miércoles, 21 de diciembre de 2022

VillaCabra Trail (Villaviciosa)

18 d'Avientu de 2022

Track: Trail Villaviciosa (Villaviciosa) - Santolaya (Cabranes)


Web del Trail: Trail VillaCabra

Clasificaciones: Clasificaciones 2022 

Por cuartu añu, tornamos una vegada más hasta Villaviciosa, pa finalizar l'añu correnderu nel Villacabra Trail y cómo? Pues corriendo munchísimu, más de lo que somos a esfrutar los montañeros jeje. Esta vegada, Cesar Pina y el grupu Llamaello, prepararon una carrera con salida y llegada dende la Villa, con tres xubidas, dos al picu Solares y otra la clásica Peña Cabrera, ensin baxar nesta ocasión hasta la capital de Cabranes, Santolaya.

Los molinos del Profundu lo más guapu de la carrera

Entamamos la carrera permal, escaecíendoseme'l dorsal a falta de 5 minutos del pistoletazu teniendo que volver a la furgo a la carrera, saliendo con él na mano y faciendo'l primer kilómetru caminando, colocándomelo con imperdibles, hasta qu'en Montotu, despídome de Silvia y la cola de carrera y arranco a correr adelantando xente, con demasiada priesa qu'a la llarga ficiérame dir agobiáu tola carrera.

Dacuando barrizal y dacuando un pelín de pista formigonada

Na primer xubida al picu Solares, voi garrando ritmu y baxo a fueu con varios corredores hacia Llugás, onde alcuéntrome con Alberto qu'abandona por mor d'un xemelu mancáu. Equí arrancaremos la xubida hacia Peña Cabrera, onde nun m'alcuentru bien del estómagu y nun soi a hidratame curiosu, sofriendo un pelín tola baxada y tol maraviyosu tramu de los Molinos del Profundu.

Tramu final de carrera aportando a la Villa

D'esti xeitu nel pasu por Coru, tengo claro que toca caltener ritmu sele y terminar la carrera lo meyor posible, atopando un compañeru col que vamos alternando posiciones, según seya baxada o xubida, onde tira unu o el otru, sofriendo y faciéndoseme llarguísima la xubida de nuevu a Solares y tol crestéu hasta la baxada final, onde entramos a la Villa, con 3 hores clavaes de carrera.

Paez mentira, que mires los tiempos que ficisti en carrera, siendo abondo positivos y que les sensaciones personales seyan tan males, pero les carreres pel monte son así, hai díes nes que vas flotando en sensaciones pero nun apretes lo suficiente y otres nes que sin darte cuenta vas rápidu pero nun sientes que vayas fluyendo precísamente.

----------------------------------------------------------------------------

viernes, 9 de diciembre de 2022

Sorrodiles (Cangas del Narcea) - Picu Sigueiru - Val.láu - Sonande

3 d'Avientu de 2022

Track: Sorrodiles (Cangas del Narcea) - Picu Sigueiru - Val.láu - Sonande

Continuamos colos bonos vezos de dir de monte, sacando del tinteru o más bien del llistáu de Montes Cimeros d'Asturies, otra posible ruta, que llevásenos a conocer otru cachín del enorme conceyu de Cangas del Narcea, nel suroccidente astur, que tan pocu valoráu ta y que tanto tendrá que dir ufreciéndonos nos prósimos años.

Del mesmu mou, que na visita al picu'l Cabril y Rabu L'Asnu, tornamos al val.le Cibea, pero esta vegada díbemos quedanos en Sorrodiles, crucie de caminos pente la CN-4 a Xinestosu y la CN-8 hacia Val.láu, aparcando delantre'l chigre'l pueblu y preparándonos pa una xornada de monte bien fría.

