domingo, 29 de diciembre de 2019

Tresona (Corvera)

24 d'Agostu 2019

Nun too nesta vida va ser trepar y monte, o sí, pero bono, dacuando tamién préstanos dir pa la costa a tar relaxaos y que Kíla esfruta de la mar. Nesti casu, averámonos un finde a tar tiraos en Verdicio, nel conceyu Gozón, onde la perrina ñaciera casi pegáu a Carreño, n'Antromero.

Casi pasaron 7 años dende que la garráremos y fueron 7 años enllenos de bona vida pa Kíla, con llibertá pel monte, pela playa, siempre faciendo un pocu lo que-y dió la gana. Más menos, lo qu'intenta'l so dueñu facer cola so vida, pero paezme que lu tien más cenciello ella, que nun trabaya y ta tol día perende ensin esmolecimientos de nengún tipu.

Díes de sablera en Verdicio

Nun voi dar muncha cancha a lo bien que se ta nos aparcaderos de Verdicios, cola sablera, col pedreru pa los perros, col chigre con música en direutu, proyeiciones de películes o charres astronómiques... too eso, nun sólo finde, ye normal qu'aquello tea hasta la bandera.

El casu ye que tábemos ya fartos de zanganear y alcordéme de la reequipación d'una escuelina de cuarcita en Tresona, de la qu'oyera delles hestories y que un tiempu dempués punxera dalgo d'info el collaciu Dani Asturwaterman.

Apretando un pelín nun 6b d'entamu bloqueru

Coles mesmes, fuimos Ani, Rubén y yo a conocelo y anque'l sitiu nun espeutacular, tien el so puntu, esguilar pente ocalitos y en cuarcita. Aparte, toles víes que probamos teníen la so gracia, prestándome enforma trepar con canto romo y menos regleta calicera.

La verdá ye que nun da pa munches visites más, pasa lo mesmu qu'en Panondres ya que los graos son baxos y nun da proyeutar muncho. Paez mentira, que nun mes pudiera esguilar n'Asturies en dos escueles de cuarcita, como non tirando pal occidente astur.

Kíla alcontrando sitiu y Rúben catando la cuarcita corverana

Más menos, esguilamos un montón de víes de V y sestos baxos, esfrutando d'una escalada variada, onde moverse pa facer meyor les preses ye la clave y al menos quitamos un pelín de mono escalador que teníemos nestos díes de calorón que tuviemos nesta semana.

Lo dicho, escuelina que paga la pena conocer, pa echar unes rises, tastiar un tipu d'escalada distintu y combinar con un bañín en cualesquier de les sableres del cabu Peñes, así que bon plan la escalada en Tresona.

Camudando'l Camín en corvera con Ruben y Ani

Tresona
 
Croquis modificaos por mi de la escuela d'escalada de Tresona. Gracies y col so permisu.

jueves, 26 de diciembre de 2019

Recuerda (Tierras del Burgo) - Fresno de Caracena - Atauta - Montejo de Tiermes - Caracena

7 d'Agostu de 2019

https://www.mediafire.com/file/5wlqxop24ik2o60/Recuerda_-_Atauta_-_Montejo_-_Caracena.gpx/file Track: Recuerda (Tierras del Burgo) - Fresno de Caracena - Atauta - Montejo de Tiermes - Caracena


Fácil que llevara diez añinos ensin andar en bici en seriu y ye que la mala suerte d'un robu de mi bici, dexara esta afición pa prau sacante de dalgún paseín más tranquilu nel pueblu. Esta vegada, gracies a Miguel que llevaba picándome pa volver a da-y al pedal y prestábame la bici, desempolvé'l cascu, les zapatilles y el culote sobretou pa poder moveme nel restu de díes jeje.

Como non, el terrenu de xuegu sedrán les milenta pistes de tierra que tenemos en tierres sorianes y ye qu'aparte de pegar tiraes llargues corriendo, la bicicleta de montaña ye la verdadera protagonista pa facer deporte en Soria ya que práuticamente tenemos la suerte d'enllazar pueblu tres pueblu siempre per camín o carreteres mui pocu percorríes.

