Soto (Sobrescobiu) - Pandanes - Retriñón - Moroma - Pandefresnu

23 de Xunu de 2024

Track: Soto (Sobrescobiu) - Pandanes - Retriñón - Moroma - Pandefresnu

Ruta programada nel calendariu del GM Xuan de la Borrina, pol compañeru Carlos, a la qu'animámonos como siempre los más interesaos, ye dicir, los más interesaos en bregar pel monte y descubrir dalgún senderu mediu perdíu y de pasu que Carlos ficiera per primer vegada, el Retriñón, que por temes de trabayu nos últimos años, nun pudiera ascendelu.

Pero como nun mos presta repetir rutes, na ruta mítica, pola bregada, al picu Les Aberrugues peles foces de Llaímu, acolumbráremos la posible ascensión al cercanu Retriñón peles mines de Pandales, quedándonos cola ruta guardada na tiesta, por muncho que nos diese pereza percorrer una vegada más, el camín d'Agüeria o senda L'Alba.

Partimos del guapu pueblu coyanu de Soto (432 m)

Llueu d'un intentu d'almuerzu en Sobrescobiu, pasando pela Pola Llaviana, a pinchar unos pinchos a la xente, ya que llegaba pelín tarde, preparámonos nel aparcaderu y entamamos a calecer patuques pel clásicu camín pegáu al rigu Alba, esfrutando de la nuesa soledá madrugadora y como siempre, de dellos puntos de gran interés paisaxísticu, hasta aportar a la Vega, onde asítiase una pequeña área recreativa.

Trail de Reres (Sobrescobiu)

29 d'Ochobre de 2022

Track: Reres Trail (Sobrescobiu)

Web del Trail: Seronda Trails - Reres
 
Clasificaciones: Clasificaciones 2022  

Tornábemos seyes años dempués a esta carrera en Sobrescobiu, una de les clásiques de la Seronda, onde tuviéramos una perbona participación cuando quiciás taba más fuerte nesto de correr. Los años pasen y pesie a qu'entrenamos dalgo, camiento que'l facer menos monte duro ta faciéndome perder nes pindies xubides o simplemente, que la xente entrena y corre munchísimo.

El casu ye que plantámonos en Sobrescobiu, alcontrándome con Sergi y con Illán col que ya falara por teléfonu, garramos dorsal y nuna mañana fresquina pero con mui bona pinta, vamos preparándonos con calma pa dir hacia la salida, onde como siempre, había una gran participación anque coincidiese col Blincapeñas en Suarías.

Esfrutando de la carrera en tolos tarrenes

 

La carrera, como siempre, sal como un tiru peles cais de Rusecu pa garrar un cachín de carretera desviándonos hacia pista en direición Villamoréi. Voi con Illán, camentando aguantar lo que pueda con él, ya que decidí tomar la carrera como un entrenu, asina que mi idega ye apretar lo posible hasta la senda L'Alba, a falta más menos de 10 km, onde tocaría aguantar como pudiera.

Primer parte mui correndera como siempre

Asina lo voi faciendo y veo qu'Illán nun me sigue nel camín hacia'l Torruxón y posterior xubida hacia'l canal d'agua que percorre tol faldéu de la xerra'l Crespón, poro ya toca carrera en solitariu y a furrular, esfrutando bastante de la xubida y sobretou del camín percorrible hasta Prieya, onde xinto daqué y entamamos l'ascensión al Cogullu, la cual me sobrepasa un pocu y voi penando, algamando meyores sensaciones na baxada téunica y posterior crestéu téunicu hasta'l colláu Peruques onde garramos la primer baxada llarga.

Momentos a metá de carrera

Llueu tocaría una pequeña xubida hasta Trapa, onde garro un pocu de xinta y tírome abaxo hacia'l Retorturiu na senda l'Alba, faciendo una de les meyores baxaes de pista que fice enxamás, esfrutándola a tope y ganando dalgunes posiciones con compañeros que díbemos turnándonos depende'l tarrén de carrera. Garro agua y dalgo de picar y entama l'ascensión temida per pista hasta Fresnu, la cual faise llarguísima y mui pesada, perdiendo dalgunes posiciones y dalgo de motivación pa siguir apretando.

Na fastera de la Trapa na parte final de la carrera

En Fresnu, a la fín, entama la baxada hacia la Foz de Nozalín, na que ya veo que toca ser conservador, faciéndoseme hasta pesáu tol faldéu del Cullargayos hasta Llaíñes, onde como siempre nin garro agua y continuo pa facer los 3,5 km que resten hasta la meta, onde entro contento porque veo que baxé de les 4 hores, lo que nun entraba nos miós planes.