Partimos de Sorrodiles (670 m) en Cangas del Narcea

La verdá ye que la meteo empobinónos hacia'l suroccidente, ya qu'en toa Asturies namái que llibraba pa esta fastera, asina qu'aportamos a Sorrodiles, magar d'un viaxe en coche lloviendo hasta Cangas de Narcea, pero a partir d'equí los claros y ñubes diben ser una costante nel día, eso sí, entamamos a caleyar de Sorrodiles hacia'l pueblu de la Riegla de Cibea, con tolo que teníemos d'abrigu puestu.

miércoles, 30 de noviembre de 2022

Camín de la Molina - Banduxu (Proaza) - Picu'l Vialar - Valle'l Robledal

27 de Payares de 2022

Track: Camín de la Molina - Banduxu (Proaza) - Picu'l Vialar - Valle'l Robledal

Llevábemos dellos findes, intentando preparar dalgo pa festexar el XIII Aniversariu del GM Xuan de la Borrina, pero la meteo fue arrequexándonos hasta decidir facer un día solu d'actividá, preparando una xinta a posteriori y mira per onde, nun mos salió mal, ya que xuntámonos casi 20 persones pa l'actividá y la fartura.

Poques vegaes pasa qu'escoyemos la ruta, magar de ver un menú, pero esta vegada asina fuera, poro col llugar escoyíu nel Sabil, tocaba restolar que facer pel valle'l Trubia. Como siempre, tuve preparando milenta tracks, algamando unes posibilidaes perbones pa rutes potentes pel Cordal de Caranga u otres cola idega de conocer valles pente los conceyos de Proaza, Tameza, Grau y Teberga.

Semeya de grupu na Senda L'Osu (280 m) en Proaza

Pero pa una mañanera rápida, ocurriósenos visitar el pueblu de Banduxu y que meyor qu'intentar facer una circular, asina que tuve buscando la manera, como non, entamando pela mítica ascensión pel Camín de la Molina, qu'entá nun conociemos, asina qu'aparcamos nel PK 21 de la As-228 y preparámonos pa caleyar tol grupu.

viernes, 25 de noviembre de 2022

Trail de Salas (Salas)

20 de Payares de 2022

Track: Trail de Salas


Web del Trail: Salas - Virxen del Visu

 
Clasificaciones: Clasificaciones 2022 

Continuamos cola motivación por correr pel monte, entrando ya, na dómina l'añu más ivernal, onde apaecen pel calendariu carreres más curties, más afayaices pal tiempu fríu o lluviosu y onde tar munches hores corriendo nun ye lo más apetecible.

D'esti xeitu, apuntábame per primer vegada al Trail de Salas, que percorre tola falder del monte Visu, onde asítiase una ermita cola virxen. La carrera de 13 km, parte d'esti guapu pueblu, que nun tenía la suerte de conocer, lo qu'indícame a les clares, que debemos afondar más nel monte suroccidental y poner en valor esta fastera asturiana.

Carrera a fueu dende l'entamu en Salas

Gran ambiente pel pueblu, dende bien ceo, con xente recoyendo'l dorsal, caleciendo músculos o tomando un cafetín tranquilu como solemos facer nós. Llueu, preparámonos y aportamos a la meta saludando a munchos conocíos, cola idega de facer la mió carrera, esperando que'l día anterior de monte pel cordal de L.longalendo nun se notara muncho.

Nun fue así y salimos a bon ritmu tola parte correndera hasta'l tabayón de Nonaya, pa entamar una xubida, tamién, a tramos correndera y otros más pindia hasta la Peñallonga, onde llaniaremos un pelín y tendremos per delantre la baxada más rápida que tengo alcordanza, na que doi tolo que tengo, con varies patinaes pel barru incluyíes.

miércoles, 23 de noviembre de 2022

La Felguerosa (Ayer) - Picu Cutrifera - Monte Bustiello

19 de Payares de 2022

Track: La Felguerosa (Ayer) - Picu Cutrifera - Monte Bustiello

Primer selmana d'iviernu, con ñevaes nes cotes altes, lo que llevó a buscar un requexín, una pequeña ventanina, pa poder salir al monte. Esta vegada, la xente nun fui mui positiva y tan sólo aventurámonos Charly y yo, tornando una vegada más, hasta'l cordal de L.longalendo, onde entá faltábenmos un tramu per conocer, xustu enriba de Morea, nel conceyu d'Ayer.

Les otres incursiones en L.longalendo, fueran más al oriente, entamando pelos picos Culladiella y Grandes, pa finalizar el cordal pela Burra Blanca y Cuetu Ventosu que ficímoslo nun va tantos años, siendo una costante nesti cordal, el caltenimiento de los mayaos ganaderos y calteniéndose en bon estáu una llínea de senderos pela propia cumera o falderes altes de L.longalendo.

