lunes, 29 de noviembre de 2010

Rocódromu d'Otero (Uviéu)

Dempués de tres temporaes esguilando poquín a pocu siguimos avanzando, y paez qu'esti añu podría ser el más afayaizu pa pegar un bon saltu de calidá nesti deporte, y ye que dexar el fútbol foi una gran decisión, ya qu'a estos altores de temporada (dos mesinos d'entrenu en búlder), solía tener lesión ya na pata, y la consecuente parada obligatoria pa recuperar, perdiendo tolo ganáu. 
 
 Si a eso sumamos-y, qu'esti añu en branu tampoco paré d'esguilar, dempués d'un cursu en roca, onde conocí a una compañera cola que dir a escalar, pues perfeutu. Ya qu'aparte de siguir yendo a Quirós a facer víes, cuando finó'l bon tiempu pa dir, entamamos a entrenar tanto en Llugones al búlder como pol finde al Rocódromu d'Oteru n'Uviéu. 
 
Rocódromu d'Otero (Uviéu)

Asína pues, ante la torga de dir al Rocódromu de la Calzada en Xixón, poles obres, tamos yendo a esguilar n'altor a esti rocódromu d'Uviéu, que pertenez a una empresa privada (anque'l preciu ye mui asequible) y que pa nun perder el vezu de chapar y trabayar un pelín, colos ellementos d'esguile n'altor paga la pena.

 
Silvia dándo-y duru y yo chapando nuna reunión
 

Nun hai información de les sos dimensiones (na rede), pero calculando qu'ocupa l'anchu d'una pista fútbol sala, tendrá unos 20 ms de llargu y el so altor rondará los 10 ms. Eso sí, ta dixebráu en tres zones más o menos, la primera ensín desplome con 3 víes, una desplomada con 3 víes tamién y la última de tres víes tamién con un techín pel mediu. 

Aparte hai dalguna vía más, nos llaterales entre zona y zona, y una vía ensín desplome qu'asemeya a una paré de roca, con grietes. Pa entrenar nun ta mal, pero dicir como nota mui negativa, que si tan xugando a la mesma vegada dalgún partíu pues llevate un balonazu y nun vuelín pue ser peligrosa la portería, ya que ta na vertical de caída del desplome.

miércoles, 24 de noviembre de 2010

L'Alisu (Cangues d'Onís) - Monte Faes

21 de Payares de 2010

Track: L'Alisu (Cangues d'Onís) - Monte Faes



Domingu pela mañana, llevántome ensín madrugar demasiáu, ya que quedé con Fernan, pa facer dalgo de monte, sele, anque lleváse tola selmana dando un tiempu horrible de lluvia aseguráu al 100%. Y ye que, nun hai que da-y más vueltes, cuando me dicen de salir de monte, dame lo mesmu que faiga sol, lluvia o ñeve, así que cola escusa de devolveme'l piolé y los crampones que me dexara na so furgo, quedamos a les 9 en Lloviu (Ribeseya).

Dicir que'l día anterior nun tuviera na mal, esguilando tola mañana nel roco, y asistiendo a la Axuntaza d'Espeleologos asturianos, nel chigre'l Sabil, en Villanueva (Santu Adrianu). Ellí pude esfrutar de les charres sobre'l Pozo Azul en Burgos (que mal rollu da la buceoespeleloxía), 8 años d'espeleo na fastera norte d'Ubina (quiciás la que más me prestó) y l'ansiáu empate de la Cueva l'Agua de Culiembru col Pozu'l H.itu nel Cornión. Ehí va un enllaz sol tema: Espeleoastur

Como siempre, pa llegar a Lloviu, garré l'autovía del Cantábricu en direición Santander, y ente xarazaes, orbayu y tou tipu de lluvia aporte al desvíu hacia Les Arriondes - Cangues, onde esperé na retonda a qu'arribasen los mios collacios vascos.


Puntu de partida: L'Alisu en Les Roces

Dicir que teníemos preparaes delles rutes facilines pa pasar la mañana, cola total posibilidá de moyáse, así que dexayunamos nun hotel-cafetería-... (puti de xuru pela nueche) de La Vuelta la Ribera, y charramos ensín priesa, Ibán (que nun viera dende Pireneus), Fernan y yo, so la posibilidá meyor pal día, decidiendo que xubir a la Peruyalina, diba tar bien.

