Recuerda (Tierras del Burgo) - Quintanas - Lodares - Burgo - La Rasa - Navapalos - Vildé

7 d'Agostu de 2025

Track: Recuerda (Tierras del Burgo) - Quintanas - Lodares - Burgo - La Rasa - Navapalos - Vildé

Vacaciones per Soria y como siempre, toca facer monte o bici, o lo que se pueda, que nos alloñe de tar nel chigre hidratándonos, asina que madrugamos en condiciones y escapamos lo más ceo posible dar una vueltina en bici, conociendo un pelín meyor día a día, les milenta pistes, caminos y carreteres tranquiles pa facer bici de monte.

Siempre digo que ye un paraisu pa la bici de monte y siempre que salgo atopo percorríos afayaizos pa meter unos kilómetros moderaos en 3 o 4 hores, enantes de qu'entre la calufa infumable. Como ye vezu, intento tachar un vértice xeodésicu, por ruta, ya seya caleyando o en bici, asina que preparé una vueltina, na redolada del nuesu pueblu, Recuerda, que diba llevanos en parte a conocer un cachín del GR86 y de pasu tachar un vértice nel pueblu de la Rasa. 

 

Partimos de Recuerda col castillu de Gormaz al fondu

Saldremos pela carretera dende Recuerda, hacia l'antiguu puente sol rigu Duero, siempre baxo l'atenta mirada del castillu de Gormaz, cruciaremos el Duero y pasamos a rodar pela carretera cortada, col envís de garrar el camín que va facenos pasar peles Fuentes de Quintanas, onde tantes hores de fríos baños nos dimos tola vida .

Aportaremos al pueblu de Quintanas onde garramos el GR86, que pasa pel camín al Burgo de Osma, percorrriendo a la solombra de los pinares un llargu tramu de caminos con dalguna xubidina hacia la fastera de los Cuatro Mojones, pa posteriori descender hacia'l pueblu de Lodares.

Recuerda (Tierras del Burgo) - Morales - Aguilera - Berlanga - Alaló - Brias

14 d'Agostu de 2024

Track: Recuerda (Tierras del Burgo) - Morales - Aguilera - Berlanga - Alaló - Brias

Dempués de dellos díes de folixa pel pueblu y un par de díes rodando en bici pela redolada, preparéme una ruta pa darme un pelín de caña y de pasu, tachar un par de vértices sorianos, que pocu a pocu voi completando, al menos nes comarques más averaes a Recuerda.

Como siempre digo, Soria ye un paraísu pa la bici de monte pudiendo trazar cualesquier ruta entre pueblos, per pistes de tierra ensin tener que tomar carreteres asfaltaes, anque tampoco son males p'andar en bici les comarcales, onde nun alcontraremos munchu tráficu.

 

Partimos de Recuerda (900 m) cola visión del Castillo de Gormaz

Asina qu'alborecemos mediu ceo, almorzamos y salgo del pueblu enantes de les diez, pa garrar camín hacia'l pueblu de Morales, pasando, como non, al llau de les bodegues de Recuerda, xustu enantes de garrar la rampla pela bas de la Muela, que llévame hacia un colláu dende'l baxaremos dexando a la mandrecha Valdeley, pa siguir de secute pela pista hacia'l pueblu de Morales.

Travesaremos Morales saliéndonos pel Calvario pa garrar el camino del Molino, hasta'l Alto la Mina, onde la pista va llevanos pegaos al rigu Duero durante más menos un kilómetru, pa dexalo un pelín de llau, siguiendo la pista que va llevanos hacia'l Molino Blanco.

La Güera (Tierras del Burgo de Osma) - Altos del río Abión

11 d'Agostu de 2023

Track: La Güera (Tierras del Burgo de Osma) - Altos del río Abión

Terminamos los díes deportivos de vacaciones per Soria, con un últimu patéu pela contorna del ríu Abión, nes cercaníes del Burgo de Osma. Pa ello, averarémonos hasta la puente La Güeria, nel ríu Ucero, onde tendremos dellos apartaderos pa dexar el nuesu vehículo y termina una vía senderista que percorre tol ríu dende'l pueblu, mui usáu pelos habitantes del Burgo.

Dende l'entamu na Güeria (898m ) la talaya de Uxama siempre presente

Nun son les 9 la mañana y ya entamo a caleyar dende la puente, garrando un senderín al llau de los cartelos del GR86, anque'l nuesu destín sedrá dir ganando tola amplia arista del Lomero, per esti senduru hasta una mayada, onde empataremos con una amplia pista. Tol camín, fadrémoslo siempre coles vistes al otru llau del ríu Ucero, de la talaya d'Uxama, que ya visitara en dalguna patéu otros años.