Partimos de la Felguerosa (494 m) penriba de Morea d'Ayer

D'esti xeitu, llueu del clásicu almuerzu en Mieres, onde compartimos coche, continuamos hasta'l valle del rigu Ayer, pa salir en Morea y facer un par de kilómetros hasta'l pueblín de la Felguerosa. Nun voi descubrir yo la fealdá que supuso la enorme industralización de les cuenques mineres, con crecimientos ensin xacíu de los grandes pueblos, pero sí que quiero destacar que namái que salímonos a les falderes de los cordales, alcontrámonos con pueblinos bien calteníos, onde por suerte, recuperánronse bona parte de les cases, a mou de segunda vivienda supongo, la mayoría d'elles.

miércoles, 16 de noviembre de 2022

Sellañu (Ponga) - Riega Salgaréu - Ruamón - Sorbeyu - La Güerfana - Cezulia - Pandiellos

 12 de Payares de 2022

Track: Sellañu (Ponga) - Riega Salgaréu - Ruamón - Sorbeyu - La Güerfana - Cezulia - Pandiellos

Dempués del día gafu que tuviéramos na ruta per Llaviana al Corbellusu, teníemos ganes de desquitanos y llueu de dar vueltes a la tiesta, Mario y yo, punximos la vista en Ponga, cola idega de conocer pela mió parte, la Foz de Salgaréu, pasu pente les peñes del Pierzu y la Güerfana, que tien bon camín pente Priesca y la collada Llomena.

Sicasí, tardamos en decidir la ruta y nun sé por qué, punxe la vista na riega Salgaréu, restolando peles redes, ensin alcontrar información, teniendo que falar con dalgún compañeru barranquista, por si taba nel catálogu d'Asturies y nun yera afayaizu pa los montañeros.

Partimos de Sellañu (245 m) en plenu parque de Ponga

Con varios planes nel tinteru, almorzaremos a les 8 la mañana na Huera en Cangues d'Onís y ellí, ente toos, decidimos probar suerte pela riega Salgaréu teniendo un par de posibles escapaes, tanto hacia la pista que xube de Priesca pela manzorga, como hacia la mandrecha hacia Pandiellos, pero siendo too una auténtica incógnita.

martes, 8 de noviembre de 2022

Trail de Reres (Sobrescobiu)

29 d'Ochobre de 2022

Track: Reres Trail (Sobrescobiu)


Web del Trail: Seronda Trails - Reres

 
Clasificaciones: Clasificaciones 2022  

Tornábemos seyes años dempués a esta carrera en Sobrescobiu, una de les clásiques de la Seronda, onde tuviéramos una perbona participación cuando quiciás taba más fuerte nesto de correr. Los años pasen y pesie a qu'entrenamos dalgo, camiento que'l facer menos monte duro ta faciéndome perder nes pindies xubides o simplemente, que la xente entrena y corre munchísimo.

El casu ye que plantámonos en Sobrescobiu, alcontrándome con Sergi y con Illán col que ya falara por teléfonu, garramos dorsal y nuna mañana fresquina pero con mui bona pinta, vamos preparándonos con calma pa dir hacia la salida, onde como siempre, había una gran participación anque coincidiese col Blincapeñas en Suarías.

Esfrutando de la carrera en tolos tarrenes
 
La carrera, como siempre, sal como un tiru peles cais de Rusecu pa garrar un cachín de carretera desviándonos hacia pista en direición Villamoréi. Voi con Illán, camentando aguantar lo que pueda con él, ya que decidí tomar la carrera como un entrenu, asina que mi idega ye apretar lo posible hasta la senda L'Alba, a falta más menos de 10 km, onde tocaría aguantar como pudiera.

Primer parte mui correndera como siempre

Asina lo voi faciendo y veo qu'Illán nun me sigue nel camín hacia'l Torruxón y posterior xubida hacia'l canal d'agua que percorre tol faldéu de la xerra'l Crespón, poro ya toca carrera en solitariu y a furrular, esfrutando bastante de la xubida y sobretou del camín percorrible hasta Prieya, onde xinto daqué y entamamos l'ascensión al Cogullu, la cual me sobrepasa un pocu y voi penando, algamando meyores sensaciones na baxada téunica y posterior crestéu téunicu hasta'l colláu Peruques onde garramos la primer baxada llarga.