Asína que, dexamos el mio coche nel parking, y montamos los trastos na furgo, pa empobinanos al pueblu d'Omedina, namáis pasar Santianes, onde travesaríemos el ríu Seya, el cual taba con una crecida que metía mieu, y namái posar la vista na ponte colgante, pola que teníemos que pasar vemos que ye imposible al tar estrozáu dafechu. La nuesa intención yera crucialo pa entamar la ruta dende'l pueblu de Cueves, pero quedó a les clares que nun yera posible.

La siguiente oción, y más averada a la nuesa posición yera siguir hacia Cangues d'Onís, pasando polos pueblos de Fríes y ya en Cangues, por Llordón y El Llanu de Margolles, pa dempués de Triongu llegar a la retonda, onde siguiremos hacia Cangues d'Onís capital, hasta parar antes del pueblu de Les Roces, más en concretu en L'Alisu, onde alcuéntrase la Renault.


Xubiendo peles pistes hacia la collada Ordial

D'equí (55 ms), garraremos una amplia pista que poquín a pocu baxo la lluvia aportarános a la collada Ordial (300 ms). La pista, anque se bifurque varies vegaes, va dexanos na mesma collada siempre, en la cual tiraremos hacia la manzorga, pa dir averándonos a la cresta'l monte.


Garrando l'arista del monte

Esti camín llevaranos, bordiando la parte cimera'l monte, hasta una curva, onde veremos qu'entama a baxar. Nesi puntu, encaramámonos penriba una muria piedra, y garramos un senderín, qu'a les clares va llevanos penriba'l monte tol tiempu, faciendo la nuesa primer parada nun primer cumal de 421 ms, al que-y puse cima Ordial, por da-y un nome.


Pasando de la primera cima d'Ordial hacia la Cenca

Bien cerquino, avistamos el cumal central del monte Faes, y pa llegar a ellí, tenemos que travesar unos cuantos metros de cotollal pelín repuntantes, sobretou si vas con paragües, chubasqueru, mochila con chubasqueru, y la de su madre...


Nel Cantu la Cenca y nel vértice xeodésicu del monte Faes

Pero qu'a la fin, pónente nel puntu más altu del monte, el Cantu la Cenca de 421 ms, el cual dexarános pasu, un pelín más abaxu al vértice xeodésicu, que-y daba dalgo d'interés a esti monte, que como dicíame un collaciu de Cangues: a eso nomámos-y Cueste, nun ye nin monte.

Pues eso, tamos nel vértice de la cueste, a 405 ms. Que por qué ta'l vértice na parte más baxa del monte, nin idega. Yo dedícome a xubilos, jeje non a poner trastos enriba d'él. En fin, como yera cuando más taba lloviendo, sacamos delles semeyes, y nos baxamos d'ellí lo más ceo posible.


Baxando del Monte Faes

La baxada ficímosla hacia l'otru llau del monte, contando con que garraríamos una pista que bordiara completamente'l monte pela falda y nos dexase nel nuesu puntu de partida, pero nun foi así, ya que nengún camin cruciaba la riega L'Argumal, asína qu'en varios ciszas, el camín depositónos na carretera N-634 pelín enantes del barriu de Samiguel del pueblu de Coviella.


Pasiando por Coviella

Poro, caleyaremos un ratín pel arcén esquierdo, hasta topanos col desvíu a Coviella, el cual tomaremos, pa pasiar seliquino (a estes altures moyanos dábenos lo mesmu, una vegada que tas pingando) polos distintos barrios (Los Centenales, La Podada, El Palaciu, El Cuetu), hasta dar a la carretera otra vegada la cual cruciamos, y garramos la senda que lleva a Cuadonga, hasta tornar a L'Alisu.

En resumen, nun día que pocu más podía facese, caleyamos casi dos hores y media, faciendo 9,6 kms y 612 ms de desnivel acumuláu, pa lo más importante tachar l'últimu vértice xeodésicu que me quedaba en Cangues d'Onís. Esto últimu ye mentira, lo únicu y más importante, yera darse un motivu pa tomar unes cañes dempués nel Chigre'l Corquieu de Ribeseya, con unos bonos collacios, y quedar en que la prósima será n'Euskadi. Así que... ta la prósima.