Fresno de Caracena (Tierras del Burgo) - La Capilla

 7 d'Agostu de 2023

Track: Fresno de Caracena (Tierras del Burgo) - La Capilla

Pues si en Soria, durante la carrera en Cuevas de Soria fastidiárame'l labrum de la cadera, anque ya venía d'atrás por sobrecarga, tocaba volver a dar un pateín nos díes de vacaciones que pasé per Soria, como tolos años. Sabiendo lo que tengo, con una artrosis de cadera avanzada y el labrum roto, veremos hasta onde podemos llegar, pero estos díes, el cuerpu pedíame volver a caleyar pel monte, anque fuera monte modestu como ye'l sorianu d'esta fastera de Tierras del Burgo.

 

Madrugaremos un pelín pa tar en Fresno de Caracena (946 m)

Asina, qu'averámonos hasta Fresno de Caracena, a pocos kilómetros del nuesu pueblu Recuerda, onde ya llegáremos nuna guapa ruta en bicicleta y esta vegada, dexaremos la furgo, pelín más allá de la ermita de la Virgen de la Soledad, pegáu a la puente sol ríu Tiermes, onde garraremos una pista n'ascensu, con vistes a los altos que vamos conocer nesta rutina.

La Perera (Tierras del Burgo) - Madruédano - San Cristóbal - Modamio

5 d'Agostu de 2022

Track: La Perera (Tierras del Burgo) - Madruédano - San Cristóbal - Modamio

Mítiques vacaciones d'Agostu per Soria, viendo a la familia y collacios, pero nun branu, nel que ties tan poques hores "actives", que nun seya tar a remoyo como los garbanzos, esta vegada nun pude dir facer monte pel Sistema Ibéricu o el Central, a malpenes una horina del pueblu.

Asina que magar, d'un par de díes de salides correnderes pela redolada de Recuerda, decidí continuar tachando dalgún vértice más de las Tierras del Burgo, que ye la comarca onde asítiase'l municipiu de Recuerda y per onde salgo a facer salidines correndero-montañeres.

Partimos de La Perera (1066 m)

Esta vegada diba tirar direición Sur, hasta La Perera, onde ya ficiéramos una guapa ruta conociendo la Hoz de Caracena. D'otra miente, llegárame a les miós oreyes, que nesti pueblu, equipáranse víes d'escalada, asina qu'antes de les 9 la mañana, taba echándo-y un vistazu a la cueva d'entrada'l pueblu onde pude ver 4 u 5 víes equipaes, qu'espero anime pa equipar dellos muros bordilleros nesti mesmu farallón rocosu.

 

El casu ye que dempués d'entreteneme un ratín cola cueva, aparqué nel pueblu y salí corriendo pela Dehesa, con tovía ciertu fresquín mañaneru, hasta la mecederu de la riega de Madrúedano y el Fuente Arenaza, onde tendré que desviarme a la mandrecha.

Recuerda (Tierras del Burgo) - Fresno de Caracena - Atauta - Montejo de Tiermes - Caracena

7 d'Agostu de 2019

https://www.mediafire.com/file/5wlqxop24ik2o60/Recuerda_-_Atauta_-_Montejo_-_Caracena.gpx/file Track: Recuerda (Tierras del Burgo) - Fresno de Caracena - Atauta - Montejo de Tiermes - Caracena

Fácil que llevara diez añinos ensin andar en bici en seriu y ye que la mala suerte d'un robu de mi bici, dexara esta afición pa prau sacante de dalgún paseín más tranquilu nel pueblu. Esta vegada, gracies a Miguel que llevaba picándome pa volver a da-y al pedal y prestábame la bici, desempolvé'l cascu, les zapatilles y el culote sobretou pa poder moveme nel restu de díes jeje.

Como non, el terrenu de xuegu sedrán les milenta pistes de tierra que tenemos en tierres sorianes y ye qu'aparte de pegar tiraes llargues corriendo, la bicicleta de montaña ye la verdadera protagonista pa facer deporte en Soria ya que práuticamente tenemos la suerte d'enllazar pueblu tres pueblu siempre per camín o carreteres mui pocu percorríes.

Partimos de Recuerda (899 m)

La Perera (Tierras del Burgo) - Hoz del Caracena - Madruédano

20 Abril de 2019

Track: La Perera (Tierras del Burgo) - Hoz del Caracena - Madruédano

Un añu más na selmana santa avérome hasta'l pueblu mió pa en Recuerda en Soria, pa pasar unos díes que mayormente ocúpolos saliendo a correr y fartándome, pero esti añu fizo un tiempo permalo, pudiendo namái, que salir un día a dar un paseín, pal menos sentinos un pelín deportistes.

