miércoles, 30 de junio de 2021

La Bocandia (Tameza)

12 de Xunu de 2021

Finde calurosu nel que buscamos pa onde tar esguilando tranquilamente, ensin aglomeraciones, poro así sobre la marcha decidimos dir conocer un seutor del qu'oyéramos falar va tiempu en Tameza: La Bocandia. 

Esti llugar ye más conocíu pola so cueva, de la que podemos atopar dalgo de info nel blogue del collaciu Dani Asturwaterman. Como ya nun tien chicha pa venir facer dalgo d'alpina o deportiva con un servidor, dedícase a rapelar y arrastrase pelos barrancos y covaches jaja... ye broma... semeyaques que se gasta'l compañeru y perbones actividaes en tolos medios.

Averamientu selváticu y pindiu hasta'l paré de la Bocandia

Magar d'echar un vistacín a la cueva, salimos a la manzorga d'ella per un senderín equipáu con cuerdes, ya que'l tarrén d'averamientu al paré ye pindiu enforma. Perbon trabayu de los equipadores, ya que col tarrén moyáu les cayides taríen más qu'aseguraes.

Aportamos al paré, con árboles nel pié de vía pa tar a gustu, mientres entra la solombra a partir de les 3 de la tarde, anque ye bon llugar pa esguilar tol día. Namái, echar el primer güeyu ya vemos que les víes van ser recies, asina qu'escoyemos un 6b cortín, de primer llargu (Yernes 13), teniendo qu'apretar de coyones pa poder encadenalu.

Anna tastiando la roca tamezana

Dende ésti montaremos parte d'un 6c, pringando nun pasu de placa infame, nel que solucioné magar de colgar saliendo pela mandrecha pa siguir per un tramu de chorrera guapu enforma. Si ésta vía ye buena, anque dura, la de la so mandrecha, Stanlingrado ye brutal, anque tien un pasu mal rolleru pente la segunda y tercer chapa.

Como ye vezu, nuna primer visita a un seutor, los encadenes nun suelen tar al orde del día y d'esta vegada nin Anna nin yo, llevamos dengún d'estos 6cs pero bono, quedamos con ganes de tornar per Tameza pa trepar relaxaos pero sabiendo qu'hai que venir con ganes d'apretar enforma.

Camudando'l Camín pelos parés de Tameza

viernes, 25 de junio de 2021

Baíña (Mieres) - Picu Magarrón

 23 de Xunu de 2021

Track: Baíña (Mieres) - Picu Magarrón


Tarde de San Xuan, horariu de branu, terminando de trabayar prontín, tenemos tiempu de sobra pa preparar una rutina d'unes hores moderaes y conocer un pocu más la montaña central asturiana. Nesti casu, el nuesu oxetivu yera dar preste al techu del conceyu La Ribera, asina que siendo bon conocedor de la zona, por mor de ser fastera d'escueles d'esguilada, averámonos hasta Baíña nel conceyu de Mieres.

Partimos del pueblu mierense de Baíña (177 m)

Vamos colo mínimu, mochilina con agua y a furrular, saliendo de Baíña, per camín balizáu y cómodu hasta'l barriu de Valmurián de Baxo, onde topámonos con un guapu enrame del pozu'l pueblu. Equí, camiento que ye bon sitiu p'aparcar y averase a ún de los seutores d'escalada de Baíña, Fraes, ensin comenos tanto desnivel p'aportar hasta'l guapu espolón calizu nel qu'alcuéntrase.

Facemos camín seliquín hacia Valmurián de Baxo
 
Fadremos dellos metros de carretera hasta'l barriu de Riba de Valmurián y siguiendo los guapos cartelos del PR de la Xerra de Llagos, entraremos en camín empredráu per Escalabá, que llevarános hasta la Vega Foxá, caleyando ya pela parte alta de Llagos hacia la Campa Les Monxes.