Camudando'l Camín dende'l Monte Faes


Nesta ruta ficimos un vértice xeodésicu de Cangues d'Onís: Monte Faes (405 ms)
Ver progresos en: Retos montañeros

lunes, 22 de noviembre de 2010

Llagu La Ercina (Cangues d'Onís) - Picu Llombreras (1er Torre los Cabrones)

7 de Payares de 2010

Track: Llagu La Ercina (Cangues d'Onís) - Picu Llombreras



Hai díes que nun se sabe mui bien como entamar a desplicar una ruta. Simplemente hai vegaes que l'ánimu y les ganes, superan a la cabeza y esto pue tornase peligrosu. La ruta anterior, foi un intentu de facer la Punta Gregoriana, pero dellos pilancos ficieron que quedase nuna ruta alternativa, qu'a la fín, resultó muncho más que satisfactoria.

Una selmana dempués, tábemos con más ganes inda, y camiento qu'un mayor deséu de facer bona montaña, llevónos a meténos en picos, con un temporal asomando'l focicu. Teníemos un ventanucu de tiempu hasta la tarde-nueche, ya intentamos aprovechalu yendo per segunda vegada a la Punta Gregoriana.


Partimos del Campu La Tiese

Como siempre, partimos del aparcaderu del Campu la Tiese, na vega'l Llagu La Ercina de Cangues d'Onís. Pa ello como siempre tenemos el viaxe dende Xixón a Cangues d'Onís, onde desayunamos, y llueu de pasar por Cuadonga xubimos hasta los míticos Llagos.

La primer impresión que tenemos al salir de la furgo, ye de fríu y vientu, poro mudámonos lo más rápidu posible, y ponémonos a caleyar poco dempués de les 9 la mañana. Aún así, el sol rellumaba pente les ñubes y dábanos cierta esperanza, contando con que pola mañana daba pior que pola tarde, hasta que llegáse'l frente gordu pela nueche.


Nel llagu La Ercina (1136 ms)

Sorprendía, ver tantísima augua, ye más dempués d'arrodiar el llagu pela so mandrecha, los nuesos pasos diben dar xubida, pela riega de la vega'l Texu, .... riega que camiento nun ver con augua, y menos con tantísima augua na mio vida.


Xubiendo la Riega la Vega'l Texu

Magar d'esti guapu pasu, tocanos travesar esta vega, estrada d'agua y facer una pequeña ascensión pola Canaleta hasta aportar a otra vegona ablucante, la vega'l Paré. Sinceramente, ye de les vegues más guapes que vi na mio vida, y de momentu, siguiamos a bon pasu y el tiempu, teníanos un puquiñín de respetu.


Vega'l Paré (1305 ms)

Darréu, vamos xubir d'esta vega hasta les cabañes del Tolleyu, onde vemos posibilidaes de resguardase nuna vuelta, pero camentamos que va ser una ruta espress, o lo que ye lo mesmu, nun vamos parar nin pa facer una mexada. Nestos momentos, siguimos xubiendo altor, y la lluvia sele que tábemos aguantando, tórnase en trapinos de ñeve, los cuales, molesten quiciás hasta menos que la propia lluvia.


Primeros trapos que van a más en tou momentu

Al altor de la vega'l Forcáu, llevábemos un hora y media caleyando ya inda nun pescanciábemos onde tábemos metiéndonos, poro siguimos, con cierta tranquilidá y munchos ánimos, caleyando a mui bon ritmu. Hasta equí, hai que dicir, que'l camín yera entreteníu, y la ñeve facíalo más prestosu, pol momentu. Y digo pel momentu, porque nun ratu más, na fonte la Camperona, ya tuvi que poneme l'abrigu (minutu silenciu, pa la mio Nevica, "modelu yonki de los 90", que dende esta ruta pasó a meyor vida, jeje), porque ya taba bien moyáu y calor, calor nun facía precísamente.

Les mios sensaciones ficiéronse correutes dafechu, nos H.oos de Carbanal, onde la proteción que tuvieramos peles vegues, desaparecío bien ceo y dalguna ventada qu'otra, poníate los pelos de punta. Aún así seguíamos, a bon pasu, anque la ñeve entamaba a dificultar el ritmu, y dimos bona cuenta de tramos de camín por Cilluenga, H.ou de las Cuevas,... hasta aportar a la vega d'Aliseda en menos de 3 hores, onde la ñebla, facíase más y más densa, y dábanos a entender que nun díbemos tener esi descansu del tiempu pela tarde.


Tirando hacia la Vega d'Aliseda

Magar de mirar gps, pa orientanos, ya que nun se veía gran cosa, empobinámonos al traviés de les Llombes d'Aliseda, como meyor vamos viendo, colos h.itos, col track del gps,... y lo pocu que nos daba la vista. Dicir, qu'a partir de los H.oos de la Carbanal, el tarrén foise complicando poquín a pocu, pudíendose perder ún, sin teunoloxía, con una facilidá ablucante, poro qu'a naide se-y ocurra nin en branu, metése per esta fastera sin gps.


