Trail Pica Torbina (Valle Altu de Peñamellera)

27 de Setiembre de 2025

Track: Trail Pica Torbina (Valle Altu de Peñamellera)

Dos años y mediu ensin tornar a les carreres pel monte, dende'l trail de Cuevas en Soria, onde partí definitivamente, anque ya saliera mui tocáu de Resistencia Nembra. Dende entós, pruebes varies, resonancies y la certeza de que tenia'l cadril drechu cambiar por artrosis, ensin dengún remediu qu'operar y poner una prótesis.

Penmediu, abandono total de correr, dalgo de bici y monte con dolor y muncha escalada, ya que nun me molestaba demasiáu, aportando a facer el mió másimu grau esi mesmu 2023, pa tener un 2024 onde ya me volvía a picar facer monte, pero taba coxeando de más pa poder caminar y entamaben a fadiase otres partes del cuerpu.

A la muerte xubiendo pel entepechu vertical

Tocó tomar la decisión d'operame, los trámites y n'Avientu de 2024 camudamos el cadril, faciendo una recuperación rápida, tornando a les escueles d'escalada al mes y mediu d'operar y a facer dalgo de monte a partir de los 2 meses, teniendo en branu perbones sensaciones per Picos, continuando con rutes pel monte cada vegada más potentes, faciendo dalguna baxada corriendo pa probame.

 

Asina fue como decidime a buscar una carrerina lo más tiesa posible, montañera y curtia como pa non sofrir con grandes distancies trotando, asina que'l trail de la Pica Torbina, yera la meyor opción. Apuntéme y plantéme na salida con menos de media hora de carrera continua per llano en dos años y mediu y munchu mieu a mancame o nun tar faciendo les coses bien.  

 

 

Parte final de la xubida pelín más seliquina

Salgo atrás del tou, llueu de trotar un pelín peles cais, xubiendo per pista col trote cochineru clásicu, que faime adelantar bastantes posiciones y ye que correr p'arriba veo que pueu facelo bastante bien, hasta qu'aportamos a los tramos de camín onde sigo adelantando xente y na vallina vertical doime cuenta, que toi pasando a dalgunos nomaos corredores de siempre, al restu perdime y nun conozo a casi naide. 

Nesi puntu me digo, tira p'arriba fuerte que na baxada va tocar caltener lo que se pueda y puntu, asina que sigo, pasando pel aguya ya coles posiciones más espaciaes y salimos a la parte alta de Cuera, onde toca navegar pelos tarrén calizu típicu, faciendo la xubida final a la Pica Torbina, con dellos corredores colos que voi falando, alcontrándome realmente bien y sobretou disfrutando al apretar la máquina tolo que pude

 

Tramu correnderu de camín na parte media de la baxada

A la baxada ya voi viendo que la estabilidá del cadril nun ye'l que yera, pero buenu con menos d'un añu de la operación nun se puede pedir más, toca garrar más fuerza de cuadriceps si queremos facer esto unes cuantes vegaes al añu. Ensin más, sabiendo lo qu'hai, voi baxando al mió ritmu, dexando pasar a munchos corredores que van más finos y allegres baxando, pudiendo caltener ritmos nos tramos más téunicos, pero nos más correnderos, tengo mieu a forzar el cadril y déxome dir bastante, perdiendo más posiciones.

Finalmente, facemos el tramu final correnderu en baxada hasta'l pueblu de Rozagás y entro en meta en 2 hores y 5 minutos, teniendo un másimu de 3 hores pa completalo, poro doime cuenta que pueu tar contento, ya que nun entrené, nin fice na, sacante patiar pel monte y aprosimar pa escalar, poro nun toi pa quexame precísamente.

 

Descensu a fueu... faciéndoseme hasta llargu dempués de tanto tiempu

Mudámonos de ropa y esfrutamos d'una cervecina tranquila nel pueblu, teniendo paella pa tolos participantes, nun pueblu que vuélcase cola carrera, qu'al final ye lo que siempre prestóme d'estes actividaes, meter caña a la maquinaria y conocer pueblos enfotaos col monte y el deporte, lloñe de los tiempos, de les posiciones y de muncha parafernalia qu'abunde nes carreres de monte.

