martes, 28 de junio de 2022

Puent de Coronas (Ribagorza) - Tuca Culebres - Tuca Vallhibierna - Ibones de Vallhibierna

12 de Xunu de 2022

Track: Puent de Coronas (Ribagorza) - Tuca Culebres - Tuca Vallhibierna - Ibones de Vallhibierna

Dempués del primer día de calecer patuques pela redolada de la estación de Sarllé/Cerler, continuamos nel viaxe pel Pirinéu, teniendo nel puntu mira pal segundu día, l'ascensión a la Tuca Vallhibierna. L'añu anterior, por mor de la meteo, quedáranos pendiente d'intentar y esta temporada díbemos bien motivaos, a completar lo qu'a posteriori, pa mín, fuera la ruta más guapa de tol viaxe.

Entamábemos almorzando nel camping Aneto, pa llueu xubir en furgo hasta'l Puent de Coronas, que seya dicho, ye una aventura en sí xubir per esta pista hasta'l refuxu de pescadores qu'alcuéntrase en Coronas y ye que la pista, ta nun estáu decente, pero mirar pal escobiu de la que conducimos pon la piel de pita.

Partimos de la Puent de Coronas (1957 m)

Llegamos sanos y salvos hasta la Puent de Coronas, alloriando cola cantidá de coches qu'alcontramos un domingu, asina que dexamos la furgo en plena pista ensin que moleste y salimos a patiar... tarde, suponemos al ver la cantidá de coches y ye que la xente nel Pirinéu madruga enforma, supongo que poles posibilidaes de tormentes de tarde.

jueves, 23 de junio de 2022

L'Ampriu (Ribagorza) - Tuca Gallinero - Tuca d'es Cebollers - Ibón de Basibé

11 de Xunu de 2022

Track: L'Ampriu (Ribagorza) - Tuca Gallinero - Tuca d'es Cebollers - Ibón de Basibé

Como ya comentáremos na entrada resume del viaxe al Pirinéu 2021 - 2022, aportábemos al Ball de Benás en Ribagorza, con toles estayes montañeres bien afitaes, siendo'l primer día, el d'aclimatación a l'altor y de paso, echar una güeyada dende lo alto a los oxetivos cimeros d'esti valle, que nun yeren otros que'l Ballibierna y Aneto.

Alborecemos en Benás, magar de descansar bastante bien hasta que l'speaker del trail, tien a bien, llevantános a les 7 y media la mañana. Nun tenemos priesa esti día, asina que vemos la salida de la maratón y vamos almorzar con calma en dalgún hotel de la cai principal.

Entamos nel aparcaderu de L'Ampriu na estación de Sarllé/Cerler (1909 m)

Ente nervios de corredores, danos tiempu a ver la salida de la carrera intermedia de 28 km y decidimos que va siendo hora de ponenos en marcha, así que garramos agua, la furgo y tiramos hacia'l pueblu Sarllé, onde ta la perconocida estación d'esquí de Cerler (Sarllé n'aragonés), pa siguir carretera alantre hasta la parte alta de la estación, conocida como L'Ampríu.

martes, 21 de junio de 2022

Pirinéu 2021 - 2022

 Del 11 al 16 de Xunu de 2022

Dempués del bon viaxe pel Pirinéu del añu pasáu, nel que tornaríemos munchos años dempués, per esti increyible y enorme macizu, una vegada más preparamos con toles ganes les rutes al detalle, con distintos planes según la meteo, les nueses fuercies o les condiciones del monte.

Integrantes del GM Xuan de la Borrina nesti viaxe 2021 - 2022
  
La idega yera aterrizar el vienres 10 de Xunu nel Ball de Benás, onde dexáremos pendiente un par de 3miles cimeros por facer. Nesti añu que pasara, tamién tuvi tiempu de restolar y organizar munchos montes menores d'esa cota tan pirenáica, pero que tuvieran importancia y dominaran la so fastera, facilitándonos una meyor conocencia del Pirinéu.
 