Poles Llombes d'Aliseda

Nós, con ñeve, ñebla y ciertos momentos de ventisca, nun teníemos toes con nós, y mirábemos el gps, con menores intervalos, de los que suelo facer, pa nun separanos del track nin unos metros siquiera. Con muncha más dificultá, vamos averándonos al colláu Los Tiros, y pa ello, tendremos un pasu, con caídes a ambes manes, qu'ente la ñeve y vientu, merezse facer con tol curiáu del mundiu.


El tema complícase del colláu Los Tiros p'arriba

Aportamos casi a esti colláu, y fuimos metiéndonos pegaos a una arista de la Verdilluenga, pa tar dalgo protexíos de la ya ventisca que teníemos enriba. Nesti momentu, yeramos conscientes, de que'l temporal adelantárase, y que la cosa taba poníendose fea. Dempués de mil miraes al gps, pensamos que nun mos quedaba muncho, asína que decidimos siguir, quiciás impulsaos por Tito, que venía con ganes, y yo tamién aporté tirando p'arriba. Pocos díes vi a Fernan rezagáu, y camiento qu'él veía que taba poníendose mui complexu l'asuntu.


Xubiendo a la Picu Llombreras pol H.orcadino

Con Tito a la tiesta, abriendo buelga, como meyor podía, a bas de pegar pataes a la ñeve, ya inclusu, xubiendo a cuatru pates, yo, Iker y Fernan, algamamos tamién el final d'una canal, pelín h.odía y peligrosa, que diba facenos aportar nel H.orcadino, onde ya, siguiríemos la poca intuición qu'aportaba la nuesa visión, hacia lo qu'a lo lloñe paecía'l cumal de dalgún picu.


Picu Llombreras (2234 ms)

Y asína yera, dempués de 4 hores, esti cumal yera la Picu Llombreras de 2240 ms, qu'a la postre, foi l'únicu del que podemos tar seguros nun día, que taba tornándose a pior si cabía, poro les nueses pescancies al traviés de collaos y cumales, a la gueta de la Punta Gregoriana, aparte d'infructuosa, taba siendo mui peligrosa.

Nestos momentos, la ventisca yera tan fuerte, que la ñeve pinchaba na cara como cristales, y el dolor nos güeyos, facía que caleyásemos, emburriaos pol vientu, tapándonos como podíamos y con una visivilidá reducía d'unos pocos metros tan solo. Nun tuviemos muncho más que falar, pa retiranos lo más apriesa posible, ya que l'únicu que dibemos a facer nestes condiciones ye xuganos la vida, y que yo sepa nun mos paguen per sufrir na montaña.

De xuru que nun ye comparable, pero nestos momentos, entiendes la frustración de dellos montañeros nel himalaya, al quedate a pocos metros del to oxetivu, pero tamién yes a date cuenta, que solo los necios xuéganse la vida por un triunfu efímeru, cuando puedes perder tolos demás triunfos qu'ésta mesma pue proporcionate a lo llargo de los años.

Nun paga la pena, hai que saber rendise y aceutar la derrota, ya que la montaña ye la que déxate xubir o non, y la que te diz: Mira mozu, otru día déxote, pero güei tira pa casa si quies tornar.
Así que ficimos-y casu, y baxamos lo más rápidu que pudimos, al traviés d'un camín del que nun quedaba rastru dengún de la nuesa esistencia per esti macizu, y ye que nuesos pasos de retornu, amosáronmos que'l temporal borrara cualquier buelga fecha por nós.

Hai díes que se disfruta y otros que se sufre na montaña, pero siempre se deprende dalgo. Nesti día, les enseñances foron más que necesaries, ya que la llende ente'l disfrute y el sufrimientu, pue rebasase de sópitu, y hai que saber dase la vuelta pa poder tornar otru día. Paez que deprendí la lleición, porque la selmana siguiente a 1800 ms d'altor la Pena Ruea tamién dixo que pa otru día, y el vientu de 100 km/h, mandábanos a fartanos con un pote castañes deliciosu, en Bárzana.