Les ganes de volver a correr, pues a dicir verdá la selmana siguiente, tuve más bien cero, ya que los dolores de cuadriceps y el cadril cargáu, me ficieron pensar muncho si paga la pena intentar volver a correr, pero pasáu esa selmana el cuerpu fue absorbiendo dolores y ver veremos si caltenemos el plan de facer carrera cada dos meses más o menos. 

Hasta la prósima o non... ya veremos

Como siempre mil gracies a la xente del pueblu de Rozagás, que trató a tolos participantes con munchu ciñu y a los voluntarios animando y fotógrafos (Dansolmar, Lastra, Ramón Gutierrez, Tres Picos, Fotopicos) por sacar el sufrimientu nes nueses cares y ye qu'esta carrera ye dura, dura y montañera como tien de ser... asína que si la maquinaria lo permite tornaré a sufrir na xubida a la Pica Torbina.

Trail Cuevas de Soria (Almazán)

8 d'Abril de 2023

Track: Trail Cuevas de Soria

Web del Trail: Puro Oxigeno Soria   

Clasificaciones: Clasificaciones 2023

Como siempre, intento tar centráu en cuanto a les carreres pel monte, intento facer calendariu, intento separar les carreres en tiempu, mínimu quince díes ya intento nun engorilame de más. Pero, pesie a que llevaba un añu estupendu, terminando retos en Deva, con tres díes de carreres, la Maxi de Cangues d'Onís o les rápides y dures en Nava y Nembra, picáronme pa correr tamién nes vacaciones en Soria.

Tou diba bien, corriendo cada quinces díes, ensin entrenar, apretando dientru de les mis posibilidaes, ensin molesties y quedando dempués de cada carrera con un tastu especial, cola sensación de tar faciendo bien les coses, pero voi pal pueblu y poles mañanes como nun hai muncho que facer, pues salgo a correr un pocu ascendiendo dalgún montucu de la zona, como la Muela o el Castillo de Gormaz.

 

Tamién corremos en vacaciones en Cuevas de Soria

D'esti xeitu, anque malpenes fueran 5 y 7 km los que corrí el Xueves y el Vienres, al terminar el vienres ya noté qu'entá nun taba recuperáu de la Resistencia en Nembra, una carrera mui rápida y dura, con un nivel altísimu, na que llegara a meta tan cansáu casi como nel trail Villa de la Sidra Nava y eso que fuera 5 kilómetros menos.

Asina que tocáu del psoas, fuimos tola familia hasta Cuevas de Soria, onde facíase'l primer Trail Oxigeno Puro de Soria, con un percorríu de 16 km y 600 m de desnivel, amosando a les clares, lo rápida que diba ser la carrera, lo que quiciás nun me diba bien y muncho menos el calor que facía ya a les 11 la mañana cuando entamaba la carrera.

 

Imáxenes en plena carrera y Miguel comentándo-y la xugada a la entrevistadora

Al final, lo de siempre, 200 corredores, un nivel menor que n'Asturies y poca xente con ganes de salir alantre, asina que sin querer entames la carrera y veste nes 25 primeres posiciones, corriendo fuerte, nun tarrén cenciello y de grandes ritmos, hasta entamar el cortafueos hacia'l Alto de Inodejo, puntu más altu de la carrera, onde veo que les pates nun van y entamo a perder posiciones.

Algamamos el cumal, garramos agua y entamamos la baxada más o menos a metá de carrera, teniendo per delantre una llarguísima baxada, onde'l psoas y el piramidal ya nun me dexen correr fuerte, viendo como nun soi a caltener ritmu, faciéndoseme perpesada la rápida baxada y siguimos perdiendo posiciones, cuando debería baxar nestos tarrenes a fueu dafechu.

Una última xubidina hacia un castru y ermita penriba'l pueblu, dempués d'un tramu guapísimu de foz pel ríu Izana, dábame un pocu d'aliendu pa llevanos a la fín, hasta'l pueblu de Cuevas, entrando a la meta dempués d'un calvariu de carrera, onde nun pude esfrutar, nin correr tolo que me diba prestar, aportando na posición 42 y coxu dafechu, cola sensación de fastidiar tola temporada que tenía en mente.

Resistencia Reino Astur Nembra (Ayer)

2 d'Abril de 2023

Track: Resistencia Reino Astur Curtiu (Ayer)

Web del Trail: Resistencia Nembra   

Clasificaciones: Clasificaciones 2023

Continuamos con esta temporada tan correndera, na que tornamos a sentinos bien y anque dexáremos d'entrenar pela semana, con tan sólo andar pel monte pa dir a esguilar y correr cada quince díes, siguimos ganando estáu de forma y vamos completando carreres tan positives como la pasada en Nava, nel primer Trail Villa de la Sidra.

