lunes, 18 de mayo de 2009

Sotres (Cabrales) - Peñe Maín

17 de Mayu de 2009

Track: Sotres - Peñe Maín



Primer ruta na que p'algamar la cume faime falta dos intentos, ya qu'en Febreru, a pesar de lo testón que soi, tuve que dar la vuelta pol mal estáu de la ñeve. Poro, como si tenía que tornar yo solu, a los pocos meses fuimos a quitánosla del mediu como fuere. Asína que voi facer un amiestu d'esos dos díes, y como non, el track ye del día que llegamos a bon puertu.


Grupu d'entamu n'ambos díes (Febreru - Mayu)

Salimos dende'l pueblu cabraliegu de Sotres (pueblu más altu d'Asturies), más en concretu dende una curvona (949 m) onde parten delles rutes perimportantes pa un montañeru (Áliva, Urriellu, ...) poro, ye bien conocío y hai sitiu onde dexar el coche.

viernes, 8 de mayo de 2009

Llaíñes (Sobrescobiu) - Picu Cullargayos

3 de Mayu de 2009

Track: Llaíñes - Picu Cullargayos


Dos díes dempués de la mio primer soba de bici pela ruta Les Sendes (nome puestu por mi, nel que casi quedo calvu de pensar tanto), tocábame guetar dalguna rutina y les premises yeren: que fora cortina, non mui dura, y... si seguíen asína facíemos camín de casa al chigre y finábemos enantes, jeje.

En fin, el tema taba en que nun se nos liáse demasiáu pa poder dir metenos una farturona dempués. Asína qu'ente les premises y que tenía ganes de dir al parque ñatural de Redes, nos conceyos de Sobrescobiu y Casu, pues alcontré una rutina bien prestosa, como munches de les qu'asítiense nel parque de Redes.

Detrás nuesa: el Picu Cullargayos (1391 m)

Dicir que ye una fastera preciosa del país, y que pues garrar cualquier piquín de non muncho más de 1000 ms, o tirase a picos de 2000, e inclusu rutes de senderismu facilines, con siempre vistes bien guapes. Dalgo qu'ablucome enforma foi lo llimpiu que taba tou, ya que tamos tristemente avezaos a ver guarrería pel monte (llates, bolses, envoltorios, ...) per cualesquier requexu ente peñes, vexetación, etc... Pero esta vegada nun foi asina, lo cual ya da un puntu a favor pa esti llugar, y otru puntu menos de trabayu a un collaciu, que la metá de los díes acaba con una bolsa enllena de la basoria qu'alcuentra pol camín.

La ruta escoyía finalmente, entama nel pueblu coyanu de Llaíñes y fina nel picu Cullargayos. Esti pueblín ta bien averáu a la capital del conceyu, Rusecu, perconocía pol so banzáu, que xunto al de Tañes, da cobertura a toa esta fastera central d'Asturies, y que ye más que suficiente, poro nun tien xacíu nengún costruyir otru estrozando parte del parque de Redes nel pueblu casín de Caliao. NON AL BANZÁU DE CALIAO!!!

martes, 5 de mayo de 2009

Uviéu (Uviéu) - Ruta de Les Sendes - Entragu (Teberga)

1 de Mayu de 2009 

 Track Completu: Ruta de les Sendes (Uviéu - Teberga) (42,7 km)

 
 Conceyos polos qu'atraviesa la ruta y vista aérea

Primera entrada falando de rutes de Mtb, de les qu'espero que seyan munches más. Pa entamar, dicir que de pasu la fice pa estrenar la bici y ver que tal diba, poro fue más que suficiente. Ye más, la vuelta fízoseme dura, dura, ya que nun tar avezáu a dá-y al pedal más de 50 kms seguíos, ye lo que tien, sobretoo, si al final acabes faciendo casi'l doble (90 km). 

 Dicir que ye una ruta facilina, sin grandes repechos y sin camudar el ritmu práuticamente con munches xubíes o baxáes, ya que estes sendes tan feches sobro antiguos ferrocarriles, lo que-yos da unos desniveles poco pronunciaos, aún así, munchos kms picando p'arriba faese durín. 

Esta ruta ta compuesta por tres sendes verdes: La senda verde d'Uviéu (Parque d'Iviernu a Fuxo), sende verde Fuxo - Tuñón y la pernomada Senda del Osu. Como véis pongo'l track enteru y amás en tres partes por si nun la queréis facer entera, ya qu'al final son kms abondo. 

 Track Primer senda: Senda verde Parque d'Iviernu (Uviéu) - Fuxo (Uviéu) (7,6 km) 

 
 Mapa y vista aérea de la senda verde d'Uviéu
 
Esta primer senda sal del parque d'Iviernu d'Uviéu y va tol camín en baxada hasta la estación de Feve de Fuxo nel conceyu d'Uviéu. Ye un tramu, con muncha xente corriendo o en bici, así que ye un tramu pa dir sélemente caleciendo les pates. En sentíu contrariu, pica con cierta dureza p'arriba, lo cual dempúes de 80 kms y vientu a la escontra, fízoseme llargu pa tan solo ser 7 kms y mediu.