Momentos a metá de carrera

Llueu tocaría una pequeña xubida hasta Trapa, onde garro un pocu de xinta y tírome abaxo hacia'l Retorturiu na senda l'Alba, faciendo una de les meyores baxaes de pista que fice enxamás, esfrutándola a tope y ganando dalgunes posiciones con compañeros que díbemos turnándonos depende'l tarrén de carrera. Garro agua y dalgo de picar y entama l'ascensión temida per pista hasta Fresnu, la cual faise llarguísima y mui pesada, perdiendo dalgunes posiciones y dalgo de motivación pa siguir apretando.

Na fastera de la Trapa na parte final de la carrera

En Fresnu, a la fín, entama la baxada hacia la Foz de Nozalín, na que ya veo que toca ser conservador, faciéndoseme hasta pesáu tol faldéu del Cullargayos hasta Llaíñes, onde como siempre nin garro agua y continuo pa facer los 3,5 km que resten hasta la meta, onde entro contento porque veo que baxé de les 4 hores, lo que nun entraba nos miós planes.

En resume, carrera bien guapa como siempre, anque la pista hacia Fresnu, fízose mui cansina, na que lo dí tou, teniendo que dir controlando na parte final de la carrera, pero con bones sensaciones pa tomámelo más en serio esta temporada 2022 - 2023.

Aportando a la meta baxando de 4 hores
------------------------------------------------------------------------------

jueves, 3 de noviembre de 2022

Les Mestres (Llaviana) - Foces del Raigusu - Colladina - Corbellusu - Foz de Sogrande - Fomermeya

22 d'Ochobre de 2022

Track: Les Mestres (Llaviana) - Raigusu - Colladina - Corbellusu - Sogrande - Fomermeya

Sorprendéntemente, l'entamu de temporada nel GM Xuan de la Borrina, ta siendo un ésitu y na segunda ruta del grupu, axuntábemosnos un bon garrapiellu de collacios, con xente nuevo del entornu de Mario y xente que l'añu pasáu poca presencia pudo tener, aparte de la minipresencia de Laia, colos sos pas, Haritz y Jenny.

Con esti ambiente y un día raruno no meteorolóxico, vamos averanos hasta'l conceyu de Llaviana, onde cuantayá que nun facíemos monte y la idega nuesa, yera percorrer, como fai dellos años, les foces del rigu Raigusu, pero cola idega de facer una circular xustu pela fastera contraria a la d'aquella ruta, na qu'ascendiéramos ente otros montes, a la Penamea.

Partimos de Les Mestres (422 m) más alantre del pueblu llavianés de L'Acebal

Axuntarémonos toos nel entamu de la ruta de les foces del Raigusu, en Les Mestres, ye dicir, na amestaura de los rigos Raigusu y Fomermeya, onde hai sitín p'aparcar coches y col güeyu puestu nel cielu empuercáu de ñubes y con un vientu molestu, entamaremos a caleyar pela cómoda pista que tien d'empobinanos valle alantre.

martes, 25 de octubre de 2022

Margalef de Montsant (Tarragona)

Del 8 al 15 d'Ochobre de 2022

Dempués del gran viaxe per Margalef y Camarasa del añu pasáu, tol mundiu tenía ganes de repetir, asina que nun lo pensamos dos vegaes y reservamos pa la mesma fecha nel camping, aportando'l sábadu a mediudía, xustu dempués de que cayera una esbastiada fina, poro con ciertes duldes, aparcamos nel Pantá de Margalef y fuimos dar un paséu pelos seutores más averaos a la Catedral y a dar un peguín a Can Reginos que ya lu conocíemos del añu pasáu.

Primer día lluviosu de paséu pela Catedral y dando un peguín en Can Regino

Con más ganes de facer campu base qu'otra cosa, tiramos pal camping y organizámonos pa cenar en comuña y brindar pol entamu de vacaciones. Al día, siguiente, con tola motivación, al menos la que nos queda dempués d'un branu enllenu de díes de proyeutar y con pocos resultaos positivos, fuimos a conocer unos seutores desconocíos pa nós, como yeren Reggae, Super Reggae, Culample y Racó de L'Eura, qu'a la postre darienmos munches hores de pegues fanáticos.

viernes, 21 de octubre de 2022

Cuevas (Ayer)

2 d'Ochobre de 2022

Dempués de la ruta pela redolada de Cuevas del día anterior, ascendiendo al Picón de las Rubias, al día siguiente averámonos enantes de que'l sol pegase fuerte, hasta'l seutor de la Fuente, onde ya esguiláramos va dellos añinos, faciendo un par de 6b/+ durinos pero mui guapos.

