martes, 4 de octubre de 2022

Riumiera (Cantabria)

Del 7 al 9 de Setiembre de 2022

Continúabemos de viaxe per Cantabria y díbemos mover l'equipu pa otru valle, menos conocíu no qu'a la esguilada refierse, pero con un potencial brutal, ya que tan sólo con dir conduciendo peles sos carreteres nun podemos otra cosa que mirar pa tola natura y la cantidá de parés a un llau y al otru del ríu Miera.

El paisaxe de los valles pasiegos ufrecen una esguilada tranquila

Tamos nos Valles Pasiegos, toa una maraviya de montes verdes y parés calizos onde paez que'l tiempu nun pasó y que la xente de los pueblos vive fuera d'esti mundiu global, que d'otra miente tanto dañu ta faciendo. Sicasí, tamién hai que dicir qu'en Sanroque del Riumiera, enxamás viera tal nivel de facismu de remembranza, al entrar a un chigre del pueblu a tomar una cervecina.

miércoles, 28 de septiembre de 2022

Ramales (Cantabria)

Del 3 al 6 de Setiembre de 2022

Tornábemos dende va dellos meses a facer un viaxe escalador, pero viendo'l nivel de precios de combustible, decidimos nun dir tan lloñe como otres vegaes averándonos hasta la vecina Cantabria, onde teníemos a un guía de luxu, como yera Santos, que viviera per estes tierres unos años atrás.

D'esti xeitu, los primeros díes de vacaciones díbemos averanos hasta Ramales, onde munches fueron les hestories de dureza escaladora per estos llares, asina que díbemos preparaos pa nun encadenar res, pero nun díbemos tan preparaos pa tar tan a gustu y que nos tratasen tan bien.

Anna y Nuria esguilando nel Camino

El primer día, aportamos nun día ñublu de tarde, llueu de pasar per Santander a ver a Xena y tiramos direutos al Camino, seutor que como'l so nome indica, tien una averamientu de 5 min de bon camín, dende'l qu'aseguramos demientres vemos pasar bicicletes, corredores de monte, andarines, espeleos, ferrateros...

martes, 27 de septiembre de 2022

Travesera Picos 2021 - 2022

 27, 28, 29 y 30 d'Agostu de 2022

Dempués de que la fola de calor nos torgase los planes montunos nel Pirinéu y de que nun saliese nes feches aniciales la Travesera Picos, intentábemos de nuevu tornar a Picos d'Europa (Asturies, Llión, Cantabria), preparando un par de díes per Valdión y otros dos pela montaña de Riañu, onde ya tuviéramos nuna travesera na que conociéramos la montaña Palentina.

Entamaba la Travesera 2020 - 2021 dende Bezanes

El vienres como ya contara, arriméme enantes hasta'l Puertu Pandetrave p'ascender ún de los montes que meyores vistes del Cornión y los Urrieles tien, como ye'l Picu Gabanceda. Llueu de la carrerina, baxara apriesa pa xuntame colos collacios que vinieren a pasar el finde, como yeren Carla y Mario del GM Xuan de la Borrina y Ani y Rubén, que diben venir per primer vegada al monte con nós.

viernes, 23 de septiembre de 2022

Salamón (Cistierna) - Peñas Pintas

30 d'Agostu de 2022

Track: Salamón (Cistierna) - Peñas Pintas

Magar del paseín de tarde del día anterior, cola ascensión al Yordas, alborecemos nel pueblu de Salamón, onde a la vera de la ilesia, con una mañana bien fresca, preparamos un almuerzu, a la espera que'l sol calézcanos un pelín los güesos y músculos enantes d'entamar a caleyar.

Con too preparáu, garramos agua nes fontes d'esti guapu pueblín y namái entamar a caleyar peles sos cais, un animosu cachorru amiestu de mastín con otru tipu de pastor, arrímase a por mimos y en definitiva a venir de monte con nós.