Esta vegada, diónos a Miguel a mí, anque yo propongo y él acompaña sabiendo del posible embarque ya qu'estes hestoriespréstame faceles corriendo y suelen dirse de madre en kilómetros. El casu ye que salimos dende La Perera, un pequeñu pueblín a la vera'l ríu Fuente Arenaza que tantes vegaes percorrí, col envís de facer una circular que nos lleve a conocer la hoz del rigu Caracena.

Salimos a patear dende La Perera (1072 m)

Valdenebro - Boos (Soria)

8, 10 y 11 d'Agostu de 2016

Un añu más colo pa Soria a pasar dellos díes, amestando fiestes, tranquilidá y cuando ya me pica too, busco trepar como sea. Esta vegada cola familia ocupada colos miós sobrinos tuve de buscame la vida y aparte de facer bloque nun llugar onde dalgún día espublizaré daqué, probé suerte falando cola xente del café El Refugio d'El Burgo d'Osma.

Por suerte, namái falar con Darío, convidame a pasame a delles hores pela escuela de Valdenebro y ya tuvi la oportunidá de pasar varios díes per ellí y trepar con Oscar, Alex... y más xente de la redolada y bonos conocedores de la escuela.

Ye de recibu falar del bon facer de Darío y compañía, que meten a la xente por esti deporte con "bautismos d'escalada" y la verdá ye que la escuela de Valdenebro-Boos da pa bautismos y pa fondiar colos graos.

Nel mió casu, esta vegada venía lo que se diz fundíu de les apretaes a finales de Xunetu, asína que tenía más interés por caltener un pelín de chispa que por facer daqué curiosu. Asína, qu'a parte de conocer bona xente, pude informame de graos de víes nueves y facer dalguna vía qu'otra, siempre ensín pasar del 6c más menos.

Espero tornar l'añu que vien con más xeitu y ganes pa poneme a apretar en seriu, anque faíseme raro'l tastiu de la roca y nunca soi a faceme a ella como pa meteme en graos altos. De toes formes, ehí queda una especie d'actualización de los croquis y dende equí un saludu tardíu a Oscar, Alex, Darío y demás xente que taba entamando nesto d'apretar na roca.

Valdenebro
Croquis modificaos por mi de la escuela d'escalada de Valdenebro, por mor del llibretu asoleyáu va pocu que podéis ver dalgo actualizáu en Soria Se Mueve. Gracies y col so permisu.

-----------------------------------------------------------------------------

Recuerda (Tierras del Burgo) - Morales - Cabeza Rivilla

10 d'Agostu de 2016

Track: Recuerda (Tierras del Burgo) - Morales - Cabeza Rivilla

Últimu de mis paseos pela redolada de Recuerda en Soria, nel qu'esta vegada diba averame corriendo a un monte con vértice xeodésicu nomáu la Cabeza Rivilla. Como siempre tengo tiempu nos díes qu'ando per ellí y yo suelo madrugar, pues llevo preparadines cosuques pa dir conociendo los montes con vértice más averaos al pueblu.

Saldremos de Recuerda, provincia de Soria, en direición Este, per una pista agora asfaltada, qu'empobínase hacia las Bodegas de Recuerda. Este conxuntu de bodegues escavaes na tierra ye un bon atrautivu del pueblu, si se supiera xestionar, ya que la visita, cata y picar dalgún productu de la tierra sería una bona idega a llevar alantre.

Camín asfaltáu hacia les bodegues de Recuerda

Recuerda (Tierras del Burgo) - Gormaz - Vildé - Villanueva

3 d'Agostu de 2016

Track: Recuerda (Soria) - Gormaz - Vildé - Villanueva

Como tolos años nel mes d'Agostu préstame pasar unos díes pel pueblu de mió pa y siempre faigo dalguna ruta nos dosmiles sorianos y tamién dalgo de senderismu nes cercaníes del pueblu pa dir tachando montes con vértice pela zona.

Esti añu, les rutes fíceles corriendo asína que nun facer casu de los tiempos porque nun ye factible pa andarinos, asína que seríen rutes que defechu diben llevanos a lo meyor una xornada más curiosina y non les poques hores nes que les fice, por muncho qu'entretúveme conociendo tal o cual senderu pa poder algamar un camín curiosu.

