lunes, 14 de junio de 2021

Peña Manteca (Morcín)

10 de Xunu de 2021

Continuamos col trabayu en Peña Manteca, arrequexaos poles prohibiciones temporales d'esguilada al seutor de la Carba. Dicir que ví baxar a xente del Ramilleru o L'Argayu y tengo munches dubies si entra o non, na fastera restrinxida, por si les mosques, ser sensatos y por esperar mes y mediu, meyor nun esguilar nestos seutores hasta Agostu.

Andrea probando A.Iva... un 6c+ referente na Carba

Na Carba, magar d'encadenar la Purista del A Vista, tocaba buscar otru proyeutín y aprovechando qu'Andrea quería probar la A.Iva (6c+), tando dambes víes al llau, volví a Crucifixión, que-y diera un pegue va munchu tiempu.
 
Encadenando Crucifixión na Carba... con ganes de proyeutar de verdá

A la fín, anduvimos finos y dempués d'un peguín de preba na que pringué na chorrera d'abaxo, nel segundu pegue fice tola parte baxa y salí del techu ensin fallu, pa llevame esti 7b, quiciás un pelín sele, nel tercer pegue en total, lo que diz, que va siendo hora de metese a proyeutar más en serio.

Peña Manteca (Seutores visitaos)

Croquis modificaos por mi de la escuela d'escalada de Peña Manteca, por mor del trabayu de Asturvertical na so mayor parte. Gracies y col so permisu.

-----------------------------------------------------------------

martes, 8 de junio de 2021

Ribota (Sayambre) - La Guariza - Niah.u - Pozalón - Llaete

6 de Xunu de 2021

Track: Ribota (Sayambre) - La Guariza - Niah.u - Pozalón - Llaete

Cola pandemia aselada, a la fin, pudimos axuntanos colos collacios vascos, ya vacunaos, preparando una ruta a la que-y tuviéramos ganes. Comenté-y a Fernan de dir conocer la Peña Niah.u, últimu Monte Cimeru de Picos que faltábame por ascender, así nun lo pensamos y el domingu alcontrámonos almorzando n'Oseya de Sayambre pelín más tarde de les 9 y media la mañana.

El día ta preciosu, asina que'l llargu viaxe paga la pena y eso que comentánmos que nos Beyos taba'l día pelín borrinosu, cosa que nun tuviéramos presente dellos miembros del grupu que veníemos dende Maraña d'esguilar los díes anteriores.

Partimos dende Ribota (526 m)

martes, 1 de junio de 2021

Covarriella (Morcín)

30 de Mayu de 2021

Nin m'alcordaba, los años que nun pasaba per Covarriella con intención de trepar y gracies a les nueves restricciones a la esguilada espublizaes reciéntemente pela Conseyería de Miedu Ambiente, col sofitu impagable de la nuesa Fempa, la de tolos federaos, alcontrámonos cola dudosa oportunidá de trepar en Covarriella, cuando siempre tuvo reguláu.

Eso sí, a los dos minutos de llegar ya pasó'l páxaru penriba'l seutor, pero que sabremos nós los escaladores de los páxaros, si dalgún putu aficionáu a la paxaroloxía, dende'l so coche ta colos prismáticos contando los güevos que se pierden por mor de los putos hippies qu'anden perende colgaos de los parés asturianos.

Tornamos al Monsacru dempués de munchos años

Pues na, como en Figares nun podemos trepar, pues tiramos pa onde supuéstamente sí podemos, pesie a que'l páxaru pasó más cerca qu'enxamás lo viera en Figares. El casu ye que los únicos que faen bien el trabayu son los clubs d'escaladores pero llueu los que deberían currar de verdá tou son torgues y refalfiu.

A lo que vamos, va años, tuviera per Covarriella ya fuera en Alimoches o na Aguya Madalena y quedábame por encadenar Poker de Estrellas, un 6c apretón, así que metímonos ensin más miramientos llevando un fesoriazu a vista, teniendo que dar un segundu pegue por mor de la vía bloquera qu'alcontrámonos.

