Track: L'Azorera (Tinéu) - Pena Filera
Un día más d'esta seronda pasada per agua, intentamos camudar el xeitu de viesca colloría pel monocollor de la ñeve. Pa ello, magar d'una ñevadina curiosa, decidimos escapar hacia la cota más alta de Tinéu, na llende col conceyu somedán que tanto visitamos nel X Aniversariu del GM Xuan de la Borrina.
Averarémonos entós, hasta'l guapu valle de Tuña, pueblu tinetense conocíu por ser llugar de ñacimientu del xeneral Riego, pa siguir carretera alantre hasta Xinestaza, tamién perconocíu pela so fana, que ye un accidente xeolóxicu ñatural pel que la Pena'l Diente argaya per tola vallina abaxo col pasu los años.
Equipín preparáu pa salir a patiar dende L'Azorera (790 m)
La nuesa salida sedrá un par de kilómetros más alantre nuna curva xusto enantes d'aportar al pueblu de L'Azorera. Ellí, dexaremos los coches y prepararémonos pa garrar un ampliu camín que tien de llevanos a conocer tol valle del rigu Xinestaza.
Empobinámonos valle Xinestaza alantre al alcuentru de les primeres ñeves
Les condiciones son clares, tenemos auga per tolos llaos, les riegues cuerren a lo xole de tolo que lleva lloviendo estos meses atrás y pa enriba la última ñevada, con díes de calor fai que'l desxelu seya dalgo a tener mui cuenta. D'esti xeitu, nun queda otra, que dir sortiando riegues que crucien el camín anegándolo, poro toca xubir a muries, saltar a praos pal menos nun moyanos nesti entamu de ruta.
Con ñeve de continuu algamamos los Cadabales (1223 m)
Perpasaremos dellos desvíos que xuben hacia l'Azorerina y al altor de la braña la Escamplá, tendremos ñeve de continuu. Nesti puntu, esta ñeve pelín paposa, fadrá que tengamos que trabayar, nel intre, con ganes nel nuesu ascensu hacia la braña los Cadabales.
Atacamos la xerra la Cabra dende la braña la Patana
Dende los Cadabales, el vientu fríu entama a soplar y toca abrigase, demientres van siguiendo ascensu hacia la braña la Patana y dende ella saldríemos hacia un colláu con vistes hacia'l pueblu somedán de Robléu. Dende esti colláu, que pudiera ser lo que nomen como Altu La Prida, siguimos ya pela pista que xube a les antenes, pero abriendo buelga con bon esfuerzu, demientres el vientu azota xabazmente.
Munchísimu fríu nos caberos metros a la pena Filera
La meteo sigue ensin danos tregua, teniendo al vientu como másimu problema y faciendo que la sensación térmica baxe munchísimo. Sicasí, les ñubes xueguen faciendo que los paisaxes tengan unos collores estraños, con una guapa boína gris qu'amenaza ñeve y cierta lluz nos valles como'l del Pigüeña.
Cumal de la Pena Filera (1529 m)
Con pocu más, facemos cume nos 1529 m de la Pena Filera, nomada así pelos vecinos de l'Azorera, asína que dámosla per bona, anque sal en mapes como la Patana, Altu la Prida o Escuriu. De toes formes, na Pena Filera pocu pudimos tar ya qu'aparte del fríu, tuviemos que colar d'ellí, por mor de los cachos de xelu que desprendíense de les antenes, faciendo peligrosu pasar más tiempu nel cumal.
Siguimos pela xerra la Cabra per tarrén abegosu d'urcies y ñeve fondo
Nun tuviemos que falar muncho, viendo como taba avanzando la borrasca que daben pa la tarde, pa decidir que siguiríemos un ratín más pela xerra la Cabra, pero non hasta la Fana Xinestaza como teníemos planíau, poro bregamos un ratín nel descensu cola ñeve blando y al altor del col.láu la Val.lina, garramos un senderín qu'en descensu aportaba a otru que faldiaba tola xerra y qu'a nós dexábanos en descensu na Escamplá de nuevu.
El día tórnase gafu y descendemos al valle Xinestaza de nuevu
Dende la Escamplá, nun tuviemos más que siguir la mesma pista que garráremos nel ascensu y ya que moyaos y dalgo cansaos, diónos lo mesmu travesar milenta riegues, con tal d'aportar al coche enantes de que la meteo punxérase más repunante de lo que ya taba y poder mudanos de ropa ensin la lluvia a poder ser.
En resume, ruta que nos dexó conocer un pelín esti valle tan guapu, que ya sólo cola conducción hasta elli, amuesa una belleza increyible. Travesar la fana en coche yera como sentise nel Paris-Dakar casi jaja. La ruta al final, 5 hores pa facer 12 km de percorríu y superar 730 m de desnivel que dexónos un pelín a medies y con ganes de facer otra incursión nestos montes de la llende Tinéu, Somiedu y Cangas del Narcea.
Camudando'l Camín nos altos de Tinéu
No hay comentarios:
Publicar un comentario