Esta primer ruta, va facenos conocer con "suerte" cuatru pueblinos de la redolada, entamando por Recuerda y siguiendo per Gormaz col so nomáu castiellu, pa siguir tarrenes fluviales hacia Vildé y Villanueva.

Na realidá, esta entrada va ser pelín estraña porque voi poner varies posibilidaes dependiendo d'un pasu clave al traviés del banzáu de Vildé, que dependiendo de la cantidá d'agua que tea garrando la presa, podremos pasar o non.

Baxamos per camín dende Recuerda hasta Gormaz con vistes del Castillo tol tiempu

Recuerda (Tierras del Burgo) - Otero de Mosarejos

13 d'Abril de 2014

Track: Recuerda (Soria) - Otero de Mosarejos

Paez mentira que tantos años corriendo y yendo en bici pel pueblu mió pa en Soria, y nun fuera a poner una rutina que partiera d'él, faciendo un percorríu bien curiosu. En selmana santa, Pau y yo, ficimos quiciás el camín que más me presta correr ampliándolu un pelín más con una ascensión.

Partimos de Recuerda pel camín de la Dehesa hacia'l hocino de Fuente Arenaza

Rocódromu del Burgo d'Osma (Tierras del Burgo)

Monolitu nel pueblu sorianu del Burgo d'Osma, a malpenes unos 10 minutinos del pueblu del mio pa, Recuerda. Por suerte, tengo esti rocódromu n'altura pa entrenar un pelín nes vacaciones braniegues. Como pue vese, cada añu más xente anímase a prebar suerte colos gatos y l'arnés, pa esguilar un ratín y petar un pocu los brazos.  

Semeyes (2011)

Xente esguilando: Berto, Gus, Rafa, David, Mari y Ángel

 

Actualización (Agostu 2011)

Namái comentar, que col avance'l tiempu d'un añu pa otru tan feches de primeru toles víes d'esti monolitu, les cuales col nivel que tengo agora mesmu, nun ye demasiáu complicáu, pero si mui prestosu y recomendable. Aparte d'ello, pa entrenar suelo intentar facer de primeru les víes y sin usar nenguna presa artificial nin d'apoyu pa los pies nin pa les manes... hai qu'intentar entrenar fuerte en tolos llugares, jeje.  

La hestoria mía con esti monolitu entamó así... 

Aprovechando qu'anduve de vacaciones poles tierres sorianes tuve la oportunidá de probar otra vegada más la escalada n'altor, cosa a la que voi avezándome a pesar d'entrenar en rocódromu de 3 m d'altor ensín asegurar. Como siempre, lo meyor de too, deprender cosuques sol material necesariu pa ello, teniendo qu'asegurar al collaciu qu'abríame les víes a facer. El rocódromu del Burgo de Osma en Soria ye un monolitu d'hormigón tematizáu simulando roca dafechu. Tien un altor de 10 ms, anque enriba paez más, y una superficie total d'escalada de 112 ms cuadraos. 

 

 Monolitu del Burgo d'Osma 

Dempués d'un par de mesinos ensín esguilar nada poles parés foi una inyeción de ganes de tornar a esti deporte, poro voi entamar l'entrenu esti mes nel gym tratando de baxar dalgo de pesu, que m'aide a facer la xera con mayor facilidá. 

 

 

Preparandome pa una de les víes 

Esti rocódromu tien 4 cares bien dixebraes unes d'otres con dificultaes de 5a pudiendo llegar una d'ellas a un 5a+, dicho polos entendíos que yo nun tengo n'idega de calibrar estes coses. Eso sí, paecióme facilino, ya que nel ratín que tuve fice 3 cares de les 4 ensín muncho sufrío, quitando l'altor, qu'inda me da un respetu, que creo nunca se debe perder. 

 

Abriendo mi primer vía de mio vida 

Dotramiente, ye mui distintu facer una vía de segundu yendo tol ratu bien aseguráu, que facela de primeru abriendo vía, y con una posible caída anque seya d'un metrín o dos, ya da más respetu y mieu, a la mesma vegada que pierdes fuercies poniendo expresses y asegurando cuerda. 

 

Sofriendo pa colocar bien un express 

Por too ello, prestome pola vida, da-y un puquiñín a los deos, tanto ensín asegurar pola parte baxa del monolitu caleciendo, como llueu col arnés y aseguráu faciéndo les víes tanto de primer como de segundu. 

 

 Llegando al final de la vía 

 

De xuru, que puquiñín a pocu voi dir mercando material pa poder dir a facer esti nueu deporte que me tien bien engancháu. Porque entrenar en búlder ta mui bien, pero l'adrenalina de l'altura pon-y si se pue un plus perimportante a la escalada deportiva.