Nathalia apretando duro nes víes de la Fuente
 
Tamién, daquella probáramos Merci Cata, vía que según onde mirásemos salía de 6c o 6c+. Esta vegada, sufríeramos la so dureza Suco y yo, alloriando un pocu, de nuevu, con que la vía fuese sólo 6c/+, nun sacándola nin de broma al primer pegue nengún de los dos.
 
Perguapu llugar la escuela ayerana de Cuevas
 
Magar de parar un ratín a xintar cuando más pegaba la solana, tornamos a últimes hores de la tarde, ya a la solombra y con meyor tactu, pa dar otru pegue al corte totalmente pa encadenala, quedándome claro, como vien na última guía de Escalada en la Cordillera, que más bien ye 7a esta vía.

Cuevas
 
Croquis modificaos por mi de la escuela d'escalada de Cuevas. Gracies y col so permisu.
 
-----------------------------------------------------------------------------------------------

miércoles, 19 de octubre de 2022

Cuevas (Ayer) - Riopinos - Picón de las Rubias - El Gumial

1 d'Ochobre de 2022

Track: Cuevas (Ayer) - Riopinos - Picón de las Rubias - El Gumial

Entamábemos temporada montañera, tardía llueu de que nun saliese alantre la xuntanza n'Euzkadi, averándonos hasta Cuevas n'Ayer, onde nun va munchu tiempu pasáremos dellos díes esguilando y mui rellacionáu nos últimos tiempos col monte astur, gracies a les campañes publicitarias d'Agua de Cuevas.

El tema yera, que tábemos con ganes de tornar de monte per esta fastera, ya que personalmente tenía un par de valles por conocer y la última vegada que tuviéramos, ficiéramos un bon día de monte ascendiendo tol val.le Melera, hasta la Peña Pandos o Peña Melera.

Partimos de Cuevas (772 m) nel conceyu ayerán

Encomiéndovos a dexar el coche nel aparcaderu del llau del merenderu de Cuevas (onde entama la ruta hacia'l Gumial) y non como nós, onde l'area recreativa, ya que caleyamos per carretera de más. Aún así, dicir que de nueche tuviemos cenando perbien nel merenderu, asina que tomar dalgo al terminar nesti restaurante ya ye un motivu más pa esta ruta.

viernes, 7 de octubre de 2022

Trail Macizu d'Ubiña (L.lena)

10 de Setiembre de 2022

Track: Trail Macizu d'Ubiña (L.lena)

Web del Trail: Trail Macizu d'Ubiña

Clasificaciones: Clasificaciones 2022 

Tornábemos a les carreres llueu d'una selmana esguilando per Cantabria, poro, nin siquiera salí a correr nos últimos quince díes. El casu ye, que tanto en Ramales como en Miera, nun tuviemos grandes averamientos a los seutores, asina que la comodidá y la relaxación escaladora, yera tol mió entrenu dende los pateos montunos de la Travesera 2022.

Kíla a la espera de la salida en Tuíza Riba

Sicasí, yeren más les ganes, asina que plantámonos en Tuíza Riba, acompañándome Anna y Kíla que diben xubir hasta'l Meicín a ver un pocu l'ambiente de la carrera. Tamién, tuve la suerte de compartir parte de la carrera con Illán, que ya facía tiempu que nun mos veíemos.

martes, 4 de octubre de 2022

Riumiera (Cantabria)

Del 28 d'Abril al 5 de Mayu de 2024



 
Apalanque perfeutu nel camping Lunada con tolos necesariu pa esfrutar del paisaxe


 
Paradina enantes d'entrar al valle en Solares


 
Segundu día trepando per Ajanedo... muria llarguísima con milenta posibilidaes


Visitina a Calseca llueu d'un día de lluvies que pudimos llibrar plaqueando


 
Víes atómiques nun día pelín murniu nel plaques de Sanroque


 
Conocimos los seutores del Molino con víes mui divertíes y mal pié de vía


Despedímonos del valle nel Desplome del Camping