lunes, 30 de mayo de 2022

El Vidral (Babia) - Cuspasante - Vallina L'Arca - Picu Colines - Muezca Colines - Chanu Guardafrais - Vachalacha

29 de Mayu de 2022

Track: El Vidral (Babia) - Cuspasante - Vallina L'Arca - Colines - Muezca Colines -  Guardafrais - Abesedón


Tornamos al monte, dempués d'un par de selmanes nes qu'anduvimos más ocupaos en correr pel monte y esguilar, asína que repasando un pocu que podíemos facer, ya que tábemos asitiaos en Teberga esguilando, alcordéme que tenía un par de dos miles nel Macizu de Penaubina de ciertu renome por facer y ún d'ellos yera'l Picu Colines.

Nesti plan, xuntámonos a les 9 y media la mañana en Samartín y salimos hacia'l Puertu Ventana, pa baxar dellos kilómetros en direición Torrebarriu onde ya saliéramos va dellos años pa los Picos del Fontán, parando esta vegada nel PK10 de la Le-481, nun crucie xustu al llau del picu d'El Vidral.

Partimos d'El Vidral (1295 m) nel PK 10 de la Le-481

Equí sal una pista ganadera hacia los ivernales de Cuspasante, la cual, nun bon día soleyeru, vamos garrar con calma, caleciendo músculos po la xubida que teníemos per delantre. Ensin más, diremos dando zapatu a la vera'l rigu La Venta'l Paniceru, hasta aportar a Cuspasante, onde tendremos de tar sollerte de garrar el camín adecuáu, pa siguir valle alantre y nun subir hacia les cabañes del Pedregal.

viernes, 27 de mayo de 2022

Otura (Morcín)

26 de Mayu de 2022

Como siempre, tolos branos garramos un seutor como referente pa la escalada y si ya fae casi un añu, andábaemos desbrozando y xubiendo al Callexón tolo que podíemos, esti añu, entamamos la temporada un pelín antes y en mayu, ya tábemos dándo-y unos peguinos a Tritonita, vía que dexáremos vista pa sentencia la temporada pasada.

Apretando en Tritonita na parte física d'embaxo

Como siempre, por dalgún motivu, tuve un día malu, de retropegues cayendo na parte baxa del desplomín y desmontela y nun torné per ellí en tol añu. Esta temporada, metímos-y un par de pegues en compañía del Pulga y Anna, viéndo-y munchísimu color, pa dexala montada pal día siguiente, nel que metí-y un pegue, faciendo tolo duro, equivocándome y quedando petadísimu cola chapa na cara en plena placa, lo que tornóse nun vuelu de díez metros y nel consiguiente desmontaxe de la vía, ya que nun díba volver a esguilar en tol finde, al tener el Desafíu Somiedu.

Entrando a la placona de Tritonita

Esta selmana, dempués d'un par de díes de lluvia fuerte, xubimos hasta ellí a ver si taba seca,  alcontrándola en bones condiciones, entrándo-y con ganes, cola compaña del Pulga que tuvo a bien montámela, faciendo un pegue d'esos enllenu de serenidá o lo que ye lo mesmu, cuando yes tan malu esguilando que ya encadenes les víes porque tas mui penriba de la vía y vas per raíles.

 
Iso y Rubén en la Diagonal y Tritonita

Coles mesmes, dediquéme a asegurar al Pulga que ya ta probando la variante de Tritonita a la manzorga, la que va ser el siguiente oxetivu mui tamién, mientres que Rubén metió-y dos pegazos a Tritonita al igual qu'Iso a la Diagonal, la cual nun me llama demasiáu, pero de xuru que nesta temporada fadré por meteme nella.

Otura (Seutores visitaos)

Croquis modificaos por mi de la escuela d'escalada d'Otura, por mor del trabayu de Asturvertical na so mayor parte. Gracies y col so permisu.

 ----------------------------------------------------------

martes, 24 de mayo de 2022

Desafíu Somiedu (Somiedu)

 21 de Mayu de 2022

Track: Desafíu Somiedu (Somiedu)

 
Web del Trail: Desafíu Somiedu (Somiedu)

Clasificaciones: Clasificaciones 2022  

Tres años ensin correr, participando esti añu namái qu'en Peñamayor y el Diantre y alcontrámonos col embarque de tener el Desafiu Somiedu nel calendariu, una carrera de 50 km, la másima distancia a la que voi enfrentame nos años que llevo esto de correr y mi segunda maratón, siendo la primera cincu años atrás, con Güeyinos del Diablu.