Semeya perguapa per tramos de correr a fueu

Esta vegada díbemos pa Nembra, con menos kilómetros qu'en Nava, pero más desnivel y una carrera más típicamente asturiana, ye dicir, a pinchu p'arriba y a fueu p'abaxo, ensin medies tintes. Ya la corriera va cinco años, cuando facíase en Xunetu y gustárame muncho, teniendo la idega de facer la meyor carrera posible.

Primera parte de la carrera a pinchu hacia'l picu la L.lomba

D'esti xeitu, salimos bastante alantre, viendo como'l nivel diba ser peralto, saliendo como tiros tolos participantes, hasta topanos con un tapón, al cruciar los primeros regatos. Llueu, fuese estirando pali pali la carrera, hasta aportar a la gran xubida hasta'l picu la L.lomba, un entepechu brutal que tuve que tragar con un personaxe llevando musiquina discotequera, hasta qu'a la fín pude adelantalo.

 

Tramu correnderu nel crestéu hacia'l picu Pedru García

Son cosines que me fadien munchísimu y los organizadores deberíen tomar cartes nel asuntu, nin auriculares nin música qu'ofenda al restu participantes. Si corres pel monte, deberíes ser capaz d'esfrutar del monte, de los soníos, del alendar de los compañeros que corren al to llau, de la charra en comuna y del bon ambiente de les carreres, sinon, vete a dar vueltes a un parque con tu musiquina y dexar vivir el monte al restu los participantes.

 

Increyible lo dura y correndera que ye la Resistencia Nembra

Sacante d'esta falta d'empatía, llueu de la L.lomba, pude esfrutar de correr y aldericar con varios deportistes demientres avanzábemos hacia'l picu Pedru García, onde nos tocó ver l'horror de los incendios d'esta selmana, corriendo per tierra quemada, casi caliente y tragando un pelín de fumu, qu'entá salía d'esta tierra astur, que dalgunos empéñense n'estrozala.

 

Tramu final de carrera hacia la meta

Como siempre dempués d'encumar el puntu más alto, toca una llarguísima baxada, con tramos téunicos al entamu, otros más correnderos na parte media pa tornar a baxar per trialeres bien guapes, hasta'l ríu Negru, onde ya tendremos un llanéu hasta arribar a la meta en Nembra, onde Rubén, el nuesu animador preferíu y paisanu de Nembra, tenía a bien saludar participante, tres participante, nesta folixa del trail.

Aportamos a meta dempués d'una carrera bien lluchada

El nivel ye tal, que dempués de facer una bona carrera, aportamos a meta el 121 de 313 participantes y el 38 de la mió categoría de 105, siempre rondando tar nel primer terciu de los compañeros, pero como digo, ye una pasada ver el nivel notándose que los corredores entrenen y muncho... poro, los montañeros agora, quedamos cola sensación de facer lo que podemos ya intentar esfrutar d'esti deporte como un complementu estupendo al restu de les nueses actividaes.

 

En cuanto, a la organización del pueblu de Nembra, namái que dar les gracies pol ambiente, pola carrera, pol avituallamientu final, con pasta recién cocío, empanaes, cerveza gratis, mercáu astur y tol pueblu volcáu con esta folixa del trail, a la qu'espero volver mientres tenga fuercies y ganes d'intentar competir dientro del nivel al que pueu y pienso dar.

Trail Villa de la Sidra (Nava)

22 de Marzu de 2023

Track: Trail de Peñamayor (Nava)

Web del Trail: Trail Villa la Sidra

Clasificaciones: Clasificaciones 2023

Un añu xustu fai que tornábemos a correr pel monte, o más bien, a "competir" dientru del nuesu nivel, que ye'l montañeru que fae de too. Daquella, ficiera la carrera curtia, sofriendo un pelín na parte final de les Foces del Pendón, como suel pasar nesta carrera, sicasí termináremos contentos y con ganes de más, faciendo otres tantes carreres na temporada.

