Valle (Piloña) - Tombu - La Olla - La Rasa - Campiellos - Foz de Valle

16 de Febreru de 2026 

Track: Valle (Piloña) - Tombu - La Olla - La Rasa - Campiellos - Foz de Valle

Continúa la motivación montañera nel grupu Xuan de la Borrina, buscándonos, un día más, la vida p'alcontrar dalguna ruta motivante y dalgo novedosa sobretou pa min, que tengo enforma patiáu dellos conceyos asturianos, sicasí, tenía ganes de tornar a Piloña, asina que tocó restolar que visitar, alcordándome que la parte alta del rigu Valle, entá nun lo conocía, poro preparámonos una circular pelos montes de la redolada.

Partimos del pueblu de Valle (280 m)

Como siempre almorzaremos na capital del conceyu en L'Infiestu y continuaremos hasta'l pueblu de Valle, onde lo meyor ye aparcar na parte baxa na Ilesia, anque nós ficímoslo nuna pequeña plazuela na parta alte. Prepararémonos nun día pelin murniu pero con temperatura agradable pa caleyar y pocu más sero de les 10 de la mañana taremos dando los primeros pasos pel pueblu.

La Pesanca (Piloña) - Moñacos - Peñe Crespa - Incós - Saolla - Agüeria - Pandemules - L'Argañal

22 de Xunu de 2025

Track: La Pesanca (Piloña) - Moñacos - Peña Crespa - Incós - Saolla - Agüeria - Pandemules - L'Argañal

Tornamos al monte col GM Xuan de la Borrina, llueu d'unos finde de descansu y vamos facelo con una ruta que teníemos na tiesta dende l'añu pasáu, pero nun alcontráremos el momentu. Tampoco ye qu'esta dómina l'añu fuera la meyor y lo sabíemos ya que la broza ya espoxigó nel monte y sabíemos que les dificultaes pa completala diben ser grandes.

Sicasí, yera'l día más llargu del añu, asina que tiempu teníemos pa completala y ganes tamién, poro averámonos hasta'l nuesu puntu favoritu de Piloña pa entamar les rutes, l'area recreativa de la Pesanca, onde al aportar alcontramos varies furgonetes que pasaren la nueche tranquilamente.

Puntu d'entamu na Pesanca (392 m)

 

Pocu más allá de les 9 la mañana, tamos preparaos pa entamar a caleyar, llueu d'un café pelín desesperante n'Infiestu, axuntándonos nel aparcaderu los cincu aventureros d'esta xornada, qu'aniciaba, como non, camín peles pistes que van a la vera'l rigu Infiernu, pasando pol cada día más guapu Muñizón y empobinándonos hacia la Foz del Infiernu primeru y dempués pel valle Pedrosa hacia'l monte Corbera.

Son munches les vegaes que pasamos per equí, asina que simplemente, vamos charrando animósamente, esfrutando de los distintos tabayones del rigu Infiernu y contándo-y a Rosa les mil batalles que tuvimos nestos años per esta fastera tan guapa.

La Matosa (Piloña) - Les Cuerries - Argumosu - Les Cabañes - Pandacéu - La Praduela

16 d'Avientu de 2023

Track: La Matosa (Piloña) - Les Cuerries - Argumosu - Les Cabañes - Pandacéu - La Praduela

Última ruta oficial del GM Xuan de la Borrina del 2023 y facía tiempu que nun preparaba una ruta, penriba'l mapa, tan sólo por conocer una fastera en concretu, sin un monte nomáu como oxetivu. Como non, mi conceyu preferíu pa conocer foces, riegues, valles ye Piloña, esi conceyu maltratáu montañeramente falando por ser vecín de conceyos más "clásicos" montañeros como Ponga o Casu, sicasí, somos unos auténticos namoraos de Piloña pa facer monte y la variedá y cantidá de rutes feches pol grupu son una amuesa clara d'esti amor.