Con estes blimes, el cestu nun podía quedar mui curiosu y más viendo que soi un auténticu desastre pa entrenar, ya que dame una pereza terrible, tomame en seriu esto de correr, así que salgo por cerca casa, ya seya pel Monsacru o el Llosoriu y nun soi a pasar de 20 km corriendo nin de broma.

De series y movides que faen los corredores ya nin falar jeje, asina que teniendo en cuenta que salgo un día a correr más menos a la selmana, más salir de monte col grupu, mi entrenu nun ye que seya denguna maraviya pa facer na curiosu, poro l'oxetivu yera terminar ensin morrer nel intentu.

Cares esperenzaes enantes de la salida
 
D'esti xeitu, madrugón infame y plantámonos na Pola Somiedu, onde recoyemos dorsales Silvia, compañera de carreres y yo, alcontrándonos con Alberto y Carlinos, que vienen bien preparaos pa esti retu, tando dafechu notra lliga distinta a la mía.

El percorríu, perconocíu pa la mayoría los montañeros asturianos, saliendo de la Pola, hasta'l Val.le, pa siguir hasta'l L.lagu'l Val.le, onde salimos per Camayor hasta l'Altu La Farrapona, onde más val aportar ensin gastar munchu, ya que vien darréu, la primer xubida seria hasta los Bígaros, ya que nel intre, la l'ascensu fuera mui tendíu y correnderu.

Collacios del GM Xuan de la Borrina en distintos momentos de la carrera
 
Más menos, voi faciendo los tiempos pensaos, pero per Camayor, pesie a dir controlando muncho, tengo los primeros avisos musculares, asina que baxamos un pocu'l pistón dexándome dir hasta la Farrapona, onde paro un ratín a xintar dalgo y recargar agua, ya que tenemos per delantre, la tirada más llarga ensin avituallamientu.
 
Sorprendéntemente, pesie a siguir con amagos de calambre, aguanto'l tirón pelos Bígaros y durante la baxada del crestéu, voi alcontrándome meyor, como siempre xugando coles pastilles de sales y faigo una baxada bastante rápida y correndera, aportando mui fuerte a Saliencia, meyor qu'a la Farrapona, pero con un calor y un chornazu reinante, que quítame les ganes de siguir corriendo.

Esfrutando dende los L.lagos de Saliencia a Los Bígaros

Tómomelo cola calma, xinto una barrina enerxética y salgo de Saliencia, pa entamar otra xubida de 400 m más a pinchu dende Éndriga al Rebol.lal y ensín una sola solombra, pasando a baxar pela Güergola hasta Arbeyales, onde recargamos agua, teniendo una pequeña xubida pel camín de la Madriecha, pa descender de nuevu hasta la cabera parada en L.lamera, onde llego derrotáu pel calor.
 
Los 41 km pasaben factura y paez mentira, pero les baxaes, aún llevando bonos ritmos, van machacándome y en L.lamera, teníemos enfrente la cabera xubida del día de casi 600 m de desnivel, qu'anque se facíese pela foz de Redibobia, onde'l rigu Bobia y los árboles daben aliendu pa l'ascensión, cuando aportamos a la Bobia, al pie del Val.le y vemos que'l camín sigue xubiendo pela faldera la Palombera, los cuerpos y ánimos de los que díbemos en grupu, quedaron escosos.
 
Dellos momentos de la carrera per tarrén somedanu

Finamos l'ascensu nas Veigas del Pandu, xustu a falta de 5 km a meta, dexándome cayer un pocu pa garrar ritmu pela llarga pista, algamando ritmos decentes, pero los kilómetros paez que nun pasen y fáeseme bola, la pista de baxada y el calor, viendo como'l cuerpu ya nun acepta más agua.

A falta de 3 km, escaezo la opción d'intentar baxar de les 8 hores y sigo más tranquilu, faciendo dalgunos tramos andando y otros corriendo, pesie a que'l tarrén y les pates nun dan dengún problema pa siguir fuerte hasta meta, mi cuerpu y cabeza nun tienen más ganes de correr.
 
