jueves, 28 de julio de 2022

Xubida Mota Cetín (Parres)

16 de Xunetu de 2022

Track: Xubida a la Mota Cetín (Parres)

Web del Trail: Xubida a la Mota Cetín

Clasificaciones: Clasificaciones 2022

Hai carreres y carreres, hailes mui profesionales y hailes de pueblu, hailes con grandes nomes que sólo tienen eso nome, pero nun tienen alma, nun tienen sentimientu y sobretou, tan feches más pa ganar perres que por amor al monte y al deporte y sobretou mirando mui pocu pal corredor.

Un exemplu claru ye la GTPE, una carrera con un percorríu, qu'a min, como montañeru gústame, sobretou na parte de Pandescura y Casañu, pero nin se curraron una señalización curiosa, nin desbrozaron, nin cuidaron al corredor nel avituallamientu final y lo de les duches pa 1600 corredores ye pa mexar y nun echar gota.

Aportando al cumal de la Pica Cetín

Y na otra punta del mundiu corredor, alcontrámonos cola Xubida a la Pica Cetín (Mota ye tola fastera boscosa pembaxo'l cumal), na qu'un pueblu volcáu organiza una carrerina pa dempués de les fiestes del pueblu, na que tienen el percorríu más guapu y montañeru que podemos facer per Asturies.

Facía tiempu que nun tornaba a la Mota Cetín y que meyor que volver nuna carrera, na que'l percorríu, perfeutamente señalizáu y perféutamente desbrozáu fue una delicia pa los pocos corredores que nos animamos a participar y ye que, claro, una carrera ensin "gran nome" y con unos desniveles perduros y mui montañeros, la xente desapaez del mapa.

Collacios que presta alcontrar nes carreres (Miguel, Blas, Carlos)

Aún así, los pocos corredores qu'animámos a esta maraviya de carrera, tuviemos la suerte, nun día de fola de calor, de sentinos como en casa, sofriendo muncho col desnivel, pero sobretou col calor, pero siempre había dalguien de la organización con una garrafa con agua al llombu, enmediu'l monte, nuna cresta, daba igual, siempre teníemos el sofitu de la organización y voluntarios.

Nun tengo más que pallabres d'ánimu pa la xente'l pueblu, pa que siga con esta carrera, porque lo qu'esfruté hasta les hores de más calor, nun lo sabe naide, sobretou na xubida a la Pica Cetín pel fayéu de Cea, pindisimu pero una auténtica maraviya.

Silvia esfrutando de so carrera femenina en solitariu

Llueu na baxada, tocaba dir regulando ya qu'entamaben a apaecer los primeros avisos y eso que los niveles de beber agua y tomar sales fueron adecuaos y superiores a lo mió normalidá, pero ye que correr hores penriba los 30 graos faise mui duro y el cuerpu sufre abondo.

Nun sólo la xubida ye llarga y pindia hasta Cetín, sinon que dempués d'una bona baxada, alcontrámonos con otra xubidona que lloñe de terminar ceo, allárgase durante un crestéu, nel que La Cogolla pon el finxu final, pa d'una vegada entamar a baxar hacia'l pueblu.

Esfrutando del frescor del fayéu de Cea

Alcontrándonos en varios tramos colos corredores de la curtia, pero dura tamién de 15 km y colos andarines, vamos animándonos toos, ufreciéndonos agua los andarines y duchándonos literalmente la xente de la organización siempre atentos a como tamos físicamente... supongo que les nueses cares nos distintos pasos, facíen que la xentes esmoleciera un pelín.

Pero como too nesta vida, tien un final y aportamos a meta, mui contentos col nivel de carrera que ficiera, sofriendo nos 27 km con 4400 m de desnivel, pero faciendo una carrera na que sentí que lu dí too, que controlé y corrí onde tocaba y teniendo claro, que lo del calor nun lo llevo bien, llegando a meta fundíu como pasárame tamién nel Desafíu Somiedu.

Increyible carrera montañera per Parres

Y cuando llegues a la meta, dempués de dalo too y alcuéntreste a tol pueblu, volcáu, trabayando pa preparar una comidona, na barra atendiendo con una sorrisa, pues sólo pue pasar lo que pasó, que móntase una folixona, con fartura, birres varies, xente baillando y esfrutando d'una carrera de pueblu, fecha con ilusión.
 
Fué un auténticu placer participar nesta carrera a la qu'espero volver añu tras añu, animando a más xente a participar ya seya pa caleyar o correr y pasar el día nesti guapu pueblín. Fue'l broche perfeutu pa esta mini temporada de carreres na qu'entamé tarde y ya descansaré hasta Setiembre.

