Acabárase l'iviernu y menudu iviernu tuvimos na fastera cantábrica, pero la primavera tovía venía con ganes de comedia y regalábanos más y más ñevaes en plenu Mayu. Lo d'esti finde yera mediu de risa y tábemos per Teberga con non munches ganes d'esguilar y sobretou teniendo que xubir hasta Murotecho, lo cual dábame galbana enforma.
Así que cuntando con que Pepa y Jóse andaben per Llión y teníemos monte de domingu nel pueblu llionés de La Cueta, salimos Ana y yo pa Llión, direutos hacia la Cueta, aportando con solín hasta Vega de Vieyos y según vamos metiéndonos hacia La Cueta una ñube blanquecina atrápanos cayendo una trapiada épica.
Ñevando na Cueta... con sol en Rabanal... brutal la primavera
Cuando aportamos a la Cueta, muertos de risa, salen de la furgo Pepa y Jose flipando tamién, decidiendo ir a tomar el vermú hasta'l chigre Picos Blancos, onde siempre nos traten de luxu cada día que vamos.
Un par de cerveces, ñube con ñeve, sol, ñube con ñeve y sol otra vegada y decidimos retiranos hacia'l sur, al menos p'aprovechar la tarde. De camín hacia una escuela soleyera, el restu del grupu montaña ráxase pal día siguiente por mor de la previsión, teniendo entós total llibertá de decisión.
Jose y Pepa na maraviyosa caliza llionesa
De la que pasamos per Rabanal el solín llucía gayoleru, colo qu'aparamos les furgonetes y tiramos a esguilar en dalguna plaquina caliente. Como les plaques ya les tenemos más menos toos fusilaes, decidimos tirar hasta'l seutor Mandrágora que personalmente nun lo conocía.
Nun yera mui ceo y sabíemos que cuando marcháse'l sol, ellí nun habría que parara de fríu, colo qu'apuramos y entamamos a facer víes de la manzorga a la mandrecha. Facer víes, con gorru d'iviernu, térmica y otra camiseta enriba nunca me pasó na mió vida, asina que taríemos esguilando a unos 7 graos como muncho.
Que bien que se taba al solete, abrigáu pero al solete
Aún así dió pa facer los 3 sextinos de la manzorga, del que salía un segundu llargu, mui llargu, nel que metime allégremente, dándome la sensación de salir más menos de 6b aproximadamente. Eso sí, mui alpinu y perguapu, teniendo que superar dellos techinos con travesíes y dalgo d'alegría nos chapaxes.
Lo dicho, disfrutón enforma y paezme que rondaría los 38 metros, ya que nun m'alcuerdo que sobrase muncho más de 2 metrinos de cuerda. La verdá ye que paezme un gran aciertu esi segundu llarguín pa rematar tres víes de placa curties.
Pié de vía comodísimu tamién nel seutor Mandrágora
Con otru par de quintinos más a la mandrecha ya tocó colar d'ellí, que col día atapeciendo baxaba la temperatura per momentos. Como siempre, el tercer tiempu, dió pa munchísimu, buscando oxetivos pal día siguiente, ya que tocaba patiar y nun teníemos nin idega de pa onde tirar... pero esa ye otra hestoria.Rabanal (Seutores visitaos)
Croquis modificaos por mi de la escuela d'escalada de Rabanal de L.luna, por mor del El Maquis. Gracies y col so permisu.
---------------------------------------------------------------------------
Branu de 2017
Siguimos trepando esti branu onde más menos nos apetez... y quiciás un pocu faltu de rodaxe y sin proyeutos, dempués de les vacaciones, facía falta tirar a facer metros y garrar sensaciones. Asína, que con mal tiempu per Asturies, apetecióme dar una vueltina hasta la escuelina llionesa de Rabanal en L.luna.
Nun hai muncho que destacar, más que facer a vista tol restu de les víes del seutor Placas, con un máximu de 6b... mui guapu por ciertu, al igual que'l 6a d'al llau. Poro, apretar pues nun apreté muncho, pero sí que colé a tomar unes cerveces, con un día bien prestosu d'escalada y como siempre en bona compañía.
Na próxima visitina a la fastera de L.luna, tocará conocer dalguna escuela o seutor nuevu... asina que ya vos contaré, ya que pa la iniciación y escapar un pelín del mal tiempu cantábricu esta caliza ye perfeuta.
---------------------------------------------------------------------------
1 de Mayu de 2014
Primer y pol momentu única visita a la escuela llionesa de Rabanal de L.luna. Pudiera paecer que ta lloñe de Xixón, pero tirando pol Güerna saliendo direición Vil.lablino, aportamos al pueblu de Rabanal en menos d'una horina de coche.
Caleyando hacia'l seutor de Las Placas
Hai dellos seutores, pero nós, como siempre que vamos de primer visita, vamos a facer munches víes y esfrutar del día lo más posible. Poro, tiramos hasta'l seutor de Las Placas, onde la vía más dura será de 6b y el 90% nun pasa del V+.
Esguilando n'adherencia que ye lo típicu en Llión
Con esi espíritu, el de nun pasar del V+, como diz la nuesa camiseta, xubimos al seutor magar d'un almuerzu nel chigre onde dexamos los coches. El averamientu curtiu y un cómodu pié de vía, faen que seya un placer esguilar nesti llugar.
Xube´l calor y hai que garrar solombra
Entamamos coles víes dende Quinta Avenida y la de Estirar, toes rondando pente'l V y V+, anque de xeitu distintu, unes mui plaqueres n'adherencia y otres un pelín más tieses. Pa cuando finamos con elles (Pau mui bien, tornando a esguilar de primera con confianza) xubimos a la mandrecha a otra placa tumbada.
Averámonos a la mandrecha a otres plaques más tumbaes inda
Apretando'l calor, ficimos la de la manzorga (IV+) mui cenciella y apreté un pelín col 6a (Pokemon), pa dexar d'ehí p'alantre en top toles demás. Darréu tocó restolar un cachín de solombra onde xintar, anque ye una xera perdifícil, poro tostamos de más y quedáronmos poques ganes d'esguilar más.
Magar de xintar... pocu más que siestear y trepar un pelín
De tarde, con calor abondo, metíme en dos víes, Raposos (V+ perguapu) y en Urz que rondará'l 6a. Namás Alberto animóse a da-y de primeru a Raposo y el mi hermanu a da-y a Urz en toprope. Con esto, baxamos como tiros pal chigre que taba esperándonos con sombrilles y quintos de mahou como si non costase.
Camudando'l Camín en Rabanal de L.luna cerveciando
No hay comentarios:
Publicar un comentario