Nesti casu, vamos volver dempués d'unos añinos al valle del rigu Color, que ya conociéramos en parte cola ascensión al Picu Priede o al Picu Torre, pero que faltábame conocer tol valle alantre hacia Les Vízcares que ye una fastera dafechu increyible, lloñe de cualesquier población y mui xabaz dientro d'Asturies.

 

Salimos dende La Matosa (315 m) en Piloña

Pa ello, como na ruta al Picu Torre vamos salir dende'l pueblín de la Matosa, asitiáu nun preciosu colláu, con vistes a los valles del rigu Color a un llau y del Tendi al otru. Aparcaremos na parte alta del pueblu, onde hai bon sitiu pa ello y baxaremos en direición norte, con vistes al Picu Priede, pa salir a la manzorga abandonando'l solín mañaneru y entrando nuna baxada hacia'l rigu Color, onde les temperatures baxen hasta los cero graos, teniendo qu'abriganos con tolo que llevamos na mochila.

Cayón Trail (Piloña)

5 de Febreru de 2023

Track: Cayón Trail (Piloña)

Web del Trail: Cayón Trail (Piloña)

Clasificaciones: Clasificaciones 2023  

Pues cuantayá que tornaba a L'Infiestu a correr na Cayón Trail y ye que la cabera vegada nun quedara mui contentu, nun sé mui bien, si pol estáu físicu, si porque taba a piques de lesioname del piramidal o porque sin más, llevaba nel 2017 munchísima tralla enriba y nun disfrutara la carrera como tien de ser.

Esta vegada, con un día soleyeru y fríu, llueu de facer un pateín curtiu con dellos collacios nel cercanu Picu Incós, diba a la carrera a esfrutar a intentar reconcialiame coal carrera y de pasu, a ver si podíemos meyores aquellos tiempos de cuando yera más mozu.

Numberosa participación de corredores nel Cayón Trail

Llueu del monte y tomar una cervecina colos collacios, avérome a pol dorsal y de pasu recibir un regalu que tocárame nun sortéu, siendo unos playeros de trail y un pantalón la sorpresa, asina que pocu más podemos pidir, más que poner el dorsal y salir a completar el día lo meyor posible.

Munchísima xente per Infiestu pa la carrera, anque a dicir verdá, pocos conocíos, así que charro con poca xente y abellúgome del fríu al solete, nos minutos enantes de la carrera. A les 4 la tarde, entamamos a correra aputuguñaos pente les cais, pa salir pelos barrios altos d'Infiestu hacia'l monte Cayón, onde la carrera va estirándose en tramos mui correnderos, hasta aportar a les primeres ramples del monte.

Tramos correnderos na parte inicial y final

Vamos turnando sucesives xubides, con dalgún tramín llanu, ya inclusu con dalguna pequeña baxada hasta garrar otra trialera pindia, hasta aportar a lo alto'l monte Cayón, el Picu Fariu, onde quiciás, dalgo reservón na xubida, entamo a correr más fuerte, pasando a unos cuantos corredores qu'apretaron na xubida, con tramos de llanéu y quebrapates a ritmos mui fuertes.

 

Cuando quiero dame cuenta, percorremos tol monte y entama la baxada a fueu, onde voi alcontrándome cada vez meyor, corriendo tola segunda parte, inclusu con un repechín quebrapates, mui al final de la baxada, hasta salir del tarrén téunicu, superdivertíu y garrar les pistes finales de baxada a L'Infiestu, onde soi a garrar ritmos, mui lloñe de los avezáu en mí, pembaxo los 4 min/km.

Diversión asegurada nes baxaes téuniques

Con mui bones sensaciones, aporto a meta, baxando dellos minutinos mi anterior y única participación, garrando cuatru frutos secos y una botellina, pa tirar a la furgo a camudar la ropa, ya que la temperatura ye perbaxa y nun ta p'andar perende pasando fríu.

En resume, tastu perdulce del día, pente'l monte seliquín pel Picu Incós y agora pel Cayón, quitando carbonilla y esfrutando de la carrera munchísimu, anque tamién hai que dicir que l'estáu de les trialeres yera de primera ensin barru y fue un prestor baxar a fueu tol monte Cayón.

