Valle (Piloña) - Tombu - La Olla - La Rasa - Campiellos - Foz de Valle

16 de Febreru de 2026 

Track: Valle (Piloña) - Tombu - La Olla - La Rasa - Campiellos - Foz de Valle

Continúa la motivación montañera nel grupu Xuan de la Borrina, buscándonos, un día más, la vida p'alcontrar dalguna ruta motivante y dalgo novedosa sobretou pa min, que tengo enforma patiáu dellos conceyos asturianos, sicasí, tenía ganes de tornar a Piloña, asina que tocó restolar que visitar, alcordándome que la parte alta del rigu Valle, entá nun lo conocía, poro preparámonos una circular pelos montes de la redolada.

Partimos del pueblu de Valle (280 m)

Como siempre almorzaremos na capital del conceyu en L'Infiestu y continuaremos hasta'l pueblu de Valle, onde lo meyor ye aparcar na parte baxa na Ilesia, anque nós ficímoslo nuna pequeña plazuela na parta alte. Prepararémonos nun día pelin murniu pero con temperatura agradable pa caleyar y pocu más sero de les 10 de la mañana taremos dando los primeros pasos pel pueblu.

Ascendemos per Valdelescabres hacia'l Tombu

Garramos camín, dexando atrás les últimes cases de Valle, p'ascender pente los praos de Valdelescabres, pelos qu'avanzamos ensin nengún problema, hasta la faldera del Tombu na que garraremos delles envueltes más pindies, que dirán llevándonos hasta la rasa del Tombu, desdexando la proa occidental, El Cayu y diremos al so puntu más altu de 667 m, encumando per segunda vegada el Tombu, que ya conocíemos de la ruta pel Chorrón.

Perguapes vistes nel nuesu pasu pel Tombu (665 m)

Esfrutaremos un ratín de les vistes, col cordal de Pesquerín que ficiera con una ñevadísima y el valle Tebrandi embaxo nuesa y un pelín per detrás, el valle Color col picu Priede. La verdá ye qu'estos cordales piloñeses tienen unes vistes increyibles, pudiendo esfrutrar de la fastera sur del Sueve y cordales más costeros, como'l de la Corona'l Castiellu o col Cuana col Mofrechu.

Baxamos a la collada Doca siempre en direición sur

Descenderemos a la collada Doca tornando pelos nuesos pasos hasta una pista y esfrutaremos d'un cómodu paséu per pista que va dir llevándonos pasando per dalguna llomba intermedia hasta la faldera del Picu La Olla, al que decidimos atacar pela so faza oriental, caleyando per un guapu camín con vistes al valle Tebrandi y al fondu entamaremos a ver Les Peñes Santes, asina como la collada Moandi y la pica Cetín.

Ascendemos al Picu La Olla (875 m) pela arista oriental

Aportamos a l'arista este y tocará buscase un pocu la vida, siguiendo dalguna traza de senderu na parte baxa, pa dempués ya garrar tarrén más llimpiu, pasando per mayaínos, pa continuar ensin dificultá hasta los 874 m del Picu La Olla, malnomáu Cantu Cubil nel IGN. La cume con dalgo de broza no más alto, tenémosla ocupada per unos rapazos que paecen piloñeses, xintando'l pinchu, poro los nuesos perros nun pierden la ocasión pa facé-yos visita.

Descendemos de la Olla a la collada l'Abedul pa continuar hacia'l Monterredondo (870 m)

Escapamos aína del cumal de la Olla, pa dexá-yos a los rapazos tranquilos y entamamos descensu hacia la Collada L'Abedul, pasando per delles cabañes, les de les Llanes d'Abaxo, bien guapes, enantes de garrar tola panda que tien de llevanos hacia'l Monterredondo, qu'aparte de facer honor al so nome, va danos unes vistes increyibles de tol Cornión y del parque de Ponga y Redes, destacando la faza norte del Pierzu y La Llambria.

Baxamos del Monterredondo a la collada Llarañes onde ascendemos a la Rasa La Escoba

Baxaremos del Monterredondo, con ganes ya de parar a picar dalgo, poro nel colláu La Perra, paramos a xintar unos minutinos y continuaremos dempués pel colláu Monterreondo enantes de siguir hasta la collada Llarañes, onde entamaremos un entepechu d'asensión de más de 150 m de desnivel, que dempués de la xinta faíasenos un pocu de bola, hasta arribar a la Rasa La Escoba de 999 m, con vistes ya del cercanu Niañu y del ñeváu picu Les Vízcares, asina como de la parte alta del valle Color pel que ficiéremos una ruta perinteresante col picu Les Cabañes como cota másima.