A la fín, paso per Urria, ensin parar y ya per carretera, atopo'l naguáu últimu kilómetru del día, descendiendo hasta La Pola, onde los aplausos de la xente y les sos indicaciones faen que llegue a meta, como poques vegaes llegara de cansáu en denguna carrera, agradeciendo les pallabres de Gobitu Bode, organizador de la carrera, pero nun tenía gracia nin pa sacar una sorrisa.

Al dia siguiente sesión d'spa per Morcín

Caleyo un ratín pela carpa, atopando a Ana y Duba, que dícenme que Silvia, nun venía mui atrás, normal, cada dia ta más fuerte, pero nun pueu más y siéntome escontra una columna a descansar. Al ratu apaez la probe per ellí, llorando como una madalena, a sabiendes del carrerón que fizo na so primer maratón.

Más tarde alcontraríemos a Alberto y Carlinos, el cuál tuviera problemes musculares a los 35 km y tuvieren que dir controlando más de lo que-yos gustaría a los dos. D'otra miente, fue un placer alcontrar de nuevu a vieyos collacios de carreres como Rubén, Leti y Jorge, colos que compartimos dalguna cervecina na post-carrera.

Dar mil gracies a la organización, voluntarios y fotógrafos, por facer una auténtica folixa d'esta carrera, perbien organizada, con un percorríu, correnderu, pero que ye l'amuesa perfeuta de tola guapura de Somiedu y a la que si sigo motiváu corriendo, nun dudaré en tornar pa esfrutala otra vegada.

jueves, 19 de mayo de 2022

Entragu - Pena Sobia (Teberga)

14 de Mayu de 2021

Dempués de finiquitar cola escuelina de Villanueva en Santu Adrianu, dormíemos n'Entragu pa pasar el restu del finde en Teberga trepando. Al día siguiente, ente avisos de tormentes, miraes pa la meteo y almuerzos interminables, arrancamos pa la Pena Sobia, col envís de conocer el nueu seutor del Rincón, equipáu por Richie de Roca Verde.

Ya pasáremos per ellí, de la que baxábemos de facer Distrito Apache en Placas del Sol, pero esi día, colos deberes fechos, nin siquiera diérame por prebar dalgún sestín. Esta vegada, pesie a los bonos pegues de tol equipu, nel día anterior, teníemos ganes d'esguilar tolo que nos diese la meteo.

Camín hacia'l Rincón col desfiladeru de Valdezreizales

D'esta miente, con un chornazu asfisiante, anque col día nubláu vamos preparándonos, metíendose Lau y Mario a prebar un par de 6as, demientres que Suco y yo, dempués de mirar bien les opciones tirámonos dar un pegue a vista a La Presa de Prisa (7a), metiéndo un pegazu a vista Suco y pringándola yo tamién al flash.

Al segundu pegue, cayendo dalguna gotera y cola truena sacudiendo pente Teberga y Somiedu al altor del Camín de la Mesa, fuimos a encadenala los dos, paecíendonos una vía perfanática, con movimientos mui guapos, quedándonos con munchísimes ganes de siguir trepando nesti requexu de la Sobia.

Mario apretando un pelín nos sestos baxos del Rincón
 
Tanto Suco como yo, tábemos ya a gustu, dando un par de pegues más Lau y Mario, pa encadenar otra bona vía, Stairway to Heaven, con primer llargu de 6a, a lo que quedamos con ganes de da-y pa tastiar el segundu llargu de 7b.
 
Ya con esto, Alón, decidimos baxar nun fuéramos a pillar una chupa fina moyando tol material, baxando hasta Entragu, onde probes de nós, pensábemos xubir a Bóvedas de tarde si llibraba pa montar dalgún proyeutu pal domingu, pero lo únicu que ficimos ye enganchando al chigre en mou vermú interminable.

Kíla esfrutando de los pies de vía de la Pena Sobia

Pena Sobia (Teberga)
Croquis modificaos por mi de la escuela d'escalada de La Depuradora, por mor del GM Aguja de Sobia: La Depuradora. Gracies y col so permisu.