Alborecemos en Salamón (1065 m) con Peñas Pintas al fondu

Según tamos saliendo del pueblu y entamando a caleyar per pista tol valle alantre, otra sorpresa en forma de mastín prietu enorme, ponse al pasu nuesu, acompañándonos hasta'l desvíu en Coto Redondo, onde vamos travesar una preciosa viesca y ye que nestos montes, nun sólo la caliza destaca, sinon que los fayeos son d'una belleza enorme.

lunes, 19 de septiembre de 2022

Liegos (Valdeburón) - Picu Yordas

29 d'Agostu de 2022

Track: Liegos (Valdeburón) - Picu Yordas

 

Continúabemos de monte per Llión, abandonando la fastera de Valdión y los Picos d'Europa, pa baxar un pocu'l nivel de les xataes, averándonos hasta Riañu, onde alcontraremos ascensiones más curties, pero nunos montes d'una belleza ablucante, como ya ficiéramos va unos años col Picu Gilbo.

Magar d'una bona cena per Riañu, alborecíemos col día más bien murniu y con munches duldes de que ruta facer. De primeres, almorzamos con calma y viendo les enormes ñubes y la previsión de la meteo, decidimos averanos hasta Liegos, puntu d'entamu de la ruta hacia'l Picu Yordas.

Partimos a les 3 de la tarde hacia'l Picu Yordas o Burín

Teniemos preparada una circular dende la pista qu'enllaza Liegos con Lois al otru llau del banzáu de Riañu, pero a pocos kilómetros de camín pela pista, les ñubes tornáronse tormentoses y un vientu afuracanáu, fízonos dar la vuelta, teniendo tiempu xustu pa tornar a la furgo enantes de que cayera'l primer bastíu.

Llueu d'otru café nun de los bares del guapu pueblín de Liegos, vemos que nun pinta parar en tola mañana, asina que decidimos echar una siesta mañanera nes furgonetes y cuando espertamos, la torba ya pasara y pudimos sacar les meses y silles pa xintar, viendo qu'era una hora bien afayaiza.

miércoles, 14 de septiembre de 2022

Posada (Valdión) - Chávida - Canal Sur - Frieru - Asotín - Cordiñanes (Valdión) - Bustiu

28 d'Agostu de 2022

Track: Posada (Valdión) - Chávida - Canal Sur - Frieru - Asotín - Cordiñanes (Valdión) - Bustiu

Dempués de la llibrada tormentosa del día anterior, na contorna de la Peña Bermeya, alborecíemos con un día preciosu y una previsión más estable pero tamién más calurosa. Poro, almorzamos na furgo, despidiéndonos d'Ani y Rubén y caleyamos peles cais de Posada de Valdión, garrando bien d'agua, pa salir per un camín na carretera hacia Pandetrave, que nos enllace col Pr-PNPE 15, el cúal tien que dir empobinánonos al nuesu destín, la canal de Chavida y a la posteriori, la Torre'l Frieru.

Partimos de Posada (924 m) con un día bien guapu

Según vamos ascendiendo pel senderu, el calor y la humedá va desprendiéndose del suelu, dándonos una sensación de que nun lo vamos a pasar mui bien. Cuéstanos enforma garrar ritmu y decidimos caltener un pasu continuu anque seliquino, parando namás que pa echar una güeyada a la muria que forma tola redolada de Pambuches.

lunes, 12 de septiembre de 2022

Posada (Valdión) - Bufón - Peña Bermeya - Torres Pardas - Pambuches

27 d'Agostu de 2022

Track: Posada (Valdión) - Bufón - Peña Bermeya - Torres Pardas - Pambuches

Dempués del entrenu pel Picu Gabanceda, del día anterior, esta vegada ya tocaba ruta con tol equipín al completu, averándose hasta Posada de Valdión, Carla y Mario del GM Xuan de la Borrina y dos collacios, Ani y Ruben, del grupu xente qu'axuntámonos pa esguilar davezu.

Como siempre digo, val más ser pocos y afayaizos que munchos y terminar chifláu, asina que teníemos per delantre dellos díes de monte y furgonetéu con un plan trazáu qu'esperábemos llevar a bon puertu. De primeres decidimos camudar l'orde de les rutes per Valdión, entamando per una ascensión circular a la Peña Bermeya, que ya ficiéramos va munchos años colos collacios del Baskonia.