En resume, carrera bien guapa como siempre, anque la pista hacia Fresnu, fízose mui cansina, na que lo dí tou, teniendo que dir controlando na parte final de la carrera, pero con bones sensaciones pa tomámelo más en serio esta temporada 2022 - 2023.

Aportando a la meta baxando de 4 hores

------------------------------------------------------------------------------

Soto (Sobrescobiu) - Senda L'Alba - Valsemana - L.lomba Yana - Aberrugues - Fierros - Vallina'l Riu'l Cabritu - Cruz de los Ríos

 20 de Febreru de 2022

Track: Soto (Sobrescobiu) - L'Alba - L.lomba Yana - Aberrugues - Riu'l Cabritu - Cruz de los Ríos 

Dende'l finde d'Aniversariu del GM Xuan de la Borrina, allá pola seronda, na qu'ascendiéramos al Cullargayos, ya tenía preparada una ruta que llevásenos a conocer dellos requexos del Monte Llaímu, quiciábes, ún de los llugares más intrincaos y sorprendentes del maraviyosu parque de Reres.

El mayor problema de querer conocer estos requexos xabaces del monte Llaímu, son los 14 km (ida y vuelta) de la Senda L'Alba que tendremos de facer, poro nun tendremos otra, qu'intentar madrugar ya que nesta dómina del añu, a les 7 la tarde ye de nueche.

Partimos del pueblu coyano de Soto (445 m)

D'esti xeitu, llantámonos a les 8 la mañana nel Balcón de Redes, con ganes d'almorzar en condiciones y pillar unos pinchinos pal camín, alcontrándonos col chigre pieslláu hasta les 9. Dempués de dar varies vueltes (Rusecu y Soto), tornamos a les 8 y media alcontrándolu abiertu, pudiendo almorzar a fueu pa tornar a Soto y entamar la ruta cuanto antes.

Soto (Sobrescobiu) - Nozalín - Picu Cullargayos - Llaíñes (Sobrescobiu)

2 d'Ochobre de 2021

Track: Soto (Sobrescobiu) - Nozalín - Picu Cullargayos - Llaíñes (Sobrescobiu)

Continuamos cola vuelta al monte per Asturies, siendo esta un finde especial, ya que vamos facer una mini xuntanza por mor del XII Aniversariu del GM Xuan de la Borrina. De primeres, el númberu de participantes yera curiosu, pero pente la mala meteo y dellos problemes personales quedamos en poca xente, lo que nun quita que fuera un finde bien guapu.

El llugar escoyíu yera'l conceyu de Sobrescobiu y la Posada Cantu L'Osu fue'l nuesu campu base, durante tol finde. Dicir dende equí, que mil gracies pol tratu, poles cenes, los almuerzos, l'alderique montañeru y social y por tener comprensión coles baxes del grupu.

Partimos del aparcaderu de Soto (425 m)

 

Magar d'un almuerzu tan bono, como la cena del día anterior, presentámonos nel aparcaderu de Soto, con dellos planes nel bolsiellu, pero viendo'l día murniu y amenzante y que nun tenemos la meyor forma del mundiu pa lo que tenía pensáu, decidimos ascender al Picu Cullargayos, conociendo la foz de Nozalín.

Villamoréi (Sobrescobiu) - Torrexón - Llampaces - Soto

16 d'Avientu de 2018 
 
Track: Villamoréi (Sobrescobiu) - Torruxón - Llampaces - Soto

Casi un mes dempués de la última salida el GM Xuan de la Borrina, tornamos al monte y con un día pelín gafu, restolamos pente les rutes de calendariu pa salir anque seya a dar un paseín. La escoyeta de la ruta, fue col envís, de que'l grupu fuera garrando dalgo de puxu y motivación y por que non, garrar un pelín de forma.

Pa ello, averámonos hasta'l conceyu de Sobrescobiu y más en concretu al pueblu de Villamoréi dende onde entamará la nuesa circular pela xerra'l Crespón. Va dellos años, percorriera tola xerra dende'l Cogollu al picu Llampaces pero esta vegada vamos intentar ascender al más picu nomáu de la xerra propiamente dicho, sacante de los cumales solitarios del Corbellosu y el Guanalón y Cogollu.

