martes, 4 de octubre de 2022

Riumiera (Cantabria)

Del 7 al 9 de Setiembre de 2022

Continúabemos de viaxe per Cantabria y díbemos mover l'equipu pa otru valle, menos conocíu no qu'a la esguilada refierse, pero con un potencial brutal, ya que tan sólo con dir conduciendo peles sos carreteres nun podemos otra cosa que mirar pa tola natura y la cantidá de parés a un llau y al otru del ríu Miera.

El paisaxe de los valles pasiegos ufrecen una esguilada tranquila

Tamos nos Valles Pasiegos, toa una maraviya de montes verdes y parés calizos onde paez que'l tiempu nun pasó y que la xente de los pueblos vive fuera d'esti mundiu global, que d'otra miente tanto dañu ta faciendo. Sicasí, tamién hai que dicir qu'en Sanroque del Riumiera, enxamás viera tal nivel de facismu de remembranza, al entrar a un chigre del pueblu a tomar una cervecina.

Aportamos a las Placas de Sanroque Riumiera

Menos mal que tuviemos como campu base, el camping de Lunada, un pequeñu requexu de bon tratu y amabilidá, ente un nivel de ranciedá enorme del pueblu y que pesie a durmir na furgo nel aparcaderu d'enfrente, tuviemos cenando y almorzando tolos díes enantes de xubir a esguilar.

Muru estráu de plaques ablucantes y dalgunes víes de chorreres

Na esguilada, centrámonos en dos seutores, Las Placas de Sanroque y Merilla de Sanroque, el primeru siendo un seutor más de placa, como'l so nome indica y el segundu un ablucante muru enllenu chorreres nel que tan sólo los llocales tienen información, cosa que ye una costante en munches zones de Cantabria.

Relaxación, paisaxes, perbones esguilaes... pocu más se puede pidir

Los dos primeros díes fuimos hasta Las Placas, onde alcontrámonos un preciosu seutor, con accesu bien cuidáu y un trabayu d'equipación de mui altu nivel, col nome y grau de la vía en casi toes les víes, na so primer chapa, lo que fai una delicia dir per ellí y restolar cual va ser el nuesu oxetivu.

Pegues fanáticos en víes de gran calidá nel plaques de Sanroque

Llevo un viaxe en plenu baxón físicu, teniendo que repetir un 6c el primer día y probando más tarde un 7a/+ (Minichorra) que tuve qu'esperar al día siguiente pa encadenalu, al igual qu'Anna y Santos, dexando d'escalar inmediatamente, ya que mi cuerpu nun daba pa más dempués d'esautamente 8 díes siguíos trepando.

Seutor increyible en Merilla de Riumiera

L'últimu día, camentando un día ñublu, como así despertara, averámonos hasta Merilla, murazo onde tuviéramos el primer día namás que dando un paséu, alcontrándonos con Oscar, que comentáranos dalgunes pincelaes en forma de graos, pa llevar un pocu de referencia a la hora de probar víes.

Les chorreres de Merilla... cimeres protagonistes d'esti ablucante paré

La verdá ye que faise raro, nun contar con croquis, pero bono, esto ye Cantabria, asina que tiramos, cuando a la fín entró la solombra a la vía a probar un 7a (Sin nome, que sepamos) de pura chorrera, con un pasín intermediu y teniendo qu'aguantar hasta cadena nun techín dalgo físicu.

Terminaba'l viaxe con otru encadene agónicu, diciéndome'l cuerpu que diba tocando ya descansar y tol equipu d'esti road trip cántabru, empobinámonos hacia la costa al alcuentru del atapecer en Liencres, onde cenamos cola despedida del sol, pal día siguiente dar unos paseinos y baños con Kíla y Lolo, nes sableres y terminar el viaxe como lo entamábemos, una visitina a Xena que bien se lu merecía.

Camudando'l Camín nos Valles Pasiegos
 
Encadenes:
 
Placas de Riumiera:
 
El árbol de la vida (6c)
Minichorra (7a+)
 
Merrilla:
 
Vía 17ª pola mandrecha (7a) 

No hay comentarios:

Publicar un comentario