Anna probando'l Trono de Hierro en Alimoches

Demientres, los collacios, Andrea y Xurde, diben llimpiando seutor vía a vía, Anna y yo, metíamonos a probar una vía equipada va pocu, por otru collaciu, Rubén. Según dellos titanes, la vía podría ser 7a+/b, así que metémonos con xeitu apretador y na cuarta chapa colgamos, magar meter un bloquéu infernal pa chapar esa cuarta.

Colgáu, preba métodos ensin xacíu, pa salir hasta la siguiente chapa nun sé nin como, continuando trepando otra apretada hasta un pasu dinámicu super guapu y placa fina hasta la reunión, hai qu'andar sollerte que dalgo pue romper entá.

Desfacemos camín hacia l'aparcaderu con perguapes vistes

Aportamos a reunión, pero nin idega de como enllazar los pasos pente la 4 y la 6, ya que tamos falando d'un desplome xabaz y unes preses que nun son buzones precísamente. Mi secuencia probada al baxar y nun segundu pegue, pocu tien que ver con un 7a+, ya que paezme que nun fice un bloque tan duru, nin cuando probé víes de 7b+ o 7c.

En resume, munchísimes ganes de tornar a la vía, con más collacios, ya que tanto Anna como Xurde coincidieron en que la vía ye muncho más dura de 7a+, teniendo la opinión de que fácil sedrá un 7b mui duro o 7b+... habrá que siguir trabayándola.

Covarriella (Seutores visitaos)

Croquis modificaos por mi de la escuela d'escalada de Covarriella, por mor del grupu del facebook d'Escuela d'Escalada del Monsacru. Gracies y col so permisu.

------------------------------------------------------------------

viernes, 28 de mayo de 2021

La Pesanca (Piloña) - Monte la Foz - Xerra Trallán - Serondu - Cubilones

23 de Mayu de 2021

Track: La Pesanca (Piloña) - Monte la Foz - Xerra Trallán - Serondu - Cubilones


La primavera n'Asturies, ye falar de verde y falar d'agua y esti añu, por mor del desxelu y les últimes lluvies, tenemos un verde tan intensu, que pasiar per una viesca nun día soleyeru, ye dalgo dafechu imprescindible pa cualesquier amante de la ñatura.

Y cuando quies sentir tol espoxigue primaveral a onde vas, pues a Piloña, como tantes otres vegaes. Enxamás, cansaréme d'encomendar esti conceyu pa facer monte n'Asturies, siempre menos visitáu que conceyos vecinos como Ponga o Casu.

Partimos del área recreativa de la Pesanca (420 m)
 
Esti día ficimos un grupín curiosu, poro tardamos un pelín en ponenos en marcha saliendo casi a les 9 y media, con una temperatura qu'invita a caleyar. Fadrémoslo saliendo hacia la pista que xube hacia les foces del rigu infiernu y a los poco metros, garraremos un camín que va facenos conocer tola viesca del monte La Foz.
 
Nun tuviera la suerte de conocer esti camín entá y tengo que dicir que fue una de les grandes sorpreses del día, siempre tendíu con bona caxa y faciéndonos ganar desnivel sele nunes envueltes bien curioses, que nos van dir faciendo travesar les vallines de L'Utra, Trescorrales y la riega la Foz hasta averanos hacia'l Cuetu Cuergu.

jueves, 20 de mayo de 2021

Sotu (Les Regueres) - Monte Pravia - Picu Grande - La Maserona

19 de Mayu de 2021

Track: Sotu (Les Regueres) - Monte Pravia - Picu Grande - La Maserona


Afayaivos al nuevu mundín de rutes a la carrera y ye que munchos montes, sobremanera nel occidente, pueden nun ser tolo atrautivos que deseyavos pa programar una ruta col GM Xuan de la Borrina. Poro, que meyor que poner los playeros y el pantalón curtiu y facelos corriendo a poder ser nuna circular un pocu curiosina.

