jueves, 30 de enero de 2020

L.lano (Quirós)

Añu 2019

El 2019 fue un añu intensu en trepaes en Quirós, a la escontra d'otros años nos que tiraba más pa Teberga, esti añu, anduvimos trepando muncho tamién nel L.lano y aunque nun tuvimos a fueu con proyeutos mui duros, sí que fuimos a encadenar dalgunes víes a les que teníemos-y munches ganes.

La preciosa placa de la Asterix... un retu téunicu y mental

Una de les que más me prestó sacar, nun momentu nel que nun taba esguilando de cabeza mui bien, fue Asterix, ya que una placa vertical nesti estilu, téunica y con ciertos pires nos que nun presta muncho esnalar, volvíame un pocu la cabeza lloca... aún así ficímonos con ella nun pegue nel que disfruté un montón encadenándola.

Díes mui fríos probando Efectos Especiales nel Escalón

De seutores nos que nun paré muncho como Asterix y Ardillas, nel que tuve probando la homónima y viendo como dellos collacios, apretaben enforma nos sos respeutivos proyeutos, como Gelu, qu'en dalgún día de los que tuve per ellí, entamara a probar Balada de Otoño, un 7c increyíblemente estéticu de muncha fuercia y desplome na metá de la vía.

Gelu trabayando la potente vía Balada de Otoño

Más tarde, totalmente fanáticu yera a llevásela, mientres personalmente volvía a visitar seutores tan míticos como l'Escalón, onde tenía pendiente un par de víes a les que-y tenía bien de ganes, como'l Corner (7a) y sobretou Efectos Especiales (7a+), onde tuve una llucha perimportante de varios díes.

Pegue buenísimu nel primer día de prebes na vía

Aparte del encadene d'estes dos víes, tamién ficimos Depiedradores (6c+) a vista nel Escalón, ya intentamos volver a ganar confianza n'otros seutores como la Candela, onde les víes me siguen costando una barbaridá sobretou no mental.

Probando la Brutus... Quirós ye así... toca pisar y apretar regleta

Y como non, tamién tuviemos dándo-y a los guapes plaques de la Cubana, faciendo poniendo cintes Sol y Nieve, pero pringando la Brutus, na que rompí un cantu cuando diba encadenando y salí volando quedando l'encadene pa otra visita qu'espero nun seya a mui tardar.

L.lano (Seutores visitaos)

Croquis modificaos por mi de la escuela d'escalada en: L.lano (Quirós) por mor de Mariño que m'empobinó a visitar la páxina de Piratas Free. Gracies y col so permisu.

----------------------------------------------------

martes, 28 de enero de 2020

Entragu - Pena Sobia (Teberga)

Añu 2019

Si'l branu del 2018 nun mos dexara casi esfrutar de la escalada per Teberga y más en concretu de la fastera de la Pena Sobia, onde alcuéntrase la Depuradora, l'iviernu del 2018-2019, fuera mui, mui secu y pudiéramos esguilar con calma visitando esta escuela varios díes hasta'l mes de Xunu.

Probando'l 7b sin nome, una vía de bloque concentráu en dos chapes

Daquella andábemos a la caza d'encadenar Garrote Vil (7a+), pero nun fuimos siquiera a poder da-y en condiciones ya que siempre taba moyada o la montábemos, dábemos un pegue, entraba la solana y nun había quien parase y de tarde llovía volviendo a la rueda una vegada más.

Guapes vistes dende les altures de la canal de la Depuradora

A finales d'añu, casi de nueche, algamamos l'encadene esfrutándo munchísimo del pegue, con un color al atapecer brutal. Tamién, naquella dómina, tuviéramos probando la vía más dura, "factible" del seutor, un 7b ensín nome, perguapu d'esguilar pero que tien tol problema concentráu en dos chapes.

Ani esguilando delles víes de la Depu

Les últimes visites na primavera, centráronse más bien, en tachar segundos llargos de 6c y 6c+ que perpasaben los 40 metros de vía y dalgunu de primer llargu perplaqueru, nel qu'había qu'apretar con too pa salir de los pasos.

