Buelna (Llanes) - Costa de Ribedeva - Picu Cañón - Bustiu (Ribedeva)

6 de Xunu de 2022

Track: Buelna (Llanes) - Costa de Ribedeva - Picu Cañón - Bustiu (Ribedeva)

 

Cuantayá que nun mos animávemos a facer una costera nel GM Xuan de la Borrina y aprovechando la meteo, ye dicir mal tiempu y tormentes pa toa Asturies, ocurrióseme tirar hasta l'oriente pa facer tola costa del conceyu de Ribedeva, pero como yera un pelín curtia, tomamos la idega del percorríu de los collacios de Los de las Claras y partimos dende'l guapu pueblu de Buelna en Llanes.

La verdá ye que si quies caleyar pela costa n'Asturies y en particular nel oriente astur, val más que nun seya nos meses de branu más avanzaos, ya que de xuru que ties qu'apavoriar a guiyadazos a tola foriatada braniega, asína que día nublo y finales de primavera o entamu de branu y a esfrutar del camín.

Partimos del pueblu llaniscu de Buelna (50 m)

Caleyeramos un pelín pente les guapes cases de Buelna y bien ceo salimos hacia la costa siguiendo una pista que llévanos a la sablera de Buelna, onde ya garramos senderu costeru, esfrutando de la maraviyosa costa caliza llanisca.

 

Cola temperatura perfeuta pa patiar, aportamos lo más pegaos a la costa posible, hasta la increyible formación de Cobih.eru, onde nun paramos demasiáu, asina que tengo pendiente volver a descubrir la cueva y mui posíblemente a facer la Travesía Los Percebes. 

Aportamos a la costa llanisca col espeutáculu de la sablera de Cobih.eru

Llueu de les milenta semeyes nel llugar, siguiremos avanzando, siempre apostando por dir lo más pegaínos a la costa, hasta qu'aportamos a otru interesante llugar, como son les planches calices del Paredón, unos tumbaos non mui cenciellos de ver nunos cantiles tan xabaces como los de Llanes.

Continuamos costa alantre hasta l'ablucante Paredón... un cantil tumbáu preciosu

Continuaremos camín, cruzándonos con dalgunos montañeros más que tuvieron la mesma idega, pa llibrar les tormentes y col mesmu envís de parar al vermú que nosotros jeje, siguimos avanzando hacia'l conceyu de Ribedeva, teniendo qu'abandonar la costa hacia la vaquería de Santiuste, anque dubio si podríase bordiar el cerru Cobariu pela manzorga y baxar a la sablera l'Acacia pa enllazar pela costa hasta la Franca.

Tenemos que dir saliéndonos de la costa per Santiuste pa siguir a la sablera La Franca

Sacante d'esti tramu a investigar, nós, salimos hacia la vaquería Santiuste, pudiendo siguir per praos hasta l'area recreativa previa a la Franca, pero nun mos dimos cuenta y salimos a la carretera pa caleyar pel marxe hasta cruciar pa baxar hasta la Franca, onde decidimos parar a tomar una cañina.

Caleyamos pela costa en baxamar hasta la ensenada de Mendía

Llueu del refrixeriu, va tocar descalzase, faciendo quiciás la parte más prestosa de tola ruta, onde vamos tastiar l'agua frío la mar caleyando penriba la sablera, cruciando pontes de roca col sentir de les foles nes pates y esfrutando como neños, nel nuesu camín, peles pedreres y sableres de L'Osu y Viveros hacia la sablera de Mendía.

Tramu superdivertíu con pasos per arcos naturales y trepes y destrepes peles sableres de L'Osu y los Viveros

Pa cuando arribamos a la increyible sablera y solitaria sablera de Mendía, les tormentes amenazantes, descarguen agua, xusto cuando tábemos pa cruciar a la cabera parte de la sablera, la de Regorgueru y sabiendo de lo pindia y herbosa xubida a la rasa, decidimos dar la vuelta y tomar el senderu más cenciellu a la entrada la sablera.

Abandonamos Mendía y Regorgueru por mor de la lluvia saliendo hacia la rasa de Pimiangu

Según vamos ascendiendo la ñube dexa de moyanos y tendremos les vistes más guapes del día, hasta a los praos de San Sebastián, onde enllazamos cola pista que percorre tola rasa costera, continuando camín tranquilu hacia Pimiangu, onde decidimos parar a picar dalgo y tomar otra cervecina.

Travesamos Pimiangu pa tornar a la costa conociendo'l guapu requexu de Tronía

Col banduyu enllenu, averámonos de nuevu hasta la costa, pa visitar el mirador del Picu, pasando pembaxo d'esti pa tomar un senderu que báxanos hacia'l bufón de la Tronía, quedando los collacios na vaquería, demientres interésome por ver más cerca un ablucante arcu, na pequeña playina de Tronía.

Siguiremos visitando la Cueva'l Pindal, Santu Medé y el monasteriu de Tina Menor

Dende la vaquería de Tronía, siguiremos camín pa empatar cola carretera que llévanos hasta la Cueva'l Pindal y ermita de Santu Medé, onde daremos delles vueltes, pa continuar per bon camín hacia l'últimu fitu arquteutónicu interesante, como ye'l monasteriu de Tina Menor.

Tornamos a xubir a la rasa Pimiangu p'ascender al techu'l conceyu, el Picu Cañón

Con tolos puntos de la ruta casi completaos, toca pegar otra xubida hacia la Ería Nueva de Pimiangu, onde entamaremos la "gran ascensión" al Picu Cañón, monte más importante y techu del conceyu de Ribedeva colos sos 207 m.

 

 Dicir qu'hai cotes más altes que peguen escontra Cuera, pero nun llevanten res, poro pa min esti ye'l verdaderu techu de Ribedeva, el cual cotaremos en tres partes, una nel vértice xeodésicu a 201 m d'altor, otra al final del cordalín a 207 m d'altor y por últimu nel mirador de la ría de Tina Menor a 204 m.

Visitamos el mirador de Cañón y descenderemos per Trescañón hacia Bustiu

Dende equí y por suerte, envede tener que dar la vuelta casi hasta la Ería de Pimiangu, vamos alcontrar delles pistes madereres qu'en varies envueltes per Trescañón van dir averándonos hacia les cases de la Texera pa siguir en descensu cómodu hasta Bustiu onde dábemos por finalizada la ruta.

 

En resume, ruta completina de 8 hores con sableres prestoses, arte asturianu arquiteutónicu, una costa oriental astur inigualable y tantes posibilidaes d'arrimase a playes y cantiles d'ensueñu qu'hai que centrar la cabeza y caleyar avanzando pa completar los 14 km de ruta con 525 m positivos y 570 m negativos-

Camudando'l Camín nel verde costeru astur