Entramos n'Infiestu faciendo un tiempín curiosu

Lludeña (Piloña) - Picu Incós

4 de Febreru de 2023

Track: Lludeña (Piloña) - Picu Incós

Día de carrera col Cayón Trail n'Infiestu, pero siendo una carrera curtia y de tarde, dábame pereza perder la mañana ensin facer gran cosa per casa, asina que falo con Carlos pa dar una vueltina pela zona, animándose Haritz con Laia, decidiéndonos por un techín nororiental como yera'l Picu Incós, techu del conceyu de Cabranes.

Pa ello, quedamos pa tomar un cafetín n'Infiestu a una hora moderada, averándonos dempués hasta'l cercanu pueblín de Lludeña, onde asítiase un Palaciu, una Ilesia curiosa y un Turruxón que bien valía la so reconstrucción, por munchos motivos, tanto hestóricos, como poles vistes que tien de tolos Picos d'Europa.

 

Salimos del pueblu de Lludeña (297 m) con vistes al picu Incós

Saldremos caleyando enfrente la Ilesia, baxando unos metros de carretera hasta la Picota, onde garramos camín hacia la Llantada, pasando pela enorme casería de la Blanca, siguiendo camín penriba del Turruxón medieval de Lludeña, el cuál caltiénse nun estáu curiosu, ensin esbarrumbe de les sos parés, pudiendo restaurase como puntu turísticu piloñés, con grandes vistes de tolos montes orientales astures.

El Pedrosu (Piloña) - Peña Niañu - Valle Llarañes

 2 d'Abril de 2022

Track: El Pedrosu (Piloña) - Peña Niañu - Valle Llarañes

Ivernada clásica primaveral que déxanos ensin posiblidaes de facer dalgo más curioso, tanto nel monte, como esquiando y sobretou esguilando. Asina qu'aprovechando que taba'l nuesu collaciu vascu Fernan per Asturies de monte con Nel, preparamos una ruta esprés viendo que'l sábadu pudiera aguantar un pelín la meteo.

A la llamada montuna, diben apuntase tamién Charly, Benjamín y Anna, asína que xuntámonos un grupín en L'Infiestu, col envís de conocer un pelín más, el conceyu de Piloña, que tantes bones rutes lleva dándonos nestos años.

Partimos del pueblín d'El Pedrosu (445 m)

Magar del almuerzu de rigor, siguimos camín en coche hacia'l valle d'Espinaréu, saliendo al pocu del pueblu del mesmu nome per una pista que tien depositanos n'El Pedrosu, llugarín onde aparcaremos delantre d'unos apartamentos rurales y prepararémonos pa entamar a caleyar.

La Pesanca (Piloña) - Monte la Foz - Xerra Trallán - Serondu - Cubilones

23 de Mayu de 2021

Track: La Pesanca (Piloña) - Monte la Foz - Xerra Trallán - Serondu - Cubilones

La primavera n'Asturies, ye falar de verde y falar d'agua y esti añu, por mor del desxelu y les últimes lluvies, tenemos un verde tan intensu, que pasiar per una viesca nun día soleyeru, ye dalgo dafechu imprescindible pa cualesquier amante de la ñatura.

Y cuando quies sentir tol espoxigue primaveral a onde vas, pues a Piloña, como tantes otres vegaes. Enxamás, cansaréme d'encomendar esti conceyu pa facer monte n'Asturies, siempre menos visitáu que conceyos vecinos como Ponga o Casu.

Partimos del área recreativa de la Pesanca (420 m)

 

Esti día ficimos un grupín curiosu, poro tardamos un pelín en ponenos en marcha saliendo casi a les 9 y media, con una temperatura qu'invita a caleyar. Fadrémoslo saliendo hacia la pista que xube hacia les foces del rigu infiernu y a los poco metros, garraremos un camín que va facenos conocer tola viesca del monte La Foz.