Semeya de salida, nunca meyor dicho, en Posada (922 m)

Llueu de saludar a munchos conocíos del mundiu de les carreres pel monte, ya que teníemos el pueblu abarrotáu de furgos y corredores, pa la Transvaldeónica, escapamos pali pali, hacia'l seutor de la Bermeya, ascendiendo hacia Pantivalles, con unes ñubes amenaciantes, que bien ceo, amosaron les sos intenciones con unes tronaes perimportantes.

Al altor de la fonte d'Hurdén, nun mos quedó otra qu'abelluganos media horina embaxo'l fayéu, a la espera que pasara la tormenta, enantes de poder continuar camín pela Llera Pambuches hacia la Pandona, demientres echábemos un vistazu a la baxada que nos diba esperar pela canal de Pambuches.

jueves, 1 de septiembre de 2022

Pandetrave (Valdión) - Picu Gabanceda - Susiella - Altu Vallosero

26 d'Agostu de 2022

Track: Pandetrave (Valdión) - Gabanceda - Susiella - Vallosero

Tornamos a los Picos d'Europa, col envís de continuar la tradición del GM Xuan de la Borrina, en forma d'especial montañera nuna Travesera de Picos pa esta temporada. El casu ye, que l'alcuentru col restu la xente del grupu yera en Posada de Valdión, ya que teníemos la idega de pasar un par de díes per esta comarca y pente salir de trabayar el vienres y aportar al pueblu, dábame pa salir a entrenar un ratín y de pasu tachar un de los Dosmiles Cimeros de Picos

Pa ello, pegué en solitariu la xatada conductora, con parada incluyía en Riañu, al pasu de la Vuelta Ciclista, pa siguir per Portilla la Reina, hasta'l Puertu de Pandetrave. La mió idega yera facer una ruta más llarga con ascensión a L'Escañu, l'otru monte de segunda categoría que fáltame nel llistáu de Picos, pero viendo la hora de llegada al puertu, diba ser dafechu imposible, asina que'l Gabanceda diba ser l'oxetivu del día.

Partimos del Puertu Pandetrave (1561 m)

Así qu'a les 5 y media, bien pasaes, salgo corriendo dende Pandetrave, pista arriba, primeru per monte baxo y llueu per un pequeñu fayéu hasta aportar a un colláu con baxada hacia'l valle de la riega Gabanceda. Nel intre, la borrina andaba esnalando pela fastera norte del Gabanceda, dexándome namái qu'acolumbrar les cumeres de los macizos del Cornión y Urrieles.

jueves, 25 de agosto de 2022

Marabiu (Teberga)

20 d'Agostu de 2022

Dempués de volver per Cuanxú, llueu d'un añu ensin tastiar la so pulidísima roca, ficimos un viaxe de carreteres perdíes astures hacia Teberga, parando a sobar en Yernes, nel conceyu de Tameza. Dempués, viendo les temperatures que nos veníen, decidimos siguir hacia Teberga col envís d'esguilar en Marabiu, llueu d'unos cuantos años tamién, ensin pasar pela escuelina.

 
Pateín hacia'l seutor d'Alimoches

La idega yera conocer el seutor d'Alimoches así que tomamos un almuerzu nel guapu aparcaderu al llau de la ermita Santana y caleyamos hacia'l seutor apriesa, enantes de que'l sol ficiera actu de presencia. Tardamos un pelín en situanos mirando los croquis y decidímonos a probar una variante de la vía Alimoches que marcaba'l croquis como 6c, viendo que la línea yera bien guapa.

Vistes increyibles de tola llínea del cordal del camín de la Mesa

Ellí que metíme, sacándola a vista, pero tengo que decir qu'ente lluchar con una yedra castrona y apretar de coyones faciendo la travesía y saliendo del techín, tuve que tar na guapa placa d'arriba, reposando un bon ratín con una petada curiosa jajaja.