Esta vegada, vengo mui rodáu, anque nos últimos meses ya entré en mou escalador y la compañera de carreres lesionóse, poro nun toi entrenando res, yendo namái, que de carrera en carrera que nun ye poco. Pero bono, pente los tres díes nel Trail de Deva y correr la Maxi Kangas, nun corretiar de quincena en quincena, nun me taba yendo mal.

 

Silvia que volvía a correr una carrera llueu d'un mes y mediu

Como plantegame esta carrera de 26 kms yera una entruga que tenía na tiesta, ya que sabía que podía apretar casi tol percorríu, asina que salimos un pocu atrás como siempre, garrando ritmu y corriendo sacante los atascos per Pra, tolos primeros kilómetros hasta l'entamu de la xubida hacia Fayacaba.

Durante la xubida, pesie a dir cargando un pocu pates, vi que'l ritmu que llevaba yera curiosu y enriba taba divirtiéndome, sufriendo pocu y charrando muncho cola xente que diba alcontrando, asina que siguimos fuerte hasta Peñón d'Orosu pa baxar a echar un tragu y entrar n'ascensión al Picu Peñamayor.

 

Travesando'l cresteríu per Peñamayor

Equí entamamos a regular ya que les posiciones nes que me movía, yeren de ritmos fuertes, a los que nun toi mui avezáu, asina que controlando calambres con sales, hidratando y demás, fuimos a caltener ritmu, hasta entamar la baxada hacia les Praeres, onde tamién nun quise apretar muncho, ya que la pista fízoseme pelín pesada.

Nes Praeres, piqué dalgo y continué a la espera de los problemes vinientes, pero xubimos la Varallonga con muncha facilidá, ganando posiciones y ya tireme abaxo hacia les Foces del Pendón, con otra visión, descendiendo apriesa y sofriendo un pelín, como siempre nel llanu de les foces, pero munchísimu menos qu'otres vegaes, anque sigue paeciéndome incomodísimu de correr esti tramu.

 

Les Foces del Pendón pasando factura como siempre

Aportamos al descensu final hacia H.uentesanta, colo meyores ritmos de carrera que soi a alcordame, faciendo una xubida hacia Piloñeta, corriendolo tou y ganando dalguna posición más, pa facer los últimos kilómetros a bonos ritmos y con sensaciones mui prestoses hasta aportar a la meta, onde alcontrábase Montse animando, a la que vamos ver si-y pica volver a correr.

Como siempre ambientazu per Nava, llavase un pocu, llimpiar una ferida d'un fostión que pegara na parte final y tomar unes cerveces esperando por Silvia, que tuviera qu'abandonar por mor de dolores nuna rodiella.

Aportando a meta mui contentu cola carrera

En resume, carrera guapísima, con nueva organización de diez, na qu'esfruté munchísimu con un tiempu de 3 hores y 10 minutos, quedando'l 56 na xeneral y el 15 na mio categoria y como siempre alloriando cola xente, lo munchu qu'entrena y lo fuerte que ta, ya que paezme que por muncho qu'entrenara baxar de les 3 hores, quédame fuera l'alcance y siendo sinceros, tampoco ye a aportame tanto.... pocos montañeros quedamos nesto de les carreres.

Kangas Mountain (Cangues d'Onís)

4 de Marzu de 2023

Track: Cangues Montain (Cangues d'Onís)

Web del Trail: Cangues Montain (Cangues d'Onís)

Clasificaciones: Clasificaciones 2023 

Tornábemos a correr en Cangues d'Onís, cincu años dempués, quedándome ensin dorsal pa la Original de 33 km, nun sabiendo mui bien que facer, decidiéndome al final, por intentar superame un pocu y correr la Maxi Trail de Cangues de 58 km, másima distancia y de mayor desnivel a la que diba enfrentame, llueu del Desafiu Somiedu del branu anterior.

Nesti sen, sabíemos que la carrera con terminala, abríanos la puerta a dir apuntándonos a la mítica Travesera, pero bono, tampoco ye que fuera un aspeutu definitivu, sinon qu'apetecíame probar más distancia y ver si yera capaz de regulame curiosu y facer una carrera mediu intelixente.

 

Ascensión al Picu L'Arbolín... pelín afogáu que díbemos

Como nos grandes eventos, fuimos pa Cangues d'Onís, a durmir na furgo, topándonos con munchos collacios del GM Xuan de la Borrina, pasando una tarde-nueche estupenda, cenando y tomando unes cerveces enantes de dir a sobar, descansando bastante mal, pa ser sinceros, espertándome a les 3 de la mañana, dando vueltes el restu la nueche hasta les 6 de la mañana que sonó l'alarma.

