lunes, 31 de agosto de 2020

Puertu Ventana (Teberga) - Picu La Ferreirúa

28 de Xunu de 2020

Track: Puertu Ventana (Teberga) - Picu La Ferreirúa




Díez añinos dempués del primer ascensu al picu La Ferreirúa, averábense hasta Teberga, tolos collacios vascos con Fernan a la cabeza, así qu'aprovechando que taba per ellí trepando, arrimáronse del grupu tamién, Benjamín y Montse pa patear tranquilamente y metenos una farturina a posteriori.

Salimos del puertu Ventana caleyando sele y pente milenta rises

Menos mal qu'esta ascensión dende'l Puertu Ventana, ye bien cómoda, ya que tanto Kíla como yo, tábemos un pelín cansaos del día anterior pela Pena Sobia y Valdecreizales. Poro, el caleyar sele, con alderique continuu, con rises varies, fue la meyor noticia pa soltar les pates y relaxar muscularmente.

Facemos el cresteríu final hacia'l Ferreirua

Tamién ye mui prestoso, poder compartir pateo con xente como Bea y Josean, que tanto monte tienen fecho na so vida y siguen con ilusión por ascender más y más cumales, non al ritmu que manexaben antaño pero sí coles mesmes ganes.

Facemos cumal nel Picu Ferreirua (1980 m)

El día nun mos acompañó del tou, pero a ratinos pudimos ver el macizu de Penubina, anque teníemos muncho meyor día hacia tolos montes de Somiedu y la Babia. Delles semeyes nel cumal dempués, decidimos descender per una variante pa evitar el crestéu, siguiendo dempués a los mesmos senderos que van llombeando hacia'l Puertu Ventana.

Toca descender de nuevu hacia'l Puertu Ventana

Y como siempre, lo meyor dempués d'un monte de día tranquilín ye un ampliu vermú y una fartura con sobremesa tranquila en Casa Laureano en Samartín. La verdá ye que como siempre, nun falló la xinta y los collacios vascos colaron de vuelta encantaos.

Fartura en Casa Laureano

En resume, los años van pasando, la evolución montuna nótase muncho y estes rutes agora nos paecen unos paseinos cuando daquella díbemos siempre sollertes a cada pasu en cada cresteríu. Lo que nun se perdió, son los ganes d'alcontrase con collacios, con xente bono y de vivir esta afición siempre nel meyor ambiente.

Camudando'l Camín per Teberga

--------------------------------------------------------------------------------

miércoles, 26 de agosto de 2020

Entragu (Teberga) - Canal de Calmerín- Cordal de Sobia - Valdecreizales

27 de Xunu de 2020

Track: Entragu (Teberga) - Canal de Calmerín - Cordal de Sobia - Valdecreizales


Col branu ya entráu, tocaba dir unos cuantos díes hasta Teberga y como nun too va ser esguilar, diónos por salir a dar un patéu y conocer un accesu a la Sobia dende'l desfiladeru de Valdecreizales, dalgo que ya nos amosara'l collaciu Cienfuegos va unos mesinos, enantes xustu del confinamientu.

Saldremos del aparcaderu d'Entregu, onde pasamos munchos díes del añu y caleyaremos pela senda L'Osu, como non, falando d'escalada, de parés onde equipar, de prohibiciones, de restricciones y de milenta hestories que tan asocediendo nel mundín de la escalada nos caberos tiempos.

Salimos del aparcaderu d'Entragu (430 m)

miércoles, 19 de agosto de 2020

H.uente Prieta (Cangues d'Onís) - Peña Cebolleda - La Fragua - H.ustigallar - Ridimuña - Pandecarme (Cangues d'Onís)

21 de Xunu de 2020

Track: Pandecarme (Cangues d'Onís) - Camín de la Maera - Gurbiñales - H.ungumia - Vegarredonda - H.uente Prieta (Cangues d'Onís)


Alborecemos penriba los 2000 m d'altor, con poques ganes de salir del sacu, ya que ta fresquín, fresquín. Sicasí, pasamos bona nueche, col mantu estrelláu enriba de nueso, lo cual fizo quedar nun sueñu fondu y placenteru achucaos nel sacu y la funda vivac.