Camudando'l Camín na Roza en Parres

lunes, 25 de julio de 2022

Estragüeña (Valle Bah.u de Peñamellera)

9 de Xunetu de 2022

Continuábemos pel Oriente Asturcántabru, intentando aselar la sensación infernal de les foles de calor, dándonos un bañín peles mañanes ya intentando facer dalgo peles tardes. Nesti casu, llueu d'un bañín na sablera de la Franca nel conceyu de Ribedeva, averámonos hasta'l Valle Bah.u de Peñamellera, onde tomamos un vermutín en Panes y continuamos hasta Estragüeña pa esguilar per primer vegada nesta escuelina.

Seutores d'Estragüeña nel Valle Bah.u

Contábemos col "guía llocal" d'Alvarín que recomendónos toles víes posibles n'Estragüeña, anque como siempre, nel mió caso y como pasara en Pechón, con un peguín ya me quedé a gustu. El casu fuera que llegamos al seutor y tovía pegaba la solana, asina que tuviemos qu'esperar con unos chavales de Barcelona, a qu'entrase la solombra.

Anna progresando en Princesa Deva (7a)

En cuanto pudimos entrar a esguilar, allá fuimos ya que viniera un garrapiellu guiris, copando tol pequeñu seutor, asina que pelín agobiaos pola xente, Anna y yo probáramos faciendo Princesa Deva, un 7a imprescindible, mientres que Alvarín metíase nun 7b a la so mandrecha.

Alvarín fluyendo nos empotres de Primera Intención (7b)

D'esti xeitu, con un pegue míu, al encadenar al flash y dos d'Anna pa llevásela, ya decidimos nun facer namás, ya que'l seutor ye guapu pero a na qu'axúntense más de 4 cordaes, ellí nun hai quien pare y diónos pereza probar dalguna vía más y eso que los collacios de Barcelona taben nun 7a+ con mui bona pinta.
 
Habrá que tornar per ellí... en temporada más baxa

Xente de nivel internacional pasiándose peles víes d'Estragüeña

Estragüeña
Croquis por mor de Altius Aventura. Gracies y col so permisu.

---------------------------------------------------


jueves, 21 de julio de 2022

Pechón (Costa Occidental)

8 de Xunetu de 2022

Casi un añu dempués, diónos por pasar un finde cántabru pela redolada'l rigu Deva, averándonos el vienres y el domingu hasta Pechón, faciendo combinada típica de baños nes sableres y d'una escalada relaxada ensin demasiaos fanatismos, ye dicir, pegues... los xustos.

Perguapa muria la de Pechón

El primer día, fuimos Anna, Alvarín y yo, de tarde, asina que mientres Anna pegaba un chapuzón aseguré a Alvarín que fizo pa calecer la Rubia (6c+), la cual encadenó apretando un pocu, pero prestándo-y muncho la vía, siguiendo de continuu Anna, que la enchufó tamién, viendo'l pegue dende l'agua, demientres taba yo remoyando'l cuerpu una migayina.

Alvarín y un servidor apretando nes esixentes víes

Mis niveles de zanganismu yeren superiores, asina que dexé a Alvarín que tirase de motivación y se metiese na compañera de la Rubia, Marinero Smith (7a) que comparte entamu, así que dempués de que la encadenara tamién, tocóme'l turnu faciéndola tamién al primer pegue apretando un pelín na so parte alta, paeciéndome una ruta abondo asequible y mui disfrutona.

Dellos momentos en Marinero Smith

El domingu, previu pasu per otru seutor de la Hermida, como ye Estragüeña, nun día de calor y playéu per la otra vera de Tina Menor, nel Sable, fuimos hasta Pechón, pa xintar nun chigrín super agradable y decidímonos a tornar hasta la escuela pa baxar la fartura.

Ría de Tina Menor y El Sable dende'l seutor

Ellí, fice a vista un 6b+/7a jaja, paecióme más dura Señor Cangrejo casi que Marinero Smith jaja. En fín, con una vía nel bolsiellu, dediquéme a asegurar a Anna, que llueu de probar un 7a super cabrón, pasó a metese nun 6c+ atómicu en travesía nel qu'equivocóse un pelín y tuvo que quedar pa otra visita.

Pechón
Croquis por mor de El Paso Clave. Gracies y col so permisu.

---------------------------------------------------

martes, 19 de julio de 2022

Otura (Morcín)

7 de Xunetu de 2022

Continuamos con tola motivación pel Callexón, xubiendo pente dos o tres díes al frescor de la so solombra, ya incluso, per primer vegada na mió vida, dexando cintes nel proyeutu de turnu, que nesti casu yera la variante a la manzorga de Tritonita.