Perguapos collores de la roca caliza del seutor Alimoches

Llueu tocaba-y el turnu a Anna, que siguió los mios pasos, faciendo meyor que yo la salida del techu, pero liose un pocu colos pies pa salir y colgó, faciendo'l restu la vía como si na. La pena, fue que'l sol entamó a facer actu presencia y nun pudimos dar dengún pegue más a esta vía nin a denguna otra, aparte que teníemos prisa pa baxar a Entragu, al vermú con conciertín.

Anna na variante d'Alimoches
 
Como yera d'esperar tuviemos tola mañana sólos, ensin ver namái qu'a montañeros, porque los escaladores nin apaecer per esta escuela tebergana. Más tarde, pudiéramos comprobar que taben toos pa los seutores de Gradura n'Entragu, como suel pasar siempre, así qu'apuntaremos Alimoches en Marabiu, como seutor perfeutu pa tar tranquilinos esguilando pela mañana.

Perguapu seutor d'Alimoches en Pena Gradura
 
El restu del día, pasámoslo ente vermú con collacios, bañín nel banzáu con Kíla, un peguín fanáticu na esplanada a la solombra y echar un gabitu nel Esguila la Nueche, organizáu pela Aguja de Sobia, onde pudimos echar unes rises y esfrutar de los más fanáticos del aparcaderu d'Entragu, apretando col frontal y baxo la lluz de los focos na Esplanada.

Marabiu
Croquis modificaos de Marabiu por mor de  Piratas Free. Gracies y col so permisu.


martes, 23 de agosto de 2022

Cuevas (Ayer)

13, 14, 15 d'Agostu de 2022

Dempués de casi dos años con ganes de volver a Cuevas, pero que siempre por una cosa u otra nun mos decidíemos a arrancar hasta esta escuela, aprovechando un puente y que taben per ellí dellos collacios, conocedores de la escuela, nun hubo dubia y plantámonos el sábadu pela mañana con ganes de trepar.

Veníemos d'otros dos díes esguilando per Morcín, asina que tomámoslo con calma, almorzando en Felechosa, aportando al aparcaderu de Cuevas un pelín dempués de la 1 la tarde. Ellí alcontramos a tol equipín del Pulga, pudiendo conocer a grandes escaladores y meyores persones, coles que pasamos tres díes estupendos.

Pateín pelín llargu pero prestosu a la solombra del fayéu del Val.le Melera

Nun sólo nosotros, pasamos tres díes xeniales, sinon que Kíla, esfrutó como una titana los baños nel rigu Braña y l'accesu pela viesca hasta'l seutor, ya que la fueya, el prestosu camín que ya conocíemos d'ascender a Pena Melera y la solombra nel pié de vía yeren perfeutos pa pasar unes tardes fanátiques d'esguilada.
 
El primer día, dedicámonos a rodar un pocu pa facenos cola roca, faciendo dellos sestos de gran calidá, pente'l 6b y el 6c, destacando sobre tou El Home del Bosque (6b) y Mar de Huecos (6c). Al día siguiente, llueu d'una cena furgonetera estupenda y delles birres tranquiles nel apartaderu, tornamos a xubir hasta'l Bosque, centrándonos nun 7a perencomendáu como ye Fuentes de Invierno, que ya probara Anna'l día anterior.

Santos gustándose nuna vía de calentar

Llueu d'una pringada un pocu tonta nel primer pegue, pudimos facela al segundu, esfrutando tola vía munchísimu y llevándosela tamién al segundu del día Anna, colo que ya baxamos encantaos hasta les furgonetes pa meter un pocu les piés nel rigu y dir cenar hasta'l cercanu merenderu de Cuevas.

L'últimu día, otra vegada tocó la xubida llarga pero guapa hasta'l Bosque, onde ya tol mundiu tenía claru los sos proyeutos del día. Nós, ya echáremos la vista nun 7a+ (Celeste) con un pintón brutal, anque por otru llau ver al Pulga y Juanín probar víes de chorrera, taben poniéndonos los dientes mui llargos.

