viernes, 28 de septiembre de 2018

Horcadas (Tierra La Reina) - Pico Gilbo

14 de Xunetu 2018

Track: Horcadas (Tierra La Reina) - Pico Gilbo) 



Pues sí, alcontrámonos en Horcadas, na montaña de Riaño en Llión y tamos na octava Travesera. Como ya dixe nel resume, esti añu camudamos un pocu el sen de les travesíes per Picos a facer ascensiones nel monte de Riaño y Palencia.

Magar de la tumiza de coche de Xixón, pel corredor del Nalón, Puertu Tarna y finalmente Riaño, siguiremos un pelín más cruciando'l banzáu de Riaño pa desvianos dempués hasta'l pueblu de Horcadas (1137 m) onde partirá la nuesa ascensión del día al Picu Gilbo.

El grupu entama la xornada en Horcadas (1137 m)

jueves, 27 de septiembre de 2018

Travesera Picos 2017 - 2018

14 al 17 de Xunetu 2018

Pues un añu más, tornábemos a facer la folixa final de temporada cola Travesera Picos 2017 - 2018, pero fuera de la normalidá, esti añu díbemos colar hasta la montaña Palentina, col envís quiciábes d'alcontrar unes xornaes montunes onde primasen les ascensiones y non los pateos llargos en travesía.

La Travesera Picos 2017 - 2018 fizo camudar munches coses nel GM Xuan de la Borrina, baxando'l nivel de les rutes, anque tamién aidó muncho l'iviernu tan duru que tocónos sufrir esti añu n'Asturies, quedando munches de les rutes plantegaes nel grupu pa prau, faciendo a la escontra, rutes alternatives y de menor entidá montañera.

Primer día saliendo de Horcadas en Riaño

miércoles, 19 de septiembre de 2018

Cabañes (Llébana) - Cuetu Agero

17 Xunu de 2018

Track: Cabañes (Llébana) - Cuetu Agero


Magar d'un día d'escalada en La Hermida y una prestosa nueche durmiendo en Cabañes, llevantámonos cola intención de facer un pocu de monte. Llevamos tol finde mirando pal Cuetu Agero y anque lo más atrautivu ye ascendelu escalando, vamos conocer la so redolada dando un guapu paséu montuno.

Como siempre, p'aportar al desfiladeru de la Hermida, tendremos de peganos esi viaxe pela autovía'l Cantábricu hasta Unquera, pa siguir tol desfiladeru alantre, perpasándolo de pueblu hasta arribar a Tama onde tendremos el desvíu pa dir hasta Cabañes.

Partimos del pueblu de Cabañes (540 m)

jueves, 13 de septiembre de 2018

El Coutu (Somiedu) - Mumián - Peña Gúa - Picu L'Altu - Sousas

3 Xunu de 2018

Track: El Coutu (Somiedu) - Mumián - Peña Gúa - Sousas


Seguimos con una primavera pasada per agua, na que cuesta muncho decidise a caleyar, por mor de les previsiones meteorolóxiques. Pero como siempre diximos, hai que salir al monte siempre y llueu veremos que nos alcontramos.

Esta vegada la previsión yera mui incierta y pa nós, que tábemos nel valle de Teberga, teníemos un día bien murnio, pero fue travesar l'Altu San L.lorienzu y según díbemos cayendo pa Somiedu los claros yeren más abundantes que les ñubes prietes.

Partimos del pueblín d'El Coutu ( m)

domingo, 2 de septiembre de 2018

La Uña (Valdeburón)

27 de Mayu de 2018

Si nel día anterior intentáramos trepar per Maraña un pocu, al día siguiente fuimos pela mañana hasta la escuela de la Uña, onde va más de 6 años qu'escalara ensin saber siquiera una referencia de los graos, ya que yera un secretivu.

Seutor de Uñas Negras

Daquella, dellos collacios trepáramos nes plaques d'adherencia más pegaes a la carretera y yera una pasada lluchar con estilu qu'a vegaes cuéstanos muncho, por nun tar avezaos a pisar y fiar tol pesu del cuerpu na goma los gatos.

Pepa trepando le Llamaban Candemor

Esta vegada queríamos tocar un pocu más de cantu y metímonos nel seutor Uñas Negras, que tien un grau per afayaizu con munchos sestos baxos pa pasar un día faciendo metros. Pero, les coses son como son, teniendo namás tiempu pa probar un par de V+ de 35 m, enantes de que punxérase a llover.

Entamaba a fastidiase'l día cláramente

Tal fue la cosa, que nun mos dió tiempu a desmontar la vía, esperando na furgo un ratín hasta qu'escampló y pudimos retirar el material y saler por pates ya que la siguiente ñube ya venía pa quedase dafechu y trayía agua enforma.

A ver cuando podemos tornar per ellí...

La Uña
 
Croquis modificaos por mi de la escuela d'escalada de La Uña, por mor del Local del Húmedo. Gracies y col so permisu. 


sábado, 1 de septiembre de 2018

Maraña (Valdeburón)

26 Mayu de 2018

Magar de la ruta de la mañana a la Peña Mora tornábemos hacia l'albergue de Maraña col envís de trepar esa tarde si'l tiempu nos dexaba. Llegamos a una hora prudente, pero con ñubes amenazantes, nun quisimos separanos muncho del aparcaderu de furgonetes.

Perguapes vistes dende l'aparcaderu de furgonetes

Una vegada que teníemos el papelín del pagu del aparcaderu, sacamos los trastos pa pasar la tarde entreteníos. Primeru, dimos una vueltina pente los bloques que tan al pié del area recreativa y aparcaderu, pudiendo ver dellos bloques pa guah.es y un pequeñu rocódromu con preses artificiales.


Paré cimeru de Maraña... munchu interés equí

Dende baxo, vese a les clares les posibilidaes del paré de la Hoguera y quedé cola pena de nun xubir a ver les víes, asina que tuviemos que conformanos con facer el fatu un pocu trepando bloques ensin cuerda, que nun pasaríen de 4 grau dengún.

Trepando cenciello pente los distintos bloques pa pasar el ratu

Aparte, ficimos dalguna vía curtia, casi bloque más bien diría yo, de la Peña la Hormiga, que siendo sinceros tien más bien pocu interés, a nun ser pa los neños que tean entamando, sobretou poles víes de III y IV grau, con chapes, pa que puedan prauticar cola supervisión d'un mayor dende riba la reunión.

Camudando'l Camín pente les peñes en Maraña 

Lo dicho, quedo con munchisimes ganes de facer otra visita más seria, ya qu'aparte del bon tratu cola xente del Albergue, el paré cimeru de Maraña, tien perbona pinta y un futuru tremendu como escuela de víes llargues verticales.

Maraña
 
Croquis modificaos por mi de la escuela d'escalada de Maraña, por mor  del Albergue de Maraña.
Gracies y col so permisu.