Casi 8 hores, ensín beber, xintar, mexar,... y sin parar de caleyar, ficieron que'l nuesu esfuerzu, sufrimientu, aguante al fríu, diese col premiu secundariu de la Picu Llombreras, dempués de 18 kms y 1365 ms d'ascensión acumulada. Anque l'únicu premiu qu'importa ye poder tener una tercer oportunidá de dir a pola Punta Gregoriana.


Camudando'l Camín dende l'infiernu xeláu de Picos

Nesta ruta ficimos un dos mil de Cangues d'Onís: Picu Llombreras (2240 ms)

Ver progresos en: Retos montañeros

martes, 16 de noviembre de 2010

Cuadonga (Cangues d'Onís) - Priena - Mosquital

30 d'Ochobre de 2010

Track: Cuadonga (Cangues d'Onís) - Priena - Mosquital



Dempués d'una selmana mirando'l parte como dicía mi güelu, pa ver que tiempu dibemos tener pal finde, la cosa nun pintaba demasiáu bien. Aún así, a pesar de les baxes, Fernan venía d'Euzkadi y tamién animábanse Canta y Gustavo, antiguu compañeru de curru míu y anguaño de Canta.

Madrugón de turnu, y tiramos dende Xixón, Canta y yo, pa quedar en Cangues d'Onís con Fernan y Gus, onde desayunamos, y salimos en direición Cuadonga pola As-114 hasta Sotu Cangues onde garraremos la As-262, pasando por La Riera y Muñíu, hasta Cuadonga, onde fadríamos la xubida a los llagos de Cuadonga.


En Cuadonga (219 ms) a puntu salir

Pero nun foi asina, taba zarráu'l pasu a coches non autorizaos y la única forma de xubir yera n'autobús. Les nueve menos cuartu la mañana, y a les ochu y media zarraren, manda güevos. H.odiósenos la ruta pensamos!!!, y ye que la nuesa intención yera tirá-y a la Punta Gregoriana nel macizu del Cornión.

Nun puente nel que daben mal tiempu, y cierren l'acesu a los llagos?... solo pescancio que ye por afán recaudatoriu, como too nesta vida. Tamién entrúgome, pa que coño soi federáu de montaña n'Asturies si nun me val, nin pa que m'autoricen a xubir pa facer rutes de montaña. Meyor nun da-y más vueltes y guetar una solución pa nun perder el día.

Nun tenía plan B, asína qu'anque seya por tachar un vértice xeodésicu ocúrreseme xubir a la Cruz de Priena, y dempués siguir ruta hacia los llagos pa baxar por Orandi, o lo que xurda. Preparámonos, y p'alante garrando carretera abaxo, hasta dar col cartelu que marca nuesu primer destín.


Fernan intentando picame y mirando pa los altores de Picos

La xubida en sí, nun tien demasiáu de dureza, nin tampoco de guapu. Les vistes descansen sol entramáu relixosu-asquerosu qu'hai en Cuadonga, poro sinceramente val más mirar, pa los altores del cielu, p'acolumbrar la única divinidá esistente, les montañes del Cornión, si les ñubes lo permiten claru ta. D'otra miente, esti monte, ta peláu y en procesu de replantáu d'árboles, poro cuanto antes lléguese al so cumal meyor, jeje.


Na Cruz de Priena (730 ms)

Falando de to un pocu, nestos momentos de ruta, ya diéramonos cuenta, que cualquier aventura polos dos miles del Cornión yera una llocura, ya que'l vientu azotaba con toles ganes. Casi dábemos les gracies por non xubir a los llagos ya intentar salir porque nos diba tocar dar vuelta de xuru.

Magar, de la semeya cola Cruz de Priena, abrigámonos un pelín, y decidimos siguir caleyando ya que hora y cuartu, nun da nin pa tener fame. El siguiente pasu, yera averanos crestiando por delles llombes hacia'l Mirador de la Reina más o menos.


Entama'l crestéu hacia los Llagos

Poro, baxamos al colláu Pasaderu, y garramos los cumales de la Cueste Cavia y la Cueste Cárcoba, hasta aportar a la Vega Severa, onde xubirémonos a la Cabeza Severa (780 ms), onde tendremos mui bones vistes de los pueblos de Gamonéu, Suh.aedo,... de la parroquia de Mestas de Con.

D'equí, baxaremos hacia'l colláu de Tarañosdios, nome celta a más non poder. Por si dalguien nun lo sabe, Taranus, yera'l dios celta del cielu, luz y los truenos, vamos el nuberu o ñuberu asturianu. Darréu, podemos baxar del colláu a la carretera o entretenese crestiando (con dalgo de dificultá) pola xerra Frecha, hasta aportar a la carretera, la cual seguiremos hasta'l colláu Valdés, onde nos meteremos per una pista, dexando debaxo nuesa'l Mirador de la Reina y les parés del Castiello.