Juanín probando un 7b+ atómicu

Aún así, entramos a la Celeste, tocándole'l turnu a Anna de montar, pegándose una aventura xabaz, quedándose a falta d'una cinta ya qu'había un pire pa matase. Llueu de munchu llucha, xubí yo, yendo encadenando a vista, poniendo esa cinta, pero llegando petáu, nun me quise xugar el vuelu y aceré, pa mirar bien como facelo ensin matase.

Al siguiente pegue ya salió ensin problemes, dándome cuenta que nestos graos voi perbien y que tendremos que continuar apretando nos proyeutos, pero que bien sienta, baxar un pocu'l nivel y facer munches víes nueves y conocer seutores nuevos, resultando un finde de díez con tola xente que coincidimos.

Cuevas
 
Croquis modificaos por mi de la escuela d'escalada de Cuevas. Gracies y col so permisu.
 
-----------------------------------------------------------------------------------------------

viernes, 19 de agosto de 2022

La Perera (Tierras del Burgo) - Madruédano - San Cristóbal - Modamio

5 d'Agostu de 2022

Track: La Perera (Tierras del Burgo) - Madruédano - San Cristóbal - Modamio

Mítiques vacaciones d'Agostu per Soria, viendo a la familia y collacios, pero nun branu, nel que ties tan poques hores "actives", que nun seya tar a remoyo como los garbanzos, esta vegada nun pude dir facer monte pel Sistema Ibéricu o el Central, a malpenes una horina del pueblu.

Asina que magar, d'un par de díes de salides correnderes pela redolada de Recuerda, decidí continuar tachando dalgún vértice más de las Tierras del Burgo, que ye la comarca onde asítiase'l municipiu de Recuerda y per onde salgo a facer salidines correndero-montañeres.

Partimos de La Perera (1066 m)

Esta vegada diba tirar direición Sur, hasta La Perera, onde ya ficiéramos una guapa ruta conociendo la Hoz de Caracena. D'otra miente, llegárame a les miós oreyes, que nesti pueblu, equipáranse víes d'escalada, asina qu'antes de les 9 la mañana, taba echándo-y un vistazu a la cueva d'entrada'l pueblu onde pude ver 4 u 5 víes equipaes, qu'espero anime pa equipar dellos muros bordilleros nesti mesmu farallón rocosu.
 
El casu ye que dempués d'entreteneme un ratín cola cueva, aparqué nel pueblu y salí corriendo pela Dehesa, con tovía ciertu fresquín mañaneru, hasta la mecederu de la riega de Madrúedano y el Fuente Arenaza, onde tendré que desviarme a la mandrecha.

martes, 16 de agosto de 2022

Sobrefoz (Ponga) - Solafoz - Les Llampes - Mayá Maciédome - Robléu - La Roza

24 de Xunetu de 2022

Track: Sobrefoz (Ponga) - Solafoz - Les Llampes - Mayá Maciédome - Robléu - La Roza

Dempués de la ruta nel Porrón de Viañu, tocaba pasar la tarde per Sobrefoz, dándonos un refresquín nel banzáu de la entrada'l pueblu, onde dexamos les furgonetes pa sobar y fuimos al pueblu a pasar el restu la tarde, tomando daqué nes terraces de los chigres del pueblu, hasta que cenamos en Casa Severa, de manera increyible.

Al día siguiente, tocó madrugón por mor de la meteo soleyera que daben, cafetín na furgo, dalgo d'embutíu y dempués de despedinos d'Anna que tiraba pa la playa, Mario y yo, salimos del pueblu so les 9 y media la mañana, col envís de reconocer tol valle de Solafoz.

