Pechón (Costa Occidental)

8 de Xunetu de 2022

Casi un añu dempués, diónos por pasar un finde cántabru pela redolada'l rigu Deva, averándonos el vienres y el domingu hasta Pechón, faciendo combinada típica de baños nes sableres y d'una escalada relaxada ensin demasiaos fanatismos, ye dicir, pegues... los xustos.

Perguapa muria la de Pechón

El primer día, fuimos Anna, Alvarín y yo, de tarde, asina que mientres Anna pegaba un chapuzón aseguré a Alvarín que fizo pa calecer la Rubia (6c+), la cual encadenó apretando un pocu, pero prestándo-y muncho la vía, siguiendo de continuu Anna, que la enchufó tamién, viendo'l pegue dende l'agua, demientres taba yo remoyando'l cuerpu una migayina.

Alvarín y un servidor apretando nes esixentes víes

Mis niveles de zanganismu yeren superiores, asina que dexé a Alvarín que tirase de motivación y se metiese na compañera de la Rubia, Marinero Smith (7a) que comparte entamu, así que dempués de que la encadenara tamién, tocóme'l turnu faciéndola tamién al primer pegue apretando un pelín na so parte alta, paeciéndome una ruta abondo asequible y mui disfrutona.

Dellos momentos en Marinero Smith

El domingu, previu pasu per otru seutor de la Hermida, como ye Estragüeña, nun día de calor y playéu per la otra vera de Tina Menor, nel Sable, fuimos hasta Pechón, pa xintar nun chigrín super agradable y decidímonos a tornar hasta la escuela pa baxar la fartura.

Ría de Tina Menor y El Sable dende'l seutor

Ellí, fice a vista un 6b+/7a jaja, paecióme más dura Señor Cangrejo casi que Marinero Smith jaja. En fín, con una vía nel bolsiellu, dediquéme a asegurar a Anna, que llueu de probar un 7a super cabrón, pasó a metese nun 6c+ atómicu en travesía nel qu'equivocóse un pelín y tuvo que quedar pa otra visita.

Pechón
Croquis por mor de El Paso Clave. Gracies y col so permisu.

---------------------------------------------------

25 de Xunetu de 2021

Como suelo decir siempre, la esguilada ye la mínima disculpa pa pasar tu tiempu llibre cola xente cola que te presta tar. Llueu, trepar más o trepar menos, encadenar más o encadenar menos, pasa dafechu a un segundu planu.

Na ría de Tina Menor colos parés de Pechón al fondu

Camiento, que si nun somos capaces de ver esto, d'esfrutar de los deportes al aire llibre compartiendo'l to tiempu colos collacios, vamos mal. Poro, tengo que decir qu'en tol finde selmana, dí más baños que pegues a les víes y eso que tuve la suerte de conocer un par de seutores qu'entá nun conocía.

Bañámonos, bañámonos? .... Venga vamos dar un chapuzón

El vienres de tarde, aportáremos a Pechón y baxamos a ver el paré, col envís d'esguilar, pero namái ver esi agua azul, tresparente, tiramos a pegar un bañu con Kíla. Pura vida, bañase cola perrina faciendo llargos ensin xacíu alreor nueso.

Roca y mar bien averaos... meyor combinación imposible

 

Viendo la hora, echamos una güeyadina a los croquis y metímonos en Grunge, un 6c+ atómicu de chorrera, que tiróme nun pasu al salir a la placa. Acabé de montala y sólo quedaba tiempu pal pegue d'Anna enantes de salir por pates a cenar, que ya teníemos hora en Colombres.

Anna apretando en La Rubia y en Grunge

Ensin encadenes, marchamos a cenar encantaos, esguilando'l sábadu en Cofría, pasando un día estupendu d'escalada tranquila y una tarde-nueche superior nel area recreativa de Muñorrodero, onde decidiéramos tornar a Pechón pa terminar el finde cántabru.

Andre probando la Rubia (6c+) y llueu tocóme'l turnu a mi

Pero como ya dixi, la escalada ye lo de menos, así que pola mañana fuimos hasta la playa'l Sable onde los perros esfrutaron como llocos pela sablera, pegándonos otru bañu tremendu tanto nel Sable, como antes d'esguilar en Pechón, onde otra vegada lo de menos fue la propia trepada, anque la vía la Rubia (6c+) nos prestase pola vida.

Camudando'l Camín pela costa cántabra

 

---------------------------------------------------