 --------------------------------------------------------------------

martes, 17 de mayo de 2022

Villanueva (Santu Adrianu)

13 de Mayu de 2022

Más de dos años dempués, tornábemos pela escuela de Villanueva en Santu Adrianu, más que nada por acompañar a Anna que tenía en mente facer los dos 7a+ y aprovechando que tenía por allí a Iso ya Iván probando Villanueva City, la última vía que faltábame nel seutor, probela un pelín sacando los movimientos de forma cenciella esta vegada.

Anna rematando'l so segundu 7a+ del seutor

Equí ya entró la motivación por finar el seutor y les visites fueron llegando sobretou nel últimu mes, onde ya tábemos pa encadenar la vía aprosimádamente nel octavu pegue, pero un pire d'un pié fízome destapinar y tar con un deu vendáu casi un par de selmanes.

Dándo-y cera y metiendo pegues a Villanueva City (7b+)

Si a esto-y sumamos les mios dificultaes pa encadenar los proyeutos con cierta facilidá, alcontréme nun procesu mental, que llevóme a cayer nel décimu pegue, saliendo a cadena dempués facer tolo duro y onde enxamás pensara que pudiera cayer.

Díes de pié de vía tranquilos en Villanueva

Dende equí viniera la cuesta abaxo, con díes de mui mala condición por temperatures y retropegues, cayendo nel primer pasín de la vía, hasta en cuatru ocasiones, hasta encadenala nel tercer pegue del día, xustu nun momentu, nel que taba pensando ya en dexala pa otra temporada.

Con esto piesllamos la escuela, ya que tenemos toles víes de los dos seutores encadenaos, asina que mis hores nesti pie de vía tan guapu, ya pasaron al escaezu y ye que tocará siguir abriendo frentes notres escueles onde tengamos un abanicu de víes más ampliu.

Lau encadenando la Cus (6c/+) y xubiendo grau pali pali

La verdá ye que prestaron munchísimu les tardes de pie de vía, viendo como los collacios diben encadenando los sos proyeutinos y consiguiendo la motivación p'apretar entre toos y animando a probar coses más dures caún nel so grau.

Villanueva (Seutores visitaos)
 
Croquis modificaos por mi de la escuela d'escalada de Villanueva, por mor de Piratas Free. Gracies y col so permisu.

--------------------------------------------------------------------------------------------------------------

viernes, 13 de mayo de 2022

Sellañu (Ponga) - Semeldón - Llevarda - Llagosciegos - Agüera - Tarañes (Ponga)

 7 de Mayu de 2022

Track: Sellañu (Ponga) - Semeldón - Llevarda - Llagosciegos - Agüera - Tarañes (Ponga)

Tornábemos al monte col GM Xuan de la Borrina, llueu de les vacaciones esguilaores y facíemoslo con una ruta potente, propuesta por Mario. Hai que dicir, que'l fichaxe d'esti collaciu nel grupu, ta dando los sos frutos, ya que ye del mesmu palo que los integrantes más vieyos, como Charly, Simón o yo, dexando casi de llau cumales míticos o grandes ascensiones en Picos, centrándonos en conocer y bregar per fasteres desconocíes pa nós.

D'esti xeitu, terminar la ruta, coles pates enllenes d'escayaes y pinchos de cotoya ye lo más normal y como non, ún de los nuesos tarrenes de xuegu preferíos ye'l conceyu de Ponga. La idega d'entamu yera quedar tol finde, pero nun podía Charly por temes de curro y el restu la xente, van un pocu al día, asina que decidimos tirar la travesía pela fastera del rigu Semeldón nel día.

Partimos de Sellañu (230 m) con un día soleyeru

Pegamos un madrugón terrible, pa esta dómina del añu y dempués del cafetín y pinchos na Huera en Cangues d'Onís, continuamos hacia Ponga, llevando de primeres coches a Tarañes y tornamos a Sellañu, onde a les 10 menos cuartu la mañana, entamamos a caleyar, ya camentando que diba ser tarde, pa tolo que queríemos facer.

viernes, 6 de mayo de 2022

Po (Cabrales)

29 d'Abril, 1, 2 de Mayu de 2022

Continúabemos de puente de Mayu per Cabrales, esfrutando d'unos díes maraviyosos d'esguilada y rises, cola idega de visitar varies escueles, pero sacante del día de las Llucias, engorilámonos en Po, pasando tres díes bien guapos apretando nesti estilu trepaor más bloqueru.