Partimos de Sobrefoz pegando la solana de bona mañana

Digo reconocer, porque n'anterior visita, baxábemos con tal pingadura de nuesa travesía dende Tarna, que nun la esfrutamos como debiera, asína que xubimos hacia'l colláu Calviáu, pasando pembaxo la cueva la Llosa y siguimos siempre per bon camín hasta topanos cola riega Solafoz, la cuál debemos siguir, abandonando'l claru camín que lleva hacia les cabañes de la Porquera.

miércoles, 10 de agosto de 2022

Venta La Faeda (Ponga) - Riega'l Cabañón - Porrón de Viañu - Miédome - Salguerosa - Ventaniella

23 de Xunetu de 2022

Track: Venta La Faeda (Ponga) - Riega'l Cabañón - Porrón de Viañu - Miédome - Salguerosa - Ventaniella

Dende la ruta Ambenes na primavera na qu'esfrutáremos como guah.es, conociendo delles fasteres nueves, ya teníemos na tiesta tornar a Ponga a pasar un finde per Ventaniella. Aprovechando que la intesidá del viaxe al Pirinéu d'esti añu, dió pasu a cancelar la nuesa mítica Travesera de Picos en Xunetu, ensin dubiar, apeteciónos a Mario y a mí facer un finde montuno y averámonos hasta'l pueblu de Sobrefoz pa ello.

A esti primer día, axuntábense Anna y Benjamín, quedando como siempre nel chigre La Huera, en Cangues d´Onís, pa siguir hasta Sobrefoz, onde continuaremos pela pista que xube hasta Ventaniella, aparcando los coches na Venta La Faeda, anque a dicir verdá, pudiéramos siguir a un bon apartaderu en Fonperi.


Partimos de la Venta La Faeda (885 m)

Una vegada que tamos preparaos, saldremos pista arriba pa facer los 2.5 km que sepártanos de Fonperi, durante dalgo más de media horina. Nesi trayeutu, dexaremos a la nuesa manzorga'l desvíu hacia la Bustariega, mayáu, onde podriemos continuar hacia la collada Obrangu pasando pelos montes de la Recabada y el Traveséu, pero nun va ser el nuesu percorríu nesti día.

lunes, 1 de agosto de 2022

El Fitu (Caravia)

 17 de Xunetu de 2022

Finde de fola de calor terrible n'Asturies, sofriendo y esfrutando a la par, el sábadu en Parres, corriendo la xubida a la Mota Cetín, carrera que seamos sinceros nun te dexa pa munches mavariyes al día siguiente, pero bono, aprovechando que tábemos pel oriente, dormimos en Caravia y aprovechamos pa xubir el domingu hasta'l seutorín del Mirador d'El Fitu, anque fuera por poner un pocu los gatos y facer unes víuques tranquilamente.

Anna col sol amenazante tres de sí
 
El calor yera insoportable, pero a sabiendes qu'esti seutor tien sombra hasta la dos o tres, tuviemos tiempu a facer unes cuantes víes y de pasu esfrutar de les vistes de la costa oriental astur. Dicir que pesie a ser graos "cenciellos", prestónos escalar de nuevu en cuarcita, cosa que nun facíemos dende les visites a Panondres.

Vista de la costa asturiana
 
Anna más motivada que yo, fue montando les víes, d'esquierda a drecha, hasta un 6a+ nomáu el Repetidor mui guapu y yo col sol amenazando y colos pies, que nun soportaba poner los gatos una vía más, dexamos el restu les víes pa otra visita, ya que ye un sitín pa tar tranquilu, ya incluso quedar a dormir arriba nel ampliu aparcaderu.

Plaquina de cuarcita curiosa pa echar una mañana
 
Coles mesmes, escapamos pa la sablera con ganes de bañanos y dexando deberes pa otra visitina al menos y tamién con ganes de conocer otru seutor más que ta pola zona, con graos más apretones, asina que toca volver de xuru.

 
Croquis por mor del collaciu Miguel Poch y en libre na web de RocaVerde. Gracies y col so permisu.

jueves, 28 de julio de 2022

Xubida Mota Cetín (Parres)

16 de Xunetu de 2022

Track: Xubida a la Mota Cetín (Parres)

Web del Trail: Xubida a la Mota Cetín

Clasificaciones: Clasificaciones 2022

Hai carreres y carreres, hailes mui profesionales y hailes de pueblu, hailes con grandes nomes que sólo tienen eso nome, pero nun tienen alma, nun tienen sentimientu y sobretou, tan feches más pa ganar perres que por amor al monte y al deporte y sobretou mirando mui pocu pal corredor.