Partimos del guapu pueblín de Villamoréi (390 m)

Castañeru Trail (Sobrescobiu)

28 de Xineru de 2018

Track: Castañeru Trail (Sobrescobiu)

Web del Trail: Castañeru Trail (Sobrescobiu)

Clasificaciones: Clasificaciones 2018 

Dempués de la dura carrera del Afuega'l Pitu d'esti añu, na que nun m'alcontré mui allá sobretou na xubida, veníemos a esfrutar d'otra carrerina na que siempre presta competir, como ye'l Castañeru y ye que'l conceyu de Sobrescobiu ya lleva bien d'años volcándose con esta modalidá montañera.

Día fríu pero espléndido en Rusecu

Esta vegada corríemos tol equipu del Asgaya Team y del GM Xuan de la Borrina, col envís que xintar xuntos magar de gananos la fartura. Como siempre, cafetín y rises enantes d'entamar y salida de la carrera a fueu, como ye vezu nestes pruebes curties.

Trail curtiu... too dios a fueu na salida

Esti añu, si nun m'equivoco, aumentaba un pelín el percorríu del trail, paezme que nun par de kms y tamién el desnivel a superar yera dalgo mayor. Personalmente, paecióme interesante esa xubidina más llarga y la posterior baxada rapidísima per pista pa soltar pates.

Primeros kilómetros cuestos pero correnderos

Un añu más, tola primer parte de la carrera correndera hasta la pista formigonada pindísima, na que pones los reñones al Xerez y na que pues pagar una posible cebada inicial. Pesie al dolor lumbar, cuando coronamos, la rápida baxada fai que descargue rapidín y garro ritmu a saco pa la parte más téunica del descensu peles guapes viesques coyanes.

Baxando con sensaciones perbones

El tramu final, prestosu enforma, per siendes embarraes nes que disfrútase resbariando a fueu, ganando posiciones y acabando fortísimu faciendo l'últimu kilómetru hasta la meta pembaxo los 4 minutos casi de xuru.

Agora sí que diba esfrutando a saco

Encantáu de la vida y con perbones sensaciones aporto a la meta, ganando delles posiciones sol añu pasáu, quedando'l 38 na xeneral y 18 de mi categoría, teniendo la nota más importante na baxada na media de 5:56 a 5:39 en más kms y más desnivel... una pasada de día.

Como siempre, dar gracies a organizadores, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Castañeru Redes Trail, Agus Camino, MV Foto, Capitán Pola....)

Soto (Sobrescobiu) - Cogullu - Guanalón - Crespón

20 de Marzu de 2011

Track: Soto (Sobrescobiu) - Cogullu - Guanalón - Crespón

Dempués de la cagada de tirar a Cangas del Narcea, a la gueta d'una ruta en ñeve, y nun poder facer res, esta vegada nun podía fallase na escoyeta, poro, tocaba averase de nueu al conceyu de Sobrescobiu, nel parque de Redes, onde como siempre, ye dafechu, un placer tornar.

Asína pues, el domingu partimos bien ceo dende Xixón, pola autovía minera hasta garrar el corredor del Nalón, al traviés del cuál damos bona cuenta de los conceyos de Llangréu, Samartín del Rei Aurelio y Llaviana, p'aportar finalmente na entrada al parque de Redes, Sobrescobiu.

Na so capital, Rusecu, tenemos intención de parar a desayunar y alcontranos con César, que tornaba a l'actividá montañera dempués d'un lesión nel hombru, pero'l nuesu gozu nun pozu, ya que taba zarráu por vacaciones, y quedámonos ensin café nin pinchu tortiella. Poro, nun mos quedaba otra que siguir hasta Soto, onde tenemos el nuesu puntu de partida, pasando enantes pelos pueblos de La Polina y Villamoréi.

Nel aparcaderu, ponémonos en mou montañeru, y demientres llega César, percorremos el pueblu enteru, a la gueta d'un sitiu onde meter dalgo pal cuerpu, pero paez ser que nestos pueblos de calter turísticu, nun abren enantes de les 9, asína que tenemos que partir, magar de la llegada de César, ensín meter na pal cuerpu.

A puntu d'abandonar la pista del Alba

Como na ruta al Corbellosu, garramos la pista de la ruta L'Alba, pero esta vegada poco más alantre de la piscifactoría, vamos tomar un desvíu a la mandrecha nes Bories d'Abaxu, y paralelamente al ríu Pandu, ascenderemos hasta travesar otru regueru que d'augües al Alba, el de los Aviaos.