Vestise na furgo, echar una güeyada nel bar de la Estación, con poca pinta d'abrir, yéndome hasta la gasolinera, onde pude tomar un cafetín, mercar dalgún donuts, una isotónica y agua pa salir bien hidratáu, escaecíendoseme coles prises el frontal, necesariu a dicir verdá pa les primeros venti minutos, que pude facer tranquilamente gracies a la montonera corredores que xuntámonos a les 7 la mañana pa facer esta Maxi Trail de 58 km y 3500 positivos.

 

Los dos alloriaos que participamos na Maxi Kangas

Na salida xúntome con Alberto y Natalia, que sácanos una semeya de salida, arrancando peles cais adormecíes de Cangues, con dalgún qu'otru vecín, aplaudiendo dende les ventanes al nuesu pasu. Los primeros kms sedrán más rápidos de lo que diba prestame hacia'l picu Arbolín, aportando en pocu menos d'una hora, decidiendo dexar qu'Alberto tire a sos ritmos y ver si soi capaz d'alcontrar la mió carrera, ya que taba faciéndoseme pelín abegosu siguilo.

Ya más tranquilu, garré un grupín col que fuí alternando posiciones, charrando dempués de Les Roces, con un corredor de Madrí, con muncha esperiencia en ultres, asina que tomelu como referencia, faciéndoseme un poco más amable tol tramu de carrera pel Cantu La Cerica, anque a la baxada final hacia Cangues, tuve que baxar ritmu, porque ví que nun me sentía mui bien.

 

Cruciando dos pontes claves na Kangas Mountain

En Cangues tuve un bon ratu, esperando a ver si alcontrábame con más compañeros que facíen la Original, pero nun tuve la suerte, asina que xinté lo que consideré, recoloqué les zapatilles con calma y salimos pel Puente Romano, hacia'l picu La Cogolla, compartiendo un tramu colos de la original, lo qu'agobia un pelín al xuntanos tantos corredores, con tiempos y oxetivos mui distintos.

Separámonos al fin y entramos nun tramu de carrera llarguísimu, nel que vémonos mui pocos corredores en tola xubida, faciéndose per llarga l'ascensión, teniendo na crestería final un par d'amagos de calambres, dalgo normal dempués de 5 hores de carrera.

Nel avituallamientu, el cuerpu pide enerxía, asina que metemos barrines enerxétiques, charramos calmao colos voluntarios y salimos caleyando sele, pa ver si les pates vuelven a furrular, controlando los calambres con sales y bebiendo muncha agua, algamandos una baxada hacia Avalle, más que positiva, compartiendo tramu con corredores del Horizonte.

Xubida hacia Següencu puntu clave de la carrera

 

Nesti puntu, ya conocemos bien el restu la carrera, cola xubida hasta'l colláu Andrín, la cual faigo percómodu, sintiéndome bien, anque la baxada hacia Tornín, dizme que tengo que regular, que queda muncho por delantre, aportando al avituallamientu con un compañeru del Horizonte y col corredor madrilanu, entamando la temida xubida a Següencu, pela nomada pedrera.

Como siempre, la pedrera nun ye lo pior, sinon que la pindia xubida pela viesca hasta l'últimu avituallamientu del día, faise perduro pol calor, polos kms que llevamos enriba y les hores (8 hores y 36 min). Una vegada más, toca tirar de cabeza, tomalo con calma, beber, xintar un bombón de chocolate qu'ufreciéronme y facemos la cabera xubida hasta L'Altu Següencu y entamábemos la baxada final hacia Cangues sabiendo que ya taba casi fecha.

 

Aportábemos a meta dempués de 9 hores y media de carrera

 Paez mentira qu'una baxada tan correndera y prestosa, si vas con pates, atragántese tanto, adelantando delles posiciones na primer parte, alcontrándome colos últimos de la Original (munchísimu méritu, que diben sofriendo lo suyo) hasta Ñeda, onde véome bien apretando na xubida y pagándolo nos últimos kilómetros de baxada, tocando controlar munchísimu pa nun terminar la carrera con calambres.

