Valdorria (Los Argüeyos) - Monte Bucioso - Peña Valdorria

24 d'Agostu de 2025

Track: Valdorria (Los Argüeyos) - Monte Bucioso - Peña Valdorria

Dempués d'un mes sin dar un pateín curiosu, por mor de vacas, esguilaes varies y calor infame, salimos el GM Xuan de la Borrina, baxo mínimos, yéndonos hasta Los Argüeyos en Llión, onde tantes y bones rutes llevamos faciendo a lo llargo de los años. 

Como non, escapámonos hasta'l valle del rigu Curueñu, onde ficiéremos el branu anterior dos grandes rutes al Cuetu Ancino y Prau Llano y a la Peña Forqueta, quedándonos esta vegada na vera occidental del rigu, yéndonos hasta'l pueblu de Valdorria. 

Salimos de Valdorria (1355 m)

Magar del almuerzu y xuntanza n'Ezequiel, salímonos hacia'l valle del Curueñu, xubiendo pela pindia carretera hasta Valdorria, onde namás llegar ya vemos que pesie al madrugón, el día, nos va a apretar enforma'l calor. 

Preparamos trastos, contando con una ruta rápida, poro nun cargamos n'escesu d'agua y cruciamos les cases del pueblu, pa salir per pista hacia'l valle de Valdecesar, que si sólo quisiésemos facer la crestería del Valdorria, tendríemos de siguila hasta los Llamargones primeru y llueu al colláu Bucioso, ensin denguna dificultá.

Avanzamos per Valdecésar cruciando a la otra vera onde atopamos el monte tomáu

Nós, traveseramos la riega Valdecésar y saldremos per una pista n'envueltes n'ascensión hasta'l colláu de las Astillas, onde alcontrámonos con una sorpresa, ya que contábemos con un monte más o menos llimpiu, de tipu llionés y atopamos un monte de pinos mozos y escobes, terminándose la pista y nun alcontrando dengún rastru de senderu.

Dempués de munchu bregar salimos a fastera más llimpia

Como se puede imaxinar, va tocános bregar pente escobes, restolando traces de senderu y pasando pembaxo les rames de los pequeños pinos hasta Collamuelas, onde podemos entrar na propia crestería cuarcítica, alcontrándonos dalguna forma nes peñes mui curioses y un avanzar más seliquino, ameyorando a cada pasu que damos y con dalgún puntu de trepadina divertida.

Esfrutamos del Monte Buciosu ensin dificultaes hasta su puntu más altu el Sancenas (1962 m)

Según vamos avanzando hacia'l monte Bucioso, tendremos menos dificultaes y les nueses piernes esgatuñaes dexarán de sufrir, pasando primeru pelo que podría ser el Picu Bucioso (1898 m) pa siguir caleyando cenciello tola arista, hasta'l puntu más altu d'esti monte Bucioso, el picu Sancenas (1962 m).

Nun tengo mui claro los nomes de los cumales d'esti monte, poro voi dexar al Bucioso al entamu de la arista y facer caso al nome del Sancenas como puntu más alto de 1962 m, pero diría que nómase Bucioso a tol monte en realidá.

Abandonamos Buciosu pela so collada pa continuar a la crestería del Valdorria

Coles mesmes, tachamos otru Monte Cimeru del Cordal Cantábricu y coles mesmes, con calor abondo y mosquines repunantes nel cumal, escapamos hacia la collada Bucioso, per onde entraremos a la fín, a la crestería de Peña Valdorria, camudando'l tarrén cuarcíticu de vexetación y peña prieta, pola blancura de la caliza llionesa, nun amplia y caótica cresta, pela que tendremos que dir navegando con xeitu.

 

Perguapa crestería pasando pel Cantu'l Chozo hacia'l final del cresterón de Valdorria

Ensin mayores dificultaes diremos superando espolones calizos, caleyando per praos, baxando a dalgún foyu y tornando a xubir per crestones calizos y así durante aproximándamente 3 kilómetros y mediu, pasando a metá de camín pel Cantu'l Chozo (1884 m), piquín importante, dientru d'esta travesía y xusto al final, tendremos una importante baxada p'acceder a la Peña Valdorria.

Entramos al cumal de la Peña Valdorria nun guapu tramu final pero con un calor descomanáu

Esta baxada nos dexará nel Portillo del Agua (1812 m), que nos dará pasu al caberu ascensu per una pindia canalina y baxo un calor sofocante, hasta algamar los 1924 m de la Peña Valdorria, la cual cellebramos pente milenta mosques y escapamos como podemos p'abelluganos y poder xintar dalgo con un pocu de tranquilidá.

Cumal de la Peña Valdorria (1924 m)

Malpenes soi a dar un par de mordiscos al bocata, ya que llevamos tola crestería baxo una solana brutal y lo que ye peor, calculamos mui mal l'esfuerzu pela primer parte del monte Bucioso, lo que fízonos gastar más agua de l'albidrada y vamos un pelín fadiaos nesti sen. Poro, prefiero nun xintar más y entamamos la baxada, decidiendo baxar corriendo al pueblu col envís de garrar agua pal grupu.

Descensu increyíblemente rápidu hacia'l pueblu de Valdorria

Menos mal que la baxada de 600 m hasta Valdorria, ye perfeuta pa entrenar, asina qu'en media hora plántome na carretera que va pal pueblu y eso que los milenta h.itos al final de la canal despistáronme y lleváronme a un barrancu nel que tuve hasta que destrepar sacándome a la carretera más baxo de lo que me gustaría, asina que tocó xubir de nuevu pela carretera hasta Valdorria.

 

Dexé la mochila nos coches y fue a buscar una fonte nel pueblu, alcontrando un pilón perguapu, onde pude garrar agua xelada y llevala a los compañeros según fuero llegando, Pepa primeru, que tomó bien el desvíu y llegó estupéndamente y Maria y Rober que tuvieron el mesmu fallu que yo, yéndose hacia'l barrancu.

 

En resume, ruta bien guapa que si la tuviera que tornar a facer, tiraría a la crestería del Valdorria namái o acercaríame nun sube-baxa hasta'l Sancenas dende'l colláu Bucioso ya que penamos abondo pela primer parte del Bucioso, faciendo nel nuesu caso, un total de 15,5 km con un desnivel acumuláu de +/- 1015 m, nuna duración de 7 hores y 20 minutos, lo que diz a les clares les dificultaes p'avanzar pel Bucioso na primer parte.

 

 

Camudando'l Camín cola crestería del Valdorria