Orlando dándo-y cera a Garrote Vil

Ensin más, quedámonos con esti seutor casi ventiláu a falta d'esti 7b, qu'intentaremos volver a atacalu lo antes posible, anque probáblemente les siguientes visites nos lleven a facer víes na Cova Negra o más arriba en Placas del Sol, que tovía nun conozo y ye un seutor perfeutu pal iviernu.

Pena Sobia (Teberga)
Croquis modificaos por mi de la escuela d'escalada de La Depuradora, por mor del GM Aguja de Sobia: La Depuradora. Gracies y col so permisu.

 --------------------------------------------------------------------
 

viernes, 24 de enero de 2020

Entragu - Pena Gradura (Teberga)

Actualización 2019 

Munchos, munchísimos fueron los díes que pasé per Teberga trepando dende finales del 2018 hasta'l 2020 y ye qu'esti iviernu pasáu fuera secu enforma y pudiéramos trepar casi tol añu, cosa qu'a final del 2019 nun pudo ser por mor de les lluvies, anque nesta segunda metá del añu casi nun pasé pol valle.

Fon siempre motiváu mientres otros descansen jeje

Falando de la parte de la Pena Gradura, aparte de facer monte per ella encadenando esi mesmu día, nel covachón de Gradura la mítica Arte Primitivo, tamién tuviera trepando un pocu más abaxo n'Entecampos, onde tamién ficimos Valle de Lokos, prestándome pola vida esti seutor.

Momentos perrunos en bóvedas

Na parte baxa d'Entecampos tamién llevámonos otra guapu sétimu como ye la Tormenta Perfecta y na Esplanada, a la fín, me tóme en serio encadenar quiciás la vía más guapa de placa de Teberga, la Hiroshima, imprescindible nel so grau.

La esplanada... plaques y desplomes al empar

Na fastera de Bóvedas y paré Negra ficimos bastante trabayu, terminando los 7as de chorrera de la Bóveda alta y aparte de probar delles víes más dures como Chamón, nos llevamos nun finde de rises y fanatismu de váter, Disfruta Manguta (7a+) bloquera como ella sóla.

Entragu - Pena Gradura (Teberga)
Croquis modificaos por mi de la escuela d'escalada de Entragu, alcontraos en La noche del Loro, el Club Aguja de Sobia, Desnivel del añu del tabacu... Gracies y col so permisu.


---------------------------------------------------------------------

lunes, 20 de enero de 2020

Las Cábadas (Cabrales)

14 de Setiembre de 2019

Otru día más de vacaciones y magar de los díes pel desfiladeru la Hermida, desplazábame hasta Cabrales col envís de dir averándome al país, esguilar dalgo per Arenas y al día siguiente entamar la temporada col grupu monte.

Apretando na Cerica... un 7a bien prestosu

La verdá ye qu'aparte de repetir delles víes cola calma, tuve centráu n'intentar de terminar les víes que me quedaben na escuelina de la Cábadas, onde tuviemos un vienres tarde tranquilín, Suco, Anna y yo, intentando nun pringar víes ya encadenaes, pesie al calor ya intentando nun desfacer les yemes nos pegues a un 7a, la Cerica, que ya tuviera probáu de va tiempu.

Suco esnalando nel pasu de la vía

Al día siguiente, dempués de que Suco abandonara l'equipu, non sin esa tarde deleitanos con unos pegues al corte, sumáronse al grupu, los collacios, Haritz, Pepa y Jose colos que trepamos más menos tola mañana hasta que'l sol fundía enforma, pero tovía eché-y ganes y dí-y un pegue pa encadenar al fín esta vía tan regletera, quedándome casi'l seutor visto pa sentencia hasta una próxima visitina.

Kíla cabraleando nas Cábadas

 
Croquis modificaos de Las Cábadas por mor del blogue del guía de montaña Victor Sánchez. Gracies y col so permisu.