Partimos de Recuerda (899 m)

miércoles, 18 de diciembre de 2019

Vegabañu (Sayambre) - Dobra - Boca Corrobre - Les Merines - Vegarredonda - Pandecarme - Bricial - Campu La Tiese (Cangues d'Onís)

16 de Xunetu de 2019

Track: Vegabañu (Sayambre) - Dobra - Boca Corrobre - Vegarredonda - La Ercina (Cangues d'Onís)


Cuartu día de patéu per Picos dientro de la nuesa particular Travesera 2018 - 2019 y magar de pasar le pior nueche en muncho tiempo nun refuxu. Llevantarémonos dafechu reventaos, teniendo que tirar de diversos cafés y muncha comida pa intentar llevantar los ánimos de los tres participantes que quedábemos: Haritz, Alberto y yo.

Esta vegada nun había nin retiraes, nin xente nuevo a facenos compañía, los tres teniemos que ser capaces de completar la estaya que nos quedaba p'aportar a la furgo d'Haritz que taba a los pies del llagu la Ercina, colo que'l borrín col qu'alborecimos dábame a entender que cenciello nun diba ser.

Salimos de Vegabañu (1292 m) pente'l borrín

martes, 17 de diciembre de 2019

Vega d'Ariu (Onís) - Boca'l H.oon - Mesones - Puertos de Cuba - Vegagüerta - Vegabañu (Sayambre)

15 de Xunetu de 2019

Track: Vega d'Ariu (Onís) - Boca'l H.oon - Puertos de Cuba - Vegagüerta - Vegabañu (Sayambre)


Alborecemos con un día preciosu na vega d'Ariu y güei, sí que dormí como un titán, tando la verdá, mui a gustu nesti refuxu, nel qu'almorzamos estupendamente enantes d'entamar un día más d'esta Travesera 2018 - 2019.

El plan pa esta estaya sedrá enllazar los refuxos de Vega d'Ariu y Vegabañu nuna llarga xornada que poca xente suel llevar a cabo. Pepa y Jose abandonen la Travesera satisfechos pola ruta y ascensión a la Piedralluenga del día anterior y Haritz, Alberto y yo, tamos preparaos pa la calcetinada que nos espera.

Semeya de grupu saliendo d'Ariu (1586 m) con un día preciosu

viernes, 22 de noviembre de 2019

Caín (Valdión) - Mesones - Piedralluenga - H.orcada Blanca - Aliseda - Ariu (Onís)

14 de Xunetu de 2019

Track: Caín (Valdión) - Mesones - Piedralluenga - H.orcada Blanca - Aliseda - Ariu (Onís)


Magar d'una nueche fina, fina de roncaera per parte de Alberto nel albergue, tocó llevantase pelín cansáu y ye qu'al día anterior, a lu tuntu, ficiera más esfuerzu del que camentaba, canal p'arriba y canal p'abaxo intentando alcontrar pasu hacia Dobresengros y ente eso y nun durmir demasiáu, llevantéme con una necesidá enorme de café pa despabilar.

Asina, qu'almorzaremos nel Albergue de Caín con calma, pero sin pasase, que tenemos per delantre una llarga xornada, que tien de llevanos hasta la Vega d'Ariu. Años atrás, teníemos esta mesma intención pero'l borrín truncónos l'intentu y tuviemos qu'optar per un plan B que nos llevase hasta Vegarredonda.

Partimos del pueblu de Caín (460 m)

lunes, 11 de noviembre de 2019

Poncebos (Cabrales) - Bulnes - Amuesa - Piedrabellida - Cuesta Duh.a - Tranvia - Caín (Valdión)

13 Xunetu de 2019

Track: Poncebos (Cabrales) - Bulnes - Amuesa - Piedrabellida - Cuesta Duh.a - Tranvia - Caín (Valdión)


Alborezo n'Arenas con un día pa dir de monte estupendo ya que'l día anterior tuviera esguilando de tarde un pocu en Pó y dempués de cenar, fuera pa la cama prontín, nótome descansáu y preparáu pa entamar la mió 9ª Travesera de Picos.