La tarde del vienres, xubiremos Anna y yo, demientres el restu del grupu avérase hasta Las Cabadas, escuela que por suerte, ya terminé d'encadenar entera. Mirando'l nivel de moyadura chorreril, nin mos planteamos para na parte baxa nin na más alta, asína que tiramos hacia'l seutor onde la Imnominata, vía que tenemos pendiente los dos.

Llibru n'honor de los aperturistes del Picu Urriellu

Personalmente, quiero probar el deu, ya que'l día anterior desficiera una yema y tocaba trepar con esparadrapu pa protexer un pelín esi deu, asina que munchu regletéu nun quería. Desdexamos la Imnominata, mientres Kíla fai del pié de vía'l so llugar de xuegu y nós restolamos cola guía, que vía podemos prebar.
 
Miramos pa Led Zeppelin y probámosla sacando como meyor podemos los pasos, con una secuencia atroz per romos y enantes un pasu de techu qu'hai que controlar. Por suerte, nun segundu pegue soi a facela, yendo de dos romos en dinámicu a una regle y posterior xarru salvador.

Esfrutando de grandes pegues a la Imnominata (7a+)
 
El tiempu nun dió pa más esti primer día, pal domingu, llueu del nuesu pasu pelas Llucias, xubir con Suco al líu, montando nun primer pegue, onde nun se puede acerar más pasos, la Imnominata y Púlpito de Levitación que comparten reunión.

Con un día nubláu, maraviyosu pa esguilar, vamos turnando pegues compartiendo métodos y pasos, nun trabayu colectivu onde les rises y los ánimos son la tónica del día. La verdá ye que la motivación yera alta y los pegues fueren fanáticos.

Encadenando la Imnominata nun pegue apretón

Personalmente, magar de montar la vía viendo que nin me movía, nun m'esperaba pa na, facela al segundu pegue, notándome mui fuerte nel bloque, pero tocó xestionar y sufrir tol restu de la placa, con munches posibilidaes de pringala na parte alta, paeciéndome una vía mui dura pa 7a, siendo pa mi idega 7a+ claramente.

Demientres Anna y Suco, siguíen dando pegues y sacando métodos, col día claramente fechu por mi parte, animéme a da-y un pegue a vista a Púlpito de Levitación, anque ya veía un pasu que dábame un pelín de terror y nel que nun se podía cayer de nenguna manera, xustu pa llevantase al Púlpito.

Pegue a vista a Púlpito de Levitación (7a+)

Nun sé mui bien cómo, tiro p'arriba, meto un talón nel Púlpito y salgo medio manteleando a chapar la cuarta, garrando aliendu al ver que ya nun me mataba. D'equí p'arriba, reposáu, salgo a vista, sacando les sencuencies pasando a un tramu de placa onde cierro regletes ensin xacíu y meto un dinámicu a una presa que nun sabía como yera, quedándome cortu por cms, a lo qu'a posteriori ví que yera un cazu que daría pasu posíblemente a mi primer 7a+ a vista... pero nun pudo ser.

Tovía tuviera tiempu a da-y otru pegue más nel que líome na parte de placa y nun soi a chapar, llanzando dinámicamente al cazu ensin garralu y pegando un volatil de los bonos, jeje. Dafechu reventaos, colamos los tres, felices magar d'un día fanáticu apretando en víes mui prestoses.

Álvaro un "local" de Po esfrutando del mundiu chorreril

Al día siguiente, llunes, espertamos nel mirador d'Asiegu, llueu d'una tarde de chigréu en Casa Niembro y furgonetéu, almorzando cola calma y viendo como la xente va cayéndose de los planes esguiladores. Nós, sentímonos obligaos a trepar ya que venía Álvaro dende Caravia, pero pa lo que nun tábemos preparaos yera pa xubir orbayando hasta'l seutor, teniéndonos qu'abellugar nel más desplomáu, en Chorreras.