Aportando a la Vega Comeya

Con casi 4 hores ya caleyando, teníemos claru, que garrar dalgún senderu pa baxar a Cuadonga dando zapatu otra vegada diba ser un infiernu, poro lo meyor yera finar en travesía y baxar en bus dempués.

Pocu más tarde, aportamos al colláu Uberdón onde taremos ante una de les vistes más prestoses de la ruta, la Vega Comeya, y ye que bien merez la pena cruciala con tola tranquilidá del mundiu, ya qu'esta estensa vega, paez que proporciona paz demientres la travesamos. De xuru que, qu'antañu fuera un llagu tien bona culpa d'ello.


Nel Escaleru pa xubir dende Comeya a Buh.errera

Amás, al final d'ella, tenemos la posibilidá d'agüeyar les antigües istalaciones de les mines de Buh.errera, les cuales teníen el llavaderu en Comeya y llueu ascenderemos al traviés de la cueva L'Escaleru hasta les propies mines, poles que pasiaremos xubiendo l'altor poquín a pocu hasta'l puntu final de la nuesa ruta, el campu La Tiese (1125 ms).


Llagu La Ercina y Enol

Ya son 5 hores y cuartu de camín, y munchos kms a bon ritmu, así que Canta decide quedáse a tomar un cafetín nel chigre, y Gus, xunto a Fernan y a mi, quier acompanganos al caberu finxu, qu'aneciamos en tener, l'ascensión al Picu Mosquital, que separta los llagos d'Enol y La Ercina.

Así que, ensín parar demasiáu, ya que'l vientu yera mui fuerte, y entamaba a facer fríu, tiramos hacia'l nuesu primer camiento, que yera xubir pela so cara norte, per una sucesión de balcones qu'amuésasen afayaizos. Hasta que pusímonos al llau del seu que nos daría acesu a ellos, y pescanciámonos que con aventaes que rondaben los 80 kms/h, y una posible caída de 4 o 5 ms, meyor yera dexar esa vía pa un día más sele meteorolóxicamente falando.


Ventolinos sol Llagu Enol

Poro, casi ensín oyernos pola fuercia del vientu, decidimos arrodiar el picu pola mandrecha de La Ercina, non sin antes esfrutar de los ventolinos qu'azotaben el llagu Enol. Paez una xera cenciella arrodiar el llagu la Ercina, pero tuviemos partes nos que nun yeremos nin a dar un pasu, poniéndose'l tema pelín abegosu, y quedándonos solos na ascensión Fernan y yo, ya que Gus prefirió dase la vuelta.

Finalmente, algamamos la vuelta'l llagu hasta les Reblagues, onde entamamos una fácil ascensión dalgo más protexios del vientu, hasta aportar al propiu vértice xeodésicu del Picu Mosquital (1283 ms) onde casi nun yeramos a tar en pie.


Nel Cumal de la Mosquital (1283 ms)

Unos cuantos intentos de sacar semeyes y unes rises dempués, d'un par de caídes de culu, baxamos ya cola intención de finar la ruta nel Campu la Tiese y con un tastu a llogru, mui distintu al que teníemos cuando nos torgaren l'acesu a los llagos a les 9 la mañana.


Dos semeyes tornando hacia la Tiese

Y ye que'l día que menos te lo asperes, sácase ún de la manga, una ruta bien prestosa, nun día nel que poques posibilidaes más nos ufrecía'l tiempu. Namái quedaba tomar una cervecina nel chigre, recoyer a los nuesos collacios, y dir garrar el bus al área de servicios de Buh.errera, onde demientres lo esperábemos, xintamos el bocata.

A la fin, 6 hores y media ficieron que diésemos bona cuenta de casi 18 kms, nos que superamos 1500 ms de desnivel acumuláu, y los más importante, empatamos dos de mis montes con vértice xeodésicu, que dificilmente diba facelos nuna ruta decente, así que, que meyor que cellebralo con una pinta nel Ca Melán de Cangues d'Onís.


Camudando'l Camín dende'l Mosquital (1283 ms)

Nesta ruta ficimos los 2 vértices xeodésicos de Cangues d'Onís: Picu Mosquital (1283 ms) y Cruz de Priena (730 ms)

Ver progresos en: Retos montañeros