D'esti xeitu, garraremos a la compi de carreres pel monte, Montse, pa tachar ún de los Techos de Conceyu y Monte Cimeru d'Asturies como ye'l Picu Grande na llende los conceyos de Candamu y Les Regueres.

Partimos de la Ilesisa de Sotu (173 m)
 
Pa ello, saldremos dende Sotu, nel conceyu Les Regueres, dexando los coches al llau de la ilesia, pa descender un pelín y xubir pente les cases d'El Pandiellu, onde hai que tener güeyu colos perros, porque hai dos mastinos mui gafos, anque por suerte tan ataos.

martes, 18 de mayo de 2021

Col.lanzo (Ayer) - Pinganón del Caideru

16 de Mayu de 2021

Track: Col.lanzo (Ayer) - Pinganón del Caideru


Finde gafu no meteorolóxicu, pero teníemos ruta programada y yera la vuelta de Benjamín, tras el parón pandémicu, asina qu'una vegada que taba vacunáu, había que salir a dar un pateín y conocer dalguna cosina nueva.

Nesi sen, dióme por dir a conocer el Pinganón del Caideru, poro preparamos varies opciones y plantámonos el domingu a les 9 la mañana en Col.lanzo, nel conceyu d'Ayer. Anímense Montse y Jorge, aportando al grupu yo les dos perrones: Kíla y Xena y la mió cansada presencia.

Semeyina nel Texu de Santibanes

El día ta murniu, pero paez que va aguantar, asina que salimos tranquilamente de Col.lanzo caleyando pela carretera primeru hacia Santiabanes de la Fuente, onde facemos semeya de rigor col texu y siguimos carretera hasta'l pueblín de la Fuente, con pocu espaciu d'apartaderu polo que dexar los coches en Col.lanzo ye la meyor opción.

jueves, 13 de mayo de 2021

Otura (Morcín)

11 de Mayu de 2021

Cualesquiera que me conoza, sabe que préstame trepar víes nueves, tachar rutes que nun conozo y sólo proyeuto cuando nun me queda otra cosa por facer nesa escuela. Ye dicir, me la suda'l grau dafechu. Toos queremos avanzar y meyorar en tolos deportes que facemos pero'l grau como oxetivu, me da igual, poro, dexo proyeutos que me supondrien xubir grau por completar escueles o esguilar víes que nun tastié. 

D'esti xeitu, nesti blogue, aparte d'amosavos esguilaes, rutes de monte, tamién aportamos llistaos con oxetivos futuros y llugares por conocer, lo qu'amuesa un sentir pa con tolo que faigo y ye que nun me presta repetir víes o repetir rutes de monte, siempre tengo la necesidá de conocer y descubrir coses nueves.

Apretando na intensa Precisión... 3 chapes a muerte

El procesu d'encadenar toles víes d'una escuela o un seutor podrá paecer llargu, pero con trepar cola mió xente, cola mió perrina, tranquilu y a poder ser probando dalgo nuevo, fai que'l restu seya migayes. Poro, nun soi de repetir una y otra vegada un seutor nin una vía, lo que llévame a conocer tantes escueles per Asturies y Cordal Cantábricu.

Si fai unos díes, dábemos por fináu, Afuega'l Pitu con Suco, esti martes, díbemos hasta Nuberu onde esperábame Precisión, la última vía del seutor Nuberu-Il Cavaliere, que faltábame por encadenar y taba dafechu atragantándoseme, por mor de nun llevar la precisión necesaria y a cada pegue camudaba un pelín de métodu, onde de primeres creía que nun yera tan dura la vía.

Andrea enchufando Xomezana col día amenazante

A la fin, cola compaña del Tres Pates pa un Bancu Team y enantes de qu'entamara a llover, pude encadenar Precisión, nun pegue d'esos tranquilu, precisu y hasta que paez que lo faes fácil, anque apretes como un xabalí.
 
