domingo, 29 de diciembre de 2019

Tresona (Corvera)

24 d'Agostu 2019

Nun too nesta vida va ser trepar y monte, o sí, pero bono, dacuando tamién préstanos dir pa la costa a tar relaxaos y que Kíla esfruta de la mar. Nesti casu, averámonos un finde a tar tiraos en Verdicio, nel conceyu Gozón, onde la perrina ñaciera casi pegáu a Carreño, n'Antromero.

Casi pasaron 7 años dende que la garráremos y fueron 7 años enllenos de bona vida pa Kíla, con llibertá pel monte, pela playa, siempre faciendo un pocu lo que-y dió la gana. Más menos, lo qu'intenta'l so dueñu facer cola so vida, pero paezme que lu tien más cenciello ella, que nun trabaya y ta tol día perende ensin esmolecimientos de nengún tipu.

Díes de sablera en Verdicio

Nun voi dar muncha cancha a lo bien que se ta nos aparcaderos de Verdicios, cola sablera, col pedreru pa los perros, col chigre con música en direutu, proyeiciones de películes o charres astronómiques... too eso, nun sólo finde, ye normal qu'aquello tea hasta la bandera.

El casu ye que tábemos ya fartos de zanganear y alcordéme de la reequipación d'una escuelina de cuarcita en Tresona, de la qu'oyera delles hestories y que un tiempu dempués punxera dalgo d'info el collaciu Dani Asturwaterman.

Apretando un pelín nun 6b d'entamu bloqueru

Coles mesmes, fuimos Ani, Rubén y yo a conocelo y anque'l sitiu nun espeutacular, tien el so puntu, esguilar pente ocalitos y en cuarcita. Aparte, toles víes que probamos teníen la so gracia, prestándome enforma trepar con canto romo y menos regleta calicera.

La verdá ye que nun da pa munches visites más, pasa lo mesmu qu'en Panondres ya que los graos son baxos y nun da proyeutar muncho. Paez mentira, que nun mes pudiera esguilar n'Asturies en dos escueles de cuarcita, como non tirando pal occidente astur.

Kíla alcontrando sitiu y Rúben catando la cuarcita corverana

Más menos, esguilamos un montón de víes de V y sestos baxos, esfrutando d'una escalada variada, onde moverse pa facer meyor les preses ye la clave y al menos quitamos un pelín de mono escalador que teníemos nestos díes de calorón que tuviemos nesta semana.

Lo dicho, escuelina que paga la pena conocer, pa echar unes rises, tastiar un tipu d'escalada distintu y combinar con un bañín en cualesquier de les sableres del cabu Peñes, así que bon plan la escalada en Tresona.

Camudando'l Camín en corvera con Ruben y Ani

Tresona
 
Croquis modificaos por mi de la escuela d'escalada de Tresona. Gracies y col so permisu.

jueves, 26 de diciembre de 2019

Recuerda (Soria) - Fresno de Caracena - Atauta - Montejo de Tiermes - Caracena

7 d'Agostu de 2019

https://www.mediafire.com/file/5wlqxop24ik2o60/Recuerda_-_Atauta_-_Montejo_-_Caracena.gpx/file Track: Recuerda (Soria) - Fresno de Caracena - Atauta - Montejo de Tiermes - Caracena


Fácil que llevara diez añinos ensin andar en bici en seriu y ye que la mala suerte d'un robu de mi bici, dexara esta afición pa prau sacante de dalgún paseín más tranquilu nel pueblu. Esta vegada, gracies a Miguel que llevaba picándome pa volver a da-y al pedal y prestábame la bici, desempolvé'l cascu, les zapatilles y el culote sobretou pa poder moveme nel restu de díes jeje.

Como non, el terrenu de xuegu sedrán les milenta pistes de tierra que tenemos en tierres sorianes y ye qu'aparte de pegar tiraes llargues corriendo, la bicicleta de montaña ye la verdadera protagonista pa facer deporte en Soria ya que práuticamente tenemos la suerte d'enllazar pueblu tres pueblu siempre per camín o carreteres mui pocu percorríes.

Partimos de Recuerda (899 m)

viernes, 20 de diciembre de 2019

Panondres (Navia)

20, 21 Xunetu de 2019

Paez mentira que siendo la mió ma d'Ortiguera, nel conceyu Cuaña, nun m'averase tovía a quiciás la única escuela del occidente qu'esiste y que xente conocío ya la tenía visitada. Como non, pa pasar un finde esguilando pel occidente, nun podía otra cosa que dir a durmir a Ortigueira a la vera'l cabu San Agustín y con vistes a la mar y a la sablera de Arnelles.

Dicir que'l chigréu hasta les mil nel "Jubilao" y el necesariu bañín mañaneru na sablera con Kíla, pasándonos pol forru la prohibición fue una auténtica pasada. Tamién saludar dende esti blogue, a los muertos de fame qu'agora viven en primera llinea de costa, probáblemente illegal y que molestámos-yos los furgoneteros y autocaravanistes.

