Pues un añu más, tornábemos a facer la folixa final de temporada cola Travesera Picos 2017 - 2018, pero fuera de la normalidá, esti añu díbemos colar hasta la montaña Palentina, col envís quiciábes d'alcontrar unes xornaes montunes onde primasen les ascensiones y non los pateos llargos en travesía.
La Travesera Picos 2017 - 2018 fizo camudar munches coses nel GM Xuan de la Borrina, baxando'l nivel de les rutes, anque tamién aidó muncho l'iviernu tan duru que tocónos sufrir esti añu n'Asturies, quedando munches de les rutes plantegaes nel grupu pa prau, faciendo a la escontra, rutes alternatives y de menor entidá montañera.
Primer día saliendo de Horcadas en Riaño
Con esti plan y viendo que teníemos delles rutes na fastera de la montaña Palentina y de Riaño, decidíme a camudar esi xeitu piquista de la Travesera, por una visita a dellos montes, que visto d'otra manera, ya diba siendo hora de facer.
Col madrugón de turnu, que siempre suel tocar facer pa estes hestories el primer día, salimos de Xixón, pa empobinanos hacia'l corredor del Nalón, col envís d'ascender hacia'l Puertu Tarna, parando enantes a almorzar en Rusecu.
Cenando en Triollo onde la cantidá superaba en muncho les necesidaes
Siguiremos hacia Tarna y pasaremos a descender hasta Riaño, onde alcontrarémonos toos: el grupu astur y el grupu vascu. Magar de la primer estaya de la Travesera, dafechu a la escontra qu'otros años, vamos tener un día plácidu y casi curtiu de monte, pero con una ascensión guapa enforma al Gilbo.
Con esa tranquilidá, reposaremos en Riaño con una cervecina y siguiremos camín hacia'l nuesu campu base en Triollo, magar de conocer tola ruta de los embalses, nuna llarga xornada de carretera, anque mui prestosa por mor de los paisaxes.
Puntu d'entamu pa pillar l'arista este del Espigüete
El segundu día, llevantarémonos casi fartucos tovía de la cena nel hostal de Triollo y tenemos enriba un estupendu almuerzu nel Albergue Curavacas, del que nun tenemos más que bones pallabres. Con fuercia nos tocará desplazanos hasta Cardaño, onde tendremos una xornada de montaña preciosa, faciendo'l picu Espigüete.
Esti añu, paez que diba ser too sorpreses y dempués de refrescanos nel rigu, díbemos alcontranos cola fiesta de la montaña palentina, poro pudimos parar un ratín a esfrutar del ambiente, enantes de tornar hacia Triollo, onde despediríamonos de varios collacios a los que se-yos acaba'l tiempu de Travesera nel finde.
A refrescase dempués d'un día de calor y esfuerzu
La tercer estaya diba tener como protagonista al picu Curavacas, al cual accederíamos dende Vidrieros, poro l'accesu yera bien curtiu, como curtia fue la ruta, por mor de tener la típica boina durante casi tola ruta esta estraña montaña.
Con estes condiciones, tocó retirada enantes de lo previsto y aportamos pa la hora de xintar a Vidrieros, onde aparte de dexanos comer na terraza la nuesa comida, aportaron con melón con xamón y un serviciu agradable a toles nueses peticiones en forma de ronda.
Cumal del Curavacas
Con tiempu de sobra, el grupu astur restante, decidimos facer una visita al "cercanu pueblu" de Cervera de Pisuerga, onde pudimos facer varies compres pa rematar una xornada gloriosa, más folixera que montañera, con una parrillada.
Ye lo que tien tener la suerte de tomar de campu base al Albergue Curavacas los cuales, nun punxeron nin un impedimentu en qu'aparte de llená-yos casi l'albergue colos abellugaos, los furgoneteros pudiéramos usar tamién les instalaciones como cualesquier usuariu más.
Parrillada nel Albergue Curavacas en Triollo
A esto, que ya ye muncho esa duchina de cada día, sumámos-y l'usu de la parrilla del patiu traseru y finalizamos a falta d'un día una Travesera distinta pero pa quedar n'alcordanza pa siempres. Nun hai que dicir que'l grupu vascu quedó encantáu con esta idega y Fernan, que se me ta ablandando, decía sin parar, qu'esto si que yera una Travesera. Manda güevos coles fartures, pero de monte, que nos metímos nes traveseres, jeje.
Con esti tastu perbono de la parrillada que nos dexara la nueche anterior, na última estaya, magar d'almorzar y despedinos de los responsables del Albergue Curavacas, tendríemos una tirada llarga de coche hasta Boca de Güerganu, pa llueu siguir hasta Llánaves de la Reina, onde tendríemos el nuesu puntu de partida hacia l'ascensión a la Peña Prieta.
Salimos dende Llánaves hacia Peña Prieta
La ruta, si ya camudara'l paisaxe col Curavacas, fue total esta vegada en cuanto a paisaxe, como si pasásemos de Picos d'Europa al Cordal Cantábricu, pasando de la caliza a la cuarcita y sobretou de les xabaces pedreres nes canales a los amplios y verdes valles como si de Somiedu tratárase.
Con una bona calcetinada final, tornaríemos de nuevu a Llánaves onde diba tocar despedinos hasta la próxima Travesera, quedándome col bon tastu de que tolos participantes acabáronla hasta onde teníen camentáu, pero col amargor de nun saber si ye lo que realmente quiero pa estes xornaes... habrá que dir dándo-y vueltes durante l'añu.
Asina acábase una travesera del GM Xuan de la Borrina
Namái, quiero dar les gracies a tolos participantes tanto del grupu astur (Benjamín, Alberto, Montse, Andrea, Pepa, Jose, Ana y Haritz) como del vascu (Tito, Eneritz, Iñaki, Ainara, Jose y Fernan) pola implicación y dar amuesa de disfrute durante toles rutes propuestes.
Como siempre, vamos dexar unos datos a mou resumen y les correspondientes entraes del blog:
Estaya 1:
Horcadas (Montaña de Riaño) - Pico Gilbo
Duración: 4 h y 35 min
Llonxitú: 6, 95 km
Ascensu: 582 m
Descensu: 582 m
Estaya 2:
Cardaño (Montaña Palentina) - Pico Espigüete
Duración: 6 h y 40 min
Llonxitú: 8,8 km
Ascensu: 1140 m
Descensu: 1140 m
Estaya 3:
Vidrieros (Montaña Palentina) - Pico Curavacas
Duración: 5 h 25 min
Llonxitú: 9.95 km
Ascensu: 1185 m
Descensu: 1185 m
Estaya 4:
Llánaves (Montaña Oriental) - Peña Prieta
Duración: 8 hores
Llonxitú: 20 km
Ascensu: 1415 m
Descensu: 1415 m
No hay comentarios:
Publicar un comentario