Un exemplu claru ye la GTPE, una carrera con un percorríu, qu'a min, como montañeru gústame, sobretou na parte de Pandescura y Casañu, pero nin se curraron una señalización curiosa, nin desbrozaron, nin cuidaron al corredor nel avituallamientu final y lo de les duches pa 1600 corredores ye pa mexar y nun echar gota.

Aportando al cumal de la Pica Cetín

Y na otra punta del mundiu corredor, alcontrámonos cola Xubida a la Pica Cetín (Mota ye tola fastera boscosa pembaxo'l cumal), na qu'un pueblu volcáu organiza una carrerina pa dempués de les fiestes del pueblu, na que tienen el percorríu más guapu y montañeru que podemos facer per Asturies.

Facía tiempu que nun tornaba a la Mota Cetín y que meyor que volver nuna carrera, na que'l percorríu, perfeutamente señalizáu y perféutamente desbrozáu fue una delicia pa los pocos corredores que nos animamos a participar y ye que, claro, una carrera ensin "gran nome" y con unos desniveles perduros y mui montañeros, la xente desapaez del mapa.

Collacios que presta alcontrar nes carreres (Miguel, Blas, Carlos)

Aún así, los pocos corredores qu'animámos a esta maraviya de carrera, tuviemos la suerte, nun día de fola de calor, de sentinos como en casa, sofriendo muncho col desnivel, pero sobretou col calor, pero siempre había dalguien de la organización con una garrafa con agua al llombu, enmediu'l monte, nuna cresta, daba igual, siempre teníemos el sofitu de la organización y voluntarios.

Nun tengo más que pallabres d'ánimu pa la xente'l pueblu, pa que siga con esta carrera, porque lo qu'esfruté hasta les hores de más calor, nun lo sabe naide, sobretou na xubida a la Pica Cetín pel fayéu de Cea, pindisimu pero una auténtica maraviya.

Silvia esfrutando de so carrera femenina en solitariu

Llueu na baxada, tocaba dir regulando ya qu'entamaben a apaecer los primeros avisos y eso que los niveles de beber agua y tomar sales fueron adecuaos y superiores a lo mió normalidá, pero ye que correr hores penriba los 30 graos faise mui duro y el cuerpu sufre abondo.

Nun sólo la xubida ye llarga y pindia hasta Cetín, sinon que dempués d'una bona baxada, alcontrámonos con otra xubidona que lloñe de terminar ceo, allárgase durante un crestéu, nel que La Cogolla pon el finxu final, pa d'una vegada entamar a baxar hacia'l pueblu.

Esfrutando del frescor del fayéu de Cea

Alcontrándonos en varios tramos colos corredores de la curtia, pero dura tamién de 15 km y colos andarines, vamos animándonos toos, ufreciéndonos agua los andarines y duchándonos literalmente la xente de la organización siempre atentos a como tamos físicamente... supongo que les nueses cares nos distintos pasos, facíen que la xentes esmoleciera un pelín.

Pero como too nesta vida, tien un final y aportamos a meta, mui contentos col nivel de carrera que ficiera, sofriendo nos 27 km con 4400 m de desnivel, pero faciendo una carrera na que sentí que lu dí too, que controlé y corrí onde tocaba y teniendo claro, que lo del calor nun lo llevo bien, llegando a meta fundíu como pasárame tamién nel Desafíu Somiedu.

Increyible carrera montañera per Parres

Y cuando llegues a la meta, dempués de dalo too y alcuéntreste a tol pueblu, volcáu, trabayando pa preparar una comidona, na barra atendiendo con una sorrisa, pues sólo pue pasar lo que pasó, que móntase una folixona, con fartura, birres varies, xente baillando y esfrutando d'una carrera de pueblu, fecha con ilusión.
 
Fué un auténticu placer participar nesta carrera a la qu'espero volver añu tras añu, animando a más xente a participar ya seya pa caleyar o correr y pasar el día nesti guapu pueblín. Fue'l broche perfeutu pa esta mini temporada de carreres na qu'entamé tarde y ya descansaré hasta Setiembre.

Camudando'l Camín na Roza en Parres