Dalgo qu'entamó como una idega pa conocer un tarrén que nin siquiera atrevíemos a pisar, fue pasando a ser una tradición que facía que tuviese que restolar pente mapes y tracks, pa intentar facer un percorríu novedosu añu tres añu.

Partimos de Poncebos (241 m) con tola ilusión

lunes, 4 de noviembre de 2019

Travesera Picos 2018 - 2019

13, 14, 15 y 16 Xunetu de 2019

Track: Travesera Picos 2018 - 2019



Nos años que llevamos de traveseres, tuviemos participación de tou tipu, entamando con muncha xente pal finde y quedando menos pal restu de díes, otres nes que fuimos constantes nel númberu anque esto siempre fué les menos y hasta dalguna na qu'entamamos un bon garrapiellu de xente y dempués del primer día de ruta, quedamos tres namái, jeje.

Partíemos de Poncebos con bon ánimu

jueves, 24 de octubre de 2019

Valdeteya (Los Argüeyos)

6, 7 Xunetu de 2019

A primeros de Xunetu, en díes de calor brutal y escapando del finde anterior de folixa y alcuentru d'escaladores de Teberga, averámonos hasta Llión pa conocer el valle de Valdeteya na comarca de Valdel.lugueros, onde sí que fice unes cuantes rutes dende'l Puertu Vegará o al Bodón dende Valverde, pero que nunca enxamás me parara per ellí a esguilar.

Ablucante llugar na foz de Valdeteya

Como podemos ver nes semeyes, el llugar onde vamos a trepar ye guapu enforma, teniendo delles poces del rigu Curueñu al llau del aparcaderu. Esti llugar, equipáu en deportiva, ya que Valdeteya ye más conocíu pola escalada clásica, ye L'Arcu, el cual podemos acolumbrar si vamos atentos dende la baxada de la carretera de Valdeteya al Curueñu.

Perguapu l'arcu de Valdeteya... una ayalga xeolóxica

Son d'estos paisaxes que pagan la pena conocer, te muevas poles víes, te preste más o menos la caliza, tengas más o menos ganes de trepar... el sitiu ye increyible. El nome ya lo diz tou, vamos tar trepando nos pilares y nel propiu arcu, casi siempre a la solombra por mor del contrafuerte y del propiu arcu.

Xente fortísimo apretando nel arcu

Como siempre, si'l llugar paga la pena, nesta ocasión tuviemos la suerte de coincidir con xente llocal de Llión, que tuvieron a bien convidanos a una paella al finar la sesión del sábadu y esto, como toles coses imporantes na vida, dexá un pocu de llau la propia escalada... asina qu'habrá que tornar per equí en plan motiváu.

martes, 22 de octubre de 2019

Gradura (Teberga) - Pena Gradura - Cuafurada

16 Xunu de 2019

Track: Gradura (Teberga) - Pena Gradura - Cuafurada


Pasara un mes dende la última ruta a la xerra de Príes y nun quería que finase al debalu la temporada oficial del grupu, asina que metí con calzador un pequeñu pero perinteresante patéu, aprovechando qu'alcontrábame esguilando per Teberga.

Más en concretu, fadremos una pequeña circular qu'a lo tuntu, va facenos pasar de llau de varios seutores d'escalada y tou ello saliendo del perguapu pueblu de Gradura, al qu'accédese xubiendo hacia los Puertos de Marabiu, dende'l pueblu d'Entragu.

Partimos de Gradura (675 m) en Teberga

lunes, 7 de octubre de 2019

Isoba (Porma) - Abedulosos - Porrón de Cerrosa - Páramu

12 Mayu de 2019

Track: Isoba (Porma) - Abedulosos - Porrón de Cerrosa - Páramu


Nestos díes perllargos y soleyeros del mes de mayu, facemos revisión de rutes pendientes y decidimos averanos hasta'l pueblu d'Isoba, na fastera llionesa del cordal cantábricu, pa visitar un accesu hacia'l parque de Reres col envís de conocer la parte sur de la xerra de Príes, que tien al Cantu L'Osu como cota más nomada.