-----------------------------------------------------------------------------------

viernes, 17 de enero de 2020

La Hermida (Llébana)

10 al 13 de Setiembre de 2019

Dempués d'unos díes per Llión trepando y conociendo les escueles de Aleje y Alejico, fice un prestosu viaxe hasta Potes per San Glorio, aportando al pueblu, xusto enantes de qu'entrase un frente, que dexó lluvies ensin xacíu durante esa nueche.

Nun sabes mui bien, lo que suena la chapa de metal de tu furgo, hasta que pases una nueche de xarazaes continues. Menos mal que Kíla y yo, tenemos pocu problema pa durmir y descansar, descansamos enforma.

Abellugaos del agua na Cueva'l Ribero onde siempre se puede trepar

Al día siguiente, tocaba baxar a almorzar cola calma hasta La Hermida, onde tuve trabayando un pelín col portátil a la espera de qu'aportasen dellos collacios d'Asturies pa trepar unos díes más pel desfiladeru anque viendo como chorreaben tolos parés, díbemos tenelo complicáu de xuru.

Esa mesma tarde, nun teníemos otra que dir hasta Cueva'l Ribero, onde como siempre podíase esguilar en casi toes les víes. Personalmente, esi día, prestóme muncho facer un 6b perguapu (Madre que de tierra) pa calecer y llueu tocó metese a probar serio Rebelión en la Granja, un 7a perclásicu d'esti seutor.

Lluchando nun 6c+ super físicu y mui cabrón

Esi día nun mos lo llevamos, pero al día siguiente al primer pegue ya cayó, asína que siguimos probando dalgún qu'otru 7a quiciás 7a+ como ye Daniela. Nun fuimos a sacala, pero guapa yera enforma, asína que quedamos tan tranquilos col día d'escalada.

Mientres tanto, Orlando se llevaba Daniela, al empar que tamién la probaba yo, Álvaro que taba de cordada conmigo, tamién encadenaba Rebelión y Fon, se llevaba ya nun día bien guapu de solo como les semeyes amuesen, un 7b qu'intentaré probar na siguiente visita, ya que tenía una pinta brutal.

Fon fusilando Cucho's Wall un 7b preciosu

Polo demás, el tercer día, fuimos dar un patéu hasta Cicera pa ver que se podría facer. Personalmente nun lo conocía y ya caleyar al llau del rigu de camín al seutor ya paga la pena, sobretou polo guapu y acoyonante del paré de Cicera así como de les vistes hacia la cueva de Carcalosa.

Nun sólo visitamos Cicera, tamién dimos pateos pa ver l'estáu de Rumenes, Estragüeña.... varios seutores del desfiladeru la Hermida y la constante yera clara... taba tou pingando. Asina que nel últimu día de trepar en Cantabria, aprovechando qu'averóse Suco tamién, fuí con él hasta cueva'l Ribero p'asegurar que trepase dalgo, demientres el restu'l grupu quedaba en Cicera intentado facer dalgo.

Paseín hasta Cicera con guapes vistes de la cueva de Calcalosa

Esi tercer día, demientres Suco conocía Rebelión en la Granja, dándo-y tres peguinos curiosos, yo metíme nun 6c+ supercabrón que ya probara en Xunetu y que ta resistiéndose y ye que pa ser 6c+ ye una vía dura y de resistencia corta esplosiva a esgalla.

Con pocu más y col sol secando los parés, faciéndose ya protagonista, terminábemos el trabayu na Hermida, non sin antes dir a durmir a Potes, ya que'l pueblu de la Hermida ye de lo más atristayáu que conozo... piesllando tolos chigres a les 10 de la nueche casi.

La Hermida
 
Croquis modificaos por mi de la escuela d'escalada de La Hermida, por mor del guía de monte: Fernando Zamora. Gracies y col so permisu.

   
                            ------------------------------------------------------------------------------------