Track Segunda senda: Senda verde Fuxo (Uviéu) - Tuñón (Uviéu) (13,4 km) 

 
Mapa y vista aérea de la senda verde ente Fuxo y Tuñón
 

Esta ye la senda más irregular de toes, como se pue ver nos mapes, ya que casi tol tiempu tamos travesando'l ríu y siguiéndolu unes vegaes por una ribera y otres pela otra, teniendo que pasar pontes y teniendo más irregularidaes del terrén, con dalgún qu'otru repechu tanto nun sentíu como nel otru. 

Tamién, tar na redolada del pueblu de Trubia, danos la inconveniencia de compartir vía con coches, y la facilidá de pérdese tamién a la gueta de la senda. Aparte de ser una zona bastante guapa, pola cercanía del ríu, nel pasu d'esta senda, llamóme l'atención muncho'l Castillu de les Caldes, y la ponte colgante pola que pásase unos cientos de metros enantes. Track Tercera senda: Senda del Osu (Uviéu - Santu Adrianu - Proaza - Teberga) (21,7 km)

 
Mapa y vista aérea de la Senda del Osu
 
Poco hai que dicir d'esta senda o nada inclusu. Ye un de les sendes más visitaes n'Asturies y que más tránsitu de xente tien. Si tuviera que dicir dalgo, ye que si préstate'l senderismu ya inclusu xubes dalguna montaña, ..., nun la faigas, jeje. Ye lo más domingueru que te pues echar a la tiesta. Y siendo sinceros, si la quies facer, fa-yla un día pola selmana y en bici, que faese menos pesada. 
 
Téunicamente, tien dalguna vista prestosa, sobretoo arribando ya a Teberga, ya que ye la parte onde más s'arrequexa'l camín pente les montañes. Dicir que sal de la llende del conceyu d'Uviéu, col de Santu Adrianu, pa postrermente travesar Proaza y finar nel prestósu conceyu de Teberga, onde hai escuela d'escalada. A la escontra de la primer senda, nesta siempre xubimos con un desnivel bien continuu, poro nótase nes pates cuando tamos llegando a la fin n'Entragu. 
 
En sentíu contrariu, ye onde verdaderamente, vemos tolo qu'ascendimos ya que la baxada nos planta en Trubia en hora y media, ensín facer un esfuerzu escesivu. De tolo qu'arrodia a esta senda, val más nun falar, ya que representa tolo qu'odio d'Asturies, d'esa Asturies, que mos quieren vender el gobiernu astur. Esto ye lo que quier vender Tini y la puta FSA (Federación $ocialista anti-asturiana). 
 
Namás que vi, dominguerismu a la másima potencia, xente a esgaya, con árees recreatives, piscines, chigres, negocios d'alquiler de bicis, y too alrodiu d'unes osines, que l'únicu que ficieron ye ñacer ensín ma, ya qu'un putu furtivu asesinóla. A partir d'ehí, que facer pa continuar cola pantomima, pues montálas, pa que siga la pita los güevos d'oru. 
 
A ver si van morrer, y queda esa senda ensín osos, ensín turistes foriatos que miren pa elles nesi reductu de semi-llibertá nel que tan metíes. Darréu que monte'l tal Furacu a les oses, ya habrá continuidá pal negociu, y llueu seré yo'l raru, al pensar qu'un animal nunca debe ser fonte de riqueza nin de turisteo. En fin, FREEDOM FOR PACA Y TOLA, agora más que nunca.

lunes, 4 de mayo de 2009

MTB: Mi nueva arma deportiva

Al fin..., ya taba yo con ganes de meteme nuna nueva estaya deportiva, como yera'l mountain bike o mtb, paezme que nómase agora más modernamente. Y ente les ganes que tenía y tamién la necesidá quiciás de poder moveme, darréu de nun tener vehículu de tracción a les 4 ruedes, pues agora tengo vehículu de tracción a dos pates y dos ruedes que facer rodar.



El subi en semi-paru por incompetencia del so dueñu

Así que, como siempre, ensín pensar les coses demasiáu, dalgo que me carauteriza fonderamente, pues merqué una bici de montaña. Camudo mi Subaru Impreza por una BH A58 K, jeje nun ye un bon cambéu, pero bono ye lo qu'hai, y hasta dientru d'un añín, va tar el probe en retiru espiritual.




Ehí toi con ella dempués d'una ruta

Asína que ya tengo nueva arma, pa pegáme unes bones sobes na bici, por Asturies, percorriendo caleyos y sendes perende. Tenía ganes de dalgo decentuco asína que ye un pelín cara, pero bono tien delles coses prestoses, frenos de discu hidráulicos, bloquéu d'amortiguador delanteru nel manillar, pedales automáticos y tolos ellementos de bona marca como ye shimano y fsa.



Más detalles y guarrería del primer contautu

Nun soi nengún especialista, poro si quies mercar dalgo decente déxate aconseyar por dalguien que sepa y t'eche un gabitu a la hora d'escoyer, sinon al final, gastes delles perres menos, pero quedes menos agustu que la ostia y arrepentíu de nun garrar dalgo meyor.

Asína que gasté perres pero dempués de probala y meteme una soba perimportante, que ya detallaré na prósima entrada, tengo que decir que toi contento de la merca que fice, y que me paez que cuando me dexe de doler, lo que vien siendo'l culu, polos 90 km de rodar, bien prontu diré a probar dalguna xubidina por pistes de tierra.