Pa ello, partiremos de Xixón garrando la autovía minera hasta Mieres del Camín, onde garramos la autovía A66 saliéndonos na salida de Morea, pa percorrer la As 112 hasta Cabanaquinta onde garraremos la AS-253 que tien d'empobinamos hacia'l Puirtu Braña pasando enantes per Felechosa, Cuevas, Roseco, Rufríu, El Fielato y La Raya.

Partimos del pueblín llionés d'Isoba (1356 m)

miércoles, 4 de septiembre de 2019

La Perera (Tierras del Burgo) - Hoz del Caracena - Madruédano

20 Abril de 2019

Track: La Perera (Tierras del Burgo) - Hoz del Caracena - Madruédano


Un añu más na selmana santa avérome hasta'l pueblu mió pa en Recuerda en Soria, pa pasar unos díes que mayormente ocúpolos saliendo a correr y fartándome, pero esti añu fizo un tiempo permalo, pudiendo namái, que salir un día a dar un paseín, pal menos sentinos un pelín deportistes.

Esta vegada, diónos a Miguel a mí, anque yo propongo y él acompaña sabiendo del posible embarque ya qu'estes hestoriespréstame faceles corriendo y suelen dirse de madre en kilómetros. El casu ye que salimos dende La Perera, un pequeñu pueblín a la vera'l ríu Fuente Arenaza que tantes vegaes percorrí, col envís de facer una circular que nos lleve a conocer la hoz del rigu Caracena.

Salimos a patear dende La Perera (1072 m)

viernes, 30 de agosto de 2019

La Cueta (Babia)

14 d'Abril de 2019

Como siempre, si tenemos finde con salida de monte nel GM Xuan de la Borrina, solemos aprovechar pa tirar en furgo a pasar el finde. Esta vegada, como vos conté na entrada de Pena Orniz salimos de la Cueta pa conocer Fuentes del Sil y ascender esti increyible monte, poro nun podía ser d'otra manera que tocaba trepar un pocu na escuela qu'asitiase penriba'l pueblu no que nómase como la Pena.

Faces de la Pena, onde asístiase la escuela dende la Cueta

Nun ye que ficiéramos gran cosa, pero como non, tar a gustu nesti pueblu ye bien cenciello, col bon facer de los dueños del hostal Picos Blancos, que lloñe de molesta-yos los furgoneteros, atiéndenmos estupéndamente, aportando, como non, pela nuesa parte, gastu cenando, almorzando y tomando daqué, ya qu'aportar económicamente a estos pueblos, faen que nun desapaezan y queden nel escaezu.

Pié de vía tranquilu y cómodu nestos seutores de la faza más baxa

No que la escalada se refier, ún de los díes, tornamos al seutor Candelas que ya conociera va un par d'años y tuviemos probando una vía nueva, que saldrá como 6a+ y tamién un 6b+ perrete que pringué dafechu jeje y qu'habrá que volver a rematar n'otra visitina que faigamos.

Víes de pasu y dalgo más llargues nel seutor Candelas

Como novedá, tuviemos l'últimu día nel seutor del Vicio, onde pude comprobar que ye'l pare con mayores posibilidaes con placa perinteresante y víes más llargues que nes faces superiores de la Pena, ya que munches de les víes son bordillinos nos otros seutores.



Placa con munches posibilidaes nel seutor Vicio

Nun mos matamos muncho tampoco y pude facer unes cuantes víes curties de la mandrecha'l seutor y ye que tábemos pelín cansadetes de la pateada del día anterior y poner gatos nun ye lo que más apeteza nestos díes, post monte, precísamente.
Plaqueando un pelín nel seutor Vicio

Ensin más una visitina más, a esti pueblu, onde podemos facer monte, esquí, escalada y sobretou esfrutar de la hospitalidá de la xente del bar, que venden Babia tolo que pueden y ye qu'hai que valorar como tien de ser, estos llugares na que la economía tradicional va finando pocu a pocu y quéda-yos pocu más qu'un pocu de turismu al ser quiciás el pueblu más altu de Llión.


La Cueta, llugar de mastinos bien guapos

La Cueta
 
Croquis modificaos por mi de la escuela d'escalada de La Cueta, por mor de la Asociación Estás en Babia. Gracies y col so permisu.