Una vegada que teníemos nel tinteru la más mítica del seutor, metímonos el Pulga y yo a probar y llimpiar la so variante a la esquierda, alcontrándonos con un viote, que creyemos que yera meyor incluso que la propia Tritonita.

Collacios a la preba de los sos proyeutos

Dende'l primer pegue enganchónos enforma, xubiendo motivaos, hasta con díes de muncho calor o col paré moyáu, por mor de la selmana y picu de lluvies que tuvimos esti mes. El casu, ye qu'al igual que Tritonita, tenemos una parte desplomada con chorreres que suel tar húmeda o moyada direutamente, dando bastante pereza esti tramu, pa poder esfrutar de la increyible placa superior.
 
Como en toles víes d'esti estilu, vía llarga y de continuidá, tocó dir ganando esa resistencia y sobretou alcontrar los reposos necesarios p'afrontar con cierta fuercia los pasos más a bloque. Como siempre, nel mió esguilar, tuve la oportunidá d'encadenala prontín al 8u pegue, pero metí una pringada épica yendo a reunión, teniendo qu'esperar más de dos selmanes pa poder da-y otru pegue.
 
Trabayando en Tritonita Izquierda compartiendo pegues

A la vuelta de les lluvies, cola vía nun estáu dafechu llamentable, teniendo que sacar agua de los cazos ya intentando secar les preses embarraes, al segundu pegue volví a cayer en cadena dos movimientos más arriba, desesperándome ya totalmente por mor de la mió inutilidá pa probar tolos pasos bien.

Al día siguiente, volviera ya cola intención d'encadenar o desmontar y dexala pal final del branu y llueu de matizar una tontería perimportante pa entrar a reunión, a la fín, pude encadenala, tornando una vegada más al másimu grau, cosa ya demasiáu davezu nesti añu... a ver si somos a dar un pasín más en breve.

Otura (Seutores visitaos)

Croquis modificaos por mi de la escuela d'escalada d'Otura, por mor del trabayu de Asturvertical na so mayor parte. Gracies y col so permisu.

 ----------------------------------------------------------

jueves, 14 de julio de 2022

Piedrasecha (L.luna)

 28, 29 de Xunu de 2022

Dempués de varios findes ocupaos nel monte, col viaxe pirenáicu y carreres pel monte, teníemos día y mediu pa movenos a escalar, pensando bien pa onde tirar y dímonos cuenta que nin Anna nin yo, conocíemos Piedrasecha, asina que cola maraviyosa compaña de Kíla, que llevaba unos tiempos malina, escapamos pa Llión y más en concretu pa la comarca de L.luna.

A la fín conocemos el pueblu de Piedrasecha y l'escobiu Los Calderones

Como siempre, nuna primer visita, tomámoslo con calma, pudiendo echar un vistazu, en qué seutores podríemos esguilar de tarde, asina qu'arrimámonos a la vera esquierda de la riega Los Calderones, esfrutando del guapu paséu pel escobiu hasta salir per un pindiu camín hacia los seutores Tsunami y Oráculo, non mui cómodos de pié de vía, pero al menos tan a la solombra de tarde.

Pie de vía percómodu nel seutor la Virgen

Ellí echamos la tarde, con un par de pegues a Lobos de una misma manada (6c), vía bien guapa, con desplomín d'entamu y placona al final, que como siempre en Llión, como ya dixe, tuvimos que dar un par de pegues pa llevánosla caún, quedándonos sin más tiempu, si queríemos alcontrar dalgún sitiu onde cenar.

Escobiu Los Calderonas que seutores a un llau y otru del rigu

Al día siguiente, llueu de dormir cómodamente a la entrada del pueblu, tiramos pela mañana hasta'l seutor Trincheras ya que yera'l que más tarde entraba'l sol. Aún así, fue mirar el seutor y ver que nun mos daba munchu xuegu por mor del desplome, asina que volvimos hacia'l seutor Virgen, onde aparte d'un pié de vía bien cómodu y guapu, les víes teníen una pinta brutal.

Seutores Tsunami y Oráculo y La Virgen

Nesti seutor, tuviemos la suerte de facer un 6a+ y 6b mui, mui buenos y probar un 6c superfísicu, que percuerre una cueva en desplome, pringando los dos nel segundu pegue saliendo ya a lo más cenciellu. La verdá ye que cuando venimos a Llión toca baxar el nivel, agachar les oreyes ya intentar esfrutar de la escalada hasta que vas faciéndote a la roca y al tipu d'esguilada.