Casi, ensin ganes d'esguilar y pelín resacosu, preparámonos p'asegurar a Alvarín que vien atómicu y calienta faciendo dos mítiques como son Alanvista y Entre Medusas, pa siguir faciendo Infiltrados, un 7a que sí qu'animámonos a probar Anna y yo.

Anna progresando per Infiltrados nel seutor Chorreras

Yo namái que-y dí un peguín y notéme tan cansáu que nun quise da-y un segundu, metíendose Anna a dar un mui bon segundu pegue, quedando lista pa otra visitina. Nel intre, el día ameyorara munchísimu y casi saliendo'l solete, averámonos hasta Púlpito, ofreciéndose Álvaro a montala, pudiendo yo dempués encadenala nel primer pegue del dia y probándola Anna, teniendo toos claro que ye más dura Imnominata.

Pa terminar, el xabalí d'Álvaro terminó metiendo otru pegue brutal a California Blues, otru 7a+ que completa la triloxía del seutor, pero que ya cola fundida que llevaba nun se pudo llevar. Darréu tocaba recoyer y baxar tranquilamente hasta l'aparcaderu, onde esperábanos la cervecina pa zarrar un puente mui positivu, llevándome un sétimu al día.

Po
Croquis modificaos por mi de la escuela d'escalada de Po, por mor de Entretenimiento Vertical. Gracies y col so permisu.

---------------------------------------------------------------------------

miércoles, 4 de mayo de 2022

Las Llucias (Cabrales)

6 de Payares de 2021 y 30 d'Abril de 2022

Tornábemos a Las Llucias, llueu d'una visita pelín infructuosa a finales del 2021, onde probáremos per primer vegada, El Velcro, un 7b en tola so dimensión, qu'asegura una escalada finísima nun pañu con una calidá de roca superior.

Esi día, metíerame nun 6c o así, dalgo húmedu que terminara por desesperame y desgatar yemes ensin xacíu y los pegues al Velcro fueren de too menos bonos, asína que col rabu pente les pates, coláremos de la escuela, ensin llevar nin una vía pal bolsiellu.

Díes de sol pero mui fresquete pelas Llucias

El puente del 1 de Mayu, dexamos de trabayar nes nueses ocupaciones profesionales y tiramos un bon garrapiellu de collacios hasta Cabrales, col envís de visitar delles escueles, pero a la fín, ficimos una visita de sábadu a las Llucias y el restu los díes, anduvimos apretando en Po.

En Las Llucias, diviéramos los grupos pente'l seutor cobalto y la segunda aguya, onde plantáremonos ellí, Anna y yo, vinieno a probar dalguna vía, Suco, Iso y Rubén, demientres el restu del grupu llimpiaba dafechu'l seutor.

Como siempre la roca y les vistes son el mayor atrautivu d'esta escuelina

El día, fresquín de primeres foi tornándose más y más calurosu, teniendo unes hores centrales, nes que yera casi imposible trepar. Enantes, montara Anna, un gran oxetivu como yera'l Velcro (7b), probándola dempués yo, viendo que col deu con esparadrapu por mor d'un siete que ficiérame en Villanueva de Xueves, diba ser imposibledar pegues decentes.

Asina que con tola solana, metíme a dar un pegue a vista al 7a que faltábame, pringando na placa fina d'abaxo, quedando mediu tontu del pegue al solano. Según fue pasando la tarde, tomándonoslo con munchísima calma, fuimos dando pegues tanto Anna como yo, turnando colos collacios que diben averándose hasta ellí, dando dos pegues finales perbonos Anna, dexándola la vía vista pa sentencia.

Kíla esfrutando d'un estupendu día de sol y relax en pié de vía

Pela mió parte, llueu de flashear Cabeza Nido (7a) a Suco e Iso, animéme a dar un últimu pegue, pringando casi na placa y saliendo ya hasta cadena ensin mayores problemes. Dicir que ye un 7a más sele que Cortejo Masivo, que podría averase al 7a+, pero paga la pena igualmente sofrir na placa pa esfrutar de la parte superior de la vía.

Agora ya sólo queda tornar a la escuela, con yemes y ganes d'escalar finu nel Velcro.

 
Croquis de Las Llucias por mor del trabayu del guía de montaña Juan Luis Guilluy, los collacios Pepa y Jose, Edu. Gracies y col so permisu.