martes, 19 de noviembre de 2013

Saliencia (Somiedu) - Xerra Los Bígaros

20 d'Ochobre de 2013

Track: Saliencia (Somiedu) - Xerra Los Bígaros


Esti añu, nun fuí mui esixente nes mios rutes pal grupu y escoyí, principalmente, llugares que tenía ganes de conocer, como ye la fastera del camín de la Mesa. Va unos añinos, supuestamente conocímoslo dende l'altu San L.lorienzu hasta Torrostigu en bici pero a la fín, nun vimos na pola ñebla, colo que les ganes de tornar yeren munches.

Más prestosu ainda si cabe, ye xubir al camín dende lo baxo, dende'l pueblu de Saliencia, teniendo la suerte de conocer de pasu tol val.le Saliencia, que ya nesta dómina del añu va camudando los collores al aportar la seronda.

Entamamos nel aparcaderu de Saliencia (1120 m)

P'arribar a Saliencia en Somiedu, tenemos que garrar l'autovía "Y" en direición Uviéu pa siguir dempués en direición Grau pola As-63, hasta la salida de Cangas del Narcea. Equí tomaremos la As-15, travesando parte del conceyu de Salas y entraremos nel conceyu de Miranda, siguiendo pola As-227 hasta l'entamu del conceyu de Somiedu, Aguamestas.

Dende Auguasmestas pasaremos pelos pueblos de Xadriz, La Riera, Recueva y Castru, onde nel banzáu de la Malva, salimos pela SD-1, entamando camín pel val.le Saliencia, pasando per Veigas, Vil.larín, Arbeyales, Éndriga y Saliencia.

Caleyamos un ratín per carretera hasta garrar el camín hacia la foz d'Arroxu

Nel pueblu hai un guapu aparcaderu, onde abrigámonos bien, ya que'l día ta pelín ventosu y la sensación de fríu ye mayor de la rial, anque según vayamos caleyando pela carretera diremos caleciendo pasín a pasu.

Pocu tendremos de carretera, dalgo menos d'un kilometrín y ya garramos un guapu senderu a la manzorga, que tien de llevanos hacia la guapa foz d'Arroxu. Esta foz conociérala penmediu de dellos blogues pero l'últimu qu'usárala p'ascender al Muñón yera Monchu x Montaña asína qu'aprovechamos pa siguir los sos pasos pa la nuesa ruta.

Salimos del monte'l Reboyar averándonos poquín a pocu a la foz

Pero enantes de conocer esta foz d'Arroxu, primeru diremos percorriendo una estupenda sienda, que traviesa'l monte Reboyar, hasta que nuna envuelta sí que somos a topanos coles parés que baxen de les peñes de los Bueis y la Ferrera, les cuales son furaes pel ríu Arroxu.

Poro, dexaremos atrás la viesca y diremos averándonos hacia la foz, pegándonos a les peñes de los Bueis, les cuales son travesaes per un camín armáu a tramos, dándonos dalgún qu'otru pasu ablucante tantu pol senderu como por les vistes hacia les plegadures calices que baxen de la Ferrera.

Perguapu pasu pela Foz d'Arroxu

Pa un aficionáu a la escalada, ver parés tan llamatives como la de la siguiente semeya, ye toa una triba d'idegues viniéndose a la tiesta. Nun se l'estáu de la peña, nin la posible dificultá de les vies a equipar nesti paré, nin lo qu'habrá na covacha del final del paré... pero sería un sitiu increyible onde esguilar.

Que potencia d'escuela d'escalada habría equí...

Desdexamos les idegues trepadores y siguimos agora esfrutando del cursu de la riega d'Arroxu, la cúal sigún avanzamos pel val.le hacia los altos, darános la posibilidá d'agüeyar dellos pequeños tabayones que faen amenu un percorríu ya de por sí, bien guapu.

Pasamos de la foz a siguir el cursu de la riega d'Arroxos colos sos saltinos

A bon ritmu siguiremos xubiendo hacia'l camín de la Mesa, onde atoparémonos con dellos bonos exemplares de caballos, a los que Kíla nun fai muncho casu de lo cuál soi a allegrame abondo. Tamién como non, acolumbraremos les primeres cabanes de teitu vexetal del día, les de la braña la Mesa.

Siguimos camín hacia la Braña La Mesa

Enantes, de llegar al ñucleu de la braña la Mesa, baxaremos del camín hacia la riega d'Arroxu, la cual cruciaremos nun tramu secu y entamaremos una pindia anque tranquila xubida hacia los altos de la xerra los Bígaros y más en concretu hacia la peña la Ferrera.