 

Nun tuviera la suerte de conocer esti camín entá y tengo que dicir que fue una de les grandes sorpreses del día, siempre tendíu con bona caxa y faciéndonos ganar desnivel sele nunes envueltes bien curioses, que nos van dir faciendo travesar les vallines de L'Utra, Trescorrales y la riega la Foz hasta averanos hacia'l Cuetu Cuergu.

La Piñera (Piloña) - Picu Priede

8 de Febreru de 2021

Track: La Piñera (Piloña) - Picu Priede

Continuamos en tiempos de pandemia, nos que les nueses salides pel monte del grupu, tan siendo d'una forma non oficial y poro toi sacando rutes alantre, más bien curties, que sirvan pa conocer montes y llugares nuevos, pero ensin grandes ascensiones nin xataes de patiar.

Pa ello, esta vegada averámonos hasta'l conceyu de Piloña, esi gran escaecíu del monte astur, nel que tenemos siempre tan bones rutes y tan bones alcordances de les sos foces, de los rigos y de los cumales, sobretou na llende col parque de Reres.

Salimos de la Piñera (115 m)

La Matosa (Piloña) - Picu Torre

6 de Xineru de 2021

Track: La Matosa (Piloña) - Picu Torre

Día de reis na ñevada más grande de los últimos años y como somos republicanos, pues tiramos pal monte. Alcuérdome d'una ñevadona así, fai diez años, cuando ficiéramos n'ivernal el Picu Fariu nes llendes de Xixón, Siero, Sariegu y Villaviciosa, más menos.

Ta tol mundiu más menos igual, esquiando, saliendo a correr pel ñeve, una llocura, pero ente tanto plan, alcontrámonos Kíla y yo, preparando a les 9 la mañana una ruta que nos pudiera prestar. Vueltes y más vueltes de tracks y decídome a tirar pa Piloña, a facer dalgún de los vértices xeodésicos que tengo per facer nesa fastera.

Vistes de la Matosa, el nuesu puntu de partida (284 m)

Rifabar (Piloña) - Maserones - Xiblaniella - Lligüeria

25 Payares de 2018 
 
Track: Rifabar (Piloña) - Maserones - Xiblaniella - Lligüeria

Magar d'un tiempu de reposu, dende les xataes d'Ochobre per Picos, tornamos al monte llueu de que quedaren nel tinteru un par de rutes del grupu que nun acabaron por salir. Esta vegada sí que xuntámonos un bon garrapiellu xente y dan un día de sol estupendo pa poder conocer ún de les poques foces na fastera del Infiernu que quédame per conocer: Los Maserones.

El día anterior, tuviéramos esguilando pela Forcada y como non, quedamos a durmir na capital de Piloña, L'Infiestu, p'almorzar un pinchín de tortiella de bona mañana y una vegada que xuntémonos toos entamar a viaxar hacia la vega'l rigu Espinaréu.

Partimos dende'l pueblu piloñés de Rifabar (323 m)

Espinaréu (Piloña) - Picu Sopiedra

11 de Marzu de 2018

Track: Espinaréu (Piloña) - Picu Sopiedra

Nos últimos tiempos, tengo un enfotu especial por conocer tolos valles perdíos del conceyu de Piloña y ye que considero qu'esti conceyu, ta quiciás dalgo tapecíu pelos conceyos d'alredore (Casu, Ponga,...), pertenecientes a dellos parques naturales.

Por embargu, tenemos milenta opciones pa facer montes, milenta riegues, foces, crestones, xerros que conocer, pasos por alcontrar, siendes por redescubrir usaes pelos pastores de Piloña. Tán sólo, hai que garrar el mapa ya intentar trazar una ruta afayaiza pal nuesu envís del día.

Salimos de ruta dende Espinaréu (241 m)

Villamayor (Piloña) - El Chorrón - El Tombu - Valle

27 de Xineru de 2018

Track: Villamayor (Piloña) - El Chorrón - El Tombu - Valle

Siguimos pel mes de Xineru, nesti iviernu dafechu anormal, en comparanza colos caberos años, ya que tamos teniendo un iviernu de los de verdá, de los de ñeve y lluvia a fartar. Poro, nun día pelín gafientu, con poques posibilidaes de tener bones vistes, nun paga la pena metese una xabazada de ruta lluchando col mantu nival.