Caleciendo pates y garrando ritmu

Magar d'esti puntu, ya pasaremos de pista a senderu, el cual pindio enforma, caltendrá durante tola so llonxitú un xeitu de dureza, que fadrános superar unos 500 ms de desnivel direutu. Y cuando falo de pindiu y direutu, ye porque nun hai nin un descansu hasta aportar a un colláu averáu a les praderíes de Cogullu.

Xubiendo pela guapa viesca coyana

Menos mal, qu'esti senderu, traviesa ún de les viesques más conservaes y guapes d'Asturies, y nun hai un requexu en toa ella, que nun seya más guapa que l'anterior. Enriba, pa mayor prestancia, tuviemos la suerte de percorrer la viesca Aviaos pente la ñebla, y que fuera esapaeciendo poquín a pocu pa dar pasu a un día espeyáu nel que'l cielu azul y el sol, amosáronmos nel colláu, tal cantidá de cumales d'esta fastera d'Asturies, que ficieron que nun supiéramos pa onde acolumbrar.

El Retriñón y cotes más altes de Sobrescobiu dende les praderíes de Cogullu

Pocu más d'hora y media tardamos n'aportar a esti mirador (1006 ms), y darréu vamos siguir poles cabañes de les praderíes, pa seliquino facer l'ascensión al Cogullu ensín averanos del too a la collá Maea. La xubida será ensín dificultá, sacante de lo pindiu, y fadráse sortiando les calices cortantes anegaes pela yerba.

Ascensu al Cogullu

A la fín, con una bona sudada, ya qu'a les 11 ya cascaba Llorienzu, aportamos a los 1221 ms d'esti prestosu cumal que tien, como non, una cara norte mui aérea, y una xubida pola sur más relaxada, como foi nel nuesu casu.

Peñes Negres y Peña Mea dende'l Cogullu

Ensín demasiaes prieses taremos nel cumal, demientres picamos dalgo, ya que'l nun desayunar fízonos tar afamiaos, aparte de facenos garrar ritmu de xubida quiciás más llentu de lo normal en nós.

Fastera ñevada de L.lena y Ayer

La verdá ye que la dureza foi grande, pero les vistes compensen nel intre, tolo sufríu y sudáu. La visión de cumales de Llaviana, Sobrescobiu, Casu, Ayer,... son la recompensa perfeuta: Peña Mea, Peñes de Faru (onde morrió un montañeru fai pocu... que la tierra-y sea lleve), Cullargayos, Retriñón,... son solo una pequeña amuesa de lo espeutacular de les vistes.

Guanalón y Xerra'l Crespón dende'l cumal del Cogullu

D'otra miente, estes cimes, quedaben munches delles ya n'alcordanza, poro nun quedaba res que mirar p'alantre y eso yera dir a pol Guanalón y más lloñe,... albidrar la posibilidá de siguir al traviés del restu de la xerra'l Crespón, hasta'l vértice xeodésicu del Picu Llampaces, anque a dicir verdá, nun lleí pela rede que naide-y diese a esta cresta.

Grupu na cume del Cogollu (1221 ms)

Ensín más, empobinámonos pel mesmu camín de baxada pel que ficiésemos cumal, y al aportar a les cabañes de la mayada de Cogullu, diz Simón qu'escaeció'l palu enriba. Dempués de les rises (siempre dexa dalgo perhí), púsose a xubir otra vegada acompangáu por Pangua que taba fuerte. Cesar quedóse a esperalos y Carlos y yo, fuimos ver como taba la baxada pola Güelga les Oveyes, que daríanos pasu pela viesca la Condilexa a Collalmonte, primer de los collaos nel nuesu camín al Picu Guanalón.

Pasando por Collalmonte hacia'l Guanalón

Magar de travesar la viesca, onde piérdese un pelín la sienda, axuntámonos de nueu en Collalmonte (1035 ms), y vamos pasar pol picu la collada Robiella dando pasu a la propia collada, onde tan esperándonos un grupu caballos esfrutando del preciosu día que facía.

Unos collacios taben na collá Robiella

Equí echaremos un traguín d'augua ya que'l calor entama a apretar, y dempués d'acolumbrar lo imponente del Cogullu dende la nuesa posición, siguimos a pol Guanalón arrodiando esta vegada'l picu la Capillona pola manzorga.