Camudando'l Camín en Piedrasecha

Piedrasecha (Seutores visitaos)

Croquis de la escuela d'escalada de Piedrasecha, por mor del trabayu de La Garafa. Gracies y col so permisu.

martes, 12 de julio de 2022

Gran Trail de los Picos d'Europa (Onís)

25 de Xunu de 2022

Track: GTPE (35 Km) (Onís)

Web del Trail: GTPE (Onís)

Clasificaciones: Clasificaciones 2022   

Había ganes d'esta carrerra nel conceyu escaecíu d'Onís y digo escaecíu, porque siempre ta a la solombra de los sos vecinos Cabrales y Cangues d'Onís. Pero ya tenía cierta certeza, de que la carrera tenía un nome mui grande pa lo que yera finalmente.

Díbemos correr en pareya, primer vegada pela mió parte, viendo que ye realmente difícil esta modalidá, porque caún tien una forma de correr y Silvia ye de dir tranquila nos entamos y apretar al final, siendo tolo contrariu pela mió parte, necesitando entrar en carrera con fuercia pa sentime dientro d'ella dende l'entamu anque toca sofrir al final.

Alberto y Carlos como siempre nel so nivel

Lloñe del resultáu, tuve un gran error escaeciendo los palos ya que dempués de les lluvies de tola selmana anterior, tuvimos munchísimu barru y na parte final de la carrera, tuve dellos problemes en forma de calambres, cuando fuera tola carrera bastante sobráu, esperando y tirando un pocu de Silvia.

El percorríu, anque la xente quéxese de que nun rasques Picos, si nun faes la ultra, dicir que ye una fastera que préstame enforma y ye que'l Casañu, ye un d'esos requexos dafechu necesarios de conocer, como ficimos va dellos años, nes rutes a la Cabeza Pandescura y el Cantón del Texéu.

Xubiendo pela pista de Demués hacia Camba

La ruta saldrá de Benia hacia Bobia y xubirá hasta Covascares, onde alcuéntrase la escuelina d'escalada pa baxar hacia la Molina y percorrer tol Casañu, puntu máxicu de la carrera, sinon fuera porque nin siquiera molestáronse en desbrozar curiosu toles sendes que traviesen la vera'l rigu Casañu.

Finamos el Casañu, recuperando un pocu posiciones y ritmu, comiéndonos el tramu más duro de carrera dende'l Casañu hasta'l colláu Regueru, onde ya tenemos la xubida final hasta Camba. Digo que díbemos recuperando posiciones pero tuviemos que parar a atender a un rapaz que sacóse un hombru nun resbarión.

Gus que se marcó un carrerón en dellos momentos de la carrera

Cuando aportaron los sanitarios, pudimos continuar, teniendo otra vegada qu'adelantar milenta puestos y forciando la máquina más de lo deseyáu, poro apaecieron los calambres, que pudimos más menos caltener y terminar la carrera con sensaciones agridulces, teniendo claro, que podíemos facelo muncho meyor, pero pa eso o dir en individual o hai que llegar a un acuerdo a la hora de dir por pareyes.

En cuanto a la meta, aportamos alcontrando un avituallamientu pelín triste y muncho más triste, tener que duchase nuna fonte del pueblu, porque diba tar a la mesma temperatura qu'un barracón d'obres en forma de duches, lo que diz a les clares que lo de Gran Trail de Picos d'Europa quéda-yos a los organizadores mui, pero que mui grande.

Camudando'l Camín pelos Picos d'Onís

viernes, 8 de julio de 2022

Vall d'Ordesa (Sobrarbe) - Senda Los Cazadores - Faixa Pelay - Cul de Soaso

16 de Xunu de 2022

Track: Vall d'Ordesa (Sobrarbe) - Senda Los Cazadores - Faixa Pelay - Cul de Soaso

Como ya cuntaremos nel resume del viaxe al Pirinéu, dempués d'algamar l'oxetivu n'ascensión a la Tuca d'Aneto, colábemos hasta'l parque d'Ordesa en Sobrarbe, con munchos frentes abiertos pero mui poques oportunidaes de facer dalguna ascensión curiosa.

Descartáremos, el mesmu día del Aneto, revisando les previsiones, qu'ante asemeyada fola de calor, aventurase a una ascensión potente al Comachibosa, sería dafechu un suicidiu y ya lo pasara yo mui mal, na travesía hasta la Renclusa, como pa volver a metese na boca'l llobu.

Salimos a conocer un pelín el Vall d'Ordesa (1322 m)

El día de descansu, lo pasamos de solombra en solombra y de xarra de birra frío en xarra de birra frío, dándonos bona cuenta de lo que nos esperaba al día siguiente. Aparte, les facilidaes qu'amosáronmos nel Vall de Benás, nun fueron nes mesmes n'Ordesa, nun pudiendo acceder a la piscina del camping si nun yéremos clientes.