Finalmente, corríemos peles cais de Cangues d'Onís, entrando na meta, con collacios y tolos compañeros del GM Xuan de la Borrina animando, faciendo un total de 9 hores y media clavaes, no más baxo del intervalo que tenía en mente entre 9 y media y 10 hores.

En resume, carrera intelixente per primer vegada, sin cebame, con dalgún tramín de sufrir por cansanciu, pero regulando munchísimu los calambres, sabiendo soportar llevar el frenu manu echáu, terminando na posición 114 d'entre 222 parcipantes lo que nun ta mal del too, pa ser una carrera tan llarga y dura.

Trail de Deva (Xixón)

17,18,19 de Febreru de 2023

Track: Trail de Deva (Xixón)

Web del Trail: Trail de Deva (Xixón)
 
Clasificaciones: Clasificaciones 2023  

Última carrera que ficiera enantes de la pandemia, fae dos añinos, terminándola, nun sé mui bien cómo, col tobiellu fechu una llaceria. Dempués del trail per Deva, tuviera tiempu abondo pa recuperar y munchu más hasta que nel trail de Peñamayor de l'añu pasáu, decidiera tornar a esto de les carreres pel monte.

Esta vegada, aprovechando qu'andaba per casa en Xixón, decidí probar a correr tres díes siguíos, faciendo la nocturna de 5 km el vienres, una carrerina rápida y curtia de 11 km el sábadu y el domingu terminar cola llarga de 27 km, too ello combináu como non, con dir a esguilar nos tiempos muertos pente carrera y carrera.

Entamu del primer día na nocturna de 5 Km

Entamábemos cola noctura de viernes, a la qu'aportaba dempués de da-y unos peguinos a un proyeutu na Carba en Peña Manteca. D'esti xeitu, cansáu d'apretar venía con un apixote perimportante conduciendo, poro tocó tomar un cafetín nel Camping de Deva con una palmerina de chocolote y ya preparámonos calentando un pocu y saludando a tolos familiares y collacios que corríen esti finde.

Una vegada preparaos los distintos participantes, fuimos saliendo en pareyes con diferencia de 30 segundos, nuna modalidá de contrarreló prestosa abondo, al igual que correr de nueche col frontal, toda una esperiencia en cuanto a los sentidos, corriendo lo más apriesa posible sollerte de cada pasu que das, anque pelín agobiante.

Preparaos pa la curtia del sábadu de 11 Km

Al día siguiente, llueu de tomer ciertes birres con un collaciu, llevantámonos preparaos pa la segunda carrera, de 11 km pero mui correndera, poro tocaba intentar controlar nervios y nun dir a fueu, cosa que suel costame munchísimu. Nel día anterior, faciendo la posición 30 na xeneral, diba ser difícil regular, asina que salí con Gus y Miguel, pero aína perdí la tranquilidá adelantando a tola xente que diba alcontrándome.

 

A la fín, los primeros kilómetros de reláx, marcaron un pocu la clasificación perdiendo 5 puestos col día anterior na xeneral, quedándome con bones sensaciones por apretar controláu, anque con munchos temores pal últimu día, nel que llegaba la prueba llarga de 27 km y nun sabía como diben responder les pates.

Esfrutando muncho'l sábadu na correndera

 

Pa rematar, como non, una persona sensata diría pa casa a descansar, tumbase nel sofá, estirar un pocu, pero quedara con collacios pa trepar un pocu y el día taba mui guapu como pa quedar en casa. Asina que vermú, bocata y pasar la tarde na paré, sicasí, nun contaba con tener que subir hasta L'Argayu... teniendo un patéu finu cola mochilona d'esguilar.

 

L'últimu día, despiértome con poques ganes de correr, llueu de tomar dalgo con más collacios, pero bono, teníemos el retu d'intentar terminar l'envite corredor, asína que pa Xixón tiramos, volviendo a intentar salir con Gus y Miguel, pero como siempre, voi dexándome llevar y na primer cuesta fuerte, piérdolos de vista y ya continúo en solitariu.

Col frenu man echáu na llarga de 27 Km del Domingu

 

Dicir, que llevé'l frenu man echáu hasta'l kilómetru 15 nel avituallamientu de metá de carrera más menos y viendo que les pates furrulaben, intenté caltener un ritmu controláu, dando la vuelta a tol cordal de Riosecu y sabiendes de que tábemos ya volviendo hacia Deva, apreté un pocu más na penúltima xubida, garrando nel camín a Illán y Alberto que diben en pareya.