Momentos impagables alboreciendo n'Ortiguera

Sabei que tábemos perbien aparcaos y non acampaos, poro la prósima vegada que vayáis dexar un papelín nel mió vehículu, tenéi suerte de que nun vos pille, porque vais pol terraplén p'abaxo. Magar de llevantase col papelín, bañame cola perrina, nun chapuzón mañaneru de los más prestosos que me dí y siguimos hasta Navia p'almorzar cola calma.

Llueu tendremos que salir hacia Polavieya y siguir hasta Busmargalí pa siguir hacia l'altu que baxa pa Busantianes, onde garraremos una pista a la mandrecha que nos llevaría hacia Oneta. A metá d'esta pista, tendremos un amplísimu apartaderu y ellí alcontraremos la paré de cuarcita onde asítitase esta escuelina d'escalada.

Grandes vistes mariñanes y pie de vía percómodu

Nunca esguilara en cuarcita y menos en deportiva, asina que vamos cola illusión de neños que tienen 35 regalinos p'abrir ún a ún. La mala suerte ye que'l bon tiempu, el sol y el calorín, fuese bien ceo y tuviemos que facer una escalada pente'l borrín mariñán.

Paez ser que ye davezu esta situación nestos altos de Panondres, pero pudimos comprobar qu'aún así la roca tien una adherencia reseñable y se dexa escalar ensin notar muncho la humedá. El primer día, pudiemos esfrutar d'unes cuantes víes, Pepa, Jose, Haritz y yo, flipando coles formes de la roca, sobretou na parte alta del paré, onde xurden unos cuernos de roca brutales, siendo la esguilada divertida en forma.

Esfrutando de la cuarcita del occidente... mui divertida

El día siguiente, alboreció peor tovía, con lluvia curioso, pero dempués del almuerzu una vegada más en Navia, volvimos a xubir pa ver si teníemos dalguna oportunidá d'esguilar otru ratín. Sorprendéntemente, alcontrámonos con unes condiciones asemeyaes, quiciás col día pelín más calecíu que nel día anterior.

Finalmente, nestos dos díes, pudimos fulminar más menos la metá de la escuela, unes 17 víes, anque nun apretamos más allá del 6a+, quedándonos con una necesidá de pasar otru finde y rematar la escuelina apretando un pelín, qu'esta vegada tuvimos en mou disfrute nesta escuela, que nos ofrez una escalada divertida, diferente a la caliza, pero mui entretenida.

Camudando'l Camín esguilando pente'l borrín

Panondres
 
Croquis modificaos por mi de la escuela d'escalada de Panondres. Gracies y col so permisu.

                           ------------------------------------------------------------------------------

miércoles, 18 de diciembre de 2019

Vegabañu (Sayambre) - Dobra - Boca Corrobre - Les Merines - Vegarredonda - Pandecarme - Bricial - Campu La Tiese (Cangues d'Onís)

16 de Xunetu de 2019

Track: Vegabañu (Sayambre) - Dobra - Boca Corrobre - Vegarredonda - La Ercina (Cangues d'Onís)


Cuartu día de patéu per Picos dientro de la nuesa particular Travesera 2018 - 2019 y magar de pasar le pior nueche en muncho tiempo nun refuxu. Llevantarémonos dafechu reventaos, teniendo que tirar de diversos cafés y muncha comida pa intentar llevantar los ánimos de los tres participantes que quedábemos: Haritz, Alberto y yo.

Esta vegada nun había nin retiraes, nin xente nuevo a facenos compañía, los tres teniemos que ser capaces de completar la estaya que nos quedaba p'aportar a la furgo d'Haritz que taba a los pies del llagu la Ercina, colo que'l borrín col qu'alborecimos dábame a entender que cenciello nun diba ser.

Salimos de Vegabañu (1292 m) pente'l borrín

martes, 17 de diciembre de 2019

Vega d'Ariu (Onís) - Boca'l H.oon - Mesones - Puertos de Cuba - Vegagüerta - Vegabañu (Sayambre)

15 de Xunetu de 2019

Track: Vega d'Ariu (Onís) - Boca'l H.oon - Puertos de Cuba - Vegagüerta - Vegabañu (Sayambre)


Alborecemos con un día preciosu na vega d'Ariu y güei, sí que dormí como un titán, tando la verdá, mui a gustu nesti refuxu, nel qu'almorzamos estupendamente enantes d'entamar un día más d'esta Travesera 2018 - 2019.

El plan pa esta estaya sedrá enllazar los refuxos de Vega d'Ariu y Vegabañu nuna llarga xornada que poca xente suel llevar a cabo. Pepa y Jose abandonen la Travesera satisfechos pola ruta y ascensión a la Piedralluenga del día anterior y Haritz, Alberto y yo, tamos preparaos pa la calcetinada que nos espera.

Semeya de grupu saliendo d'Ariu (1586 m) con un día preciosu