 
El macizu de la Maladeta-Aneto... tarrén de xuegu en dellos díes

Como siempre, con gran ilusión fuimos completando proyeutos y ascensiones, hasta que la meteo entamó a mandar, amestándose a los mítiques tormentes vespertines una fola de calor, que llendaba lo inaguantable cola práutica del deporte y más cola esposición n'altor al sol.

Les tormentes y el calor infame foron los verdaderos protagonistes
 
Los primeros díes nel Ball de Benás, fueran pesie a dellos malos momentos d'insolación nel tercer día pela mió parte, d'un completu ésitu, pudiendo algamar tolos oxetivos y rutes que teníemos na tiesta, pero ya nel últimu día en Benás, ya tábemos dándo-y vueltes a camudar los planes de cara al valle d'Ordesa.

 
 
 
 

Macizu de Pocetz dende'l macizu de Maladeta

La verdá ye que colamos del Ball de Benás, per un llau contentos poles rutes y por como pudimos xestionar almuerzos, cenes y sobretou, les disfrutones duches nel camping Aneto, pero díbemos pal Ball d'Ordesa ensin tener nada claro, como podríemos sobrevivir a les temperatures y sí podríemos siquiera salir a caleyar.

Cena de despedida del Ball de Benás

Parque Natural de Ordesa-Mont Perdito:

Primer día: Vall d'Ordesa (Sobrarbe) - Senda Los Cazadores - Faixa Pelay - Cul de Soaso
 
El día de transición de parque natural a otru,m ya nos supuso más kilómetros de los deseyaos, ya que l'escobiu del rigu Ésera ta zarráu por obres per semana, asina que tuvimos que tomar la carretera qu'avérase hacia Lleida, dando más vuelta hasta tornar a Campo y d'ehí siguir ya hacia Boltaña, onde tomamos una caña a más de 40 graos.

Torla como siempre ufreciendo les vistes más mítiques d'Ordesa

Si ya teníemos claro, que la idega d'ascender el Comachibosa (Viñamala) yera imposible, la tarde que pasamos per Torla, baxo temperatures insufribles, nos dexaba a les clares, que cualesquier actividá tenía que ser madrugando enforma y arribando al punto final, al mediudía, ensín dubia.

Vistes al Ball d'Ordesa col so míticu circu de Soaso y el Mont Perdito
 
Con un día de preba ya tuvimos abondo, ya que la única opción yera pagar el camping pa pasar la tarde a remoyo na piscina, ya que si nun yeres cliente, nun daben alternativa d'entrada. D'esti xeitu, les duches diben ser lo mesmu, asina que tocaba o camping o río más terraza y birres, dos opciones que suponíen munches perres, cuando realmente lo que queremos ye tar nel monte.
 
Poro, decidimos dempués d'un guapu paséu dende la Pradera d'Ordesa, colar del Pirinéu p'Asturies de vuelta, anque tuviésemos que tragar altes temperatures, díbemos facelo en casina y non penando colos calores, ensin descansar en condiciones na furgo.

viernes, 10 de junio de 2022

Buelna (Llanes) - Costa de Ribedeva - Picu Cañón - Bustiu (Ribedeva)

6 de Xunu de 2022

Track: Buelna (Llanes) - Costa de Ribedeva - Picu Cañón - Bustiu (Ribedeva)

 

Cuantayá que nun mos animávemos a facer una costera nel GM Xuan de la Borrina y aprovechando la meteo, ye dicir mal tiempu y tormentes pa toa Asturies, ocurrióseme tirar hasta l'oriente pa facer tola costa del conceyu de Ribedeva, pero como yera un pelín curtia, tomamos la idega del percorríu de los collacios de Los de las Claras y partimos dende'l guapu pueblu de Buelna en Llanes.

