

El llugar de Frechura... un llugar especial pa la esguilada

D'esti xeitu, volvíemos hasta Frechura, col envís d'avanzar nesto de la escalada y ye que camiento qu'esta escuela ye necesaria pa cualesquier escalador que quiera meyorar, que quiera deprender a movese a entender de que va esto de la escalada, lloñe d'agarrar cazos en desplomes y preses de collores nos rocómodros.

Asina que l'añu pasáu, por mil motivos tán sólo fuimos un día per ellí, llimpiando Ya era hora, un 6b+/c a la mandrecha, que taba un pelín inaccesible y qu'esti añu volvimos a repetir, encontrándolo un pelín gochete, pero da pa escalalo sin munchos problemes.

El muru impresionante de Frechura con una escalada fina

Tamién, probara l'añu pasáu Vagoneta, un 7a tamién a la mandrecha, mui guapu, con un tramu fino ensin reposos, qu'esti añu, monté nun primer pegue, pa encadenalo al segundu, dándome cuenta d'esti puntu agónicu nesi tramu de tres chapes en sin bonos pies nin reposos, hasta salir a la repisa central.

Llueu ya toca reposar y centrase na increyible placa final prieta con pasinos placa per güeveras y preses ablucantes, dando-y un puntu final a la vía bien guapu. La verdá ye que prestóme muncho esta vía y dióme ganes de siguir prebando y tachando víes nesta escuela, así qu'esperamos alcontrar con quien dir a pasar un pelín de mieu jeje.

Frechura
 
Croquis modificaos por mi de la escuela d'escalada de Frechura, por mor de la Asociación de Escaladores Astur Vertical. Gracies y col so permisu. 
--------------------------------------------------------------------------------------------------------------------------

Covarriella (Morcín)

25 de Marzu 2023

Finde de collacios colos que facía tiempu nun escalaba, axuntándome'l vienres na Cualladrona con Pepa y Jose, pa enseñá-yos esti seutorín, del qu'actualizaremos info esta, pa quedar con ellos de nuevu, pa xubir el sábadu hasta la Covarriella, onde facía xustu un añu pel que nun pasaba a trepar, anque si pasara corriendo delles vegaes nos entrenos pel Monsacru.

Como siempre, el patéu previu dende que dexes la furgo hasta'l seutor, ye una maraviya con vistes a tola redolada montes, col Monsacru enfrente, tol cordal de L'Aramo a la nuesa manzorga y si das la vuelta, tolos montes de L.lena, Ayer, la crestería de Peña Manteca col Llusuriu detrás y hasta Picos al fondu, lo qu'amuesa la guapura d'esti llugar.

Vistes xubiendo a la Covarriella

Cuando aporté'l sábadu pela mañana, ya taben nel seutor Pepa y Jose, con Edu y Tito, escalador l.lenizu que nun tenía'l pacer de conocer. Cola calma, entamo por asegurar a Pepa nun quintín que nun me gusta muncho polo roto y ye qu'a dicir verdá, les víes cencielles de Covarriella nun son mui guapes nin agradecíes.

 

César esfrutando de la roca de la Covarriella

Tocaba mi turnu y metíme a probar un 6c+, con entrada a bloque, como casi toes les víes d'esta parte, ya que tien un zócalu d'entrada pelín gafu, saliendo per romos pa una escalada muncho más seliquina. Como non, facela a vista yera complicáu, asina que tuve que facela al segundu pegue serio, pegando l'apretada inicial y saliendo hasta cadena ensin problemes.

 

Pepa motivada apretando na Covarriella

Llueu d'un peguín de Pepa a otra vía pa calecer, pasamos a lo meyores momentos del día, metiéndome a vista en SomosFempa un 7a, mui guapu, con muncha conti de presa pequeña y por supuestu, ensin una entrada tan bloquera, pudiendo lluchala y sacándola a vista, lo que prestóme pola vida, porque ya nun me queden munches víes d'esti grau nes que poder esguilar nesti sen.

 

Edu en SomosFempa nuna vía increyible y Miguel, César, Santi... un placer como siempre atopanos nos seutores

Magar d'esti pegue tan prestosu, tuve la suerte d'asegurar a Pepa nun 6a+ (Que Guapada, creo) apretonina que tamién fue a encadenar como muncha solidez, completando dos díes d'esguilada mui potentes, encadenando varies víes d'esti grau, confirmando'l so regresu a la escalada de primera ensin mieos.