Cogullu y Cullargayos dende Robiella

Nel acesu ente'l Cogullu y Guanalón, ta dafechu lo pior, ya que tócanos lluchar con cotolles na primer parte y colo pindiu del tarrén hacia'l colláu Recabáu (1106 ms), onde entamaremos l'ascensión final al Guanalón, cola caliza como protagonista cimera.

Xubiendo al Guanalón

Nun hai, la verdá, una aparente meyor vía pal ascensu, poro más menos, caún fuimos per onde meyor se podía, y con dalgún apoyu de manes qu'otru, fuimos avanzando hasta aportar a la cima del Guanalón (1231 ms), en poco más de diez minutinos dende'l colláu.

Ye la una la tarde, y a les 4 hores de ruta hai que sumar delles coses como una fame xabaz y un día ablucante pa tar tiráu demientres xintamos. Dichu y fechu, sentámonos tranquilamente, dempués de facer semeyes a les vistes y arrimanos a la caída del picu pal norte, y zampamos el bocata, chocolate, frutos secos y tolo que tenemos na mochila.

Cesar col Retriñón dende'l cumal del Guanalón (1231 ms)

Llueu del descansu de más de media hora, vamos baxar del Guanalón pela so arista ensín problemes hacia'l colláu del Guanalón (1081 ms) o Güelga del Guanalón (términu, que paecióme raru, ya que güelga o buelga, utilízase pa definir un pasu pero abiertu na ñeve o pente la yerba, y nun lo viera nel xacíu de pasu de montaña como forcáu (más estrechu) o colláu (más ampliu)).

De toes formes, nesti puntu, tocaba decidir que facer, si baxar a Soto nel intre, o intentar tol cresteríu de la Xerra'l Crespón. Finalmente, les 5 hores y diez minutos de ruta, más la baxada que quedaba por facer, yera más que satisfactoriu pa dellos collacios, poro separtámonos col envís de qu'en 3 hores veríamonos en Soto pa ver el partíu del Sporting.

Grandes cotes orientales y Guanalón dende'l Cantu la Zrezal

Per un llau, Simón, Charly y Cesar decidieron baxar del colláu a la mayada L'Abedul, que taba embaxo nuesa, y d'ellí garrar una pista que pasando por Priella, empobinaríase hasta les Bories d'Arriba, bien cerquino d'au garráremos pola mañana la pista hacia'l Cogullu. A la fin, aportaríen a Soto a les 6 hores y media de que saliéramos pola mañana, algamando un rutón en toda regla.

Pel otru llau, quedamos los ansiaos de monte, Pangua y Berto, qu'al estilu de rutes como la del Mofrechu o Torbina, vamos metenos nun cresteríu del que tamos ermos de datos, ya que suelse arrodiar nuna ruta PR y xubir tan solu al vértice del Llampaces.

Bona xera quédanos per delantre

En fin, son les 2 de la tarde y por lluz del día nun va ser, pero tampoco queremos facer esperar a los nuesos collacios, d'ehí que pongámonos en marcha hacia'l primer finxu del Crespón, el Cantu la Zrezal. Esto llevarános unos 15 minutos d'ascensión hasta'l cumal de 1185 ms, y siguiremos crestéu dempués de mirar atrás y esfrutar de la paré norte del Guanalón.

Pueblos coyanos dende la Xerra'l Crespón

Darréu, vamos metenos non no más peligrosu pero si la parte más repunante de tol crestéu, ya que'l llugar conocíu como'l Focarón, nun ye otra cosa qu'un montón de foyos a lo Cuera, con vexetación abondo, poro tocónos pegar saltos pente la caliza afilada abrazaos a los troncos de dellos árboles, hasta que llegamos al colláu la Felguerosa (1154 ms).

Güeyada hacia cotes de Casu

D'equí xubiremos al picu más agreste de tol Crespón, como amuesa'l so nome, Picu Crespes y nun ye que sea difícil, pero sacante de la caída hacia Soto, tenía reserváu una sorpresa na so baxada. Media hora dende'l Cantu la Zrezal, pa dar cota a los 1216 ms del Crespes, y cuando decidimos siguir alantre, alcontrámonos con un corte brutal hacia la so collacia menor, La Crespina.