La verdá ye que si quies caleyar pela costa n'Asturies y en particular nel oriente astur, val más que nun seya nos meses de branu más avanzaos, ya que de xuru que ties qu'apavoriar a guiyadazos a tola foriatada braniega, asína que día nublo y finales de primavera o entamu de branu y a esfrutar del camín.
Partimos del pueblu llaniscu de Buelna (50 m)

Caleyeramos un pelín pente les guapes cases de Buelna y bien ceo salimos hacia la costa siguiendo una pista que llévanos a la sablera de Buelna, onde ya garramos senderu costeru, esfrutando de la maraviyosa costa caliza llanisca.
 
Cola temperatura perfeuta pa patiar, aportamos lo más pegaos a la costa posible, hasta la increyible formación de Cobih.eru, onde nun paramos demasiáu, asina que tengo pendiente volver a descubrir la cueva y mui posíblemente a facer la Travesía Los Percebes

martes, 7 de junio de 2022

Alevia (Valle Bah.u de Peñamellera)

5 de Xunu de 2022

Finde tranquilu pel Oriente nel que tuviéramos de llargu patéu costeru, que cuntaremos en breve y llueu de cenar y sobar perbien en Pimiangu, al día siguiente averámonos hasta Potes p'almorzar con calma y siguir camín primeru hasta Panes, pa facer tres kilómetros más hasta'l guapu pueblu d'Alevia. 

Aparcaremos al llau de la torre la ilesia, onde alcontramos un interesante aparcader al llau d'un area recreativa, onde podemos tar sobando ensin molestar a la xente. Otra cosa ye, que pague la pena, pasiar peles cais del pueblu, ya que les casones asturianes, la plaza con bolera y tol conxuntu fai del llugar un sitiu a conocer... la pena que nun tenga chigrín pa tar por allí tranquilamente.

Perguapu pueblín y vistes n'Alevia

Colos croquis que pasáranos dellos collacios, vamos cola intención de pasar un día tranqui d'esguilada, ensin apretar como xabalíes. Atopamos a una pareyina más nel aparcaderu y vamos compartir camín, sirviéndonos de guía ya qu'ellos ya tuviera otra vegada per Alevia.
 
Yo lo más cerquina que tuviera fuera na travesía oriental pel Cuera pero nun lo viera más que dende riba, tamién destaca la so torre de la ilesia penriba del seutor Catiusca en Sieh,u, pero entá nun lo conocía, asina que pasiaremos peles sos cais y saldremos na parte alta a la mandrecha pa salir per camín empedráu primeru y senderu dempués, siguiendo los fitos esistentes y viendo les plaques al fondu, más menos nun hai muncha perda.

Averamientu llarguín pero más menos llanu hasta les plaques d'Alevia

Aportaremos al pie de vía, alcontrándonos con xente astur conocío (Diego, Vero, Javi, Mari Luz) que taben plaqueando tranquilamente, enantes de dir a catar dalguna vía más dura notru seutor que tovía equipándose. Nós, a lo nueso, plaquear un ratin hasta que los deos de los pies nun puedan más, dempués de la ruta del día anterior.
 
Fadremos un par de 6as mui buenos nel planchón de la mandrecha, tastiando una caliza brutal de perbona calidá con dalgún carboncillo. La verdá que les dos vies son mui buenes y como nun tamos pa soportar los pies muncho más, buscamos dalgo más duro, ye dicir la vía más dura del seutor, un 6c+ con placa d'entamu y una parte más vertical pa salir a cadena.

Pié de vía dependiendo de la vía más o menos cómodu y calidá de caliza

Güei tocába-y a Anna dir montando, asína que dempués de facer sin problemes les dos anteriores, ya-y tocó bregar bien nesta vía, teniendo que descubrir preses y movimientos, ya que les víes tan cero esguilaes entá.

Al fín, al segundu pegue nun la pudo facer pesie a apretar enforma y pela mió parte, al primeru nun salió, ya que tien movimientos durinos y al segundu, sí la conseguí facer, ya que cambia sabiendo a lo que vas, aún así la vía nun ye que seya cenciella nin muncho menos... ye perreta cuanto menos.

En resume, quedamos con ganes de siguir probando... pero será pa otru día colos pies menos sensibles...