martes, 22 de octubre de 2019

Gradura (Teberga) - Pena Gradura - Cuafurada

16 Xunu de 2019

Track: Gradura (Teberga) - Pena Gradura - Cuafurada


Pasara un mes dende la última ruta a la xerra de Príes y nun quería que finase al debalu la temporada oficial del grupu, asina que metí con calzador un pequeñu pero perinteresante patéu, aprovechando qu'alcontrábame esguilando per Teberga.

Más en concretu, fadremos una pequeña circular qu'a lo tuntu, va facenos pasar de llau de varios seutores d'escalada y tou ello saliendo del perguapu pueblu de Gradura, al qu'accédese xubiendo hacia los Puertos de Marabiu, dende'l pueblu d'Entragu.

Partimos de Gradura (675 m) en Teberga
Esta vegada xubimos a Marabiu dende Teberga, poro aportaremos a esti conceyu pelos valles del Trubia como tantes vegaes y al aportar a Entragu garraremos camín hacia Marabiu garrando pocu dempués de Prau, el desvíu a Gradura, onde aparcaremos con cuidadín de dexar sitiu de pasu a los vecinos.

Acolumbramos la senda'l Gabitu enantes de visitar el Covachón

Travesaremos tol pueblu siguiendo direición SE y na so parte alta, garraremos el camín de de Fontel.lera que tresformaráse nun guapu senderu, travesando les lleres de Cuandía, siempre en baxada, hasta topanos con una bifurcación, onde si baxamos más, conoceremos el Covachón de Gradura y si ponemos el güeyu nuna portiella-somier, podremos trazar cola vista la senda'l Gabitu, qu'anque paeza mentira ye bien cenciella de transitar.

Perpasamos el guapu seu del Gabitu

Nós, fadremos una breve visitina al Covachón, onde na sesión de tarde, encadenaré un pequeñu proyeutu que tenía ellí y tornamos a xubir de nuevu pa conocer la senda'l Gabitu, la cual magar d'una primer parte de tramu armáu na que pósase dalguna man, pasaremos a un corredor llateral preciosu que tien de llevanos hasta una forcada, al llau del somier y onde saldremos a los praos del Cantu la Tabla con guapes vistes d'Entragu, Samartín y tolos altos de Teberga.

Empobinámonos per pindiu tarrén hacia L'Arcu

Siguiremos travesando pindies cuestes como la de Cuestarraña, pela que se baxaría al seutor de Planeta X, pero nós, dexando enriba nueso dellos parés equipaos de placa, siguimos camín hasta dar vista a L'Arcu, al que como non, queremos conocer ensin dubia, polo que tiramos con ganes per un tramu muncho más abegosu de caleyar, con muncha cotoya baxa y rabiosa.

Dende L'Arcu siguiremos ascendiendo sin descansu

Cruciaremos L'Arcu y saldremos primero con tendencia a la mandrecha, pa tornar a la manzorga pasando nun tramín pelín delicáu, penriba del seutor al que da nome esti fabulosu furacu. Dende equí, entraremos otra vegada en tarrén amestáu de calizu y yerba, empobinándonos hacia una solitaria faya, onde alcontraremos restos de cabañes, siendo esti llugar la Rebol.losa.

Cola pena Sobia detrás encaramámonos a la Pena Gradura (1148 m)

Dende equí perpasaremos pente restos de cabañes y del llau d'una más curiosa fadremos l'últimu tramu d'ascensión hasta la Forcachina onde ganaremos en pocu esfuerzu ya, la Pena Gradura ganando prestoses vistes de montes como la Pena Sala, el picu Cuervu o el picu L'Obiu que ficiéramos cuantayá.

Averámonos a la canal de la Mucheirina pero onde baxaremos

Llueu d'un descansín, siguimos descendiendo ensin metenos na Veiga Castro y siguiendo un pelín d'arista, daremos pasu penriba de la Penapadiel.la, pa siguir bordiando delles cotes hasta topanos con una aguya qu'amuesa que tenemos la Mucheirina ante nós, puntu d'entamu de la canal de L.lampaza, la cual descendremos a bon ritmu pesie a nun tar mui marcáu dengún senderu.

Averámonos hacia la boquera de la Cuevafurada

A metá de canal de L.lampaza, vemos como un senderu sepárase de los parés de la mandrecha, onde entamen a esistir seutores de la escuela d'escalada de Marabiu y baxando a la escontra, diremos alcontrando'l pindiu y herbosu senderu que tien de llevanos a la ablucante Cuafurada.

Travesamos la Cuafurada pa descender hacia'l camín real

Hai que tener cuidáu na cabera parte enantes de la entrada, puesto que'l senderu moyáu pudiera dar más d'un sustu, asína como nel primer destrepe de la cueva onde tuviemos que portiar a les perrines, pa ya esfrutar de la covacha con total tranquilidá, hasta salir pela parte baxa siguiendo'l descensu hacia'l camín real que baxa de Marabiu.

Descendemos ya tranquilamente de nuevu hasta Gradura

Fadremos esti últimu tramu col senderu pelín tomáu, pero aína alcontremos meyor camín al altor de les cabañes de Xuan Pedroso, onde ganamos a la fín, el camín real, que tien de depositanos de nuevu en Gradura, non sin antes echar un vistazu al ablucante muru de la L.luciona, pelín penriba de los praos de Piel.les.

En resume, ruta de lo más disfrutón que pues echate enriba, nes 4 hores clavaes que nos llevó conocer llugares y pasos tan guapos como la senda'l Gabitu, L'Arcu, la Mucheirina o Cuafurada, pa tolo demás, ya sabéis tiráis de tarxeta, qu'esto costónos superar unos 800 m de desnivel acumuláu y unos 8 km de percorríu.

Camudando'l Camín cola Pena Gradura

No hay comentarios:

Publicar un comentario