Destrepada abegosa ente'l Picu Crespes y la Crespina

Nun lo comentara hasta agora, pero hai que dicir que lo que veíamos, como peña y prau verde en tola xerra'l Crespón dende'l Guanalón, en vivu ye yerba llarga y resbariosa tumbada pola ñeve ivernal, colo qu'aida más bien pocu. Nun queda otra, que dir al alcuentru d'una salida pal pasu, y dempués de mirar ún por cada cara, tirámonos pela de Pangua, qu'a pesar de xubir dos vegaes al Cogullu, ta físicamente meyor que yo, que sigo renquiante de les rotures fibrilares del muslu.

Asína que, magar de la baxaduca destrepando y con munchu güeyu, porque podíase baxar arrollicando hasta dalgún teyáu de Soto, siguimos pela Güelga la Fondúa, nel que camudamos la cara oriental del Crespón pola occidental, pa poder trepar a la Crespina a bas de garráse de les yerbes como si foran los gadeyos d'una vieya.

Sollerte a tolos que nos resta por facer...

Nel cumal de la Crespina (1195 ms) sincéramente, nos temíamos lo pior a la baxada, pero nun foi pa tanto, y pasamos lo más rápidu posible (xubióse un piquín pel mediu) pola Güelga'l Llobu (que nome más celta) pa metenos de llenu dempués de pasar pola collada Palombias, nel siguiente finxu nel camín, el picu Reancu o Faltiñosu.

A dicir verdá, el picu Reancu de 1186 ye'l cumal sur más sele, y el norte ye'l Faltiñosu (1143 ms), más baxo, pero con una caída pronunciada hacia Villamoréi y que diónos un pelín de guerra nel destrepe, pero nun tanto como'l pasu Crespes-Crespina.

D'esta baxada vamos pasar pola güelga'l Faltiñosu pa poder dar preste a la Peña Escrita, peñona de llargu percorríu que tendrános crestiando con trepes y destrepes media hora, lo cual fízose pesáu contando con que yera la penúltima torga hasta'l naguáu vértice del Llampaces.

A la fín, tenemos el Llampaces a tiru al tar nel colláu de la Enrayá (1097 ms), y quédanos tan solu la ascensión final a esti picu de 1139 ms. Tengo que dicir, que personalmente llegué práuticamente deshidratáu y mui xustu de fuercies, ya que finamos el pocu llíquidu que nos quedaba enantes de la Escrita, y nesa media hora de travesía per ella, diba mediu muñecu, cosa que col ambiente aéreu que tenía nun ye lo más recomendáu.

Picu Llampaces (1139 ms) al fin, agora toca baxar

Diben 7 hores y cuartu en total, y tábemos nel puntu más septentrional de la Xerra'l Crespón (enriba'l banzáu de Rusecu, jeje), teniendo que baxar a Soto como fuera, así que sacamos la semeya d'algamáu, dímonos la man pola xatada y p'abaxo. Lo primeru fue tornar a la Enrayá, y d'ehí baxar en diagonal hacia la Mayada Escrita, garrando pocu enantes un camín que venía de la braña Llampaces.

A partir d'entós ya garramos pista (d'un PR que da la vuelta al Crespón), y baxamos casi corriendo, dempués d'orientar a otros senderistes, hasta Soto parando únicamente nel Regatón d'Escrita, pa meténos un llitru d'augua caún, y siguir baxando desnivel hasta dar nes cais del pueblu coyanu de Soto, magar de 8 hores y 15 minutos de ruta durísima.

Supongo que ver llegar a dos persones, que llevan esi tiempu andando pa facer 17 km y superar más de 1600 ms de desnivel acumuláu con un calor perimportante, nun será mui agradable, porque la xente en Soto al llegar, mirábenmos como bichos raros (pensaríen que veníemos nesi estáu de la ruta l'Alba, jaja).

Tamién los collacios que nos esperaben nun chigre, tuvieron que sufrir la mala hostia y el cansanciu que traíemos, porque paez ser qu'al entruganos que tal, gruñimos nun se que pallabres, y nos fuimos al coche a quitar la ropa apestosa que llevábemos enriba.

Dempués d'un par de cañones de cerveza, ya pude ver relaxádamente la victoria del Sporting y zampar un bocata nun chigre al que nun pienso volver (El Fresnu), ya que nos metieron un rabu finu, finu polos bocatas y les cerveces. Putos chigres pa domingueros.

Ta la prósima...

Camudando'l Camín nel Guanalón

Nesta ruta ficimos un vértice xeodésicu de Sobrescobiu: Picu Llampaces (1139 ms) y el "prestosu" Picu Cogullu (1221 ms)

Ver progresos en: Retos montañeros