 

Dellos kilómetros xuntos, con dalgún percance d'Alberto y qu'Illán nun diba como debiera, siguí baxando fuerte dexándolos atrás, garrando la última xubida hacia l'observatoriu con bon ritmu y cola tiesta puesta na cabera baxada y sobretou nos kilómetros d'asfaltu hacia'l camping de Deva.

Aportamos a meta faciendo una bona carrera nos tres díes calteniendo posiciones

Por sorpresa, muscular y mentalmente pude terminar con ritmos decentes, non tan rápidu como'l sábadu pero sí con sensación de nun tener calambres, ganando dalguna posición más, terminando los tres díes, na posición 33 de la xeneral, lo que dexó un bon tastu de cara al restu la temporada.

Como siempre, ensin ser de les carreres más guapes d'Asturies, sí que correr por casa presta, con tola familia faciendo deporte o viniendo a animar, asina como'l puntu de retu de los tres díes de carrera, colos que camiento y espero, poder siguir faciendo y meyorando sensaciones y posición.

 

Cayón Trail (Piloña)

5 de Febreru de 2023

Track: Cayón Trail (Piloña)

Web del Trail: Cayón Trail (Piloña)

Clasificaciones: Clasificaciones 2023  

Pues cuantayá que tornaba a L'Infiestu a correr na Cayón Trail y ye que la cabera vegada nun quedara mui contentu, nun sé mui bien, si pol estáu físicu, si porque taba a piques de lesioname del piramidal o porque sin más, llevaba nel 2017 munchísima tralla enriba y nun disfrutara la carrera como tien de ser.

Esta vegada, con un día soleyeru y fríu, llueu de facer un pateín curtiu con dellos collacios nel cercanu Picu Incós, diba a la carrera a esfrutar a intentar reconcialiame coal carrera y de pasu, a ver si podíemos meyores aquellos tiempos de cuando yera más mozu.

Numberosa participación de corredores nel Cayón Trail

Llueu del monte y tomar una cervecina colos collacios, avérome a pol dorsal y de pasu recibir un regalu que tocárame nun sortéu, siendo unos playeros de trail y un pantalón la sorpresa, asina que pocu más podemos pidir, más que poner el dorsal y salir a completar el día lo meyor posible.

Munchísima xente per Infiestu pa la carrera, anque a dicir verdá, pocos conocíos, así que charro con poca xente y abellúgome del fríu al solete, nos minutos enantes de la carrera. A les 4 la tarde, entamamos a correra aputuguñaos pente les cais, pa salir pelos barrios altos d'Infiestu hacia'l monte Cayón, onde la carrera va estirándose en tramos mui correnderos, hasta aportar a les primeres ramples del monte.

Tramos correnderos na parte inicial y final

Vamos turnando sucesives xubides, con dalgún tramín llanu, ya inclusu con dalguna pequeña baxada hasta garrar otra trialera pindia, hasta aportar a lo alto'l monte Cayón, el Picu Fariu, onde quiciás, dalgo reservón na xubida, entamo a correr más fuerte, pasando a unos cuantos corredores qu'apretaron na xubida, con tramos de llanéu y quebrapates a ritmos mui fuertes.

 

Cuando quiero dame cuenta, percorremos tol monte y entama la baxada a fueu, onde voi alcontrándome cada vez meyor, corriendo tola segunda parte, inclusu con un repechín quebrapates, mui al final de la baxada, hasta salir del tarrén téunicu, superdivertíu y garrar les pistes finales de baxada a L'Infiestu, onde soi a garrar ritmos, mui lloñe de los avezáu en mí, pembaxo los 4 min/km.

Diversión asegurada nes baxaes téuniques

Con mui bones sensaciones, aporto a meta, baxando dellos minutinos mi anterior y única participación, garrando cuatru frutos secos y una botellina, pa tirar a la furgo a camudar la ropa, ya que la temperatura ye perbaxa y nun ta p'andar perende pasando fríu.

En resume, tastu perdulce del día, pente'l monte seliquín pel Picu Incós y agora pel Cayón, quitando carbonilla y esfrutando de la carrera munchísimu, anque tamién hai que dicir que l'estáu de les trialeres yera de primera ensin barru y fue un prestor baxar a fueu tol monte Cayón.

Entramos n'Infiestu faciendo un tiempín curiosu