Ascendemos fuertemente hasta l'ablucante L.lau

Pudiéramos xubir más direutos hacia los nuesos oxetivos: el Muñón y los Bígaros, pero bien paga la pena, conocer el L.lau, una prestosa l.laguna a los pies de la Ferrera, que caltién un curiosu collor verdiayu.

Perguapes semeyes col L.lau y les peñes Michu y Prieta detrás

Les semeyes al altor del L.lau, so los 1800 ms, coles Peñes Michu y Prieta (o Negra) tras de nueso, son una maraviya. Poro, casi ensín danos cuenta, tamos averándonos al col.láu Muñón, puntu onde tenemos que facer l'ascensión final al vértice xeodésicu del Picu Muñón.

Ganamos pol col.láu Muñón la cresta hacia'l Picu Muñón

Meterémonos con xeitu hacia'l col.láu, pero viendo como sopla'l vientu na cresta, preferimos ganala lo más averáu del cumal posible, algamando les vistes hacia'l restu de guapu conceyu de Somiedu, a pocos metrinos del picu Muñón.

Guapes vistes hacia los l.lagos de Saliencia

Nun ye'l meyor día pa vistes, pero siempre presta agüeyar los l.lagos de Saliencia, y cumales qu'ainda nun fui a visitar como los de la fastera'l Calabazosa. Ensín más, siguimos crestiando hasta topanos col vértice y con un ablucante furacu delantre d'él, qu'afila la cresta pelos dos llaos.

Perguapu y curiosu cumal del Muñón (2038 m)

Como se suel dicir, nun hai quien pare col vientu, asína que colamos del Muñón, abandonando'l vértice (muñón n'asturianu, ye un finxu... nun se si-y vendrá d'ehí) que nun fai llende con Llión, ya que ta nel próximu cumal a visitar, el de los Bígaros.

Pasamos la pela Pasada los Bígaros hacia'l cumal

Pa ello, siguimos pela arista, anque con un vientu tan molesto y dempués de mirar qu'habría que destrepar un pocu, prefiero baxar a la fastera oriental, pa protexenos del vientu y pasar per una faza roxiza que llévanos hacia'l col.lau o pasada de los Bígaros.

Cume nos Bígaros (2044 m)

Dende equí, namái será xubir lluchando escontra'l vientu, pa facenos una semeyina nos 2044 ms de los Bígaros, cumal de primer categoría dientru los dosmiles y montes asturianos, al dominar abondu tarrén pente dos bonos puertos como ye'l puertu la Mesa y l'altu la Farrapona.

Baxamos con fuerte vientu hacia'l Puertu La Mesa

El vientu nun baxa y les vistes pa Penaubina y restu Somiedu nun van meyorar, asína que tiramos hasta'l col.láu de nuevu, y d'ehí baxamos a fueu hacia les praeres del Puertu la Mesa. Serán más de doscientos metros de desnivel a baxar, pero fadrémoslo rápidu y na parte más baxa (1781 ms) despedireme del restu'l grupu ya que quería conocer tres cotes de Teberga que tenía xusto enfrente.

Agora como tengo a Kíla, tengo la suerte de nun dir solu nestes hestories, asína que camudo les mochiles con Pau, y salimos corriendo la perrina y yo, hacia'l col.láu pente los picos de Las Piedras y Carbacedín.

Facemos Kíla y yo les cotes teberganes de Carbacedín (1897 m) y Las Piedras (1934 m)


Pa ello, tendremos que cruciar la llende con Santumichanu (Llión) pa tornar a tierres astures, esta vegada por Teberga y encumar los 1897 ms de Carbacedín, nel que tengo bones vistes hacia la Ferreirúa y tol macizu de Penaubina baxo la ñube.

De Carbacedín, baxamos esnalando hacia'l colláu y d'ehí a la cota más alta de Teberga nel día, el picu Las Piedras (1934 ms), el cual cuéstame un pelín, ya que les pates van notándose cargaes y más corriendo per estos llares.

Finamos les cotes teberganes nel Picu L'Aguil (1871 m)

De las Piedras, tomaré como referencia tola llende que separta Somiedu de Teberga, y corriendo p'abaxo primeru por ganes y p'arriba, porque nel l.lanu'l Muñón, perseguíenmos dos mastinos, aportamos al nuesu últimu finxu del día, el Picu L'Aguil de 1871 ms, dando por fináu cola Ferreirúa, les cuatros cotes teberganes más altes.

Dende equí, cola vista puesta n'otra ruta que tenemos pa esti añu, col Michu y la Prieta, baxaré más sele hacia la braña La Mesa, onde tol restu'l grupu, Pau, Zori, Richar, David y Haritz tan esperándome nuna cómoda y guapa cabana cola xinta.

