Track: La Perera (Tierras del Burgo) - Hoz del Caracena - Madruédano
Un añu más na selmana santa avérome hasta'l pueblu mió pa en Recuerda en Soria, pa pasar unos díes que mayormente ocúpolos saliendo a correr y fartándome, pero esti añu fizo un tiempo permalo, pudiendo namái, que salir un día a dar un paseín, pal menos sentinos un pelín deportistes.
Esta vegada, diónos a Miguel a mí, anque yo propongo y él acompaña sabiendo del posible embarque ya qu'estes hestoriespréstame faceles corriendo y suelen dirse de madre en kilómetros. El casu ye que salimos dende La Perera, un pequeñu pueblín a la vera'l ríu Fuente Arenaza que tantes vegaes percorrí, col envís de facer una circular que nos lleve a conocer la hoz del rigu Caracena.
Salimos a patear dende La Perera (1072 m)
Poro, rondando les 9 la mañana, saldremos de los 1072 m d'altor de la Perera, garrando una pista que nos faiga salir penriba del pueblu, pa pocu dempués cruciar pel Charcón la riega de Valdelaespina, cerca los corrales del Orégano, pa siguir per un caleyando per un altu dende'l que veremos les ruines del pueblu de Pozuelo, finca privada anguaño, siguiendo dempués en baxada hasta la riega del Val.
Ascendemos al monte Churil (1159 m) al llau del pueblu desaniciáu de Pozuelo
Equí bordiando unes naves, supongo que pertenecientes a los dueños de Pozuelo tamién, ascenderemos la única cota del día, que nun sedrá otra que'l Churil, na que más qu'esmoleceme pol vértice xeodésicu que corona esta llomba, quédome alloriáu mirando pa los pequeños dólmenes que poblen muncha parte del so tarrén... nun tenía nin idega de la esistencia d'esto y per interné nun hai referencies tampoco.
Percorremos el camín de Fresno a Tarancueña hasta baxar a Caracena
Baxaremos de nuevu al camín, escaeciendo un pelín l'ayalga del Churil y continuaremos hasta garrar el camín de Fresno a Tarancueña, que llevarános pegaos a unes finques, pel Alto las Viñas, hasta aportar a las Hazalayas, cortáu que danos guapes vistes al pueblu de Caracena y tamién danos un accesu per un senderín bien prestosu hasta este pueblu, nel que destaca la puente, les ilesies y el castillu que lu domina dende una llomba cercana.
Percorremos asombraos tola foz del Caracena
Conocemos perbien esti pueblu, al que ficimos-y dalguna visitina de guah.es en bici, poro decidimos siguir al nuesu oxetivu que ye percorrer la foz del rigu Caracena. Pa ello, tenemos dos opciones saliendo de la puente a la manzorga'l rigu, percorriendo un tramu de riscos con vistes al pueblu o descender hasta esti y garrar un senderu que dirá tranquilamente per tola foz.
Saldremos a una parte más abierta empobinándonos hacia Tarancueña
Fadremos un amiestu cola primer parte penriba la foz y ceo descenderemos hasta'l rigu, pa siguir un camín perconocíu per munchos senderistes que nos llevarán a esfrutar de varios requexos bien guapos, con parés bien curioses de calizo ya incluso dalgún arcu formáu nesta vieya roca, que a simple vista, pinta que nun diba ser mui bona pa la mió mayor afición, como ye la escalada.
Saldremos a la parte alta del camín de Caracena a Tarancueña per un tarrén ermu de vida
Magar de conocer tola parte más encaxonada y guapa de la foz, pasaremos a una más abierta, que nos llevará a cruciar el rigu un par de vegaes y cerca de Tarancueña, a la vera d'un molín, decidimos ascender hacia los altos per onde cuerre'l l'antiguu camín pente Caracena y Tarancueña. Nesti tarrén, ermu de vida, caleyaremos pente les peñes, alcontrándonos con dalgún cierre de ganáu en los Rincones, que sírvenos pa orientanos hasta garrar el camín que tien de llevanos hasta'l pueblu de Madruédano.
Siguiremos el cursu de la riega de Madrúedano hasta la dehesa de La Perera
En pocu tiempu de camín per pista, perpasaremos dexando Madruédano enriba nuesa a la mandrecha y siguiremos hasta dar col cursu del riu Madruédano, el cual nun perderemos, caleyando primeru al llau y más tarde pel mesmu calce, faciendo un guapu paisaxe, hasta salir a la dehesa de la Perera dando al pueblu a la vera de la riega de Fuente Arenaza.
En resume, ruta de 5 hores, 20 km y 420 de desnivel positivu, mañanera nel nuesu casu, pasando un pelín de metenos nos pueblos, porque ya los conocemos, anque hai que dicir que paga la pena la visita a les ilesies y castillo qu'hai en Caracena y Madruédano.
Camudando'l Camín pela Soria desconocida
No hay comentarios:
Publicar un comentario