 

Visitina al seutor Marco Polo baxo la Covarriella

Col trabayu fechu, dediquéme a dar un paseín, comentándome Tito y Edu, qu'había víes nun muru con una visera brutal na parte alta, a la qué-y echara un vistazu va tiempu, averándome hasta ellí, comprobando la esistencia de cuatru víes de grau baxu, no qu'informeme que sería'l seutor Marco Polo, quedándome con ganes de probales y facer croquis, ya que pudiera completar perfeutamente con Covarriella.

Camudando'l Camín na Covarriella cola Mostayal al fondu

Trail Villa de la Sidra (Nava)

22 de Marzu de 2023

Track: Trail de Peñamayor (Nava)

Web del Trail: Trail Villa la Sidra

Clasificaciones: Clasificaciones 2023

Un añu xustu fai que tornábemos a correr pel monte, o más bien, a "competir" dientru del nuesu nivel, que ye'l montañeru que fae de too. Daquella, ficiera la carrera curtia, sofriendo un pelín na parte final de les Foces del Pendón, como suel pasar nesta carrera, sicasí termináremos contentos y con ganes de más, faciendo otres tantes carreres na temporada.

Esta vegada, vengo mui rodáu, anque nos últimos meses ya entré en mou escalador y la compañera de carreres lesionóse, poro nun toi entrenando res, yendo namái, que de carrera en carrera que nun ye poco. Pero bono, pente los tres díes nel Trail de Deva y correr la Maxi Kangas, nun corretiar de quincena en quincena, nun me taba yendo mal.

 

Silvia que volvía a correr una carrera llueu d'un mes y mediu

Como plantegame esta carrera de 26 kms yera una entruga que tenía na tiesta, ya que sabía que podía apretar casi tol percorríu, asina que salimos un pocu atrás como siempre, garrando ritmu y corriendo sacante los atascos per Pra, tolos primeros kilómetros hasta l'entamu de la xubida hacia Fayacaba.

Durante la xubida, pesie a dir cargando un pocu pates, vi que'l ritmu que llevaba yera curiosu y enriba taba divirtiéndome, sufriendo pocu y charrando muncho cola xente que diba alcontrando, asina que siguimos fuerte hasta Peñón d'Orosu pa baxar a echar un tragu y entrar n'ascensión al Picu Peñamayor.

 

Travesando'l cresteríu per Peñamayor

Equí entamamos a regular ya que les posiciones nes que me movía, yeren de ritmos fuertes, a los que nun toi mui avezáu, asina que controlando calambres con sales, hidratando y demás, fuimos a caltener ritmu, hasta entamar la baxada hacia les Praeres, onde tamién nun quise apretar muncho, ya que la pista fízoseme pelín pesada.

Nes Praeres, piqué dalgo y continué a la espera de los problemes vinientes, pero xubimos la Varallonga con muncha facilidá, ganando posiciones y ya tireme abaxo hacia les Foces del Pendón, con otra visión, descendiendo apriesa y sofriendo un pelín, como siempre nel llanu de les foces, pero munchísimu menos qu'otres vegaes, anque sigue paeciéndome incomodísimu de correr esti tramu.

 

Les Foces del Pendón pasando factura como siempre

Aportamos al descensu final hacia H.uentesanta, colo meyores ritmos de carrera que soi a alcordame, faciendo una xubida hacia Piloñeta, corriendolo tou y ganando dalguna posición más, pa facer los últimos kilómetros a bonos ritmos y con sensaciones mui prestoses hasta aportar a la meta, onde alcontrábase Montse animando, a la que vamos ver si-y pica volver a correr.

Como siempre ambientazu per Nava, llavase un pocu, llimpiar una ferida d'un fostión que pegara na parte final y tomar unes cerveces esperando por Silvia, que tuviera qu'abandonar por mor de dolores nuna rodiella.

Aportando a meta mui contentu cola carrera

En resume, carrera guapísima, con nueva organización de diez, na qu'esfruté munchísimu con un tiempu de 3 hores y 10 minutos, quedando'l 56 na xeneral y el 15 na mio categoria y como siempre alloriando cola xente, lo munchu qu'entrena y lo fuerte que ta, ya que paezme que por muncho qu'entrenara baxar de les 3 hores, quédame fuera l'alcance y siendo sinceros, tampoco ye a aportame tanto.... pocos montañeros quedamos nesto de les carreres.