Alborecemos na H.uente Prieta (2090 m)

miércoles, 12 de agosto de 2020

Pandecarme (Cangues d'Onís) - Camín de la Maera - Gurbiñales - H.ungumia - Vegarredonda - H.uente Prieta (Cangues d'Onís)

20 de Xunu de 2020

Track: Pandecarme (Cangues d'Onís) - Camín de la Maera - Gurbiñales - H.ungumia - Vegarredonda - H.uente Prieta (Cangues d'Onís)


Munches vegaes, creyemos que la nuesa esistencia nesti mundiu, tien cierta importancia, tien un desendolque capaz de facer, que dalgo seya importante al traviés de los nuesos actos y de les nueses viviencies.

Al menos, eso queremos tresmitir dende l'algame d'unes actividaes, que nun dexen de ser un puntu d'egocentrismu vital, un engrandecer una miseria de capacidá de compromisu, pa perder el to tiempu personal, en lluchar por una sociedá o un país del que tas namoráu y nagües pol so porgüeyu.

Y nesi sen, creyemos que con militar económicamente nun partíu, nun sindicatu, escribir y compartir quince mierdes diaries peles redes sociales, con comentarios ocurrentes y que la xente lo llea, tamos faciendo un llabor, pero al final, eso ye la mesma puxarra del que nun fae na por camudar les coses, más que votar y sentase delantre del televisor a criticar.

Otres persones, xente como mi compañera de proyeutu políticu durante años, Yolanda Huergo, recién finada pol cáncanu, qu'esta vegada sí que llévase a los meyores, gastaba esa fuercia vital en meyorar un país como Asturies o una ciudá como Xixón.

Toos falen de la so sorrisa, de la so capacidá d'axuntar, más que d'estremar, nes diferencies qu'había n'aquella dómina, pente los partíos políticos asturianos. Los que somos simplemente deportistes o montañeros, más que rescamplar una cara amable, embaxo quiciás, d'una especie de timidez, veíemos un fuercia xabaz, un sorrisa enllena d'enerxía ya fuera tomando una botella sidre, falando de política, música, cultura o topándola nel ximnasiu yendo a facer bici, llevantar peses y faciendo una vida activa nun de los sos piores momentos físicos cola so enfermedá.

Marchó, esa fuera la pallabra usada pol so compañeru, Rubén. Marchar quier dicir n'asturianu, dexar de tar nun sitiu pa dir a otru y quiciás ye la pallabra más afayaiza. Porque nin abandonó, nin fuxó, nin dexó de lluchar pola vida que-y tocó vivir, mesmamente que nun dexó de lluchar por tolo que la pudiera esmolecer: la llingua, la cultura, el mediuambiente, Asturies, Xixón, los drechos humanos, el trabayu dignu... tantes coses qu'a munchos de nós, que namás valemos pa ocupanos de garrar una roca con más fuercia o xubir un monte más apriesa que los demás, déxanos con mui pocu que dicir al respectu so los nuesos llogros personales.

Namái, que siéntome cola necesidá d'espresar agradecimientu pol tiempu compartíu, ya fuera en reuniones de partíu, pegando cartelos con tola illusión o echando una botellina sidre dempués d'un actu. El restu de los mortales que miramos pal nuesu ombligu y pal nuesu mini mundiu personal, quedámonos ermos d'un referente de llucha pol país, por Asturies..., ermos d'una persona integra y solidaria y non sólo d'una sorrisa, que sí, yera presente, por fuera, pero por dientro esa fuercia que la fizo lluchar tanto pola so vida, rellumaba más que la so sorrisa.

A l'alcordanza de Yolanda Huergo, que llugares tan guapos de l'Asturies qu'amasti, como los que conocí nesta ruta, t'acueyan pa siempre.