Travesamos la Braña La Mesa siguiendo'l camín davezu hacia Saliencia

Magar de la espeutacular tortiella que ficiera Paulina la nueche anterior, agora sí, siguimos el camín de la Mesa, conociendo tola braña del mesmu nome y el guapu rebañu de caballos que pastia nestos praos somedanos.

Pasiaremos tranquilamente, pol camín, dexando a la nuesa manzorga la Foz d'Arroxu y conociendo dalgún qu'otru val.le con personalidá como'l de Caranga que baxaría hacia'l pueblu de Barriu y que caltién delles brañes guapes de conocer como Fonfría, Carroceda y L.ladrona.

Guapes vistes pel camín de la Mesa: Foz d'Arroxos, Val.le Caranga, Sobia y Gradura

Al fondu veremos, con un sol rellumante les calices de Gradura y Sobia, nel qu'hai delles escueles d'escalada y siguiremos camín protexíos del viento polos Cumales, hasta'l col.láu la Madalena, onde entamaremos una prestosa baxada hacia las Morteras de Saliencia.

Pasando pela Mortera Saliencia

De prestosa la baxada al conocer, munches y bien curiáes cabanes, pasaremos a una baxada pindia per pista de formigón, que sinón ye polos collores del monte Las Bustariegas al otru lláu del val.le Saliencia, fadríase más pesada si cabe.

Finalmente, a pesar de nun acompañanos el día del tou, anque tengo que dicir que nun se si ye casualidá o non, pero nun vi un reportaxe con bon tiempu a los Bígaros, jaja, el día portóse y tuviemos una ruta mui, mui buena per llugares quiciás menos conocíos de Somiedu.

Aportamos al pueblu Saliencia pa finar la ruta


En resume, aportamos a Saliencia, magar de casi 8 hores de ruta y nel mio casu, col añadíu de les cotes teberganes, unos 19.2 kms de percorríu y casi 1400 ms de desnivel acumuláu, lo cual acabó por facese más bien durín, durín.

Polo demás, que meyor que pa finar un bon día de monte, tomar unes cerveces nel Albergue de Saliencia, el cuál sorprendiónos polo guapu, pol bon tratu y sobretou pol ambiente montañeru del chigreru con pelicules de montaña bien prestoses (Catherine Destivelle, Tocando el vacio ... ), polo que nun m'importaría pasar unos díes per ellí nun futuru.

Camudando'l Camín na Xerra los Bígaros

Ruta nos altos de Somiedu y Teberga na que ficimos: El Muñón (2038m) dosmil y vértice somedanu, Los Bígaros (2044 m), Las Piedras (1934 m) segunda cota de Teberga, Carbacedín (1897 ms) tercer cota de Teberga y L'Aguíl (1871 m) cuarta cota de Teberga

Ver progresos en: Retos montañeros

6 comentarios:

  1. No hago más que terminar la entrada de la Robleñada y me encuentro esta otra guapa entrada de Somiedo. Que aunque dices que hace mal tiempo no se aprecia mucho en las fotos.
    Esto que viene ahora si que es mal tiempo. A ver como libramos¡¡¡¡¡.

    Un abrazu collaciu.

    ResponderEliminar
    Respuestas
    1. Pues tenemos ruta, asina que nun se pa onde vamos poder tirar, jaja. Eso sí, bien abrigaos.

      Un abrazu Fernan

      Eliminar
  2. Guapa Berto, veo que la hicísteis calcá a la nuestra, salvo por el añadio tuyu de Carbacedín, Piedres y Aguil. En otra ocasión, nosotros desde Torrestío, por la Farrapona a Bígaros, Muñón, Aguil y todas las cumbres hasta el Ferreirúa, ah y con mucha nieve!!!
    Buen reportaje.
    Un abrazu

    ResponderEliminar
    Respuestas
    1. Gracies Monchu, ya me l'apuntara yo, cuando la ficisteis col nietu y paecióme bien guapa. L'añadíu yera por completar eses tres cimes, que pensándolu bien, dende los valles teberganos tienen que ser guapes de xubir igualmente.

      Un abrazu

      Eliminar
  3. Guapes semeyes y mui prestosu'l reportaxe. Yo fixéralu esti branu, sin les cotes teberganes, y pasáralo perbien.
    Un saludu

    ResponderEliminar
    Respuestas
    1. Gracies Arturo... les semeyes lo que se podía, taba'l día más bien murniu... así que lo salió que nun somos nengunos fieres cola cámara.

      Un saludu

      Eliminar