Darréu, toca visitar otros seutores dOtura, que de xuru, nos traen víes nueves, más dures, pero nueves, que tamién van facenos avanzar na nuesa escalada, lloñe del grau, simplemente apretar, avanzar y esfrutar siempre de la esguilada tranquila que tanto préstame.. ensin voces nin fanatismos.

Otura (Seutores visitaos)

Croquis modificaos por mi de la escuela d'escalada d'Otura, por mor del trabayu de Asturvertical na so mayor parte. Gracies y col so permisu.

------------------------------------------------------------------

martes, 11 de mayo de 2021

Avín (Onís)

8 de Mayu de 2021

Dende que viera la espublización de Victor Sanchez, d'una nueva escuelina d'esguilada n'Onís, andaba con ganes de visitala. A la fín, esti finde pudimos escapar pal Oriente y magar d'un vienres d'entrenu corriendo pel monte más un par de peguinos nas Cabadas a la última vía que me queda por facer, el sábadu yera'l día de conocela.

Averamientu guapu enforma con vistes al macizu del Cornión

Daben muncho calor, pero'l día alboreció mediu ñubláu, así que tiramos hasta ellí igualmente. Aportamos a Avín y xubimos tola pista hacia Cueva Rota, onde hai un bon aparcaderu, dexando les furgos bien pegadines a la valla pa dexar sitiu pa dar la vuelta a los ganaderos, ya que tamos a la boca d'una cueva quesera.

viernes, 7 de mayo de 2021

El Laboratoriu (Morcín)

6 de Mayu de 2021

Primavera post-pandémica n'Asturies, na que nun paramos de trepar y tar tiraos nel monte, nun fuera que tornásemos a tar zarraos como l'añu anterior. Esti añu, volví a proponeme trepar en desplome, asina que'l Laboratoriu paecióme una opción bien válida, más agradecida a mi mou de ver que Priañes.

El primer día que fuí, probara con Xavi y Rúben la Sin Nombre, un 7b que ya probara cuanto ficiera Átomo va dos años. Esta vegada, sí que llegué a cadena bien y al segundu pegue ya me cayera saliendo del bloque físicu del mediu.

Trabayando la vía Sin Nombre del Laboratoriu (7b)

Nos croquis de la guía de Esaú, esta vía apaez de 7b+ y creo que n'otros más nuevos hasta de 7a+, pero a mi mou de ver, paezme un 7b sólidu al igual que l'Empalao, que tamién ficiera va dos añinos. La siguiente visita, montara la vía y al segundu pegue caí saliendo a cadena por nun tener mui clara la secuencia.
 
Una cagada terrible pero bastante clásica en munches de les víes del Laboratoriu, nes que sueles aportar a cadena con una inflada perimportante. Tan sólo, quedaba apaecer otru día pel seutor y con Iván, que montó la vía pa facer metros, ya pude da-y un pegue seriu pa calecer músculos y una vegada que llegué al reposu bien, tocaba dalo too ya intentar l'encadene.

Secuencia final y a volar saliendo a reunión
 
Salí del reposu cómodu y fice'l pasu físicu sin problemes, aportando al pasu a cadena, intentado salir col invertíu de dereches y viendo que la diba pringar volví a destrepar a reposar otru pocu y por suerte, Iván encendió la bombiella a tiempu, diciéndome que me llevantara del hombru, pudiendo llegar a cadena y encestar la cuerda na reunión al llímite dafechu.

Con esti encadene, anímome más a venir al desplome y ya tuve probando la travesía de Alma Gemela (7c) que dábame mal rollu, polos vuelos llaterales, viendo que se fae cómodu hasta'l reposu, poro, toca metese a probar la parte dura y proyeutar un puquiñín.

El Laboratoriu
 

                           ------------------------------------------------------------------------------

miércoles, 5 de mayo de 2021

Entragu - Pena Gradura (Teberga)

2 de Mayu de 2021

Un finde más, tornábemos a Teberga a intentar esguilar, pero la meteo yera gafa enforma, faciendo un pocu de monte'l sábadu cola ascensión a Peña Cruzada, pasando llueu demasiáu tiempu de vermú, xinta y chigréu como pa poder apretar seriu de domingu.

