miércoles, 19 de septiembre de 2018

Cabañes (Llébana) - Cuetu Agero

17 Xunu de 2018

Track: Cabañes (Llébana) - Cuetu Agero


Magar d'un día d'escalada en La Hermida y una prestosa nueche durmiendo en Cabañes, llevantámonos cola intención de facer un pocu de monte. Llevamos tol finde mirando pal Cuetu Agero y anque lo más atrautivu ye ascendelu escalando, vamos conocer la so redolada dando un guapu paséu montuno.

Como siempre, p'aportar al desfiladeru de la Hermida, tendremos de peganos esi viaxe pela autovía'l Cantábricu hasta Unquera, pa siguir tol desfiladeru alantre, perpasándolo de pueblu hasta arribar a Tama onde tendremos el desvíu pa dir hasta Cabañes.

Partimos del pueblu de Cabañes (540 m)


Aparte, d'una escuelina d'escalada, la cual tenemos que trabayar muncho más, ya que tan sólo fuimos a conocela y facer unes cuantes vies facilines pa pasar la tarde anterior, tamién un tenemos un albergue onde una vegada que nos xuntamos tolos participantes, facemos un segundu almuerzu.

Damos un agradable paséu per pista con vistes al Agero hasta Allende

Dende l'albergue, saldremos per una pista que tien de llevanos hacia'l pueblu d'Allende, onde casi tol mundiu fai les ascensiones tanto esguilando como caleyando al Cuetu Agero. Dende primer momentu, el sol aprieta, menos que la pista nes sos envueltes déxanos garrar solombres de xemes en cuando.

Dende Allende, tan sólo tenemos que siguir per pista cola vista puesta nel Cuetu Agero, ya qu'empobinarémonos hacia él, pela clara canal que tien a la so manzorga, la cual garraremos penriba d'un mayaín con cabaña espeutacular.

Garramos la prestosa canal d'ascensu al Cuetu Agero

L'ascensu, aparte de cómodu, ye preciosu con senderu bien claru y unes vistes perguapes so los pueblos de la Hermida. Caún, vamos al nuesu ritmu y les paraes son les xustes p'abellugase del sol, que lleva apretando tol finde con fuercia.

Pali pali, aportaremos toos a la boquera de la canal y ellí despedímonos d'Imanol, collaciu vascu d'Haritz, que viniera a revisar una ruta pal so grupu Pagoeta y tien priesa pa tornar pa Euzkadi. Los demás, menos Benjamín que nun va mui finu, metémonos nel ascensu del Cuetu Agero, el cúal ye un amiestu de yerba llargo y calizu que nun fai mui agradable l'averamientu hasta'l cumal de 1024 m.

Facemos la xubida al abegosu Cuetu Agero (1024 m)

Col xeitu d'abandonar cuanto enantes el Cuetu Agero, descendemos lo más aina posible hasta la boquera de la canal onde dexáremos les mochiles y siguiremos camín hacia La Vega, onde al refuxu d'una cabaña taba esperándonos Benjamín.

Pembaxo de los mil metros de nuevu, tendremos una guapa tirada hasta'l nuesu siguiente oxetivu, abriéndose les vistes nel nuesu caminar hacia'l restu de montes de la redolada cántabra. La verdá ye que'l día ta preciosu p'andar pel monte y vamos esfrutando de cada pasu.

Travesamos mayaos nun día perguapu empobinándonos al Cuetu La Pelea

Siguiremos pelo más cenciello, esfrutando de dalgunos pasos per plaques d'adherencia caliza, que faen que Kíla y Noah, faigan les delicies del respetable colos sos pies de perru. Con pocu más, aportaremos a l'arista que nos tien de llevar, a la cota más alta d'esti macizu d'Agero: el picu La Pelea de 1380 m.

Personalmente, préstame pola vida aportar a esti cumal, donde tenemos vistes del pueblu de Bejes, onde aparte d'escalar, ficiéramos va tiempu una ruta que diba llevanos a conocer el Samelar dende una fastera muncho más desconocida pa los asturianos.

Cume nel Cuetu La Pelea (1380 m)

Los más de 400 m de desnivel direutu hasta'l Cuetu La Pelea, xunto al calor, fizo que tomáramos con calma la xinta, pudiendo reposar con calma la xente más cansao. Magar del descansu, baxaremos pela mesma arista pa travesar una vegona, empobinándonos hacia una llaguna, la de H.ontaniella.

Pocu más que dicir, que tamos en tarrén de fala asturiana, siendo claramente un topónimu deriváu de fonte. Nós, nun tuviemos que beber d'esa llaguna, pero a les perrines vínos-yos de luxu, ya que diben pasando calor tol día y esi refrescón fue más que necesariu.

N'otra tirada averámonos hasta'l Cuetu H.ontaniella (1342 m)

De la llaguna, al Cuetu H.ontaniella, tendremos una pequeña arista que va dexanos nel cumal de 1342 m, tamién nomáu como Picu Agero. A esta cume, ya xubimos menos xente, poro fue sacar una semeya y salir p'abaxo como tiros a la gueta del restu del grupu.

De primeres, descendimos per una panda pindia, hasta dir en direición suroeste col envís d'alcontranos con una vallina y cola xente que faltaba y qu'acertaron a garrar tamién esta mesma vallina, la cual tendría de depositanos pelín pembaxo del colláu de la Pelea.

Descensu hacia Prada y cómoda pista de tramu final hasta Cabañes

Garraremos la pista en Prada, llueu de sentanos un ratín a reposar de la baxada nel prau y siguiremos pista abaxo toos xuntos, pasando pembaxo de les peñes del Cochizo y Ciruenzo, que tienen nes sos parés gran parte de los seutores de la escuelada d'escalada de Cabañes.

Ensin más hestoria, aportaremos a Cabañes, dempués 6 hores y 45 minutinos de ruta, con un percorríu de 12,2 km y superando un desnivel positivu de 1270 m, que diónos perbien pa conocer esta fastera llende del macizu oriental de los Picos d'Europa.

Camudando'l Camín na llende del macizu oriental

No hay comentarios:

Publicar un comentario