De Valmurián de Riba salimos per camín hacia lo alto la Xerra Llagos

Nun puntu'l camín, alcontraremos una opción alternativa pa baxar per una guapa viesca hacia Valmayor, pero nós, siguiremos hacia La Minona, onde alcontramos restos de lo que creyemos ye'l llavaderu y la bocamina. Perderemos un ratín en ver esti curiosu llugar y siguimos camín entrando nel matu de la ruta nunca meyor dicho.

Pasamos a conocer la Minona antes d'entrar al infiernu cotoyil

Perpasamos la bocamina y siguimos per estrechu camín, pasando una portiella, pa entamar a bregar coles cotoyes y escayos. El camín, ye evidente, pero ta mui tomáu, tanto qu'intentamos ensin ésitu tirar a pinchu hacial'l cumal de la Xerra Llagos, el Picu Magarrón.

Bregamos como xabalís hasta alcontrar el bon camín hacia'l cumal del Picu Magarrón

Cualesquier intentu, ye imposible, poro tornamos a la "sienda", miramos el GPS y vemos que da munchísima vuelta pa entrar pela arista oeste. Damos una última intentona, alcontrando un claru foyu en mediu la viesca, referencia importante, la cual travesamos saliéndonos a la manzorga p'alcontrar un bon senderu, que va dir sacándonos cenciellu, per tarrén más llimpiu, hacia l'Altu Magarrón.

Cume nel Picu Magarrón (654 m) techu del conceyu La Ribera

Aportaremos a una antecume y pela cumera'l monte, ascenderemos al puntu  más altu, coronáu con una cruz, siendo hasta un cumal aéreu y bien guapu. Les vistes tapecíes pel borrín, son casi d'agradecer, ya que tamos na Asturies industrial, con dos térmiques na redolada y dellos polígonos industriales, poro semeya de cumal, techu de La Ribera tacháu y p'abaxo.

Empobinámonos de vuelta per Valmayor

La baxada, fadrémosla hacia'l sur, per onde encomiendo a los posibles montañeros a ascender esti montucu, munchu más llimpiu y claru de camín. Descenderemos per una vallina y tornando hacia l'Este, toparemos de nuevu'l PR de Llagos que vien dende la fastera de la Minona.

Baxamos a les Cuestes pa siguir per carretera hasta Baíña

Ensin fallu posible, baxaremos escayaos pero contentos, pel bon camín de Valmayor, con vistes a los parés del Salgueiru y Figares al fondu. No baxo, enllazaremos col camín que vien dende Valmenor, onde tenemos l'otru seutor d'escalada de Baiña, al que-y tengo munches ganes de facer una visitina.
 
Ensin más, daremos a la carretera en Rozaes, pa baxar a la Viña pa siguir peles Cuestes hasta Baíña de nuevu, completando esta circular de 6,5 km y 480 m de desnivel, na que si vamos pol sitiu más afayaizu, podemos hasta esfrutar de les 3 hores y media de rutina.

Camudando'l Camín na Asturies Republicana

martes, 8 de junio de 2021

Ribota (Sayambre) - La Guariza - Niah.u - Pozalón - Llaete

6 de Xunu de 2021

Track: Ribota (Sayambre) - La Guariza - Niah.u - Pozalón - Llaete

Cola pandemia aselada, a la fin, pudimos axuntanos colos collacios vascos, ya vacunaos, preparando una ruta a la que-y tuviéramos ganes. Comenté-y a Fernan de dir conocer la Peña Niah.u, últimu Monte Cimeru de Picos que faltábame por ascender, así nun lo pensamos y el domingu alcontrámonos almorzando n'Oseya de Sayambre pelín más tarde de les 9 y media la mañana.

El día ta preciosu, asina que'l llargu viaxe paga la pena y eso que comentánmos que nos Beyos taba'l día pelín borrinosu, cosa que nun tuviéramos presente dellos miembros del grupu que veníemos dende Maraña d'esguilar los díes anteriores.

Partimos dende Ribota (526 m)