GM Xuan de la Borrina

Somos un grupu de collacios de Xixón (na mayor parte) que dempués de llevar unos añinos nesto de peleanos pel monte, facer rutes, etc… y como nun somos de siguir el camín marcáu polos demás, decidimos facer un grupu propiu de montaña.

Asína, podremos continuar colos nuesos cafetinos d’enantes y cerveces de dempués de la ruta, les cagaes na creación de les rutes sobre papel, les discusiones en plena ruta, los bonos momentos cuando too sal bien, y demás hestories que nos faen deprender pasín a pasu a caleyar el camín pel monte y tamién a camudar esi camín de la nuesa vida.

Dempués de munchos papeleos, notarios, conseyeríes, a la fin somos un grupu más na federación de montaña d’Asturies formando parte de la familia montañera asturiana, dando amás un toque asturianu y un tanto desconocío al poner al grupu’l nome d’un ser mitolóxicu como Xuan de la Borrina.

Esti paisanu, que nos protexe d’un de los más temíos contratiempos na montaña, como ye la borrina, ñebla, neblina, ñublina.., ye’l personaxe sobrenatural más invocáu polos pastores pa que’l peligru de perdese pel monte, pase y s’espeye’l camín a tomar.

Xuan de la Borrina, tamién nomáu Xuan Blancu, Xuan de Madruga, Xuan de Riba o Xuan Barbudu preséntase polo xeneral acompangáu d’una perra llanuda y de la so muyer desnuda, que sigún dicen tamién tien barba.

D'esta miente, tenemos un cantar que recitar, cuando les coses tórnensen peligroses pola neblina:

Escampa, nublina,
de valle en vallina,
regueiros abaxo,
canales enriba,
qu’ehí vien Xuan Blancu
xurando y votando
que te ha de comer,
cola sua muyer barbuda,
y la sua perra llanuda.

Escampa neblina,
valle, vallina,
comieron los llobos
la cabra cornina;
comieron los güesos,
dexaron la cecina.
Ehí va Xuan Blancu
col perru blancu,
la muyer desnuda,
la perra cozcorruda.
Ehí va Riaño
xurando y votando
que te va a cortar un calcañu.


Contautu

Si quies contautar col Grupu Montaña Xuan de la Borrina de Xixón (Asturies), ties a la to disposición el siguiente mail:

GM XUAN DE LA BORRINA

No hay comentarios:

Publicar un comentario