Andre probando Raska y Gana... algamando un proyeutu bien prestosu

Aún así, llevantámonos, almorzamos y decidimos aprovechar les hores de solín hasta que llegase la lluvia de nuevu de tarde. Pa ello, xubimos hasta la parte alta d'Entecampos el Tres Pates pa un Bancu Team, pa esguilar nesa ablucante caliza que tien esta muria.

Anna caleciendo manes y encadenando Raska y Gana
 
Siendo la primer vegada que tan nel seutor, Anna y Andre, anímo-yos a probar Raska y Gana, un 6c+ de lo meyor de Teberga. Métense con xeitu, primeru Andrea aportando hasta la metá de la vía pa llueu completar el montaxe Anna, encadenándola nun pegue apretón onde los haya.
 
Col escaquéu por bandera, por mor de la resaca y contando cola lluvia, dexo paso a Andrea pa que termine de matizar la vía nun segundu pegue, pudiendo probala con calma y dexándola llista pa otra visita.

Sufriendo pa facer la Ardilla Roja... vía sicolóxica de la vieya escuela tebergana

Como nun terminaba de llover y nun taba pa meteme en proyeutos serios, decídime a intentar la Ardilla Roja poniendo cintes. Ya la probara otru domingu soleyeru va unos mesinos y esta vegada sí que la pude encandenar, nun pegue de puru sufrimientu y pasando más mieu que'l que lu inventó... la vieya escuela tebergana con pires de 3 metros llargos te pon nel sitiu.

Entragu - Pena Gradura (Teberga)
Croquis modificaos por mi de la escuela d'escalada de Entragu, alcontraos en La noche del Loro, el Club Aguja de Sobia, Desnivel del añu del tabacu... Gracies y col so permisu.

---------------------------------------------------------------------

1, 2 d'Abril de 2021

Continuábemos col rock trip astur y magar de colar del Val.le en Somiedu y pasanos pal siguiente valle a Teberga, entrábemos nel retu de llevanos dalgo pal bolsiellu na dureza tebergana. El día 1 d'Abril, día del mió 40 cumpleaños, aportábemos a Entragu a mediudía y decidimos dir hasta la Esplanada, más que nada por ver a tola xente.

Llueu de repartise tol mundiu pela escuela, sobretou n'Entecampos y Esplanada, Anna y yo quedámonos con Iso y Laura, aprovechando que teníen montáu la Sudoku, una vía que ya probara en dos ocasiones y teníala pelín travesada.

Ellí metímonos, dando un mui bon primer pegue, llevantándonos de la bañerina, pero pringando al salir por nun tener claros los pies. Lo que paecía un pegue de revisión pa encadenar al siguiente, dió pasu a la entrada del sol, un tactu nes güeveres romes horrible y nun ser a llevantame de la bañera nos dos siguientes pegues.

Probando la Sudoku unos mesinos atrás
 
Anna, metióse a la Hiroshima, vía que tenía encadenada con un allargue na reunión y quería facela en condiciones, asína que la montó y dió otros dos bonos pegues, pero güei nun yera'l día. Poro, terminamos por colar pal aparcaderu onde cellebraríemos de tranqui mi cumple con unes birres y una tartina.

Al día siguiente, tampoco pensamos muncho, garramos los trastos pela mañana, magar del almuerzu y con unos diez gradinos a la solombra, primeru fice poniendo cintes la Sudoku y llueu Anna, enchufó poniendo cintes tamién la Hiroshima.

Día perfectu, d'esti xeitu, tornamos al aparcaderu d'Entragu a redesayunar y tomar el solín coles perrines hasta'l mediudía que tocó xintar un menú y descansar hasta'l día siguiente, que ya sedría l'últimu de les vacaciones.