---------------------------------------------------------------------------

Partimos de Pandecarme (1065 m)


martes, 4 de agosto de 2020

Sena (L.luna)

1, 2 d'Agostu de 2020

Finde progamáu pa la esguilada, teniendo la idega de quedar pela fastera central asturiana, en mis queríes escueles morciniegues, pero'l sábadu llevantóse murniu, con ganes d'orpinar, lo cuál fízonos tener que dar la vuelta xubiendo a Otura.

Ensín más, tomamos un café nel Mineru, miramos la meteo y vemos que pa Llión llibra y que les temperatures tampoco son pa morrer. Eso debió pensar muncha más xente, porque nun fice más que ver actividá esti finde per Babia y L.luna.

Ya tuviera delles vegaes trepando en Rabanal pero enxamás averéme hasta'l pueblu d'al lláu, Sena, nel que tenemos una muria qu'abelluga tres seutores (Viecha, Canalizos y Mitológico). Viendo los croquis y los graos, pa tolos gustos, nun lo pensamos y aportamos Nus y yo, sobre les 4 y media la tarde, cuando dellos escaladores baxen ya un pelín turraos de la solana.

Esfrutando del calizu llionés nun día soleyeru


Tenemos tola tarde per delantre, asina que tomámoslo con calma y facemos campu base nuna peñona, onde va danos la sombra necesaria pa relaxar un pocu la tiesta. Aparte, tira dalgo d'airín, asína que ponémonos a trepar toles víes posibles del seutor Mitológico, faciendo un montón de quintos d'adherencia y dalgún sestucu nel que superar barrigues y techos.

Lo que más abunda ye la placa, cómoda pa lo que ye l'adherencia llionesa, pero tamién antes de marchar, paro a mirar les víes más dures del seutor, quedándome con ganes de probar un 7a que tenía mui bona pinta o lo que ye lo mesmu, la escuela paga la pena delles visites más.

Col día fechu, contentos por escapar d'Asturies pa pasar el día, tocaba echar una cerve y dir a cenar hasta Güergas de Babia, onde fuimos al Moriscal a cenar y a sobar nel so aparcaderu d'autocaravanes, lo cual ye mui d'agradecer como iniciativa privada.
Kima a la solombra cola calma

Magar d'una cena brutal y un almuerzu al día siguiente del mesmu palo, tornamos so los nuesos pasos hasta Sena onde xubimos a facer un par de víes más al Mitológico y viendo la concentración d'escaladores nel seutor y que la perrina nun taba a gustu, movímonos a la manzorga pa trepar en Canalizos.

La sensación, la mesma, pasando d'un seutor más d'entamu a un seutor de sestos, con bayura d'estilos, con pasos d'adherencia y pasos más físicos pa superar barrigues. La verdá ye que volvió a prestame la esguilada y otra vegada anduve mirando la parte dura del seutor, que ya pasaría a ser el de la Viecha, dándome bones sensaciones pa dir n'iviernu o en díes nubladetes, teniendo de xuru unes trepaes bien tranquiles y ye qu'a vegaes n'Asturies la concentración d'escaladores raspia la masificación.

Camudando'l Camín na escuela de Sena en L.luna


Sena (Seutores visitaos)
 
Croquis modificaos por mi de la escuela d'escalada de Sena de L.luna, por mor del El Maquis. Gracies y col so permisu.

---------------------------------------------------------------------------

sábado, 1 de agosto de 2020

Castaedo (Villayón) - Prao Roque - Os Gargalois - Carondio

14 de Xunu de 2020

Track: Castaedo (Villayón) - Prao Roque - Os Gargalois - Carondio


Facía años, que nun volvía a preparar una ruta pa tachar dellos montes nomaos por dalgún motivu, como pueden ser los techos de conceyu. Poro, nesti casu y tamién por camudar un pelín de fastera asturiana, averámonos al suroccidente pa facer los techos de Bual, Eilao y Villayón.

Salimos de Castaedo (465 m)