Facemos travesía dende la Rasa (999 m) del monte hasta a la Escoba (984 m)

El día sigue murniu y tira un airín pelín gafu, que fae que nun tengamos munches ganes de siguir nel cumal principal de la Rasa La Escoba, asina que continuamos un cenciellu cresteriu hasta'l cumal occidental de 984 m, que pudiera ser La Escoba, al tar tremáu d'escobes el cumal, siendo un pelín molestu de facer, poro, cotamos cume y siguimos descendiendo hacia'l colláu Pendedor, nuna baxada llarga, pindia y pelín pestosa, ya que'l tarrén ye un amiesetu de yerba, barru y turba, que fai abegosu y resbariosu'l baxar.

 

Descendemos del Pendedor pel valle Campiellos con un primer tramu pelín xabaz

Aportaremos al colláu Pendedor, onde atopamos delles cabañes en bon estáu y camiento qu'equivocámonos un pelín, ya que por nun metenos nuna llamarga pa percorrer tol colláu, vamos tirar hacia'l valle Campiellos de primeres, metiéndonos a lo xole p'abaxo, atopando una viesca perguapa pero perpindia, con muries calices a la mandrecha. 

 

Esfrutamos de la parte baxa del valle Campiellos con caminos perguapos

D'esti xeitu, decidimos travesar la riega Campiellos, pa garrar la fastera contraria, onde abunden los praos con enormes anque desaniciaes cabañes, alcontrando un descensu más cenciello. Poro, encomiendo a travesar tol colláu y baxar pelos praos na faldera del picu Robléu, hasta arribar a la fastera media del valle, onde ya alcontramos perguapos senderos que nos fadrán baxar pela viesca, pente'l mugor de les peñes y la fueya posada nel camín, hasta'l mayáu de Campiellos y el finalmente el rigu Valle.

 

Ablucante caleyar peles foces del rigu Valle... una maraviya de la ñatura

Aportaremos finalmente al rigu Valle, travesándolo y xubiendo un pelín hacia los praos y cabañes que baxen dende'l colláu L'Abedul, tomando ya un senderu claro, que va facer qu'esfrutemos de cada pasu que damos, ya seya asomándonos a sacar una semeya a un tabayón o cruciando'l rigu Valle pa continuar pela manzorga'l rigu durante munchu tiempu, siempre per senderu evidente y perguapu.

 

Distintos momentos d'un prestosu caminar peles foces del Valle

Ensin pérdida nel camín, tan sólo tenemos que dexanos baxar a bon ritmu, pero nun podemos más que parar p'arrimar el focicu sol rigu Valle, alcontrándonos con dellos tabayones, de muncha guapura, sobremanera col caideru pegáu a una cabaña, onde'l rigu embarranca, garrando gran altor el camín so'l calce'l rigu, teniendo que tornar al camín ya qu'un resbarión pudiera ser fatal si siguimos a la gueta del tabayón perfeutu.

Tramu increyible encañonáu de les foces del rigu Valle

Magar de bona parte col ampliu camín, alloñáu del calce vamos descender de nuevu hasta ponenos de nuevo al so altor y entraremos quiciás na parte más guapa de les foces, con un pasu encoñáu llueu de cruciar una pequeña ponte, paeciéndome un llugar máxicu, de gran valir montañeru y ñatural, quiciábes más guapu qu'otres foces más nomaes... una auténtica ayalga a conocer.

Salimos de les foces del rigu Valle pa continuar ya per pista na parte baxa del Valle

Pasáu esti puntu tan guapu, ya saldremos al pocu a pista que vien dende la Tayá de Cardes y caleyaremos cómodamente hasta la ponte Los Ciegos, onde xúnese la pista que baxa de la collada Doca, pela que baxamos de la ruta al Chorrón, continuando pista hacia la ponte Les Melendreres que travesamos pa facer una pequeña xubida pa continuar ya de vuelta hacia'l pueblu del Valle.

 

Aportamos de nuevu hacia'l pueblín de Valle

En resume, ruta circular de llibru na que namás faltó tener vistes más llimpies a tola redolada que nun puede ser de mayor valir (Picos, Ponga, Casu y Piloña), con un total de 15.7 km de percorríu, con un desnivel acumuláu de +/- 1050 m y una duración de 6 hores y 40 minutos, poro nun pueu más qu'encomendar conocer esti valle y los montes que lu arrodien.

 

Camudando'l Camín una vegada más per Piloña