Lo meyor, ye tomáselo con calma y dedicase a facer rutines seliquines nos que conocer dalgún requexín d'Asturies que tengas na tiesta. Nesti casu, sigo pelín empeñaú en siguir faciendo monte per Piloña, ya que paezme un conceyu con grandísimes posibilidaes y quiciás queda arrequexáu polos conceyos vecinos de Ponga y Casu.

Partimos de Villamayor ( m)

La Pesanca (Piloña) - Foz del Infiernu - Foz de los Cubilones - La Becerrera - Foz de Moñacos

2 d'Abril de 2017

Track: La Pesanca (Piloña) - Foz Infiernu - Foz de los Cubilones - La Becerrera - Foz de Moñacos

Hai díes y son munchos, qu'escoyemos les rutes non por facer un cumal en cuestión, sinon por conocer un posible camín que nos tien de llevar a la base d'esi cumal. Otres vegaes, anque seyan les menos, vamos a conocer pasos y accidentes xeográficos de la nuesa Asturies y de les más ablucantes son les foces. 

Una foz ye un pasu pente peñes nes que davezu pasa una riega y na fastera del ríu Infiernu, tenémosles de tolos collores, poro, preparar una rutina pa conocer les siendes qu'intenten travesales yera dalgo que tenía na tiesta dende cuantayá.

Salimos dende La Pesanca (415 m)

Espinaréu (Piloña) - Xerra d'El Sellón

13 de Febreru de 2016

Track: Espinaréu (Piloña) - Xerra d'El Sellón

Aportó l'iviernu a Asturies, tarde, pero aportó a la fín y con ello inestabilidá meteorolóxica y dificultaes pa restolar que fastera d'Asturies ye la meyor p'aventurase. Si a esto, amestámos-y que la escoyeta de rutes de la mayor parte del grupu, fuese a grandes altores esti añu, pues tengo que sacame del bolsiellu más d'una ruta alternativa al calendariu d'aniciu.

Pa esti finde en cuestión, teníemos una ventana de bon tiempu hasta'l mediudía o un pelín, asína que descartábemos cualesquier ruta del occidente o sur, por entrar el frente per ellí y sobretou por fuertes ventoleres. Con estes premises, apetecíame tornar pal conceyu de Piloña, que pesie a nun tener grandes altores, sí que tien un tarrén montuno perinteresante con grandes accidentes xeográficos sobretou de calter hidrolóxicu.

Nesi sen, averámonos hasta Espinaréu, non pa metenos nes fondes foces del ríu Infiernu, pero sí col envís de conocer un pelín meyor tol valle dende una posición privilexiada como ye la xerra d'El Sellón, xerra que da nome a un camín real que percorre de norte a sur dende Tarna a L'Infiestu siendo una de les grandes víes de comunicación d'antaño.

Preparaos pa caleyar n'Espinaréu (274 m)

Altu La Llama (Piloña) - La Múa - Miruenu

30 d'Abril de 2014

Track: Altu La Llama (Piloña) - La Múa - Miruenu

De les semeyes, d'entamu y final, col día estupendu, a les más murnies, pasaron ya más de 6 añinos. Dízse pronto, pero quiciás l'ascensión al Miruenu, fué de les primeres que ficimos nel añu 2008 y en xeneral na nuesa "carrera" nos montes asturianos.

Esta vegada, símplemente acompañé al mió pa, que diba a la gueta de cogordes y la fastera d'Espineres del Sueve, ye onde más-y presta andar. Poro, garramos el coche en direición Colunga pela Autovía'l Cantábricu, pa garrar nel pueblu la As-258 qu'empobínase hacia Lliberdón, pasando pelos pueblos de La Riera, La Ferrería, Agüera Baxu y Agüera Riba.

Nel Altu La Llama (418 m) con vistes al colláu Oviñes